अथोनपञ्चाशदधिकशततमो ऽध्यायः ॥
athonapañcāśadadhikaśatatamo 'dhyāyaḥ ||
लक्षकोटिहोमः
lakṣakoṭihomaḥ
ईश्वर उवाच
īśvara uvāca
होमाद्रणादौ विजयो राज्याप्तिर्विघ्ननाशनं
homādraṇādau vijayo rājyāptirvighnanāśanaṃ
कृच्छ्रेण शुद्धिमुत्पाद्य प्राणायामशतेन च
kṛcchreṇa śuddhimutpādya prāṇāyāmaśatena ca
अन्तर्जले च गायत्रीं जप्त्वा षोडशधाचरेत्
antarjale ca gāyatrīṃ japtvā ṣoḍaśadhācaret
प्राणायामांश् च पूर्वाह्णे जुहुयात् पावके हविः
prāṇāyāmāṃś ca pūrvāhṇe juhuyāt pāvake haviḥ
भैक्ष्ययावकभक्षी च फलमूलाशनो ऽपि वा
bhaikṣyayāvakabhakṣī ca phalamūlāśano 'pi vā
क्षीरशक्तुघृताहार एकमाहारमाश्रयेत्
kṣīraśaktughṛtāhāra ekamāhāramāśrayet
यावत्समाप्तिर्भवति लक्षहोमस्य पार्वति
yāvatsamāptirbhavati lakṣahomasya pārvati
दक्षिणा लक्षहोमान्ते गावो वस्त्राणि काञ्चनं
dakṣiṇā lakṣahomānte gāvo vastrāṇi kāñcanaṃ
सर्वोत्पातसमुत्पत्तौ पञ्चभिर्दशभिर्द्विजैः
sarvotpātasamutpattau pañcabhirdaśabhirdvijaiḥ
नास्ति लोके स उत्पातो यो ह्य् अनेन न शाम्यति
nāsti loke sa utpāto yo hy anena na śāmyati
मङ्गल्यं परमं नास्ति यदस्मादतिरिच्यते
maṅgalyaṃ paramaṃ nāsti yadasmādatiricyate
कोटिहोमन्तु यो राजा कारयेत् पूर्ववद्द्विजैः
koṭihomantu yo rājā kārayet pūrvavaddvijaiḥ
न तस्य शत्रवः सङ्ख्ये जातु तिष्ठन्ति कर्हिचित्
na tasya śatravaḥ saṅkhye jātu tiṣṭhanti karhicit
न तस्य मारको देशे व्याधिर्वा जायते क्वचित्
na tasya mārako deśe vyādhirvā jāyate kvacit
अतिवृष्टिरनावृष्टिर्मूषकाः शलभाः शुकाः
ativṛṣṭiranāvṛṣṭirmūṣakāḥ śalabhāḥ śukāḥ
राक्षसाद्याश् च शाम्यन्ति सर्वे च रिपवो रणे
rākṣasādyāś ca śāmyanti sarve ca ripavo raṇe
कोटिहोमे तु वरयेद्ब्राह्मणान्विंशतिं तथा
koṭihome tu varayedbrāhmaṇānviṃśatiṃ tathā
शतञ्चाथ सहस्रं वा यथेष्टाम्भूतिमाप्नुयात्
śatañcātha sahasraṃ vā yatheṣṭāmbhūtimāpnuyāt
कोटिहोमन्तु यः कुर्याद् द्विजो भूपो ऽथवा च विट्
koṭihomantu yaḥ kuryād dvijo bhūpo 'thavā ca viṭ
यदिच्छेत् प्राप्नुयात्तत्तत् सशरीरो दिवं व्रजेत्
yadicchet prāpnuyāttattat saśarīro divaṃ vrajet
गायत्र्या ग्रहमन्त्रैर् वा कुष्माण्डीजातवेदसैः
gāyatryā grahamantrair vā kuṣmāṇḍījātavedasaiḥ
ऐन्द्रवारुणवायव्ययाम्याग्नेयैश् च वैष्णवैः
aindravāruṇavāyavyayāmyāgneyaiś ca vaiṣṇavaiḥ
शाक्तेयैश् च शाम्भवैः सौरैर् मन्त्रैर् होमार्चनात्ततः
śākteyaiś ca śāmbhavaiḥ saurair mantrair homārcanāttataḥ
अयुतेनाल्पसिद्धिः स्याल्लक्षहोमो ऽखिलार्तिनुत्
ayutenālpasiddhiḥ syāllakṣahomo 'khilārtinut
सर्वपीडादिनशाय कोटिहोमो ऽखिलार्थदः
sarvapīḍādinaśāya koṭihomo 'khilārthadaḥ
यवव्रीहितिलक्षीरघृतकुशप्रमातिकाः
yavavrīhitilakṣīraghṛtakuśapramātikāḥ
पङ्कजोशीरविल्वाम्रदला होमे प्रकीर्तिताः
paṅkajośīravilvāmradalā home prakīrtitāḥ
अष्टहस्तप्रमाणेन कोटिहोमेषु खातकं
aṣṭahastapramāṇena koṭihomeṣu khātakaṃ
तस्मादर्धप्रमाणेन लक्षहोमे विधीयते
tasmādardhapramāṇena lakṣahome vidhīyate
होमो ऽयुतेन लक्षेण कोद्याज्याद्यैः प्रकीर्तितः
homo 'yutena lakṣeṇa kodyājyādyaiḥ prakīrtitaḥ
इत्य् आग्नेये महापुराणे युद्धजयार्णवे अयुतलक्षकोटिहोमो नामोनपञ्चाशदधिकशततमो ऽध्यायः ॥
ity āgneye mahāpurāṇe yuddhajayārṇave ayutalakṣakoṭihomo nāmonapañcāśadadhikaśatatamo 'dhyāyaḥ ||