Chapter 16

वक्ष्ये बुद्धावतारञ्च पठतः शृण्वतोर्थदम्

vakṣye buddhāvatārañca paṭhataḥ śṛṇvatorthadam

पुरा देवासुरे युद्धे दैत्यैर् देवाः पराजिताः

purā devāsure yuddhe daityair devāḥ parājitāḥ

रक्ष रक्षेति शरणं वदन्तो जग्मुरीश्वरम्

rakṣa rakṣeti śaraṇaṃ vadanto jagmurīśvaram

मायमोहस्वरुपोसौ शुद्धोदनसुतो ऽभवत्

māyamohasvaruposau śuddhodanasuto 'bhavat

मोहयामास दैत्यांस्तांस्त्याजिता वेदधर्मकम्

mohayāmāsa daityāṃstāṃstyājitā vedadharmakam

ते च बौद्धा बभूवुर्हि तेभ्योन्ये वेदवर्जिताः

te ca bauddhā babhūvurhi tebhyonye vedavarjitāḥ

आर्हतः सो ऽभवत् पश्चादार्हतानकरोत् परान्

ārhataḥ so 'bhavat paścādārhatānakarot parān

एवं पाषण्डिनो जाता वेदधर्मादिवर्जिताः

evaṃ pāṣaṇḍino jātā vedadharmādivarjitāḥ

नरकार्हं कर्म चक्रुर्ग्रहीष्यन्त्यधमादपि

narakārhaṃ karma cakrurgrahīṣyantyadhamādapi

सर्वे कलियुगान्ते तु भविष्यन्ति च सङ्कराः

sarve kaliyugānte tu bhaviṣyanti ca saṅkarāḥ

दस्यवः शीलहीनाश् च वेदो वाजसनेयकः

dasyavaḥ śīlahīnāś ca vedo vājasaneyakaḥ

दश पञ्च च शाखा वै प्रमाणेन भविष्यति

daśa pañca ca śākhā vai pramāṇena bhaviṣyati

धर्मकञ्चुकसंवीता अधर्मरुचयस् तथा

dharmakañcukasaṃvītā adharmarucayas tathā

मानुषान् भक्षयिष्यन्ति म्लेच्छाः पार्थिवरूपिणः

mānuṣān bhakṣayiṣyanti mlecchāḥ pārthivarūpiṇaḥ

कल्की विष्णुयशःपुत्रो याज्ञवल्क्यपुरोहितः

kalkī viṣṇuyaśaḥputro yājñavalkyapurohitaḥ

उत्सादयिष्यति म्लेच्छान् गृहीतास्त्रः कृतायुधः

utsādayiṣyati mlecchān gṛhītāstraḥ kṛtāyudhaḥ

स्थापयिष्यति मर्यादां चातुर्वर्ण्ये यथोचिताम्

sthāpayiṣyati maryādāṃ cāturvarṇye yathocitām

आश्रमेषु च सर्वेषु प्रजाः सद्धर्मवर्त्मनि

āśrameṣu ca sarveṣu prajāḥ saddharmavartmani

कल्किरूपं परित्यज्य हरिः स्वर्गं गमिष्यति

kalkirūpaṃ parityajya hariḥ svargaṃ gamiṣyati

ततः कृतयुगान्नाम पुरावत् सम्भविष्यति

tataḥ kṛtayugānnāma purāvat sambhaviṣyati

वर्नाश्रमाश् च धर्मेषु स्वेषु स्थास्यन्ति सत्तम

varnāśramāś ca dharmeṣu sveṣu sthāsyanti sattama

एवं सर्वेषु कल्पेषु सर्वमन्वन्तरेषु च

evaṃ sarveṣu kalpeṣu sarvamanvantareṣu ca

अवतारा असङ्ख्याता अतीतानागतादयः

avatārā asaṅkhyātā atītānāgatādayaḥ

विष्णोर्दशावताराख्यान् यः पठेत् शृणुयान्नरः

viṣṇordaśāvatārākhyān yaḥ paṭhet śṛṇuyānnaraḥ

सोवाप्तकामो विमलः सकुलः स्वर्गमाप्नुयात्

sovāptakāmo vimalaḥ sakulaḥ svargamāpnuyāt

धर्माधर्मव्यवस्थानमेवं वै कुरुते हरिः

dharmādharmavyavasthānamevaṃ vai kurute hariḥ

अवतीर्णञ्च स गतः सर्गादेः कारणं हरिः

avatīrṇañca sa gataḥ sargādeḥ kāraṇaṃ hariḥ