Chapter 183

वक्ष्ये व्रतानि चाष्टम्यां रोहिण्यां प्रथमं व्रतं

vakṣye vratāni cāṣṭamyāṃ rohiṇyāṃ prathamaṃ vrataṃ

मासि भाद्रपदे ऽष्टभ्यां रोहिण्यामर्धरात्रके

māsi bhādrapade 'ṣṭabhyāṃ rohiṇyāmardharātrake

कृष्णो जातो यतस्तस्यां जयन्ती स्यात्ततो ऽष्टमी

kṛṣṇo jāto yatastasyāṃ jayantī syāttato 'ṣṭamī

सप्तजन्मकृतात् पापात् मुच्यते चोपवासतः

saptajanmakṛtāt pāpāt mucyate copavāsataḥ

कृष्णपक्षे भाद्रपदे अष्टम्यां रोहिणीयुते

kṛṣṇapakṣe bhādrapade aṣṭamyāṃ rohiṇīyute

उपाषितोर्चयेत् कृष्णं भुक्तिमुक्तिप्रदायकं

upāṣitorcayet kṛṣṇaṃ bhuktimuktipradāyakaṃ

आवाहयाम्यहं कृष्णं बलभद्रञ्च देवकीं

āvāhayāmyahaṃ kṛṣṇaṃ balabhadrañca devakīṃ

वसुदेवं यशोदाङ्गाः पूजयामि नमो ऽस्तु ते

vasudevaṃ yaśodāṅgāḥ pūjayāmi namo 'stu te

योगाय योगपतये योगेशाय नमो नमः

yogāya yogapataye yogeśāya namo namaḥ

योगादिसम्भावयैव गोविन्दाय नमो नमः

yogādisambhāvayaiva govindāya namo namaḥ

स्नानं कृष्णाय दद्यात्तु अर्घ्यं चानेन दापयेत्

snānaṃ kṛṣṇāya dadyāttu arghyaṃ cānena dāpayet

यज्ञाय यज्ञेश्वराय यज्ञानां पतये नमः

yajñāya yajñeśvarāya yajñānāṃ pataye namaḥ

यज्ञादिसंभवायैव गोविन्दाय नमो नमः

yajñādisaṃbhavāyaiva govindāya namo namaḥ

गृहाण देव पुष्पाणि सुगन्धीनि प्रियाणि ते

gṛhāṇa deva puṣpāṇi sugandhīni priyāṇi te

सर्वकामप्रदो देव भव मे देववन्दित

sarvakāmaprado deva bhava me devavandita

धूपधूपित धूपं त्वं धूपितैस्त्वं गृहाण मे

dhūpadhūpita dhūpaṃ tvaṃ dhūpitaistvaṃ gṛhāṇa me

सुगन्ध धूपगन्धाढ्यं कुरु मां सर्वदा हरे

sugandha dhūpagandhāḍhyaṃ kuru māṃ sarvadā hare

दीपदीप्त महादीपं दीपदीप्तद सर्वदा

dīpadīpta mahādīpaṃ dīpadīptada sarvadā

मया दत्तं गृहाण त्वं कुरु चोर्ध्वगतिं च मां

mayā dattaṃ gṛhāṇa tvaṃ kuru cordhvagatiṃ ca māṃ

विश्वाय विश्वपतये विश्वेशाय नमो नमः

viśvāya viśvapataye viśveśāya namo namaḥ

विश्वादिसम्भवायैव गोविन्दाय निवेदितं

viśvādisambhavāyaiva govindāya niveditaṃ

धर्माय धर्मपतये दर्मेशाय नमो नमः

dharmāya dharmapataye darmeśāya namo namaḥ

धर्मादिसम्भवायैव गोविन्दशयनं कुरु

dharmādisambhavāyaiva govindaśayanaṃ kuru

सर्वाय सर्वपतये सर्वेशाय नमओ नमः

sarvāya sarvapataye sarveśāya namao namaḥ

सर्वादिसम्भवायैव गोविन्दाय च पावनं

sarvādisambhavāyaiva govindāya ca pāvanaṃ

क्षीरोदार्णवसम्भूत अत्रिनेत्रसमुद्भव

kṣīrodārṇavasambhūta atrinetrasamudbhava

गृहाणार्घ्यं शशाङ्केदं रोहिण्या सहितो मम

gṛhāṇārghyaṃ śaśāṅkedaṃ rohiṇyā sahito mama

स्थण्डिले स्थापयेद्देवं सचन्द्रां रोहिणीं यजेत्

sthaṇḍile sthāpayeddevaṃ sacandrāṃ rohiṇīṃ yajet

देवकीं वसुदेवं च यशोदां नन्दकं बलं

devakīṃ vasudevaṃ ca yaśodāṃ nandakaṃ balaṃ

अर्धरात्रे परोधाराः पातयेद् गुडसर्पिषा

ardharātre parodhārāḥ pātayed guḍasarpiṣā

वस्त्रहेमादिकं दद्याद्ब्राह्मणान् भोजयेद्व्रती

vastrahemādikaṃ dadyādbrāhmaṇān bhojayedvratī

जन्माष्टमीव्रतकरः पुत्रवान्विष्णुलोकभाक्

janmāṣṭamīvratakaraḥ putravānviṣṇulokabhāk

वर्षे वर्षे तु यः कुर्यात् पुत्रार्थी वेत्ति नो भयं

varṣe varṣe tu yaḥ kuryāt putrārthī vetti no bhayaṃ

पुत्रान् देहि धनं देहि आयुरारोग्यसन्ततिं

putrān dehi dhanaṃ dehi āyurārogyasantatiṃ

धर्मं कामं च सौभाग्यं स्वर्गं मोक्षं च देहि मे

dharmaṃ kāmaṃ ca saubhāgyaṃ svargaṃ mokṣaṃ ca dehi me