Chapter 190

अखण्डद्वादशीं वक्ष्ये व्रतसम्पूर्णताकृतं

akhaṇḍadvādaśīṃ vakṣye vratasampūrṇatākṛtaṃ

मार्गशीर्षे सिते विष्णुं द्वादश्यां समुपोषितः

mārgaśīrṣe site viṣṇuṃ dvādaśyāṃ samupoṣitaḥ

पञ्चगव्यजले स्नातो यजेत्तत्प्राशनो व्रती

pañcagavyajale snāto yajettatprāśano vratī

यवव्रीहियुतम्पात्रन्द्वादश्यां हि द्विजे ऽर्पयेत्

yavavrīhiyutampātrandvādaśyāṃ hi dvije 'rpayet

सप्तजन्मनि यत् किञ्चिन्मया खण्डं व्रतं कृतं

saptajanmani yat kiñcinmayā khaṇḍaṃ vrataṃ kṛtaṃ

भगवंस्त्वत्प्रसादेन तदखण्डमिहास्तु मे

bhagavaṃstvatprasādena tadakhaṇḍamihāstu me

यथाखण्डं जगत् सर्वं त्वमेव पुरुषोत्तम

yathākhaṇḍaṃ jagat sarvaṃ tvameva puruṣottama

तथाखिलान्यखण्डानि व्रतानि मम सन्तु वै

tathākhilānyakhaṇḍāni vratāni mama santu vai

एवमेवानुमासञ्च चातुर्मास्यो विधिः स्मृतः

evamevānumāsañca cāturmāsyo vidhiḥ smṛtaḥ

अन्यच्चैत्रादिमासेषु शक्तुपात्राणि चार्पयेत्

anyaccaitrādimāseṣu śaktupātrāṇi cārpayet

श्रावणादिषु चारभ्य कार्त्तिकान्तेषु पारणं

śrāvaṇādiṣu cārabhya kārttikānteṣu pāraṇaṃ

सप्तजन्मसु वैकल्यं व्रतानां सफलं कृते

saptajanmasu vaikalyaṃ vratānāṃ saphalaṃ kṛte

आयुरारोग्यसौभाग्यराज्यभोगादिमाप्नुयात्

āyurārogyasaubhāgyarājyabhogādimāpnuyāt