अथ त्रयोदशाधिकद्विशततमो ऽध्यायः
atha trayodaśādhikadviśatatamo 'dhyāyaḥ
पृथ्वीदानानि
pṛthvīdānāni
अग्निर् उवाच
agnir uvāca
पृथ्वीदानं प्रवक्ष्यामि पृथिवी त्रिविधा मता
pṛthvīdānaṃ pravakṣyāmi pṛthivī trividhā matā
शतकोटिर्योजनानां सप्तद्वीपा ससागरा
śatakoṭiryojanānāṃ saptadvīpā sasāgarā
जम्बुद्वीपावधिः सा च उत्तमा मेदिनीरिता
jambudvīpāvadhiḥ sā ca uttamā medinīritā
उत्तमां पञ्चभिर्भारैः काञ्चनैश् च प्रकल्पयेत्
uttamāṃ pañcabhirbhāraiḥ kāñcanaiś ca prakalpayet
तदर्धान्तरजं कूर्मं तथा पद्मं समादिशेत्
tadardhāntarajaṃ kūrmaṃ tathā padmaṃ samādiśet
उत्तमा कथिता पृथ्वी द्व्यंशेनैव तु मध्यमा
uttamā kathitā pṛthvī dvyaṃśenaiva tu madhyamā
कन्यसा च त्रिभागेन त्रिहान्या कूर्मपङ्कजे
kanyasā ca tribhāgena trihānyā kūrmapaṅkaje
पलानान्तु सहस्रेण कल्पयेत् कल्पपादपं
palānāntu sahasreṇa kalpayet kalpapādapaṃ
मूलदण्डं सपत्रञ्च फलपुष्पसमन्वितं
mūladaṇḍaṃ sapatrañca phalapuṣpasamanvitaṃ
पञ्चस्कन्धन्तु सङ्कल्प्य पञ्चानान्दापयेत् सुधीः
pañcaskandhantu saṅkalpya pañcānāndāpayet sudhīḥ
एतद्दाता ब्रह्मलोके पितृभिर्मोदते चिरं
etaddātā brahmaloke pitṛbhirmodate ciraṃ
विष्ण्वग्रे कामधेनुन्तु पलानां पञ्चभिः शतैः
viṣṇvagre kāmadhenuntu palānāṃ pañcabhiḥ śataiḥ
ब्रह्मविष्णुमहेशाद्या देवा धेनौ व्यवस्थिताः
brahmaviṣṇumaheśādyā devā dhenau vyavasthitāḥ
धेनुदानं सर्वदानं सर्वद ब्रह्मलोकदं
dhenudānaṃ sarvadānaṃ sarvada brahmalokadaṃ
विष्ण्वग्रे कपिलां दत्त्वा तारयेत् सकलं कुलं
viṣṇvagre kapilāṃ dattvā tārayet sakalaṃ kulaṃ
अलङ्कृत्य स्त्रियं दद्यादश्वमेधफलं लभेत्
alaṅkṛtya striyaṃ dadyādaśvamedhaphalaṃ labhet
भूमिं दत्त्वा सर्वभाक् स्यात् सर्वशस्यप्ररोहिणीम्
bhūmiṃ dattvā sarvabhāk syāt sarvaśasyaprarohiṇīm
ग्रामं वाथ पुरं वापि खेटकञ्च दद्त् सुखी
grāmaṃ vātha puraṃ vāpi kheṭakañca dadt sukhī
कार्त्तिक्यादौ वृषोत्सर्गं कुर्वंस्तारयते कुलं
kārttikyādau vṛṣotsargaṃ kurvaṃstārayate kulaṃ
इत्य् आग्नेये महापुराणे पृथ्वीदानानि नाम त्रयोदशाधिकद्विशततमो ऽध्यायः ॥
ity āgneye mahāpurāṇe pṛthvīdānāni nāma trayodaśādhikadviśatatamo 'dhyāyaḥ ||