अथ सप्तदशाधिकद्विशततमो ऽध्यायः
atha saptadaśādhikadviśatatamo 'dhyāyaḥ
गायत्रीनिर्वाणं
gāyatrīnirvāṇaṃ
अग्निर् उवाच
agnir uvāca
लिङ्गमूर्तिं शिवं स्तुत्वा गायत्र्या योगमाप्तवान्
liṅgamūrtiṃ śivaṃ stutvā gāyatryā yogamāptavān
निर्वाणं परमं ब्रह्म वसिष्ठो ऽन्यश् च शङ्करात्
nirvāṇaṃ paramaṃ brahma vasiṣṭho 'nyaś ca śaṅkarāt
नमः कनकलिङ्गाय वेदलिङ्गाय वै नमः
namaḥ kanakaliṅgāya vedaliṅgāya vai namaḥ
नमः परमलिङ्गाय व्योमलिङ्गाय वै नमः
namaḥ paramaliṅgāya vyomaliṅgāya vai namaḥ
नमः सहस्रलिङ्गाय वह्निलिङ्गाय वै नमः
namaḥ sahasraliṅgāya vahniliṅgāya vai namaḥ
नमः पुराणलिङ्गाय श्रुतिलिङ्गाय वै नमः
namaḥ purāṇaliṅgāya śrutiliṅgāya vai namaḥ
नमः पाताललिङ्गाय ब्रह्मलिङ्गाय वै नमः
namaḥ pātālaliṅgāya brahmaliṅgāya vai namaḥ
नमो रहस्यलिङ्गाय सप्तद्वीपोर्धलिङ्गिने
namo rahasyaliṅgāya saptadvīpordhaliṅgine
नमः सर्वात्मलिङ्गाय सर्वलोकाङ्गलिङ्गिने
namaḥ sarvātmaliṅgāya sarvalokāṅgaliṅgine
नमस्त्वव्यक्तलिङ्गाय बुद्धिलिङ्गाय वै नमः
namastvavyaktaliṅgāya buddhiliṅgāya vai namaḥ
नमो ऽहङ्कारकिङ्गाय भूतलिङ्गाय वै नमः
namo 'haṅkārakiṅgāya bhūtaliṅgāya vai namaḥ
नम इन्द्रियलिङ्गाय नमस्तन्मात्रलिङ्गिने
nama indriyaliṅgāya namastanmātraliṅgine
नमः पुरुषलिङ्गाय भावलिङ्गाय वै नमः
namaḥ puruṣaliṅgāya bhāvaliṅgāya vai namaḥ
नमो रजोर्धलिङ्गाय सत्त्वलिङ्गाय वै नमः
namo rajordhaliṅgāya sattvaliṅgāya vai namaḥ
नम्स्तेभवलिङ्गाय नमस्त्रैगुण्यलिङ्गिने
namstebhavaliṅgāya namastraiguṇyaliṅgine
नमो ऽनागतलिङ्गाय तेजोलिङ्गाय वै नमः
namo 'nāgataliṅgāya tejoliṅgāya vai namaḥ
नमो वायूर्ध्वलिङ्गाय श्रुतिलिङ्गाय वै नमः
namo vāyūrdhvaliṅgāya śrutiliṅgāya vai namaḥ
नमस्ते ऽथर्वलिङ्गाय सामलिङ्गाय वै नमः
namaste 'tharvaliṅgāya sāmaliṅgāya vai namaḥ
नमो यज्ञाङ्गलिङ्गाय यज्ञलिङ्गाय वै नमः
namo yajñāṅgaliṅgāya yajñaliṅgāya vai namaḥ
नमस्ते तत्त्वलिङ्गाय देवानुगतलिङ्गिने
namaste tattvaliṅgāya devānugataliṅgine
दिश नः परमं योगमपत्यं मत्समन्तथा
diśa naḥ paramaṃ yogamapatyaṃ matsamantathā
ब्रह्म चैवाक्षयं देव शमञ्चैव परं विभो
brahma caivākṣayaṃ deva śamañcaiva paraṃ vibho
अक्षयन्त्वञ्च वंशस्य धर्मे च मतिमक्षयां
akṣayantvañca vaṃśasya dharme ca matimakṣayāṃ
अग्निर् उवाच
agnir uvāca
वसिष्ठेन स्तुतः शम्भुस्तुष्टः श्रीपर्वते पुरा
vasiṣṭhena stutaḥ śambhustuṣṭaḥ śrīparvate purā
वसिष्ठाय वरं दत्त्वा तत्रैवान्तरधीयत ॥13
vasiṣṭhāya varaṃ dattvā tatraivāntaradhīyata //13
इत्य् आग्नेये महापुराणे गायत्रीनिर्वाणं नाम सप्तदशाधिकद्विशततमो ऽध्यायः ॥
ity āgneye mahāpurāṇe gāyatrīnirvāṇaṃ nāma saptadaśādhikadviśatatamo 'dhyāyaḥ ||