Chapter 22

वक्ष्ये स्नानं क्रियाद्यर्थं नृसिंहेन तु मृत्तिकां

vakṣye snānaṃ kriyādyarthaṃ nṛsiṃhena tu mṛttikāṃ

गृहीत्वा तां द्विधा कृत्वा मनःस्नानमथैकया

gṛhītvā tāṃ dvidhā kṛtvā manaḥsnānamathaikayā

निमज्याचम्य विन्यस्य सिंहेन कृतरक्षकः

nimajyācamya vinyasya siṃhena kṛtarakṣakaḥ

विधिस्नानं ततः कुर्यात् प्राणायामपुरःसरं

vidhisnānaṃ tataḥ kuryāt prāṇāyāmapuraḥsaraṃ

हृदि ध्यायन् हरिज्ञानं मन्त्रेणाष्टाक्षरेण हि

hṛdi dhyāyan harijñānaṃ mantreṇāṣṭākṣareṇa hi

त्रिधा पाणितले मृत्स्नां दिग्बन्धं सिंहजप्ततः

tridhā pāṇitale mṛtsnāṃ digbandhaṃ siṃhajaptataḥ

वासदेवप्रजप्तेन तीर्थं सङ्कल्प्य चालभेत्

vāsadevaprajaptena tīrthaṃ saṅkalpya cālabhet

गात्रं वेदादिना मन्त्रैः सम्मार्ज्याराध्य मूर्तिना

gātraṃ vedādinā mantraiḥ sammārjyārādhya mūrtinā

कृत्वाघमर्षणं वस्त्रं परिधाय समाचरेत्

kṛtvāghamarṣaṇaṃ vastraṃ paridhāya samācaret

विन्यस्य मन्त्रैर् द्विर्मार्ज्य पाणिस्थं जलमेव च

vinyasya mantrair dvirmārjya pāṇisthaṃ jalameva ca

नारायणेन संयम्य वायुमाघ्राय चोत्सृजेत्

nārāyaṇena saṃyamya vāyumāghrāya cotsṛjet

जलं ध्यायन् हरिं पश्चाद्दत्वार्घ्यं द्वादशाक्षरं

jalaṃ dhyāyan hariṃ paścāddatvārghyaṃ dvādaśākṣaraṃ

जप्त्वान्याञ्छतशस्तस्य योगपीठादितः क्रमात्

japtvānyāñchataśastasya yogapīṭhāditaḥ kramāt

मन्त्रान् दिक्पालपर्यन्तानृषीन् पितृगणानपि

mantrān dikpālaparyantānṛṣīn pitṛgaṇānapi

मनुष्यान् सर्वभूतानि स्थावरान्तान्यथावसेत्

manuṣyān sarvabhūtāni sthāvarāntānyathāvaset

न्यस्य चाङ्गानि संहृत्य मन्त्रान्यागगृहं व्रजेत्

nyasya cāṅgāni saṃhṛtya mantrānyāgagṛhaṃ vrajet

एवमन्यासु पूजासु मूलाद्यैः स्नानमाचरेत्

evamanyāsu pūjāsu mūlādyaiḥ snānamācaret