Chapter 250

जितहस्तो जितमतिर्जितदृग्लक्ष्यसाधकः

jitahasto jitamatirjitadṛglakṣyasādhakaḥ

नियतां सिद्धिमासाद्य ततो वाहनमारुहेत्

niyatāṃ siddhimāsādya tato vāhanamāruhet

दशहस्तो भवेत् पाशो वृत्तः करमुखस् तथा

daśahasto bhavet pāśo vṛttaḥ karamukhas tathā

गुणकार्पासमुञ्जानां भङ्गस्नाय्वर्कवर्मिणाम्

guṇakārpāsamuñjānāṃ bhaṅgasnāyvarkavarmiṇām

अन्येषां सुदृढानाञ्च सुकृतं परिवेष्टितम्

anyeṣāṃ sudṛḍhānāñca sukṛtaṃ pariveṣṭitam

तथा त्रिंशत्समं पाशं बुधः कुर्यात् सुवर्तितम्

tathā triṃśatsamaṃ pāśaṃ budhaḥ kuryāt suvartitam

कर्तव्यं शिक्षकैस्तस्य स्थानं कक्षासु वै तदा

kartavyaṃ śikṣakaistasya sthānaṃ kakṣāsu vai tadā

वामहस्तेन सङ्गृह्य दक्षिणेनोद्धरेत्ततः

vāmahastena saṅgṛhya dakṣiṇenoddharettataḥ

कुण्डलस्याकृतिं कृत्वा भ्राम्यकं मस्तकोपरि

kuṇḍalasyākṛtiṃ kṛtvā bhrāmyakaṃ mastakopari

क्षिपेत् तूर्णमये तूर्णं पुरुषे चर्मवेष्टिते

kṣipet tūrṇamaye tūrṇaṃ puruṣe carmaveṣṭite

वल्गिते च प्लुते चैव तथा प्रव्रजितेषु च

valgite ca plute caiva tathā pravrajiteṣu ca

समयोगविधिं कृत्वा प्रयुञ्जीत सुशिक्षितम्

samayogavidhiṃ kṛtvā prayuñjīta suśikṣitam

विजित्वा तु यथान्यायं ततो बन्धं समाचरेत्

vijitvā tu yathānyāyaṃ tato bandhaṃ samācaret

कट्याम्बद्ध्वा ततः खड्गं वामपार्श्वावलम्बितम्

kaṭyāmbaddhvā tataḥ khaḍgaṃ vāmapārśvāvalambitam

दृढं विगृह्य वामेन निष्कर्षेद्दक्षिणेन तु

dṛḍhaṃ vigṛhya vāmena niṣkarṣeddakṣiṇena tu

षडङ्गुलपरीणाहं सप्तहस्तसमुच्छ्रितं

ṣaḍaṅgulaparīṇāhaṃ saptahastasamucchritaṃ

अयोमय्यः शलाकाश् च वर्माणि विविधानि च

ayomayyaḥ śalākāś ca varmāṇi vividhāni ca

अर्धहस्ते समे चैव तिर्यगूर्ध्वगतं तथा

ardhahaste same caiva tiryagūrdhvagataṃ tathā

योजयेद्विधिना येन तथात्वङ्गदतः शृणु

yojayedvidhinā yena tathātvaṅgadataḥ śṛṇu

तूणचर्मावनद्धाङ्गं स्थापयित्वा नवं दृढं

tūṇacarmāvanaddhāṅgaṃ sthāpayitvā navaṃ dṛḍhaṃ

करेणादाय लगूडं दक्षिणाङ्गुलकं नवं

kareṇādāya lagūḍaṃ dakṣiṇāṅgulakaṃ navaṃ

उद्यम्य घातयेद्यस्य नाशस्तेन शिशोर्दृढं

udyamya ghātayedyasya nāśastena śiśordṛḍhaṃ

उभाभ्यामथ हस्ताभ्यां कुर्यात्तस्य निपातनं

ubhābhyāmatha hastābhyāṃ kuryāttasya nipātanaṃ

अक्लेशेन ततः कुर्वन् बधे सिद्धिः प्रकीर्तिता

akleśena tataḥ kurvan badhe siddhiḥ prakīrtitā

वाहानां श्रमकरणं प्रचारार्थं पुरा तव

vāhānāṃ śramakaraṇaṃ pracārārthaṃ purā tava