Chapter 264

सर्वार्थसाधनं स्नानं वक्ष्ये शान्तिकरं शृणु

sarvārthasādhanaṃ snānaṃ vakṣye śāntikaraṃ śṛṇu

स्नापयेच्च सरित्तीरे ग्रहान् विष्णुं विचक्षणः

snāpayecca sarittīre grahān viṣṇuṃ vicakṣaṇaḥ

देवालये ज्वरार्त्यादौ विनायकग्रहार्दिते

devālaye jvarārtyādau vināyakagrahārdite

विद्यार्थिनो ह्रदे गेहे जयकामस्य तीर्थके

vidyārthino hrade gehe jayakāmasya tīrthake

पद्मिन्यां स्नापयेन्नारीं गर्भो यस्याः स्रवेत्तथा

padminyāṃ snāpayennārīṃ garbho yasyāḥ sravettathā

अशोकसन्निधौ स्नायाज्जातो यस्या विनश्यति

aśokasannidhau snāyājjāto yasyā vinaśyati

पुष्पार्थिनाञ्च पुष्पाढ्ये पुत्रार्थिनाञ्च सागरे

puṣpārthināñca puṣpāḍhye putrārthināñca sāgare

गृहसौभाग्यकामानां सर्वेषां विष्णुसन्निधौ

gṛhasaubhāgyakāmānāṃ sarveṣāṃ viṣṇusannidhau

वैष्णवे रेवतीपुष्ये सर्वेषां स्नानमुत्तमं

vaiṣṇave revatīpuṣye sarveṣāṃ snānamuttamaṃ

स्नानकामस्य सप्ताहम्पूर्वमुत्सादनं स्मृतं

snānakāmasya saptāhampūrvamutsādanaṃ smṛtaṃ

पुनर् नवां रोचनाञ्च शताङ्गं गुरुणी त्वचं

punar navāṃ rocanāñca śatāṅgaṃ guruṇī tvacaṃ

मधूकं रजनी द्वे च तगरन्नागकेशरम्

madhūkaṃ rajanī dve ca tagarannāgakeśaram

अम्बरीञ्चैव मञ्जिष्ठां मांसीयासकमर्दनैः

ambarīñcaiva mañjiṣṭhāṃ māṃsīyāsakamardanaiḥ

प्रियङ्गुसर्षपं कुष्ठम्बलाम्ब्राह्मीञ्च कुङ्कुमं

priyaṅgusarṣapaṃ kuṣṭhambalāmbrāhmīñca kuṅkumaṃ

पञ्चगव्यं शक्तुमिश्रं उद्वर्त्य स्नानमाचरेत्

pañcagavyaṃ śaktumiśraṃ udvartya snānamācaret

मण्डले कर्णिकायाञ्च विष्णुं ब्राह्मणमर्चयेत्

maṇḍale karṇikāyāñca viṣṇuṃ brāhmaṇamarcayet

दक्षे वामे हरं पूर्वं पत्रे पूर्वादिके क्रमात्

dakṣe vāme haraṃ pūrvaṃ patre pūrvādike kramāt

लिखेदिन्द्रादिकान्देवान् सायुधान् सहबान्धवान्

likhedindrādikāndevān sāyudhān sahabāndhavān

स्नानमण्डलकान् दिक्षु कुर्याच्चैव विदिक्षु च

snānamaṇḍalakān dikṣu kuryāccaiva vidikṣu ca

विष्णुब्रह्मेशशक्रादींस्तदस्त्राण्यर्च्य होमयेत्

viṣṇubrahmeśaśakrādīṃstadastrāṇyarcya homayet

एकैकस्य त्वष्टशतं समिधस्तु तिलान् धृतं

ekaikasya tvaṣṭaśataṃ samidhastu tilān dhṛtaṃ

भद्रः सुभद्रः सिद्धार्थः कलसाः पुष्टिवर्धनाः

bhadraḥ subhadraḥ siddhārthaḥ kalasāḥ puṣṭivardhanāḥ

अमोघश्चित्रभानुश् च पर्जन्यो ऽथ सुदर्शनः

amoghaścitrabhānuś ca parjanyo 'tha sudarśanaḥ

स्थापयेत्तु वटानेनान् साश्विरुद्रमरुद्गणान्

sthāpayettu vaṭānenān sāśvirudramarudgaṇān

विश्वे देवस् तथा दैत्या वसवो मुनयस् तथा

viśve devas tathā daityā vasavo munayas tathā

आवेशयन्तु सुप्रीतास् तथान्या अपि देवताः

āveśayantu suprītās tathānyā api devatāḥ

ओषधीर् निक्षिपेत् कुम्भे जयन्तीं विजयां जयां

oṣadhīr nikṣipet kumbhe jayantīṃ vijayāṃ jayāṃ

शतावरीं शतपुष्पां विष्णुक्रान्तापराजिताम्

śatāvarīṃ śatapuṣpāṃ viṣṇukrāntāparājitām

ज्योतिष्मतीमतिबलाञ्चन्दनोशीरकेशरं

jyotiṣmatīmatibalāñcandanośīrakeśaraṃ

कस्तूरिकाञ्च कर्पूरं बालकं पत्रकं त्वचं

kastūrikāñca karpūraṃ bālakaṃ patrakaṃ tvacaṃ

जातीफलं लवङ्गञ्च मृत्तिकां पञ्चगव्यकं

jātīphalaṃ lavaṅgañca mṛttikāṃ pañcagavyakaṃ

भद्रपीठे स्थितं साध्यं स्नापयेयुर्द्विजा बलात्

bhadrapīṭhe sthitaṃ sādhyaṃ snāpayeyurdvijā balāt

राजाभिषेकमन्त्रोक्तदेवानां होमकाः पृथक्

rājābhiṣekamantroktadevānāṃ homakāḥ pṛthak

पूर्णाहुतिन्ततो दत्वा गुरवे दक्षिणां ददेत्

pūrṇāhutintato datvā gurave dakṣiṇāṃ dadet

इन्द्रो ऽभिषिक्तो गुरुणा पुरा दैत्यान् जघान ह

indro 'bhiṣikto guruṇā purā daityān jaghāna ha

दिक्पालस्नानङ्कथितं संग्रामादौ जयादिकं

dikpālasnānaṅkathitaṃ saṃgrāmādau jayādikaṃ