Chapter 311

विद्याप्रस्तावमाख्यास्ये धर्मकामादिसिद्धिदम्

vidyāprastāvamākhyāsye dharmakāmādisiddhidam

नवकोष्ठविभागेन विद्याभेदञ्च विन्दति

navakoṣṭhavibhāgena vidyābhedañca vindati

अनुलोमविलोमेन समस्तव्यस्तयोगतः

anulomavilomena samastavyastayogataḥ

कर्णाविकर्णयोगेन अत ऊर्ध्वं विभागशः

karṇāvikarṇayogena ata ūrdhvaṃ vibhāgaśaḥ

त्रित्रिकेण च योगेन देव्या सन्नद्धविग्रहः

tritrikeṇa ca yogena devyā sannaddhavigrahaḥ

जानाति सिद्धिदान्मन्त्रान् प्रस्तावान्निर्गतान् बहून्

jānāti siddhidānmantrān prastāvānnirgatān bahūn

शास्त्रे शास्त्रे स्मृता मन्त्राः प्रयोगास्तत्र दुर्लभाः

śāstre śāstre smṛtā mantrāḥ prayogāstatra durlabhāḥ

गुरुः स्यात् प्रथमो वर्णः पूर्वेद्युर्न च वर्ण्यते

guruḥ syāt prathamo varṇaḥ pūrvedyurna ca varṇyate

प्रस्तावे तत्र चैकार्णा द्व्यर्णास्त्र्यर्णादयो ऽभवन्

prastāve tatra caikārṇā dvyarṇāstryarṇādayo 'bhavan

तिर्यगूर्ध्वगता रेखाश् चतुरश् चतुरो भजेत्

tiryagūrdhvagatā rekhāś caturaś caturo bhajet

नव कोष्ठा भवन्त्येवं मध्यदेशे तथा इमान्

nava koṣṭhā bhavantyevaṃ madhyadeśe tathā imān

प्रदक्षिणेन संस्थाप्य प्रस्तावं भेदयेत्ततः

pradakṣiṇena saṃsthāpya prastāvaṃ bhedayettataḥ

प्रस्तावक्रमयोगेन प्रस्तावं यस्तु विन्दति

prastāvakramayogena prastāvaṃ yastu vindati

करमुष्टिस्थितास्तस्य साधकस्य हि सिद्धयः

karamuṣṭisthitāstasya sādhakasya hi siddhayaḥ

त्रैलोक्यं पादमूले स्यान्नवखण्डां भुवं लभेत्

trailokyaṃ pādamūle syānnavakhaṇḍāṃ bhuvaṃ labhet

कपाले तु समालिख्य शिवतत्त्वं समन्ततः

kapāle tu samālikhya śivatattvaṃ samantataḥ

श्मशानकर्पटे वाथ वाह्यं निष्क्रम्य मन्त्रवित्

śmaśānakarpaṭe vātha vāhyaṃ niṣkramya mantravit

तस्य मध्ये लिखेन्नाम कर्णिकोपरि संस्थितम्

tasya madhye likhennāma karṇikopari saṃsthitam

तापयेत्खादिराङ्गारैर् भूर्जमाक्रम्य पादयोः

tāpayetkhādirāṅgārair bhūrjamākramya pādayoḥ

सप्ताहादानयेत् सर्वं त्रेलोक्यं सचराचरम्

saptāhādānayet sarvaṃ trelokyaṃ sacarācaram

वज्रसम्पुटगर्भे तु द्वादशारे तु लेखयेत्

vajrasampuṭagarbhe tu dvādaśāre tu lekhayet

मध्ये गर्भगतं नाम सदाशिवविदर्भितम्

madhye garbhagataṃ nāma sadāśivavidarbhitam

कुड्ये फलकके वाथ शिलापट्टे हरिद्रया

kuḍye phalakake vātha śilāpaṭṭe haridrayā

मुखस्तम्भं गतिस्तम्भं सैन्यस्तम्भन्तु जायते

mukhastambhaṃ gatistambhaṃ sainyastambhantu jāyate

विषरक्तेन संलिख्य श्मशाने कर्परे बुधः

viṣaraktena saṃlikhya śmaśāne karpare budhaḥ

षट्कोणं दण्डमाक्रान्तं समन्ताच्छक्तियोजितम्

ṣaṭkoṇaṃ daṇḍamākrāntaṃ samantācchaktiyojitam

मारयेदचिरादेष श्मशाने निहतं रिपुं

mārayedacirādeṣa śmaśāne nihataṃ ripuṃ

छेदं करोति राष्ट्रस्य चक्रमध्ये न्यसेद्रिपुं

chedaṃ karoti rāṣṭrasya cakramadhye nyasedripuṃ

चक्रधाराङ्गतां शक्तिं रिपुनाम्ना रिपुं हरेत्

cakradhārāṅgatāṃ śaktiṃ ripunāmnā ripuṃ haret

तार्क्ष्येणैव तु वीजेन खड्गमध्ये तु लेखयेत्

tārkṣyeṇaiva tu vījena khaḍgamadhye tu lekhayet

विदर्भरिपुनामाथ श्मशानाङ्गारलेखितम्

vidarbharipunāmātha śmaśānāṅgāralekhitam

सप्ताहात्साधयेद्देशं ताडयेत् प्रेतभस्मना

saptāhātsādhayeddeśaṃ tāḍayet pretabhasmanā

भेदने छेदने चैव मारणेषु शिवो भवेत्

bhedane chedane caiva māraṇeṣu śivo bhavet

तारकं नेत्रमुद्दिष्टं शान्तिपुष्टौ नियोजयेत्

tārakaṃ netramuddiṣṭaṃ śāntipuṣṭau niyojayet

दहनादिप्रयोगोयं शाकिनीञ्चैव कर्पयेत्

dahanādiprayogoyaṃ śākinīñcaiva karpayet

मध्यादिवारुणीं यावद्वक्रतुण्डसमन्वितः

madhyādivāruṇīṃ yāvadvakratuṇḍasamanvitaḥ

कुष्टाद्या व्याधयो ये तु नाशयेत्तान्न संशयः

kuṣṭādyā vyādhayo ye tu nāśayettānna saṃśayaḥ

मध्यादिउत्तरान्तन्तु करालीबन्धनाज्जपेत्

madhyādiuttarāntantu karālībandhanājjapet

रक्षयेदात्मनो विद्यां प्रतिवादी यदा शिवः

rakṣayedātmano vidyāṃ prativādī yadā śivaḥ

वारुण्यादि ततो न्यस्य ज्वरकाशविनाशनम्

vāruṇyādi tato nyasya jvarakāśavināśanam

सौम्यादि मध्यमान्तन्तु गुरुत्वं जायते वटे

saumyādi madhyamāntantu gurutvaṃ jāyate vaṭe

पूर्वादि मध्यमान्तन्तु लघुत्वं कुरुते क्षणात्

pūrvādi madhyamāntantu laghutvaṃ kurute kṣaṇāt

भूर्जे रोचनया लिख्य एतद्वज्राकुलं पुरम्

bhūrje rocanayā likhya etadvajrākulaṃ puram

क्रमस्थैर् मन्त्रवीजैस्तु रक्षां देहेषु कारयेत्

kramasthair mantravījaistu rakṣāṃ deheṣu kārayet

वेष्टिता भावहेम्ना च रक्षेयं मृत्युनाशिनी

veṣṭitā bhāvahemnā ca rakṣeyaṃ mṛtyunāśinī

विघ्नपापारिदमनी सौभाग्यायुःप्रदा धृता

vighnapāpāridamanī saubhāgyāyuḥpradā dhṛtā

द्यूते रेणे च जयदा शक्रसैन्ये न संशयः

dyūte reṇe ca jayadā śakrasainye na saṃśayaḥ

बन्ध्यानां पुत्रदा ह्य् एषा चिन्तामणिरिवापरा

bandhyānāṃ putradā hy eṣā cintāmaṇirivāparā

साधयेत् परराष्ट्राणि राज्यञ्च पृथिवीं जयेत्

sādhayet pararāṣṭrāṇi rājyañca pṛthivīṃ jayet

फट् स्त्रीं क्षें हूं लक्षजप्याद्यक्षादिर्वशगो भवेत्

phaṭ strīṃ kṣeṃ hūṃ lakṣajapyādyakṣādirvaśago bhavet