Chapter 35

सम्पाताहुतिनासिच्य पवित्राण्यधिवासयेत्

sampātāhutināsicya pavitrāṇyadhivāsayet

नृसिंहमन्त्रजप्तानि गुप्तान्यस्त्रेण तानि तु

nṛsiṃhamantrajaptāni guptānyastreṇa tāni tu

वस्त्रसंवेष्टितान्येव पात्रस्थान्यभिमन्त्रयेत्

vastrasaṃveṣṭitānyeva pātrasthānyabhimantrayet

विल्वाद्यद्भिः प्रोक्षितानि मन्त्रेण चैकधा द्विधा

vilvādyadbhiḥ prokṣitāni mantreṇa caikadhā dvidhā

कुम्भपार्श्वे तु संस्थाप्य रक्षां विज्ञाप्य देशिकः

kumbhapārśve tu saṃsthāpya rakṣāṃ vijñāpya deśikaḥ

दन्तकाष्ठञ्चामरकं पूर्वे सङ्कर्षणेन तु

dantakāṣṭhañcāmarakaṃ pūrve saṅkarṣaṇena tu

प्रद्युम्नेन भस्मतिलान् दक्षे गोमयमृत्तिकां

pradyumnena bhasmatilān dakṣe gomayamṛttikāṃ

वारुणेन चानिरुद्धेन सौम्ये नारायणेन च

vāruṇena cāniruddhena saumye nārāyaṇena ca

दर्भोदकञ्चाथ हृदा अग्नौ कुङ्कुमरोचनं

darbhodakañcātha hṛdā agnau kuṅkumarocanaṃ

ऐशान्यां शिरसा धूपं शिखया नैरृतेप्यथ

aiśānyāṃ śirasā dhūpaṃ śikhayā nairṛtepyatha

मूलपुष्पाणि दिव्यानि कवचेनाथ वायवे

mūlapuṣpāṇi divyāni kavacenātha vāyave

चन्दनाम्ब्वक्षतदधिदूर्वाश् च पुटिकास्थिताः

candanāmbvakṣatadadhidūrvāś ca puṭikāsthitāḥ

गृहं त्रिसूत्रेणावेष्ट्य पुनः सिद्धार्थकान् क्षिपेत्

gṛhaṃ trisūtreṇāveṣṭya punaḥ siddhārthakān kṣipet

दद्यात्पूजाक्रमेणाथ स्वैः स्वैर् गन्धपवित्रकं

dadyātpūjākrameṇātha svaiḥ svair gandhapavitrakaṃ

मन्त्रैर् वै द्वारपादिभ्यो विष्णुकुम्भे त्वनेन च

mantrair vai dvārapādibhyo viṣṇukumbhe tvanena ca

विष्णुतेजोभवं रम्यं सर्वपातकनाशनं

viṣṇutejobhavaṃ ramyaṃ sarvapātakanāśanaṃ

सर्वकामप्रदं देवं तवाङ्गे धारयाम्यहं

sarvakāmapradaṃ devaṃ tavāṅge dhārayāmyahaṃ

सम्पूज्य धूपदीपाद्यैर् व्रजेद्द्वारसमीपतः

sampūjya dhūpadīpādyair vrajeddvārasamīpataḥ

गन्धपुष्पाक्षतोपेतं पवित्रञ्चाखिलेर्पयेत्

gandhapuṣpākṣatopetaṃ pavitrañcākhilerpayet

पवित्रं वैष्णवं तेजो महापातकनाशनं

pavitraṃ vaiṣṇavaṃ tejo mahāpātakanāśanaṃ

धर्मकामार्थसिद्ध्यर्थं स्वकेङ्गे धारयाम्यहं

dharmakāmārthasiddhyarthaṃ svakeṅge dhārayāmyahaṃ

आसने परिवारादौ गुरौ दद्यात् पवित्रकं

āsane parivārādau gurau dadyāt pavitrakaṃ

गन्धादिभिः समभ्यर्च्य गन्धपुष्पाक्षतादिमत्

gandhādibhiḥ samabhyarcya gandhapuṣpākṣatādimat

विष्णुतेजोभवेत्यादिमूलेन हरयेर्पयेत्

viṣṇutejobhavetyādimūlena harayerpayet

वह्निस्थाय ततो दत्वा देवं सम्प्रार्थयेत्ततः

vahnisthāya tato datvā devaṃ samprārthayettataḥ

क्षीरोदधिमहानागशय्यावस्थितविग्रहः

kṣīrodadhimahānāgaśayyāvasthitavigrahaḥ

प्रातस्त्वां पूजयिष्यामि सन्निधौ भव केशव

prātastvāṃ pūjayiṣyāmi sannidhau bhava keśava

इन्द्रादिभस्ततो दत्वा विष्णुपार्षदके बलिं

indrādibhastato datvā viṣṇupārṣadake baliṃ

ततो देवाग्रतः कुम्भं वासोयुगसमन्वितं

tato devāgrataḥ kumbhaṃ vāsoyugasamanvitaṃ

रोचनाचन्द्रकाश्मीरगन्धाद्युदकसंयुतं

rocanācandrakāśmīragandhādyudakasaṃyutaṃ

गन्धपुष्पादिनाभूष्य मूलमन्त्रेण पूजयेत्

gandhapuṣpādinābhūṣya mūlamantreṇa pūjayet

मण्डपाद्वहिरागत्य विलिप्ते मण्डलत्रये

maṇḍapādvahirāgatya vilipte maṇḍalatraye

पञ्चगव्यञ्चरुन्दन्तकाष्ठञ्चैव क्रमाद्भवेत्

pañcagavyañcarundantakāṣṭhañcaiva kramādbhavet

पुराणश्रवणं स्तोत्रं पठन् जागरणं निशि

purāṇaśravaṇaṃ stotraṃ paṭhan jāgaraṇaṃ niśi

परप्रेषकबालानां स्त्रीणां भोगभुजां तथा

parapreṣakabālānāṃ strīṇāṃ bhogabhujāṃ tathā

सद्योधिवासनं कुर्याद्विना गन्धपवित्रकं

sadyodhivāsanaṃ kuryādvinā gandhapavitrakaṃ