अथ सप्तत्रिंशो ऽध्यायः
atha saptatriṃśo 'dhyāyaḥ
सर्वदेवपवित्रारोहणविधिः
sarvadevapavitrārohaṇavidhiḥ
अग्निर् उवाच
agnir uvāca
सङ्क्षेपात् सर्वदेवानां पवित्रारोहणं शृणु
saṅkṣepāt sarvadevānāṃ pavitrārohaṇaṃ śṛṇu
पवित्र सर्वलक्ष्म स्यात् स्वरसानलगं त्वपि
pavitra sarvalakṣma syāt svarasānalagaṃ tvapi
जगद्योने समागच्छ परिवारगणैः सह
jagadyone samāgaccha parivāragaṇaiḥ saha
निमन्त्रयाम्यहं प्रातर्दद्यान्तुभ्यं पवित्रकं
nimantrayāmyahaṃ prātardadyāntubhyaṃ pavitrakaṃ
जगत्सृजे नमस्तुभ्यं गृह्णीष्वेदं पवित्रकं
jagatsṛje namastubhyaṃ gṛhṇīṣvedaṃ pavitrakaṃ
पवित्रीकरणार्थाय वर्षपूजाफलप्रदं
pavitrīkaraṇārthāya varṣapūjāphalapradaṃ
शिवदेव नमस्तुभ्यं गृह्णीष्वेदं पवित्रकं
śivadeva namastubhyaṃ gṛhṇīṣvedaṃ pavitrakaṃ
मणिविद्रुममालाभिर्मन्दारकुसुमादिभिः
maṇividrumamālābhirmandārakusumādibhiḥ
इयं सांवत्सरी पूजा तवास्तु वेदवित्पते
iyaṃ sāṃvatsarī pūjā tavāstu vedavitpate
सांवत्सरीमिमां पूजां सम्पाद्य विधिमन्मम
sāṃvatsarīmimāṃ pūjāṃ sampādya vidhimanmama
व्रज पवित्रकेदानीं स्वर्गलोकं विसर्जितः
vraja pavitrakedānīṃ svargalokaṃ visarjitaḥ
सूर्यदेव नमस्तुभ्यं गृह्णीष्वेदं पवित्रकं
sūryadeva namastubhyaṃ gṛhṇīṣvedaṃ pavitrakaṃ
पवित्रीकरणार्थाय वर्षपूजाफलप्रदं
pavitrīkaraṇārthāya varṣapūjāphalapradaṃ
शिवदेव नमस्तुभ्यं गृह्णीष्वेदं पवित्रकं
śivadeva namastubhyaṃ gṛhṇīṣvedaṃ pavitrakaṃ
पवित्रीकरणार्थाय वर्षपूजाफलप्रदं
pavitrīkaraṇārthāya varṣapūjāphalapradaṃ
वाणेश्वर नमस्तुभ्यं गृह्णीष्वेदं पवित्रकं
vāṇeśvara namastubhyaṃ gṛhṇīṣvedaṃ pavitrakaṃ
पवित्रीकरणार्थाय वर्षपूजाफलप्रदं
pavitrīkaraṇārthāya varṣapūjāphalapradaṃ
शक्तिदेव नमस्तुभ्यं गृह्णीष्वेदं पवित्रकं
śaktideva namastubhyaṃ gṛhṇīṣvedaṃ pavitrakaṃ
पवित्रीकरणार्थाय वर्षपूजाफलप्रदं
pavitrīkaraṇārthāya varṣapūjāphalapradaṃ
नारायणमयं सूत्रमनिरुद्धमयं वरं
nārāyaṇamayaṃ sūtramaniruddhamayaṃ varaṃ
धनधान्यायुरारोग्यप्रदं सम्प्रददामि ते
dhanadhānyāyurārogyapradaṃ sampradadāmi te
कामदेवमयं सूत्रं सङ्कर्षणमयं वरं
kāmadevamayaṃ sūtraṃ saṅkarṣaṇamayaṃ varaṃ
विद्यासन्ततिसौभाग्यप्रदं सम्प्रददामि ते
vidyāsantatisaubhāgyapradaṃ sampradadāmi te
वासुदेवमयं सूत्रं धर्मकामार्थमोक्षदं
vāsudevamayaṃ sūtraṃ dharmakāmārthamokṣadaṃ
संसारसागरोत्तारकारणं प्रददामि ते
saṃsārasāgarottārakāraṇaṃ pradadāmi te
विश्वरूपमयं सूत्रं सर्वदं पापनाशनं
viśvarūpamayaṃ sūtraṃ sarvadaṃ pāpanāśanaṃ
अतीतानागतकुलसमुद्धारं ददामि ते
atītānāgatakulasamuddhāraṃ dadāmi te
कनिष्ठादीनि चत्वारि मनुभिस्तु क्रमाद्ददे
kaniṣṭhādīni catvāri manubhistu kramāddade
इत्य् आदिमहापुराणे आग्नेये सङ्क्षेपपवित्रारोहणं नाम सप्तत्रिंशो ऽध्यायः ॥
ity ādimahāpurāṇe āgneye saṅkṣepapavitrārohaṇaṃ nāma saptatriṃśo 'dhyāyaḥ ||