अथ त्रिषष्टितमो ऽध्यायः
atha triṣaṣṭitamo 'dhyāyaḥ
सुदर्शनचक्रादिप्रतिष्ठाकथनं
sudarśanacakrādipratiṣṭhākathanaṃ
भगवानुवाच
bhagavānuvāca
एवं तार्क्ष्यस्य चक्रस्य ब्रह्मणो नृहरेस् तथा
evaṃ tārkṣyasya cakrasya brahmaṇo nṛhares tathā
प्रतिष्ठा विष्णुवत् कार्या स्वस्वमन्त्रेण तां शृणु
pratiṣṭhā viṣṇuvat kāryā svasvamantreṇa tāṃ śṛṇu
सुदर्शन महाचक्र शान्त दुष्टभयङ्कर
sudarśana mahācakra śānta duṣṭabhayaṅkara
च्छिन्द छिन्द भिन्द भिन्द विदारय विदारय परमन्त्रान् ग्रस ग्रस भक्षय भक्षय भूतान् त्रायस त्रायस हूं फट् सुदर्शनाय नमः ॥
cchinda chinda bhinda bhinda vidāraya vidāraya paramantrān grasa grasa bhakṣaya bhakṣaya bhūtān trāyasa trāyasa hūṃ phaṭ sudarśanāya namaḥ ||
अभ्यर्च्य चक्रं चानेन रणे दारयेते रिपून्
abhyarcya cakraṃ cānena raṇe dārayete ripūn
ओं क्षौं नरसिंह उग्ररूप ज्वल ज्वल प्रज्वल प्रज्वल स्वाहा ॥
oṃ kṣauṃ narasiṃha ugrarūpa jvala jvala prajvala prajvala svāhā ||
नरसिंहस्य मन्त्रोयं पातालाख्यस्य वच्मि ते
narasiṃhasya mantroyaṃ pātālākhyasya vacmi te
ओं क्षौं नमो भगवते नरसिंहाय प्रदीप्तसूर्यकोटिसहस्रसमतेजसे वज्रनखदंष्ट्रायुधायं स्फुटविकटविकीर्णकेसरसटाप्रक्षुभितमहार्णवाम्भोददुन्दुभिनिर्घोषाय सर्वमन्त्रोत्तारणाय एह्येहि भगवन्नरसिंह पुरुषपरापरब्रह्मसत्येन स्फुर स्फुर विजृम्भ विजृम्भ आक्रम गर्ज गर्ज मुञ्च मुञ्च सिंहनादान् विदारय विदारय विद्रावय विद्रावय आविश
oṃ kṣauṃ namo bhagavate narasiṃhāya pradīptasūryakoṭisahasrasamatejase vajranakhadaṃṣṭrāyudhāyaṃ sphuṭavikaṭavikīrṇakesarasaṭāprakṣubhitamahārṇavāmbhodadundubhinirghoṣāya sarvamantrottāraṇāya ehyehi bhagavannarasiṃha puruṣaparāparabrahmasatyena sphura sphura vijṛmbha vijṛmbha ākrama garja garja muñca muñca siṃhanādān vidāraya vidāraya vidrāvaya vidrāvaya āviśa
आविश सर्वमन्त्ररूपाणि सर्वमन्त्रजातयश् च हन हन छिन्द सङ्क्षिप सङ्क्षिप सर सर दारय दारय स्फुट स्फुट स्फोटय स्फोटय ज्वालामालासङ्घातमय सर्वतो ऽनन्तज्वालावज्राशनिचक्रेण सर्वपातालान् उत्सादय उत्सादय सर्वतो ऽनतज्वालावज्रशरपञ्जरेण सर्वपातालान् परिवारय परिवारय सर्वपातालासुरवासिनां हृदयान्याकर्षय आकर्षय शीघ्रं दह दह पच पच मथ मथ शोषय शोषय निकृन्तय निकृन्तय तावद्यावन्मे वशमागताः पातालेभ्यः फट्
āviśa sarvamantrarūpāṇi sarvamantrajātayaś ca hana hana chinda saṅkṣipa saṅkṣipa sara sara dāraya dāraya sphuṭa sphuṭa sphoṭaya sphoṭaya jvālāmālāsaṅghātamaya sarvato 'nantajvālāvajrāśanicakreṇa sarvapātālān utsādaya utsādaya sarvato 'natajvālāvajraśarapañjareṇa sarvapātālān parivāraya parivāraya sarvapātālāsuravāsināṃ hṛdayānyākarṣaya ākarṣaya śīghraṃ daha daha paca paca matha matha śoṣaya śoṣaya nikṛntaya nikṛntaya tāvadyāvanme vaśamāgatāḥ pātālebhyaḥ phaṭ
असुरेभ्यः फट् मन्त्ररूपेभ्यः फट् मन्त्रजातिभ्यः फट् संशयान्मां भगवन्नरसिंहरूप विष्णो सर्वापद्भ्यः सर्वमन्त्ररूपेभ्यो रक्ष रक्ष ह्रूं फट् नमो ऽस्तु ते ॥
asurebhyaḥ phaṭ mantrarūpebhyaḥ phaṭ mantrajātibhyaḥ phaṭ saṃśayānmāṃ bhagavannarasiṃharūpa viṣṇo sarvāpadbhyaḥ sarvamantrarūpebhyo rakṣa rakṣa hrūṃ phaṭ namo 'stu te ||
नरसिंहस्य विद्येयं हरिरूपार्थसिद्धिदा
narasiṃhasya vidyeyaṃ harirūpārthasiddhidā
त्रिलोक्यमोहनैर् मन्त्रैः स्थाप्यस्त्रैलोक्यमोहनः
trilokyamohanair mantraiḥ sthāpyastrailokyamohanaḥ
गदो दक्षे शान्तिकरो द्विभुजो वा चतुर्भुजः
gado dakṣe śāntikaro dvibhujo vā caturbhujaḥ
वामोर्ध्वे कारयेच्चक्रं पाञ्चजन्यमथो ह्य् अधः
vāmordhve kārayeccakraṃ pāñcajanyamatho hy adhaḥ
श्रीपुष्टिसंयुक्तं कुर्याद् बलेन सह भद्रया
śrīpuṣṭisaṃyuktaṃ kuryād balena saha bhadrayā
प्रासादे स्थापयेद्विष्णुं गृहे वा मण्डपे ऽपि वा
prāsāde sthāpayedviṣṇuṃ gṛhe vā maṇḍape 'pi vā
वामनं चैव वैकुण्ठं हयास्यमनिरुद्धकं
vāmanaṃ caiva vaikuṇṭhaṃ hayāsyamaniruddhakaṃ
स्थापयेज्जलशय्यास्थं मत्स्यादींश्चावतारकान्
sthāpayejjalaśayyāsthaṃ matsyādīṃścāvatārakān
सङ्कर्षणं विश्वरूपं लिङ्गं वै रुद्रमूर्तिकं
saṅkarṣaṇaṃ viśvarūpaṃ liṅgaṃ vai rudramūrtikaṃ
अर्धनारीश्वरं तद्वद्धरिशङ्करमातृकाः
ardhanārīśvaraṃ tadvaddhariśaṅkaramātṛkāḥ
भैरवं च तथा सूर्यं ग्रहांस्तद्विनायकम्
bhairavaṃ ca tathā sūryaṃ grahāṃstadvināyakam
गौरीमिन्द्रादिकां लेप्यां चित्रजां च बलाबलां
gaurīmindrādikāṃ lepyāṃ citrajāṃ ca balābalāṃ
पुस्तकानां प्रतिष्ठां च वक्ष्ये लिखनतद्विधिं
pustakānāṃ pratiṣṭhāṃ ca vakṣye likhanatadvidhiṃ
स्वस्तिके मण्डले ऽभ्यर्च्य शरपत्रासने स्थितं
svastike maṇḍale 'bhyarcya śarapatrāsane sthitaṃ
लेख्यञ्च लिखितं पुस्तं गुरुर्विद्यां हरिं यजेत्
lekhyañca likhitaṃ pustaṃ gururvidyāṃ hariṃ yajet
यजमानो गुरुं विद्यां हरिं लिपिकृतं नरं
yajamāno guruṃ vidyāṃ hariṃ lipikṛtaṃ naraṃ
प्राङ्मुखः पद्मिनीं ध्यायेत् लिखित्वा श्लोकपञ्चकं
prāṅmukhaḥ padminīṃ dhyāyet likhitvā ślokapañcakaṃ
रौप्यस्थमस्या हैम्या च लेखन्या नागराक्षरं
raupyasthamasyā haimyā ca lekhanyā nāgarākṣaraṃ
ब्राह्मणान् भोजयेच्छक्या शक्त्या दद्याच्च दक्षिणां
brāhmaṇān bhojayecchakyā śaktyā dadyācca dakṣiṇāṃ
गुरुं विद्यां हरिं प्रार्च्य पुराणादि लिखेन्नरः
guruṃ vidyāṃ hariṃ prārcya purāṇādi likhennaraḥ
पूर्ववन्मण्डलाद्ये च ऐशान्यां भद्रपीठके
pūrvavanmaṇḍalādye ca aiśānyāṃ bhadrapīṭhake
दर्पणे पुस्तकं दृष्ट्वा सेचयेत् पूर्ववद् घटैः
darpaṇe pustakaṃ dṛṣṭvā secayet pūrvavad ghaṭaiḥ
नेत्रोन्मीलनकं कृत्वा शय्यायां तु न्यसेन्नरः
netronmīlanakaṃ kṛtvā śayyāyāṃ tu nyasennaraḥ
न्यसेत्तु पौरुषं सूक्तं देवाद्यं तत्र पुस्तके
nyasettu pauruṣaṃ sūktaṃ devādyaṃ tatra pustake
कृत्वा सजीवीकरणं प्रार्च्य हुत्वा चरुं ततः
kṛtvā sajīvīkaraṇaṃ prārcya hutvā caruṃ tataḥ
सम्प्राश्य दक्षिणाभिस्तु गुर्वादीन् भोजयेद्द्विजान्
samprāśya dakṣiṇābhistu gurvādīn bhojayeddvijān
रथेन हस्तिना वापि भ्राम्येत् पुस्तकं नरैः
rathena hastinā vāpi bhrāmyet pustakaṃ naraiḥ
गृहे देवालयादौ तु पुस्तकं स्थाप्य पूजयेत्
gṛhe devālayādau tu pustakaṃ sthāpya pūjayet
वस्त्रादिवेष्टितं पाठादादावन्ते समर्चयेत्
vastrādiveṣṭitaṃ pāṭhādādāvante samarcayet
जगच्छान्तिञ्चावधार्य पुस्तकं वाचयेन्नरः
jagacchāntiñcāvadhārya pustakaṃ vācayennaraḥ
अध्यायमेकं कुम्भाद्भिर्यजमानादि सेचयेत्
adhyāyamekaṃ kumbhādbhiryajamānādi secayet
द्विजाय पुस्तकं दत्वा फलस्यान्तो न विद्यते
dvijāya pustakaṃ datvā phalasyānto na vidyate
त्रीण्याहुरतिदानानि गावः पृथ्वीं सरस्वती
trīṇyāhuratidānāni gāvaḥ pṛthvīṃ sarasvatī
विद्यादानफलं दत्वा मस्यन्तं पत्रसञ्चयं
vidyādānaphalaṃ datvā masyantaṃ patrasañcayaṃ
यावत्तु पत्रसङ्ख्यानमक्षराणां तथानघ
yāvattu patrasaṅkhyānamakṣarāṇāṃ tathānagha
तावद्वर्षसहस्राणि विष्णुलोके महीयते
tāvadvarṣasahasrāṇi viṣṇuloke mahīyate
पञ्चरात्रं पुराणानि भारतानि ददन्नरः
pañcarātraṃ purāṇāni bhāratāni dadannaraḥ
कुलैकविंशमुद्धृत्य परे तत्त्वे तु लीयते
kulaikaviṃśamuddhṛtya pare tattve tu līyate
इत्य् आदिमहापुत्राणे आग्नेये देवादिप्रतिष्ठापुस्तकप्रतिष्ठाकथनं नाम त्रिषष्टितमोध्यायः
ity ādimahāputrāṇe āgneye devādipratiṣṭhāpustakapratiṣṭhākathanaṃ nāma triṣaṣṭitamodhyāyaḥ