अथ चतुःसप्ततितमो ऽध्यायः
atha catuḥsaptatitamo 'dhyāyaḥ
शिवपूजाकथनं
śivapūjākathanaṃ
ईश्वर उवाच
īśvara uvāca
शिवपूजां प्रवक्ष्यामि आचम्य प्रणवार्घ्यवान्
śivapūjāṃ pravakṣyāmi ācamya praṇavārghyavān
द्वारमस्त्राम्बुना प्रोक्ष्य होमादिद्वारपान्यजेत्
dvāramastrāmbunā prokṣya homādidvārapānyajet
गणं सरस्वतीं लक्ष्मीमूर्ध्वोदुम्बरके यजेत्
gaṇaṃ sarasvatīṃ lakṣmīmūrdhvodumbarake yajet
नन्दिगङ्गे दक्षिणे ऽथ स्थिते वामगते यजेत्
nandigaṅge dakṣiṇe 'tha sthite vāmagate yajet
महाकालं च यमुनां दिव्यदृष्टिनिपातितः
mahākālaṃ ca yamunāṃ divyadṛṣṭinipātitaḥ
उत्सार्य दिव्यान् विघ्नांश् च पुष्पाक्षेपान्तरिक्षगान्
utsārya divyān vighnāṃś ca puṣpākṣepāntarikṣagān
दक्षपार्ष्णित्रिभिर्घातैभूमिष्ठान्यागमन्दिरं
dakṣapārṣṇitribhirghātaibhūmiṣṭhānyāgamandiraṃ
देहलीं लङ्घयेद्वामशाखामाश्रित्य वै विशेत्
dehalīṃ laṅghayedvāmaśākhāmāśritya vai viśet
प्रविश्य दक्षपादेन विन्यस्यास्त्रमुदुम्बरे
praviśya dakṣapādena vinyasyāstramudumbare
ओं हां वास्त्वधिपतये ब्रह्मणे मध्यतो यजेत्
oṃ hāṃ vāstvadhipataye brahmaṇe madhyato yajet
निरीक्षणादिभिः शस्त्रैः शुद्धानादाय गड्डुकान्
nirīkṣaṇādibhiḥ śastraiḥ śuddhānādāya gaḍḍukān
लब्धानुज्ञः शिवान्मौनी गङ्गादिकमनुव्रजेत्
labdhānujñaḥ śivānmaunī gaṅgādikamanuvrajet
पवित्राङ्गः प्रजप्तेन वस्त्रपूतेन वारिणा
pavitrāṅgaḥ prajaptena vastrapūtena vāriṇā
पूरयेदम्बुधौ तांस्तान् गयत्र्या हृदयेन वा
pūrayedambudhau tāṃstān gayatryā hṛdayena vā
गन्धकाक्षत पुष्पादिसर्वद्रव्यसमुच्चयं
gandhakākṣata puṣpādisarvadravyasamuccayaṃ
सन्निधीकृत्य पूजार्थं भूतशुद्धादि कारयेत्
sannidhīkṛtya pūjārthaṃ bhūtaśuddhādi kārayet
देवदक्षे ततो न्यस्य सौम्यास्यश् च शरीरतः
devadakṣe tato nyasya saumyāsyaś ca śarīrataḥ
संहारमुद्रयादाय मूर्ध्नि मन्त्रेण धारयेत्
saṃhāramudrayādāya mūrdhni mantreṇa dhārayet
भोग्यकर्मोपभोगार्थं पाणिकच्छपिकाख्यया
bhogyakarmopabhogārthaṃ pāṇikacchapikākhyayā
हृदम्बुजे निजात्मानं द्वादशान्तपदे ऽथवा
hṛdambuje nijātmānaṃ dvādaśāntapade 'thavā
शोधयेत् पञ्चभूतानि सञ्चिन्त्य शुषिरन्तनौ
śodhayet pañcabhūtāni sañcintya śuṣirantanau
चरणाङ्गुष्ठयोर्युग्मान् शुषिरान्तर्वहिः स्मरेत्
caraṇāṅguṣṭhayoryugmān śuṣirāntarvahiḥ smaret
शक्तिं हृद्व्यापिनीं पश्चाद्धूङ्कारे पावकप्रभे
śaktiṃ hṛdvyāpinīṃ paścāddhūṅkāre pāvakaprabhe
रन्ध्रमध्यस्थिते कृत्वा प्राणरोधं हि चिन्तकः
randhramadhyasthite kṛtvā prāṇarodhaṃ hi cintakaḥ
निवेशयेद्रेचकान्ते फडन्तेनाथ तेन च
niveśayedrecakānte phaḍantenātha tena ca
हृत्कण्ठतालुभ्रूमध्यब्रह्मरन्ध्रे विभिद्य च
hṛtkaṇṭhatālubhrūmadhyabrahmarandhre vibhidya ca
ग्रन्थीन्निर्भिद्य हूङ्कारं मूर्ध्नि विन्यस्य जीवनं
granthīnnirbhidya hūṅkāraṃ mūrdhni vinyasya jīvanaṃ
सम्पुटं हृदयेनाथ पूरकाहितचेतनं
sampuṭaṃ hṛdayenātha pūrakāhitacetanaṃ
हूं शिखोपरि विन्यस्य शुद्धं विन्द्वात्मकं स्मरेत्
hūṃ śikhopari vinyasya śuddhaṃ vindvātmakaṃ smaret
कृत्वाथ कुम्भकं शम्भौ एकोद्घातेन योजयेत्
kṛtvātha kumbhakaṃ śambhau ekodghātena yojayet
रेचकेन वीजवृत्त्या शिवे लीनो ऽथ शोधयेत्
recakena vījavṛttyā śive līno 'tha śodhayet
प्रतिलोमं स्वदेहे तु विन्द्वन्तं तत्र विन्दुकं
pratilomaṃ svadehe tu vindvantaṃ tatra vindukaṃ
लयन्नीत्वा महीवातौ जलवह्नी परस्परं
layannītvā mahīvātau jalavahnī parasparaṃ
द्वौ द्वौ साध्यौ तथाकाशमविरोधेन तच्छृणु
dvau dvau sādhyau tathākāśamavirodhena tacchṛṇu
पार्थिवं मण्डलं पीतं कठिनं वज्रलाञ्छितं
pārthivaṃ maṇḍalaṃ pītaṃ kaṭhinaṃ vajralāñchitaṃ
हौमित्यात्मीयवीजेन तन्निवृत्तिकलामयं
haumityātmīyavījena tannivṛttikalāmayaṃ
पदादारभ्य मूर्धानं विचिन्त्य चतुरस्रकं
padādārabhya mūrdhānaṃ vicintya caturasrakaṃ
उद्घातपञ्चकेनैव वायुभूतं विचिन्तयेत्
udghātapañcakenaiva vāyubhūtaṃ vicintayet
अर्धचन्द्रं द्रवं सौम्यं शुभ्रसम्भोजलाञ्छितं
ardhacandraṃ dravaṃ saumyaṃ śubhrasambhojalāñchitaṃ
ह्रीमित्यनेन वीजेन प्रतिष्ठारूपतां गतं
hrīmityanena vījena pratiṣṭhārūpatāṃ gataṃ
संयुक्तं राममन्त्रेण पुरुषान्तमकारणं
saṃyuktaṃ rāmamantreṇa puruṣāntamakāraṇaṃ
अर्घ्यञ्चतुर्भिरुद्घातैर् वह्निभूतं विशोधयेत्
arghyañcaturbhirudghātair vahnibhūtaṃ viśodhayet
आग्नेयं मण्डलं त्र्यस्त्रं रक्तं स्वस्तिकलाञ्छितं
āgneyaṃ maṇḍalaṃ tryastraṃ raktaṃ svastikalāñchitaṃ
हूमित्यनेन वीजेन विद्यारूपं विभावयेत्
hūmityanena vījena vidyārūpaṃ vibhāvayet
घोराणुत्रिभिरुद्घातैर् जलभूतं विशोधयेत्
ghorāṇutribhirudghātair jalabhūtaṃ viśodhayet
षडस्रं मण्डलं वायोर्विन्दुभिः षड्भिरङ्कितं
ṣaḍasraṃ maṇḍalaṃ vāyorvindubhiḥ ṣaḍbhiraṅkitaṃ
कृष्णं ह्रेमिति वीजेन जातं शान्तिकलामयं
kṛṣṇaṃ hremiti vījena jātaṃ śāntikalāmayaṃ
सञ्चित्योद्घातयुग्मेन पृथ्वीभूतं विशोधयेत्
sañcityodghātayugmena pṛthvībhūtaṃ viśodhayet
नभोविन्दुमयं वृत्तं विन्दुशक्तिविभूषितं
nabhovindumayaṃ vṛttaṃ vinduśaktivibhūṣitaṃ
व्योमाकारं सुवृत्तञ्च शुद्धस्फटिकनिर्मलं
vyomākāraṃ suvṛttañca śuddhasphaṭikanirmalaṃ
हौङ्कारेण फडन्तेन शान्त्यतीतकलामयं
hauṅkāreṇa phaḍantena śāntyatītakalāmayaṃ
ध्यात्वैकोद्घातयोगेन सुविशुद्धं विभावयेत्
dhyātvaikodghātayogena suviśuddhaṃ vibhāvayet
आप्याययेत्ततः सर्वं मूलेनामृतवर्षिणा
āpyāyayettataḥ sarvaṃ mūlenāmṛtavarṣiṇā
आधाराख्यामनन्तञ्च धर्मज्ञानादिपङ्कजं
ādhārākhyāmanantañca dharmajñānādipaṅkajaṃ
हृदासनमिदं ध्यात्वा मूर्तिमावाहयेत्ततः
hṛdāsanamidaṃ dhyātvā mūrtimāvāhayettataḥ
सृष्ट्या शिवमयं तस्यामात्मानं द्वादशान्ततः
sṛṣṭyā śivamayaṃ tasyāmātmānaṃ dvādaśāntataḥ
अथ तां शक्तिमन्त्रेण वौषडन्तेन सर्वतः
atha tāṃ śaktimantreṇa vauṣaḍantena sarvataḥ
दिव्यामृतेन सम्प्लाव्य कुर्वीत सकलीकृतं
divyāmṛtena samplāvya kurvīta sakalīkṛtaṃ
हृदयादिकरान्तेषु कनिष्ठाद्यङ्गुलीषु च
hṛdayādikarānteṣu kaniṣṭhādyaṅgulīṣu ca
हृदादिमन्त्रविन्यासः सकलीकरणं मतं
hṛdādimantravinyāsaḥ sakalīkaraṇaṃ mataṃ
अस्त्रेण रक्ष्य प्राकारं तन्मन्त्रेणाथ तद्वहिः
astreṇa rakṣya prākāraṃ tanmantreṇātha tadvahiḥ
शक्तिजालमधश्चोर्ध्वं महामुद्रां प्रदर्शयेत्
śaktijālamadhaścordhvaṃ mahāmudrāṃ pradarśayet
आपदमस्तकं यावद् भावपुष्पैः शिवं हृदि
āpadamastakaṃ yāvad bhāvapuṣpaiḥ śivaṃ hṛdi
पद्मे यजेत् पूरकेण आकृष्टामृतसद्घृतैः
padme yajet pūrakeṇa ākṛṣṭāmṛtasadghṛtaiḥ
शिवमन्त्रैर् नाभिकुण्डे तर्पयेत शिवानलं
śivamantrair nābhikuṇḍe tarpayeta śivānalaṃ
ललाटे विन्दुरूपञ्च चिन्तयेच्छुभविग्रहं
lalāṭe vindurūpañca cintayecchubhavigrahaṃ
एकं स्वर्णादिपात्राणां पात्रमस्त्राम्बुशोधितं
ekaṃ svarṇādipātrāṇāṃ pātramastrāmbuśodhitaṃ
विन्दुप्रसूतपीयूषरूपतोयाक्षतादिना
vinduprasūtapīyūṣarūpatoyākṣatādinā
हृदापूर्य षडङ्गेन पूजयित्वाभिमन्त्रयेत्
hṛdāpūrya ṣaḍaṅgena pūjayitvābhimantrayet
संरक्ष्य हेति मन्त्रेण कवचेन विगुण्ठयेत्
saṃrakṣya heti mantreṇa kavacena viguṇṭhayet
रचयित्वार्घ्यमष्टाङ्गं सेचयेद्धेनुमुद्रया
racayitvārghyamaṣṭāṅgaṃ secayeddhenumudrayā
अभिषिञ्चेदथात्मानं मूर्ध्नि तत्तोयविन्दुना
abhiṣiñcedathātmānaṃ mūrdhni tattoyavindunā
तत्रस्थं यागसम्भारं प्रोक्षयेदस्त्रवारिणा
tatrasthaṃ yāgasambhāraṃ prokṣayedastravāriṇā
अभिमन्त्र्य हृदा पिण्डैस्तनुत्राणेन वेष्टयेत्
abhimantrya hṛdā piṇḍaistanutrāṇena veṣṭayet
दर्शयित्वामृतां मुद्रां पुष्पं दत्वा निजासने
darśayitvāmṛtāṃ mudrāṃ puṣpaṃ datvā nijāsane
विधाय तिलकं मूर्ध्नि पुष्पं मूलेन योजयेत्
vidhāya tilakaṃ mūrdhni puṣpaṃ mūlena yojayet
स्नाने देवार्चने होमे भोजने यागयोगयोः
snāne devārcane home bhojane yāgayogayoḥ
आवश्यके जपे धीरः सदा वाचंयमो भवेत्
āvaśyake jape dhīraḥ sadā vācaṃyamo bhavet
नादान्तोच्चारणान्मन्त्रं शोधयित्वा सुसंस्कृतं
nādāntoccāraṇānmantraṃ śodhayitvā susaṃskṛtaṃ
पूजने ऽभ्यर्च्य गायत्र्या सामान्यार्घ्यमुपाहरेत्
pūjane 'bhyarcya gāyatryā sāmānyārghyamupāharet
ब्रह्मपञ्चकमावर्त्य माल्यमादाय लिङ्गतः
brahmapañcakamāvartya mālyamādāya liṅgataḥ
ऐशान्यान्दिशि चण्डाय हृदयेन निवेदयेत्
aiśānyāndiśi caṇḍāya hṛdayena nivedayet
प्रक्षाल्य पिण्दिकालिङ्गे अस्त्रतोये ततो हृदा
prakṣālya piṇdikāliṅge astratoye tato hṛdā
अर्घ्यपात्राम्बुना सिञ्चेदिति लिङ्गविशोधनं
arghyapātrāmbunā siñcediti liṅgaviśodhanaṃ
आतमद्रव्यमन्त्रलिङ्गशुद्धौ सर्वान् सुरान्यजेत्
ātamadravyamantraliṅgaśuddhau sarvān surānyajet
वायव्ये गणपतये हां गुरुभ्यो ऽर्चयेच्छिवे
vāyavye gaṇapataye hāṃ gurubhyo 'rcayecchive
आधारशक्तिमङ्कुरनिभां कूर्मशिलास्थितां
ādhāraśaktimaṅkuranibhāṃ kūrmaśilāsthitāṃ
यजेद् ब्रह्मशिलारूढं शिवस्यानन्तमासनं
yajed brahmaśilārūḍhaṃ śivasyānantamāsanaṃ
विचित्रकेशप्रख्यानमन्योन्यं पृष्टदर्शिनः
vicitrakeśaprakhyānamanyonyaṃ pṛṣṭadarśinaḥ
कृतत्रेतादिरूपेण शिवस्यासनपादुकां
kṛtatretādirūpeṇa śivasyāsanapādukāṃ
धर्मं ज्ञानञ्च वैराग्यमैश्वर्यञ्चाग्निदिङ्मुखान्
dharmaṃ jñānañca vairāgyamaiśvaryañcāgnidiṅmukhān
कूर्पारकुङ्कुमस्वर्णकज्जलाभान् यजेत् क्रमात्
kūrpārakuṅkumasvarṇakajjalābhān yajet kramāt
पद्मञ्च कर्णिकामध्ये पूर्वादौ मध्यतो नव
padmañca karṇikāmadhye pūrvādau madhyato nava
वरदाभयहस्ताश् च शक्तयो धृतचामराः
varadābhayahastāś ca śaktayo dhṛtacāmarāḥ
वामा ज्येष्ठा च रौद्री च काली कलविकारिणी
vāmā jyeṣṭhā ca raudrī ca kālī kalavikāriṇī
बलविकरणी पूज्या बलप्रमथनी क्रमात्
balavikaraṇī pūjyā balapramathanī kramāt
हां सर्वभूतदमनी केशराग्रे मनोन्मनी
hāṃ sarvabhūtadamanī keśarāgre manonmanī
क्षित्त्यादि शुद्धविद्यान्तु तत्त्वव्यापकमासनं
kṣittyādi śuddhavidyāntu tattvavyāpakamāsanaṃ
न्यसेत् सिंहासने देवं शुक्लं पञ्चमुखं विभुं
nyaset siṃhāsane devaṃ śuklaṃ pañcamukhaṃ vibhuṃ
दशबाहुं च खण्डेन्दुं दधानन्दक्षिणैः करैः
daśabāhuṃ ca khaṇḍenduṃ dadhānandakṣiṇaiḥ karaiḥ
शक्त्यृष्टिशूलखट्वाङ्गवरदं वामकैः करैः
śaktyṛṣṭiśūlakhaṭvāṅgavaradaṃ vāmakaiḥ karaiḥ
डमरुं वीजपुरञ्च नीलाब्जं सूत्रकोत्पलं
ḍamaruṃ vījapurañca nīlābjaṃ sūtrakotpalaṃ
द्वात्रिंशल्लक्षणोपेतां शैवीं मूर्तिन्तु मध्यतः
dvātriṃśallakṣaṇopetāṃ śaivīṃ mūrtintu madhyataḥ
हां हं हां शिवमूर्तये स्वप्रकाशं शिवं स्मरन्
hāṃ haṃ hāṃ śivamūrtaye svaprakāśaṃ śivaṃ smaran
ब्रह्मादिकारणत्यागान्मन्त्रं नीत्वा शिवास्पदं
brahmādikāraṇatyāgānmantraṃ nītvā śivāspadaṃ
ततो ललातमध्यस्थं स्फुरत्तारापतिप्रभं
tato lalātamadhyasthaṃ sphurattārāpatiprabhaṃ
षडङ्गेन समाकीर्णं विन्दुरूपं परं शिवं
ṣaḍaṅgena samākīrṇaṃ vindurūpaṃ paraṃ śivaṃ
पुष्पाञ्जलिगतं ध्यात्वा लक्ष्मीमूर्तौ निवेशयेत्
puṣpāñjaligataṃ dhyātvā lakṣmīmūrtau niveśayet
ओं हां हौं शिवाय नम आवाहन्या हृद्दा ततः
oṃ hāṃ hauṃ śivāya nama āvāhanyā hṛddā tataḥ
आवाह्य स्थाप्य स्थापन्या सन्निधायान्तिकं शिवं
āvāhya sthāpya sthāpanyā sannidhāyāntikaṃ śivaṃ
निरोधयेन्निष्ठुरया कालकान्त्या फडन्ततः
nirodhayenniṣṭhurayā kālakāntyā phaḍantataḥ
विघ्नानुत्सार्य विष्ठ्याथ लिङ्गमुद्रां नमस्कृतिं
vighnānutsārya viṣṭhyātha liṅgamudrāṃ namaskṛtiṃ
हृदावगुण्ठयेत् पश्चादावाहः सम्मुखी ततः
hṛdāvaguṇṭhayet paścādāvāhaḥ sammukhī tataḥ
निवेशनं स्थापनं स्यात्सन्निधानं तवास्मि भोः
niveśanaṃ sthāpanaṃ syātsannidhānaṃ tavāsmi bhoḥ
आकर्मकाण्डपर्यन्तं सन्नेधेयोपरिक्षयः
ākarmakāṇḍaparyantaṃ sannedheyoparikṣayaḥ
स्वभक्तेश् च प्रकाशोयस्तद्भवेदवगुण्ठनं
svabhakteś ca prakāśoyastadbhavedavaguṇṭhanaṃ
सकलीकरणं कृत्वा मन्त्रैः षड्भिरथैकतां
sakalīkaraṇaṃ kṛtvā mantraiḥ ṣaḍbhirathaikatāṃ
अङ्गानामङ्गिना सार्धं विदध्यादमृतीकृतं
aṅgānāmaṅginā sārdhaṃ vidadhyādamṛtīkṛtaṃ
चिच्छक्तिहृदयं शम्भोः शिव ऐश्वर्यमष्टधा
cicchaktihṛdayaṃ śambhoḥ śiva aiśvaryamaṣṭadhā
शिखावशित्वं चाभेद्यं तेजः कवचमैश्वरं
śikhāvaśitvaṃ cābhedyaṃ tejaḥ kavacamaiśvaraṃ
प्रतापो दुःसहश्चास्त्रमन्तरायापहारकं
pratāpo duḥsahaścāstramantarāyāpahārakaṃ
नमः स्वधा च स्वाहा च वौषट् चेति यथाक्रमं
namaḥ svadhā ca svāhā ca vauṣaṭ ceti yathākramaṃ
हृत्पुरःसरमुच्चार्य पाद्यादीनि निवेदयेत्
hṛtpuraḥsaramuccārya pādyādīni nivedayet
पाद्यं पादाम्बुजद्वन्द्वे वक्त्रेष्वाचमनीयकं
pādyaṃ pādāmbujadvandve vaktreṣvācamanīyakaṃ
अर्घ्यं शिरसि देवस्य दूर्वापुष्पाक्षतानि च
arghyaṃ śirasi devasya dūrvāpuṣpākṣatāni ca
एवं संस्कृत्य संस्कारैर् दशभिः परमेश्वरं
evaṃ saṃskṛtya saṃskārair daśabhiḥ parameśvaraṃ
यजेत् पञ्चोपचारेण विधिना कुसुमादिभिः
yajet pañcopacāreṇa vidhinā kusumādibhiḥ
अभ्युक्ष्योद्धर्त्य निर्म्भञ्ज्य राजिकालवणादिभिः
abhyukṣyoddhartya nirmbhañjya rājikālavaṇādibhiḥ
अर्घ्योदविन्दुपुष्पाद्यैर् गड्डूकैः स्नापयेच्छनैः
arghyodavindupuṣpādyair gaḍḍūkaiḥ snāpayecchanaiḥ
पयोदधिघृतक्षौद्रशर्कराद्यैर् अनुक्रमात्
payodadhighṛtakṣaudraśarkarādyair anukramāt
ईशादिमन्त्रितर्द्रव्यैर् अर्च्य तेषां विपर्ययः
īśādimantritardravyair arcya teṣāṃ viparyayaḥ
तोयधूपान्तरैः सर्वैर् मूलेन स्नपयेच्छिवं
toyadhūpāntaraiḥ sarvair mūlena snapayecchivaṃ
विरूक्ष्य यवचूर्णेन यथेष्टं शीतलैर् जलैः
virūkṣya yavacūrṇena yatheṣṭaṃ śītalair jalaiḥ
स्वशक्त्या गन्धतोयेन संस्नाप्य शुचिवाससा
svaśaktyā gandhatoyena saṃsnāpya śucivāsasā
निर्मार्ज्यार्घ्यं प्रदद्याच्च नोपरि भ्रामयेत् करं
nirmārjyārghyaṃ pradadyācca nopari bhrāmayet karaṃ
न शून्यमस्तकं लिङ्गं पुष्पैः कुर्यात्ततो ददेत्
na śūnyamastakaṃ liṅgaṃ puṣpaiḥ kuryāttato dadet
चन्दनाद्यैः समालभ्य पुष्पैः प्रार्च्य शिवाणुना
candanādyaiḥ samālabhya puṣpaiḥ prārcya śivāṇunā
धूपभाजनमस्त्रेण प्रोक्ष्याभ्यर्च्य शिवाणुना
dhūpabhājanamastreṇa prokṣyābhyarcya śivāṇunā
अस्त्रेण पूजितां घण्टां चादाय गुग्गुलं ददेत्
astreṇa pūjitāṃ ghaṇṭāṃ cādāya guggulaṃ dadet
दद्यादाचमनं पश्चात् स्वधान्तं हृदयाणुना
dadyādācamanaṃ paścāt svadhāntaṃ hṛdayāṇunā
आरात्रिकं समुत्तार्य तथैवाचामयेत् पुनः
ārātrikaṃ samuttārya tathaivācāmayet punaḥ
प्रणम्यादाय देवाज्ञां भोगाङ्गानि प्रपूजयेत्
praṇamyādāya devājñāṃ bhogāṅgāni prapūjayet
हृदग्नौ चन्द्रभं चैशे शिवं चामीकरप्रभं
hṛdagnau candrabhaṃ caiśe śivaṃ cāmīkaraprabhaṃ
शिखां रक्ताञ्च नैरृत्ये कृष्णं वर्म च वायवे
śikhāṃ raktāñca nairṛtye kṛṣṇaṃ varma ca vāyave
चतुर्वक्त्रं चतुर्बाहुं दलस्थान् पूजयेदिमान्
caturvaktraṃ caturbāhuṃ dalasthān pūjayedimān
दंष्ट्राकरालमप्यस्त्रं पूर्वादौ वज्रसन्निभं
daṃṣṭrākarālamapyastraṃ pūrvādau vajrasannibhaṃ
मूले हौं शिवाय नमः ओं हां हूं हीं हों शिरश् च
mūle hauṃ śivāya namaḥ oṃ hāṃ hūṃ hīṃ hoṃ śiraś ca
हृं शिखायै हैं वर्म हश्चास्त्रं परिवारयुताय च
hṛṃ śikhāyai haiṃ varma haścāstraṃ parivārayutāya ca
शिवाय दद्यात् पाद्यञ्च आचामञ्चार्घ्यमेव च
śivāya dadyāt pādyañca ācāmañcārghyameva ca
गन्धं पुष्पं धूपदीपं नैवेद्याचमनीयकं
gandhaṃ puṣpaṃ dhūpadīpaṃ naivedyācamanīyakaṃ
करोद्वर्तनताम्बूलं मुखवासञ्च दर्पणं
karodvartanatāmbūlaṃ mukhavāsañca darpaṇaṃ
शिरस्यारोप्य देवस्य दूर्वाक्षतपवित्रकं
śirasyāropya devasya dūrvākṣatapavitrakaṃ
मूलमष्टशतं जप्त्वा हृदयेनाभिमन्त्रितं
mūlamaṣṭaśataṃ japtvā hṛdayenābhimantritaṃ
चर्मणावेष्टितं खड्गं रक्षितं कुशपुष्पकैः
carmaṇāveṣṭitaṃ khaḍgaṃ rakṣitaṃ kuśapuṣpakaiḥ
अक्षतैर् मुद्राया युक्तं शिवमुद्भवसञ्ज्ञया
akṣatair mudrāyā yuktaṃ śivamudbhavasañjñayā
गुह्यातिगुह्यगुप्त्यर्थं गृहाणास्मत्कृतं जपं
guhyātiguhyaguptyarthaṃ gṛhāṇāsmatkṛtaṃ japaṃ
सिद्धिर्भवतु मे येन त्वत्प्रसादात्त्वयि स्थिते
siddhirbhavatu me yena tvatprasādāttvayi sthite
भोगी श्लोकं पठित्वाद्यं दक्षहस्तेन शम्भवे
bhogī ślokaṃ paṭhitvādyaṃ dakṣahastena śambhave
मूलाणुनार्घ्यतोयेन वरहस्ते निवेदयेत्
mūlāṇunārghyatoyena varahaste nivedayet
यत्किञ्चित् कुर्महे देव सदा सुकृतदुस्कृतं
yatkiñcit kurmahe deva sadā sukṛtaduskṛtaṃ
तन्मे शिवपदस्थस्य हूं क्षः क्षेपय शङ्कर
tanme śivapadasthasya hūṃ kṣaḥ kṣepaya śaṅkara
शिवो दाता शिवो भोक्ता शिवः सर्वमिदं जगत्
śivo dātā śivo bhoktā śivaḥ sarvamidaṃ jagat
शिवो जयति सर्वत्र यः शिवः सोहमेव च
śivo jayati sarvatra yaḥ śivaḥ sohameva ca
श्लोकद्वयमधीत्यैवं जपं देवाय चार्पयेत्
ślokadvayamadhītyaivaṃ japaṃ devāya cārpayet
शिवाङ्गानां दशांशञ्च दत्वार्घ्यं स्तुतिमाचरेत्
śivāṅgānāṃ daśāṃśañca datvārghyaṃ stutimācaret
प्रदक्षिणीकृत्य नमेच्चाष्टाङ्गञ्चाष्टमूर्तये
pradakṣiṇīkṛtya nameccāṣṭāṅgañcāṣṭamūrtaye
नत्वा ध्यानादिभिश् चैव यजेच्चित्रे ऽनलादिषु
natvā dhyānādibhiś caiva yajeccitre 'nalādiṣu
इत्य् आदिमहापुराणे आग्नेये शिवपूजा नाम चतुःसप्ततितमो ऽध्यायः ॥
ity ādimahāpurāṇe āgneye śivapūjā nāma catuḥsaptatitamo 'dhyāyaḥ ||