Chapter 77

कपिलापूजनं वक्ष्ये एभिर्मन्त्रैर् यजेच्च गां

kapilāpūjanaṃ vakṣye ebhirmantrair yajecca gāṃ

ओं कपिले नन्दे नमः ओं कपिले भद्रिके नमः

oṃ kapile nande namaḥ oṃ kapile bhadrike namaḥ

ओं कपिले सुशीले नमः कपिले सुरभिप्रभे

oṃ kapile suśīle namaḥ kapile surabhiprabhe

ओं कपिले सुमनसे नमः ओं भुक्तिमुक्तिप्रदे नमः

oṃ kapile sumanase namaḥ oṃ bhuktimuktiprade namaḥ

सौरभेयि जगन्मातर्देवानाममृतप्रदे

saurabheyi jaganmātardevānāmamṛtaprade

गृहाण वरदे ग्रासमीप्सितार्थञ्च देहि मे

gṛhāṇa varade grāsamīpsitārthañca dehi me

वन्दितासि वसिष्ठेन विश्वामित्रेण धीमता

vanditāsi vasiṣṭhena viśvāmitreṇa dhīmatā

कपिले हर मे पापं यन्मया दुष्कृतं कृतं

kapile hara me pāpaṃ yanmayā duṣkṛtaṃ kṛtaṃ

गावो ममाग्रतो नित्यं गावः पृष्ठत एव च

gāvo mamāgrato nityaṃ gāvaḥ pṛṣṭhata eva ca

गावो मे हृदये चापि गवां मध्ये वसाम्यहं

gāvo me hṛdaye cāpi gavāṃ madhye vasāmyahaṃ

दत्तं गृह्णन्तु मे ग्रासं जप्त्वा स्यां निर्मलः शिवः

dattaṃ gṛhṇantu me grāsaṃ japtvā syāṃ nirmalaḥ śivaḥ

प्रार्च्य विद्यापुस्तकानि गुरुपादौ नमेन्नरः

prārcya vidyāpustakāni gurupādau namennaraḥ

यजेत् स्नात्वा तु मध्याह्ने अष्टपुष्पिकया शिवं

yajet snātvā tu madhyāhne aṣṭapuṣpikayā śivaṃ

पीठमूर्तिशिवाङ्गानां पूजा स्यादष्टपुष्पिका

pīṭhamūrtiśivāṅgānāṃ pūjā syādaṣṭapuṣpikā

मध्याह्ने भोजनागारे सुलिप्ते पाकमानयेत्

madhyāhne bhojanāgāre sulipte pākamānayet

ततो मृत्युञ्जयेनैव वौषडन्तेन सप्तधा

tato mṛtyuñjayenaiva vauṣaḍantena saptadhā

जप्तैः सदर्भशङ्खस्थैः सिञ्चेत्तं वारिविन्दुभिः

japtaiḥ sadarbhaśaṅkhasthaiḥ siñcettaṃ vārivindubhiḥ

सर्वपाकाग्रमुद्धृत्य शिवाय विनिवेदयेत्

sarvapākāgramuddhṛtya śivāya vinivedayet

अथार्धं चुल्लिकाहोमे विधानायोपकल्पयेत्

athārdhaṃ cullikāhome vidhānāyopakalpayet

विशोध्य विधिना चुल्लीं तद्वह्निं पूरकाहुतिं

viśodhya vidhinā cullīṃ tadvahniṃ pūrakāhutiṃ

हुत्वा नाभ्यग्निना चैकं ततो रेचकवायुना

hutvā nābhyagninā caikaṃ tato recakavāyunā

वह्निवीजं समादाय कादिस्थानगतिक्रमात्

vahnivījaṃ samādāya kādisthānagatikramāt

शिवाग्निस्त्वमिति ध्यात्वा चुल्लिकाग्नौ निवेशयेत्

śivāgnistvamiti dhyātvā cullikāgnau niveśayet

ओं हां अग्नये नमो वै हां सोमाय वै नमः

oṃ hāṃ agnaye namo vai hāṃ somāya vai namaḥ

सूर्याय वृहस्पतये प्रजानां पतये नमः

sūryāya vṛhaspataye prajānāṃ pataye namaḥ

सर्वेभ्यश् चैव देवेभ्यः सर्वविश्वेभ्य एव च

sarvebhyaś caiva devebhyaḥ sarvaviśvebhya eva ca

हामग्नये खिष्टिकृते पूर्वादावर्चयेदिमान्

hāmagnaye khiṣṭikṛte pūrvādāvarcayedimān

स्वाहान्तामाहुतिं दत्वा क्षमयित्वा विसर्जयेत्

svāhāntāmāhutiṃ datvā kṣamayitvā visarjayet

चुल्ल्या दक्षिणबाहौ च यजेद्धर्माय वै नमः

cullyā dakṣiṇabāhau ca yajeddharmāya vai namaḥ

वामबाहावधर्माय काञ्जिकादिकभाण्डके

vāmabāhāvadharmāya kāñjikādikabhāṇḍake

रसपरिवर्तमानाय वरुणाय जलाग्नये

rasaparivartamānāya varuṇāya jalāgnaye

विघ्नराजो गृहद्वारे पेषण्यां सुभगे नमः

vighnarājo gṛhadvāre peṣaṇyāṃ subhage namaḥ

ओं रौद्रिके नमो गिरिके नमश् चओलूखले यजेत्

oṃ raudrike namo girike namaś caolūkhale yajet

बलप्रियायायुधाय नमस्ते मुषले यजेत्

balapriyāyāyudhāya namaste muṣale yajet

सम्मार्जन्यां देवतोक्ते कामाय शयनीयके

sammārjanyāṃ devatokte kāmāya śayanīyake

मध्यस्तम्भे च स्कन्दाय दत्वा वास्तुबलिं ततः

madhyastambhe ca skandāya datvā vāstubaliṃ tataḥ

भुञ्जीत पात्रे सौवर्णे पद्मिन्यादिदलादिके

bhuñjīta pātre sauvarṇe padminyādidalādike

आचार्यः साधकःपुत्र समयी मौनमास्थितः

ācāryaḥ sādhakaḥputra samayī maunamāsthitaḥ

वटाश्वत्थार्कवाताविसर्जभल्लातकांस्त्यजेत्

vaṭāśvatthārkavātāvisarjabhallātakāṃstyajet

अपोशानं पुरादाय प्राणाद्यैः प्रणवान्वितैः

apośānaṃ purādāya prāṇādyaiḥ praṇavānvitaiḥ

स्वाहान्तेनाहुतीः पञ्च दत्वादीप्योदरानलं

svāhāntenāhutīḥ pañca datvādīpyodarānalaṃ

नागः कूर्मो ऽथ कृकरो देवदत्तो धनञ्जयः

nāgaḥ kūrmo 'tha kṛkaro devadatto dhanañjayaḥ

एतेभ्य उपवायुभ्यः स्वाहापोषानवारिणा

etebhya upavāyubhyaḥ svāhāpoṣānavāriṇā

भक्तादिकं निवेद्याय पिवेच्छेषोदकं नरः

bhaktādikaṃ nivedyāya piveccheṣodakaṃ naraḥ

अमृतोपस्तरणमसि प्राणाहुतीस्ततो ददेत्

amṛtopastaraṇamasi prāṇāhutīstato dadet

प्राणाय स्वाहापानाय समानाय ततस् तथा

prāṇāya svāhāpānāya samānāya tatas tathā

उदानाय च व्यानाय भुक्त्वा चुल्लकमाचरेत्

udānāya ca vyānāya bhuktvā cullakamācaret