Chapter 80

वक्ष्ये दमनकारोहविधिं पूर्ववदाचरेत्

vakṣye damanakārohavidhiṃ pūrvavadācaret

हरकोपात् पुरा जातो भैरवो दमिताः सुराः

harakopāt purā jāto bhairavo damitāḥ surāḥ

तेनाथ शप्तो विटपो भवेति त्रिपुरारिणा

tenātha śapto viṭapo bhaveti tripurāriṇā

प्रसन्नेनेरितं चेदं पूजयिष्यन्ति ये नराः

prasanneneritaṃ cedaṃ pūjayiṣyanti ye narāḥ

परिपूर्णफलं तेषां नान्यथा ते भविष्यति

paripūrṇaphalaṃ teṣāṃ nānyathā te bhaviṣyati

सप्तम्यां वा त्रयोदश्यां दमनं संहितात्मभिः

saptamyāṃ vā trayodaśyāṃ damanaṃ saṃhitātmabhiḥ

सम्पूज्य बोधयेद्वृक्षं भववाक्येन मन्त्रवित्

sampūjya bodhayedvṛkṣaṃ bhavavākyena mantravit

हरप्रसादसंभूत त्वमत्र सन्निधीभव

haraprasādasaṃbhūta tvamatra sannidhībhava

शिवकार्यं समुद्दिश्य नेतव्यो ऽसि शिवाज्ञया

śivakāryaṃ samuddiśya netavyo 'si śivājñayā

गृहे ऽप्यामन्त्रणं कुर्यात् सायाह्ने चाधिवासनं

gṛhe 'pyāmantraṇaṃ kuryāt sāyāhne cādhivāsanaṃ

यथाविधि समभ्यर्च्य सूर्यशङ्करपावकान्

yathāvidhi samabhyarcya sūryaśaṅkarapāvakān

देवस्य पश्चिमे मूलं दद्यात्तस्य मृदा युतं

devasya paścime mūlaṃ dadyāttasya mṛdā yutaṃ

वामेन शिरसा वाथ नालं धात्रीं तथोत्तरे

vāmena śirasā vātha nālaṃ dhātrīṃ tathottare

दक्षिणे भग्नपत्रञ्च प्राच्यां पुष्पञ्च धारणं

dakṣiṇe bhagnapatrañca prācyāṃ puṣpañca dhāraṇaṃ

पुटिकास्थं फलं मूलमथैशान्यां यजेच्छिवं

puṭikāsthaṃ phalaṃ mūlamathaiśānyāṃ yajecchivaṃ

पञ्चाङ्गमञ्जलौ कृत्वा आमन्त्र्य शिरसि न्यसेत्

pañcāṅgamañjalau kṛtvā āmantrya śirasi nyaset

आमन्त्रितो ऽसि देवेश प्रातःकाले मया प्रभो

āmantrito 'si deveśa prātaḥkāle mayā prabho

कर्तव्यस्तपसो लाभः पूर्णं सर्वं तवाज्ञया

kartavyastapaso lābhaḥ pūrṇaṃ sarvaṃ tavājñayā

मूलेन शेषं पात्रस्थं पिधायाथ पवित्रकं

mūlena śeṣaṃ pātrasthaṃ pidhāyātha pavitrakaṃ

प्रातः स्नात्वा जगन्नाथं गन्धपुष्पादिभिर्यजेत्

prātaḥ snātvā jagannāthaṃ gandhapuṣpādibhiryajet

नित्यं नैमित्तिकं कृत्वा दमनैः पूजयेत्ततः

nityaṃ naimittikaṃ kṛtvā damanaiḥ pūjayettataḥ

शेषमञ्जलिमादाय आत्मविद्याशिवात्मभिः

śeṣamañjalimādāya ātmavidyāśivātmabhiḥ

मूलाद्यैर् ईश्वरान्तैश् च चतुर्थाञ्जलिना ततः

mūlādyair īśvarāntaiś ca caturthāñjalinā tataḥ

ओं हौं मखेश्वराय मखं पूरय शूलपाणये नमः

oṃ hauṃ makheśvarāya makhaṃ pūraya śūlapāṇaye namaḥ

शिवं वह्निं च सम्पूज्य गुरुं प्रार्च्याथ बोधयेत्

śivaṃ vahniṃ ca sampūjya guruṃ prārcyātha bodhayet

भगवन्नतिरिक्तं वा हीनं वा यन्मया कृतं

bhagavannatiriktaṃ vā hīnaṃ vā yanmayā kṛtaṃ

सर्वं तदस्तु सम्पूर्णं यच्च दामनकं मम

sarvaṃ tadastu sampūrṇaṃ yacca dāmanakaṃ mama

सकलं चैत्रमासोत्थं फलं प्राप्य दिवं व्रजेत्

sakalaṃ caitramāsotthaṃ phalaṃ prāpya divaṃ vrajet