Chapter 87

सन्दध्यादधुना विद्यां शान्त्या सार्धं यथाविधि

sandadhyādadhunā vidyāṃ śāntyā sārdhaṃ yathāvidhi

शान्तौ तत्त्वद्वयं लीनं भावेश्वरसदाशिवौ

śāntau tattvadvayaṃ līnaṃ bhāveśvarasadāśivau

हकारश् च क्षकारश् च द्वौ वर्णौ परिकीर्तितौ

hakāraś ca kṣakāraś ca dvau varṇau parikīrtitau

रुद्राः समाननामानो भुवनैः सह तद्यथा

rudrāḥ samānanāmāno bhuvanaiḥ saha tadyathā

प्रभवः समयः क्षुद्रो विमलः शिव इत्य् अपि

prabhavaḥ samayaḥ kṣudro vimalaḥ śiva ity api

घनौ निरञ्जनाकारौ स्वशिवौ दीप्तिकारणौ

ghanau nirañjanākārau svaśivau dīptikāraṇau

त्रिदशेश्वरनामा च त्रिदशः कालसज्ज्ञकः

tridaśeśvaranāmā ca tridaśaḥ kālasajjñakaḥ

पुरुषः कवचौ मन्त्रौ वीजे विन्दूपकारकौ

puruṣaḥ kavacau mantrau vīje vindūpakārakau

अलम्बुषायसानाड्यौ वायू कृकरकर्मकौ

alambuṣāyasānāḍyau vāyū kṛkarakarmakau

इन्द्रिये त्वक्करावस्या स्पर्शस्तु विषयो मतः

indriye tvakkarāvasyā sparśastu viṣayo mataḥ

गुणौ स्पर्शनिनादौ द्वावेकः कारणमीश्वरः

guṇau sparśaninādau dvāvekaḥ kāraṇamīśvaraḥ

तुर्म्यावस्थेति शान्तिस्थं सम्भाव्य भुवनादिकं

turmyāvastheti śāntisthaṃ sambhāvya bhuvanādikaṃ

विदध्यात्ताडनं भेदं प्रवेशञ्च वियोजनं

vidadhyāttāḍanaṃ bhedaṃ praveśañca viyojanaṃ

आकृष्य ग्रहणं कुर्याच्छान्तेर्वदनसूत्रतः

ākṛṣya grahaṇaṃ kuryācchāntervadanasūtrataḥ

आत्मन्यारोप्य सङ्गृह्य कलां कुण्डे निवेशयेत्

ātmanyāropya saṅgṛhya kalāṃ kuṇḍe niveśayet

ईशं तवाधिकारे ऽस्मिन् मुमुक्षुं दीक्षयाम्यहं

īśaṃ tavādhikāre 'smin mumukṣuṃ dīkṣayāmyahaṃ

भव्यं त्वयानुकूलेन कुर्यात् विज्ञापनामिति

bhavyaṃ tvayānukūlena kuryāt vijñāpanāmiti

आवाहनादिकं पित्रोः शिष्यस्य ताडनादिकं

āvāhanādikaṃ pitroḥ śiṣyasya tāḍanādikaṃ

विधायादाय चैतन्यं विधिना.अत्मनि योजयेत्

vidhāyādāya caitanyaṃ vidhinā.atmani yojayet

पूर्ववत् पितृसंयोगं भावयित्वोद्भवाख्यया

pūrvavat pitṛsaṃyogaṃ bhāvayitvodbhavākhyayā

हृत्सम्पुटात्मवीजेन देवीगर्भे नियोजयेत्

hṛtsampuṭātmavījena devīgarbhe niyojayet

देहोत्पत्तौ हृदा पञ्च शिरसा जन्महेतवे

dehotpattau hṛdā pañca śirasā janmahetave

शिखया वाधिकाराय भोगाय कवचाणुना

śikhayā vādhikārāya bhogāya kavacāṇunā

लयाय शस्त्रमन्त्रेण श्रोतःशुद्धौ शिवेन च

layāya śastramantreṇa śrotaḥśuddhau śivena ca

तत्त्वशुद्धौ हृदा ह्य् एवं गर्भाधानादि पूर्ववत्

tattvaśuddhau hṛdā hy evaṃ garbhādhānādi pūrvavat

वर्मणा पाशशैथिल्यं निष्कृत्यैवं शतं जपेत्

varmaṇā pāśaśaithilyaṃ niṣkṛtyaivaṃ śataṃ japet

मलशक्तितिरोधने शस्त्रेणाहुतिपञ्चकं

malaśaktitirodhane śastreṇāhutipañcakaṃ

एवं पाशवियोगे ऽपि ततः सप्तास्त्रजप्तया

evaṃ pāśaviyoge 'pi tataḥ saptāstrajaptayā

छिन्द्यादस्त्रेण कर्तर्या पाशान्वीजवता यथा

chindyādastreṇa kartaryā pāśānvījavatā yathā

विसृज्य वर्तुलीकृत्य पाशमन्त्रेण पूर्ववत्

visṛjya vartulīkṛtya pāśamantreṇa pūrvavat

घृतपूर्णे श्रुवे दत्वा कलास्त्रेणैव होमयेत्

ghṛtapūrṇe śruve datvā kalāstreṇaiva homayet

अस्त्रेण जुहुयात् पञ्च पाशाङ्कुशनिवृत्तये

astreṇa juhuyāt pañca pāśāṅkuśanivṛttaye

प्रायश्चित्तनिषेधाय दद्यादष्टाहुतीरथ

prāyaścittaniṣedhāya dadyādaṣṭāhutīratha

हृदेश्वरं समावाह्य कृत्वा पूजनतर्पणे

hṛdeśvaraṃ samāvāhya kṛtvā pūjanatarpaṇe

विदधीत विधानेन तस्मै शुल्कसमर्पणं

vidadhīta vidhānena tasmai śulkasamarpaṇaṃ

निःशेषदग्धपाशस्य पशोरस्येश्वर त्वया

niḥśeṣadagdhapāśasya paśorasyeśvara tvayā

न स्थेयं बन्धकत्वेन शिवाज्ञां श्रावयेदिति

na stheyaṃ bandhakatvena śivājñāṃ śrāvayediti

विसृजेदीश्वरन्देवं रौद्रात्मानं नियोजयेत्

visṛjedīśvarandevaṃ raudrātmānaṃ niyojayet

ईषच्चन्द्रमिवात्मानं विधिना.अत्मनि योजयेत्

īṣaccandramivātmānaṃ vidhinā.atmani yojayet

सूत्रे संयोजयेदेनं शुद्धयोद्भवमुद्रया

sūtre saṃyojayedenaṃ śuddhayodbhavamudrayā

दद्यात् मूलेन शिष्यस्य शिरस्यमृतविन्दुकं

dadyāt mūlena śiṣyasya śirasyamṛtavindukaṃ

विसृज्य पितरौ वह्नेः पूजितौ कुसुमादिभिः

visṛjya pitarau vahneḥ pūjitau kusumādibhiḥ

दद्यात् पूर्णां विधानज्ञो निःशेषविधिपूरणीं

dadyāt pūrṇāṃ vidhānajño niḥśeṣavidhipūraṇīṃ

अस्यामपि विधातव्यं पूर्ववत्ताडनादिअकं

asyāmapi vidhātavyaṃ pūrvavattāḍanādiakaṃ

स्ववीजन्तु विशेषः स्याच्छुद्धिः शान्तेरपीडिता

svavījantu viśeṣaḥ syācchuddhiḥ śānterapīḍitā