Chapter 94

ईशादिषु चरक्याद्याः पूर्ववत् पूजयेद्वहिः

īśādiṣu carakyādyāḥ pūrvavat pūjayedvahiḥ

आहुतित्रितयं दद्यात् प्रतिदेवमनुक्रमात्

āhutitritayaṃ dadyāt pratidevamanukramāt

दत्वा भूतबलिं लग्ने शिलान्यासमनुक्रमात्

datvā bhūtabaliṃ lagne śilānyāsamanukramāt

मध्यसूत्रे न्यसेच्छक्तिं कुम्भञ्चानन्तमुत्तमं

madhyasūtre nyasecchaktiṃ kumbhañcānantamuttamaṃ

नकारारूढमूलेन कुम्भे ऽस्मिन् धारयेच्छिलां

nakārārūḍhamūlena kumbhe 'smin dhārayecchilāṃ

कुम्भानष्टौ सभद्रादीन् दिक्षु पूर्वादिषु क्रमात्

kumbhānaṣṭau sabhadrādīn dikṣu pūrvādiṣu kramāt

लोकपालाणुभिर्न्यस्य श्वभ्रेषु न्यस्तशक्तिषु

lokapālāṇubhirnyasya śvabhreṣu nyastaśaktiṣu

शिलास्तेष्वथ नन्दाद्याः क्रमेण विनियोजयेत्

śilāsteṣvatha nandādyāḥ krameṇa viniyojayet

शम्बरैर् मूर्तिनाथानां यथा स्युर्भित्तिमध्यतः

śambarair mūrtināthānāṃ yathā syurbhittimadhyataḥ

तासु धर्मादिकानष्टौ कोणात् कोणं विभागशः

tāsu dharmādikānaṣṭau koṇāt koṇaṃ vibhāgaśaḥ

सुभद्रादिषु नन्दाद्याश् चतस्रो ऽग्न्यादिकोणगाः

subhadrādiṣu nandādyāś catasro 'gnyādikoṇagāḥ

अजिताद्याश् च पूर्वादिजयादिष्वथ विन्यसेत्

ajitādyāś ca pūrvādijayādiṣvatha vinyaset

ब्रह्माणं चोपरि मस्य व्यापकं च महेश्वरं

brahmāṇaṃ copari masya vyāpakaṃ ca maheśvaraṃ

चिन्तयेदेषु चाधानं व्योमप्रसादमध्यगं

cintayedeṣu cādhānaṃ vyomaprasādamadhyagaṃ

बलिन्दत्त्वा जपेदस्त्रं विघ्नदोषनिवारणं

balindattvā japedastraṃ vighnadoṣanivāraṇaṃ

शिलापञ्चकपक्षे ऽपि मनागुद्दिश्यते यथा

śilāpañcakapakṣe 'pi manāguddiśyate yathā

मध्ये पूर्णशिलान्यासः सुभद्रकलशे ऽर्धतः

madhye pūrṇaśilānyāsaḥ subhadrakalaśe 'rdhataḥ

पद्मादिषु च नन्दाद्याः कोणेष्वग्न्यादिषु क्रमात्

padmādiṣu ca nandādyāḥ koṇeṣvagnyādiṣu kramāt

मध्यभावे चतस्रो ऽपि मातृवद्भावसम्मताः

madhyabhāve catasro 'pi mātṛvadbhāvasammatāḥ

ओं पूर्णे त्वं महाविश्वे सर्वसन्दोहलक्षणे

oṃ pūrṇe tvaṃ mahāviśve sarvasandohalakṣaṇe

सर्वसम्पूर्णमेवात्र कुरुष्वाङ्गिरसः सुते

sarvasampūrṇamevātra kuruṣvāṅgirasaḥ sute

ओं नन्दे त्वं नन्दिनी पुंसां त्वामत्र स्थापयाम्यहं

oṃ nande tvaṃ nandinī puṃsāṃ tvāmatra sthāpayāmyahaṃ

प्रासादे तिष्ठ सन्तृप्ता यावच्चन्द्रार्कतारकं

prāsāde tiṣṭha santṛptā yāvaccandrārkatārakaṃ

आयुः कामं श्रियन्नन्दे देहि वासिष्ठ देहिनां

āyuḥ kāmaṃ śriyannande dehi vāsiṣṭha dehināṃ

अस्मिन् रक्षा सदा कार्या प्रासादे यत्नतस्त्वया

asmin rakṣā sadā kāryā prāsāde yatnatastvayā

ओं भद्रे त्वं सर्वदा भद्रं लोकानां कुरु काश्यपि

oṃ bhadre tvaṃ sarvadā bhadraṃ lokānāṃ kuru kāśyapi

आयुर्दा कामदा देवि श्रीप्रदा च सदा भव

āyurdā kāmadā devi śrīpradā ca sadā bhava

ओं जये ऽत्र सर्वदा देवि श्रीदा.अयुर्दा च सदा भव

oṃ jaye 'tra sarvadā devi śrīdā.ayurdā ca sadā bhava

ओं जये ऽत्र सर्वदा देवि तिष्ठ त्वं स्थापिता मय

oṃ jaye 'tra sarvadā devi tiṣṭha tvaṃ sthāpitā maya

नित्यञ्जयाय भूत्यै च स्वामिनी भव भार्गवि

nityañjayāya bhūtyai ca svāminī bhava bhārgavi

ओं रिक्ते ऽतिरिक्तदोषघ्ने सिद्धिमुक्तिप्रदे शुभं

oṃ rikte 'tiriktadoṣaghne siddhimuktiprade śubhaṃ

सर्वदा सर्वदेशस्थे तिष्ठास्मिन् विश्वरूपिणि

sarvadā sarvadeśasthe tiṣṭhāsmin viśvarūpiṇi

गगनायतनन्ध्यात्वा तत्र तत्त्वत्रयं न्यसेत्

gaganāyatanandhyātvā tatra tattvatrayaṃ nyaset

प्रायश्चित्तन्ततो हुत्वा विधिना विसृजेन्मखं

prāyaścittantato hutvā vidhinā visṛjenmakhaṃ