धान्यतीर्थम् इति ख्यातं सर्वकामप्रदं नृणाम् सुभिक्षं क्षेमदं पुंसां सर्वापद्विनिवारणम् ॥
dhānyatīrtham iti khyātaṃ sarvakāmapradaṃ nṛṇām subhikṣaṃ kṣemadaṃ puṃsāṃ sarvāpadvinivāraṇam //
ओषध्यः सोमराजानं पतिं प्राप्य मुदान्विताः ऊचुः सर्वस्य लोकस्य गङ्गायाश् चेप्सितं वचः ॥
oṣadhyaḥ somarājānaṃ patiṃ prāpya mudānvitāḥ ūcuḥ sarvasya lokasya gaṅgāyāś cepsitaṃ vacaḥ //
वैदिकी पुण्यगाथास्ति यां वै वेदविदो विदुः भूमिं सस्यवतीं कश्चिन् मातरं मातृसंमिताम् ॥
vaidikī puṇyagāthāsti yāṃ vai vedavido viduḥ bhūmiṃ sasyavatīṃ kaścin mātaraṃ mātṛsaṃmitām //
गङ्गासमीपे यो दद्यात् सर्वकामान् अवाप्नुयात् भूमिं सस्यवतीं गाश् च ओषधीश् च मुदान्वितः ॥
gaṅgāsamīpe yo dadyāt sarvakāmān avāpnuyāt bhūmiṃ sasyavatīṃ gāś ca oṣadhīś ca mudānvitaḥ //
विष्णुब्रह्मेशरूपाय यो दद्याद् भक्तिमान् नरः सर्वं तद् अक्षयं विद्यात् सर्वकामान् अवाप्नुयात् ॥
viṣṇubrahmeśarūpāya yo dadyād bhaktimān naraḥ sarvaṃ tad akṣayaṃ vidyāt sarvakāmān avāpnuyāt //
ओषध्यः सोमराजन्याः सोमश् चाप्य् ओषधीपतिः इति ज्ञात्वा ब्रह्मविद ओषधीर् यः प्रदास्यति ॥
oṣadhyaḥ somarājanyāḥ somaś cāpy oṣadhīpatiḥ iti jñātvā brahmavida oṣadhīr yaḥ pradāsyati //
सर्वान् कामान् अवाप्नोति ब्रह्मलोके महीयते ता एव सोमराजन्याः प्रीताः प्रोचुः पुनः पुनः ॥
sarvān kāmān avāpnoti brahmaloke mahīyate tā eva somarājanyāḥ prītāḥ procuḥ punaḥ punaḥ //
यो ऽस्मान् ददाति गङ्गायां तं राजन् पारयामसि त्वम् उत्तमश् चौषधीश त्वदधीनं चराचरम् ॥
yo 'smān dadāti gaṅgāyāṃ taṃ rājan pārayāmasi tvam uttamaś cauṣadhīśa tvadadhīnaṃ carācaram //
ओषधयः संवदन्ते सोमेन सह राज्ञा यो ऽस्मान् ददाति विप्रेभ्यस् तं राजन् पारयामसि ॥
oṣadhayaḥ saṃvadante somena saha rājñā yo 'smān dadāti viprebhyas taṃ rājan pārayāmasi //
वयं च ब्रह्मरूपिण्यः प्राणरूपिण्य एव च यो ऽस्मान् ददाति विप्रेभ्यस् तं राजन् पारयामसि ॥
vayaṃ ca brahmarūpiṇyaḥ prāṇarūpiṇya eva ca yo 'smān dadāti viprebhyas taṃ rājan pārayāmasi //
अस्मान् ददाति यो नित्यं ब्राह्मणेभ्यो जितव्रतः उपास्तिर् अस्ति सास्माकं तं राजन् पारयामसि ॥
asmān dadāti yo nityaṃ brāhmaṇebhyo jitavrataḥ upāstir asti sāsmākaṃ taṃ rājan pārayāmasi //
स्थावरं जङ्गमं किंचिद् अस्माभिर् व्यापृतं जगत् यो ऽस्मान् ददाति विप्रेभ्यस् तं राजन् पारयामसि ॥
sthāvaraṃ jaṅgamaṃ kiṃcid asmābhir vyāpṛtaṃ jagat yo 'smān dadāti viprebhyas taṃ rājan pārayāmasi //
हव्यं कव्यं यद् अमृतं यत् किंचिद् उपभुज्यते तद्गरीयश् च यो दद्यात् तं राजन् पारयामसि ॥
havyaṃ kavyaṃ yad amṛtaṃ yat kiṃcid upabhujyate tadgarīyaś ca yo dadyāt taṃ rājan pārayāmasi //
इत्य् एतां वैदिकीं गाथां यः शृणोति स्मरेत वा पठते भक्तिम् आपन्नस् तं राजन् पारयामसि ॥
ity etāṃ vaidikīṃ gāthāṃ yaḥ śṛṇoti smareta vā paṭhate bhaktim āpannas taṃ rājan pārayāmasi //
यत्रैषा पठिता गाथा सोमेन सह राज्ञा गङ्गातीरे चौषधीभिर् धान्यतीर्थं तद् उच्यते ॥
yatraiṣā paṭhitā gāthā somena saha rājñā gaṅgātīre cauṣadhībhir dhānyatīrthaṃ tad ucyate //
ततः प्रभृति तत् तीर्थम् औषध्यं सौम्यम् एव च अमृतं वेदगाथं च मातृतीर्थं तथैव च ॥
tataḥ prabhṛti tat tīrtham auṣadhyaṃ saumyam eva ca amṛtaṃ vedagāthaṃ ca mātṛtīrthaṃ tathaiva ca //
एषु स्नानं जपो होमो दानं च पितृतर्पणम् अन्नदानं तु यः कुर्यात् तद् आनन्त्याय कल्पते ॥
eṣu snānaṃ japo homo dānaṃ ca pitṛtarpaṇam annadānaṃ tu yaḥ kuryāt tad ānantyāya kalpate //
षट्शताधिकसाहस्रं तीर्थानां तीरयोर् द्वयोः सर्वपापनिहन्तॄणां सर्वसंपद्विवर्धनम् ॥
ṣaṭśatādhikasāhasraṃ tīrthānāṃ tīrayor dvayoḥ sarvapāpanihantṝṇāṃ sarvasaṃpadvivardhanam //