Chapter 132

यक्षिणीसंगमं नाम तीर्थं सर्वफलप्रदम् तत्र स्नानेन दानेन सर्वान् कामान् अवाप्नुयात् ॥

yakṣiṇīsaṃgamaṃ nāma tīrthaṃ sarvaphalapradam tatra snānena dānena sarvān kāmān avāpnuyāt //

यत्र यक्षेश्वरो देवो दर्शनाद् भुक्तिमुक्तिदः तत्र च स्नानमात्रेण सत्त्रयागफलं लभेत् ॥

yatra yakṣeśvaro devo darśanād bhuktimuktidaḥ tatra ca snānamātreṇa sattrayāgaphalaṃ labhet //

विश्वावसोः स्वसा नाम्ना पिप्पला गुरुहासिनी ऋषीणां सत्त्रम् अगमद् गौतमीतीरवर्तिनाम् ॥

viśvāvasoḥ svasā nāmnā pippalā guruhāsinī ṛṣīṇāṃ sattram agamad gautamītīravartinām //

दृष्ट्वा तत्र ऋषीन् क्षामान् सा जहासातिगर्विता या गत्वाश्रावय वौषड् अस्तु श्रौषड् इति स्थिरम् ॥

dṛṣṭvā tatra ṛṣīn kṣāmān sā jahāsātigarvitā yā gatvāśrāvaya vauṣaḍ astu śrauṣaḍ iti sthiram //

विस्वरेण ब्रुवती तां ते शेपुः स्राविणी भव ततो नद्य् अभवत् तत्र यक्षिणीति सुविश्रुता ॥

visvareṇa bruvatī tāṃ te śepuḥ srāviṇī bhava tato nady abhavat tatra yakṣiṇīti suviśrutā //

ततो विश्वावसुः पूज्य ऋषीन् देवं त्रिलोचनम् संगम्य चैव गौतम्या तां विशापाम् अथाकरोत् ॥

tato viśvāvasuḥ pūjya ṛṣīn devaṃ trilocanam saṃgamya caiva gautamyā tāṃ viśāpām athākarot //

ततः प्रभृति तत् तीर्थं यक्षिणीसंगमं स्मृतम् तत्र स्नानादिदानेन सर्वान् कामान् अवाप्नुयात् ॥

tataḥ prabhṛti tat tīrthaṃ yakṣiṇīsaṃgamaṃ smṛtam tatra snānādidānena sarvān kāmān avāpnuyāt //

विश्वावसोः प्रसन्नो ऽभूद् यत्र शंभुः शिवान्वितः शैवं तत् परमं तीर्थं दुर्गातीर्थं च विश्रुतम् ॥

viśvāvasoḥ prasanno 'bhūd yatra śaṃbhuḥ śivānvitaḥ śaivaṃ tat paramaṃ tīrthaṃ durgātīrthaṃ ca viśrutam //

सर्वपापौघहरणं सर्वदुर्गतिनाशनम् सर्वेषां तीर्थमुख्यानां तद् धि सारं महामुने तीर्थं मुनिवरैः ख्यातं सर्वसिद्धिप्रदं नृणाम् ॥

sarvapāpaughaharaṇaṃ sarvadurgatināśanam sarveṣāṃ tīrthamukhyānāṃ tad dhi sāraṃ mahāmune tīrthaṃ munivaraiḥ khyātaṃ sarvasiddhipradaṃ nṛṇām //