देवस्थानम् इति ख्यातं तीर्थं त्रैलोक्यविश्रुतम् तस्य प्रभावं वक्ष्यामि शृणु यत्नेन नारद ॥
devasthānam iti khyātaṃ tīrthaṃ trailokyaviśrutam tasya prabhāvaṃ vakṣyāmi śṛṇu yatnena nārada //
पुरा कृतयुगस्यादौ देवदानवसंगरे प्रवृत्ते वा सिंहिकेति विख्याता दैत्यसुन्दरी ॥
purā kṛtayugasyādau devadānavasaṃgare pravṛtte vā siṃhiketi vikhyātā daityasundarī //
तस्याः पुत्रो महादैत्यो राहुर् नाम महाबलः अमृते तु समुत्पन्ने सैंहिकेये च भेदिते ॥
tasyāḥ putro mahādaityo rāhur nāma mahābalaḥ amṛte tu samutpanne saiṃhikeye ca bhedite //
तस्य पुत्रो महादैत्यो मेघहास इति श्रुतः पितरं घातितं श्रुत्वा तपस् तेपे ऽतिदुःखितः ॥
tasya putro mahādaityo meghahāsa iti śrutaḥ pitaraṃ ghātitaṃ śrutvā tapas tepe 'tiduḥkhitaḥ //
तपस्यन्तं राहुसुतं गौतमीतीरम् आश्रितम् देवाश् च ऋषयः सर्वे तम् ऊचुर् अतिभीतवत् ॥
tapasyantaṃ rāhusutaṃ gautamītīram āśritam devāś ca ṛṣayaḥ sarve tam ūcur atibhītavat //
तपो जहि महाबाहो यत् ते मनसि संस्थितम् सर्वं भवतु नामेदं शिवगङ्गाप्रसादतः शिवगङ्गाप्रसादेन किं नामास्त्य् अत्र दुर्लभम् ॥
tapo jahi mahābāho yat te manasi saṃsthitam sarvaṃ bhavatu nāmedaṃ śivagaṅgāprasādataḥ śivagaṅgāprasādena kiṃ nāmāsty atra durlabham //
परिभूतः पिता पूज्यो युष्माभिर् मम दैवतम् तस्यापि मम चात्यन्तं प्रीतिश् च क्रियते यदि ॥
paribhūtaḥ pitā pūjyo yuṣmābhir mama daivatam tasyāpi mama cātyantaṃ prītiś ca kriyate yadi //
भवद्भिस् तपसो ऽस्माच् च अहं वैरान् निवर्तये वैरनिर्यातनं कार्यं पुत्रेण पितुर् आदरात् प्रार्थयन्ते भवन्तश् चेत् पूर्णास् तन् मे मनोरथाः ॥
bhavadbhis tapaso 'smāc ca ahaṃ vairān nivartaye vairaniryātanaṃ kāryaṃ putreṇa pitur ādarāt prārthayante bhavantaś cet pūrṇās tan me manorathāḥ //
ततः सुरगणाः सर्वे राहुं चक्रुर् ग्रहानुगम् तं चापि मेघहासं ते चक्रू राक्षसपुंगवम् ॥
tataḥ suragaṇāḥ sarve rāhuṃ cakrur grahānugam taṃ cāpi meghahāsaṃ te cakrū rākṣasapuṃgavam //
ततो ऽभवद् राहुसुतो नैरृताधिपतिः प्रभुः पुनश् चाह सुरान् दैत्यो मम ख्यातिर् यथा भवेत् ॥
tato 'bhavad rāhusuto nairṛtādhipatiḥ prabhuḥ punaś cāha surān daityo mama khyātir yathā bhavet //
तीर्थस्यास्य प्रभावश् च दातव्य इति मे मतिः तथेत्य् उक्त्वा ददुर् देवाः सर्वम् एव मनोगतम् ॥
tīrthasyāsya prabhāvaś ca dātavya iti me matiḥ tathety uktvā dadur devāḥ sarvam eva manogatam //
दैत्येश्वरस्य देवर्षे तन्नाम्ना तीर्थम् उच्यते देवा यतो ऽभवन् सर्वे तत्र स्थाने महामते ॥
daityeśvarasya devarṣe tannāmnā tīrtham ucyate devā yato 'bhavan sarve tatra sthāne mahāmate //
देवस्थानं तु तत् तीर्थं देवानाम् अपि दुर्लभम् यत्र देवेश्वरो देवो देवतीर्थं ततः स्मृतम् ॥
devasthānaṃ tu tat tīrthaṃ devānām api durlabham yatra deveśvaro devo devatīrthaṃ tataḥ smṛtam //
तत्राष्टादश तीर्थानि दैत्यपूज्यानि नारद तेषु स्नानं च दानं च महापातकनाशनम् ॥
tatrāṣṭādaśa tīrthāni daityapūjyāni nārada teṣu snānaṃ ca dānaṃ ca mahāpātakanāśanam //