नारसिंहम् इति ख्यातं गङ्गाया उत्तरे तटे तस्यानुभावं वक्ष्यामि सर्वरक्षाविधायकम् ॥
nārasiṃham iti khyātaṃ gaṅgāyā uttare taṭe tasyānubhāvaṃ vakṣyāmi sarvarakṣāvidhāyakam //
हिरण्यकशिपुः पूर्वम् अभवद् बलिनां वरः तपसा विक्रमेणापि देवानाम् अपराजितः ॥
hiraṇyakaśipuḥ pūrvam abhavad balināṃ varaḥ tapasā vikrameṇāpi devānām aparājitaḥ //
हरिभक्तात्मजद्वेषकलुषीकृतमानसः आविर्भूय सभास्तम्भाद् विश्वात्मत्वं प्रदर्शयन् ॥
haribhaktātmajadveṣakaluṣīkṛtamānasaḥ āvirbhūya sabhāstambhād viśvātmatvaṃ pradarśayan //
तं हत्वा नरसिंहस् तत्सैन्यम् अद्रावयत् तदा सर्वान् हत्वा महादैत्यान् क्रमेणाजौ महामृगः ॥
taṃ hatvā narasiṃhas tatsainyam adrāvayat tadā sarvān hatvā mahādaityān krameṇājau mahāmṛgaḥ //
रसातलस्थाञ् शत्रूंश् च जित्वा स्वर्लोकम् ईयिवान् तत्र जित्वा भुवं गत्वा दैत्यान् हत्वा नगस्थितान् ॥
rasātalasthāñ śatrūṃś ca jitvā svarlokam īyivān tatra jitvā bhuvaṃ gatvā daityān hatvā nagasthitān //
समुद्रस्थान् नदीसंस्थान् ग्रामस्थान् वनवासिनः नानारूपधरान् दैत्यान् निजघान मृगाकृतिः ॥
samudrasthān nadīsaṃsthān grāmasthān vanavāsinaḥ nānārūpadharān daityān nijaghāna mṛgākṛtiḥ //
आकाशगान् वायुसंस्थाञ् ज्योतिर्लोकम् उपागतान् वज्रपाताधिकनखः समुद्धूतमहासटः ॥
ākāśagān vāyusaṃsthāñ jyotirlokam upāgatān vajrapātādhikanakhaḥ samuddhūtamahāsaṭaḥ //
दैत्यगर्भस्राविगर्जी निर्जिताशेषराक्षसः महानादैर् वीक्षितैश् च प्रलयानलसंनिभैः ॥
daityagarbhasrāvigarjī nirjitāśeṣarākṣasaḥ mahānādair vīkṣitaiś ca pralayānalasaṃnibhaiḥ //
चपेटैर् अङ्गविक्षेपैर् असुरान् पर्यचूर्णयत् एवं हत्वा बहुविधान् गौतमीम् अगमद् धरिः ॥
capeṭair aṅgavikṣepair asurān paryacūrṇayat evaṃ hatvā bahuvidhān gautamīm agamad dhariḥ //
स्वपदाम्बुजसंभूतां मनोनयननन्दिनीम् तत्राम्बर्य इति ख्यातो दण्डकाधिपते रिपुः ॥
svapadāmbujasaṃbhūtāṃ manonayananandinīm tatrāmbarya iti khyāto daṇḍakādhipate ripuḥ //
देवानां दुर्जयो योद्धा बलेन महतावृतः तेनाभवन् महारौद्रं भीषणं लोमहर्षणम् ॥
devānāṃ durjayo yoddhā balena mahatāvṛtaḥ tenābhavan mahāraudraṃ bhīṣaṇaṃ lomaharṣaṇam //
शस्त्रास्त्रवर्षणं युद्धं हरिणा दैत्यसूनुना निजघान हरिः श्रीमांस् तं रिपुं ह्य् उत्तरे तटे ॥
śastrāstravarṣaṇaṃ yuddhaṃ hariṇā daityasūnunā nijaghāna hariḥ śrīmāṃs taṃ ripuṃ hy uttare taṭe //
गङ्गायां नारसिंहं तु तीर्थं त्रैलोक्यविश्रुतम् स्नानदानादिकं तत्र सर्वपापग्रहार्दनम् ॥
gaṅgāyāṃ nārasiṃhaṃ tu tīrthaṃ trailokyaviśrutam snānadānādikaṃ tatra sarvapāpagrahārdanam //
सर्वरक्षाकरं नित्यं जरामरणवारणम् यथा सुराणां सर्वेषां न कोपि हरिणा समः ॥
sarvarakṣākaraṃ nityaṃ jarāmaraṇavāraṇam yathā surāṇāṃ sarveṣāṃ na kopi hariṇā samaḥ //
तीर्थानाम् अप्य् अशेषाणां तथा तत् तीर्थम् उत्तमम् तत्र तीर्थे नरः स्नात्वा कुर्यान् नृहरिपूजनम् ॥
tīrthānām apy aśeṣāṇāṃ tathā tat tīrtham uttamam tatra tīrthe naraḥ snātvā kuryān nṛharipūjanam //
स्वर्गे मर्त्ये तले वापि तस्य किंचिन् न दुर्लभम् इत्याद्य् अष्टौ मुने तत्र महातीर्थानि नारद ॥
svarge martye tale vāpi tasya kiṃcin na durlabham ityādy aṣṭau mune tatra mahātīrthāni nārada //
पृथक् पृथक् तीर्थकोटिफलम् आहुर् मनीषिणः अश्रद्धयापि यन्नाम्नि स्मृते सर्वाघसंक्षयः ॥
pṛthak pṛthak tīrthakoṭiphalam āhur manīṣiṇaḥ aśraddhayāpi yannāmni smṛte sarvāghasaṃkṣayaḥ //
भवेत् साक्षान् नृसिंहो ऽसौ सर्वदा यत्र संस्थितः तत् तीर्थसेवासंजातं फलं कैर् इह वर्ण्यते ॥
bhavet sākṣān nṛsiṃho 'sau sarvadā yatra saṃsthitaḥ tat tīrthasevāsaṃjātaṃ phalaṃ kair iha varṇyate //
यथा न देवो नृहरेर् अधिकः क्वापि वर्तते तथा नृसिंहतीर्थेन समं तीर्थं न कुत्रचित् ॥
yathā na devo nṛharer adhikaḥ kvāpi vartate tathā nṛsiṃhatīrthena samaṃ tīrthaṃ na kutracit //