भावतीर्थम् इति प्रोक्तं यत्र साक्षाद् भवः स्थितः अशेषजगदन्तस्थो भूतात्मा सच्चिदाकृतिः ॥
bhāvatīrtham iti proktaṃ yatra sākṣād bhavaḥ sthitaḥ aśeṣajagadantastho bhūtātmā saccidākṛtiḥ //
तत्रेमां शृणु वक्ष्यामि कथां पुण्यतमां शुभाम् सूर्यवंशकरः श्रीमान् क्षत्रियाणां धुरंधरः ॥
tatremāṃ śṛṇu vakṣyāmi kathāṃ puṇyatamāṃ śubhām sūryavaṃśakaraḥ śrīmān kṣatriyāṇāṃ dhuraṃdharaḥ //
प्राचीनबर्हिर् आख्यातः सर्वधर्मेषु पारगः तिस्रः कोट्यो ऽर्धकोटिश् च वर्षाणां राज्य आस्थितः ॥
prācīnabarhir ākhyātaḥ sarvadharmeṣu pāragaḥ tisraḥ koṭyo 'rdhakoṭiś ca varṣāṇāṃ rājya āsthitaḥ //
तस्येदृशं व्रतं चासीद् यद् अहं यौवनच्युतः भवेयं प्रियया वापि पुत्रैर् वा प्रियवस्तुभिः ॥
tasyedṛśaṃ vrataṃ cāsīd yad ahaṃ yauvanacyutaḥ bhaveyaṃ priyayā vāpi putrair vā priyavastubhiḥ //
वियुज्येयं ततो राज्यं त्यक्ष्ये ऽहं नात्र संशयः विवेकिनां कुलीनानाम् इदम् एवोचितं नृणाम् ॥
viyujyeyaṃ tato rājyaṃ tyakṣye 'haṃ nātra saṃśayaḥ vivekināṃ kulīnānām idam evocitaṃ nṛṇām //
स्थीयते विजने क्वापि विरक्तैर् विभवक्षये तस्मिन् प्रशासति महीं न वियोगः प्रियैः क्वचित् ॥
sthīyate vijane kvāpi viraktair vibhavakṣaye tasmin praśāsati mahīṃ na viyogaḥ priyaiḥ kvacit //
नाधिव्याधी न दुर्भिक्षं न बन्धुकलहो नृणाम् तस्मिञ् शासति राज्यं तु न च कश्चिद् वियुज्यते ॥
nādhivyādhī na durbhikṣaṃ na bandhukalaho nṛṇām tasmiñ śāsati rājyaṃ tu na ca kaścid viyujyate //
ततः पुत्रार्थम् अकरोद् यज्ञं राजा महामतिः ततः प्रसन्नो भगवान् वरं प्रादाद् यथेप्सितम् ॥
tataḥ putrārtham akarod yajñaṃ rājā mahāmatiḥ tataḥ prasanno bhagavān varaṃ prādād yathepsitam //
गौतमीतीरसंस्थाय राज्ञे देवो महेश्वरः पुत्रं देहीति राजा वै भवं प्राह स भार्यया ॥
gautamītīrasaṃsthāya rājñe devo maheśvaraḥ putraṃ dehīti rājā vai bhavaṃ prāha sa bhāryayā //
भवः प्राह नृपं प्रीत्या पश्य नेत्रं तृतीयकम् ततः पश्यति राजेन्द्रे भवस्याक्षि तु मानद ॥
bhavaḥ prāha nṛpaṃ prītyā paśya netraṃ tṛtīyakam tataḥ paśyati rājendre bhavasyākṣi tu mānada //
चक्षुर्दीप्त्याभवत् पुत्रो महिमा नाम विश्रुतः येनाकारि स्तुतिः पुण्या महिम्न इति विश्रुता ॥
cakṣurdīptyābhavat putro mahimā nāma viśrutaḥ yenākāri stutiḥ puṇyā mahimna iti viśrutā //
किम् अलभ्यं भगवति प्रसन्ने त्रिपुरान्तके यं नित्यम् अनुवर्तन्ते हरिब्रह्मादयः सुराः ॥
kim alabhyaṃ bhagavati prasanne tripurāntake yaṃ nityam anuvartante haribrahmādayaḥ surāḥ //
प्राप्तपुत्रश् च नृपतिस् तीर्थश्रैष्ठ्यम् अयाचत महापापमहारोगमहाव्यसनिनां नृणाम् ॥
prāptaputraś ca nṛpatis tīrthaśraiṣṭhyam ayācata mahāpāpamahārogamahāvyasanināṃ nṛṇām //
नानाविपद्गणार्तानां सर्वाभिमतलब्धये प्रादाज् ज्यैष्ठ्यं भवश् चापि भावतीर्थं तद् उच्यते ॥
nānāvipadgaṇārtānāṃ sarvābhimatalabdhaye prādāj jyaiṣṭhyaṃ bhavaś cāpi bhāvatīrthaṃ tad ucyate //
तत्र स्नानेन दानेन सर्वान् कामान् अवाप्नुयात् भवप्रसादाद् अभवत् सुतः प्राचीनबर्हिषः ॥
tatra snānena dānena sarvān kāmān avāpnuyāt bhavaprasādād abhavat sutaḥ prācīnabarhiṣaḥ //
महिमा गौतमीतीरे भावतीर्थं तद् उच्यते तत्र सप्तति तीर्थानि पुण्यान्य् अखिलदानि च ॥
mahimā gautamītīre bhāvatīrthaṃ tad ucyate tatra saptati tīrthāni puṇyāny akhiladāni ca //