कपिलतीर्थम् आख्यातं तद् एवाङ्गिरसं स्मृतम् तद् एवादित्यम् आख्यातं सैंहिकेयं तद् उच्यते ॥
kapilatīrtham ākhyātaṃ tad evāṅgirasaṃ smṛtam tad evādityam ākhyātaṃ saiṃhikeyaṃ tad ucyate //
गौतम्या दक्षिणे पारे आदित्यान् मुनिसत्तम अयाजयन्न् अङ्गिरसो दक्षिणां ते भुवं ददुः ॥
gautamyā dakṣiṇe pāre ādityān munisattama ayājayann aṅgiraso dakṣiṇāṃ te bhuvaṃ daduḥ //
अङ्गिरोभ्यस् तदादित्यास् तपसे ऽङ्गिरसो ययुः सा भूमिः सैंहिकी भूत्वा जनान् सर्वान् अभक्षयत् ॥
aṅgirobhyas tadādityās tapase 'ṅgiraso yayuḥ sā bhūmiḥ saiṃhikī bhūtvā janān sarvān abhakṣayat //
तत्रसुस् ते जनाः सर्वे अङ्गिरोभ्यो न्यवेदयन् विभीता ज्ञानतो ज्ञात्वा भुवं तां सैंहिकीम् इति ॥
tatrasus te janāḥ sarve aṅgirobhyo nyavedayan vibhītā jñānato jñātvā bhuvaṃ tāṃ saiṃhikīm iti //
आदित्यान् अनुगत्वाथ वाचम् अङ्गिरसो ऽब्रुवन् भुवं गृह्णन्तु या दत्ता नेत्य् आदित्यास् तदाब्रुवन् ॥
ādityān anugatvātha vācam aṅgiraso 'bruvan bhuvaṃ gṛhṇantu yā dattā nety ādityās tadābruvan //
निवृत्तां दक्षिणां नैव प्रतिगृह्णन्ति सूरयः स्वदत्तां परदत्तां वा यो हरेत वसुंधराम् ॥
nivṛttāṃ dakṣiṇāṃ naiva pratigṛhṇanti sūrayaḥ svadattāṃ paradattāṃ vā yo hareta vasuṃdharām //
षष्टिर् वर्षसहस्राणि विष्ठायां जायते कृमिः भूमेः स्वपरदत्ताया हरणान् नाधिकं क्वचित् ॥
ṣaṣṭir varṣasahasrāṇi viṣṭhāyāṃ jāyate kṛmiḥ bhūmeḥ svaparadattāyā haraṇān nādhikaṃ kvacit //
पापम् अस्ति महारौद्रं न स्वीकुर्मः पुनस् तु ताम् एवं यदा स्वदत्ताया हरणे किं तदा भवेत् ॥
pāpam asti mahāraudraṃ na svīkurmaḥ punas tu tām evaṃ yadā svadattāyā haraṇe kiṃ tadā bhavet //
तथापि क्रयरूपेण गृह्णीमो दक्षिणां भुवम् तथेत्य् उक्ते तु ते देवाः कपिलां शुभलक्षणाम् ॥
tathāpi krayarūpeṇa gṛhṇīmo dakṣiṇāṃ bhuvam tathety ukte tu te devāḥ kapilāṃ śubhalakṣaṇām //
गङ्गाया दक्षिणे पारे भुवः स्थाने तु तां ददुः भुक्तिमुक्तिप्रदः साक्षाद् विष्णुस् तिष्ठति मूर्तिमान् ॥
gaṅgāyā dakṣiṇe pāre bhuvaḥ sthāne tu tāṃ daduḥ bhuktimuktipradaḥ sākṣād viṣṇus tiṣṭhati mūrtimān //
कपिलासंगमं तच् च सर्वाघौघविनाशनम् तत्राभवद् दानतोयाद् आपगा कपिलाभिधा ॥
kapilāsaṃgamaṃ tac ca sarvāghaughavināśanam tatrābhavad dānatoyād āpagā kapilābhidhā //
सस्यवत्या अपि भुवो दानाद् गोदानम् उत्तमम् लोकरक्षां चकारासौ कृत्वा विनिमयं मुनिः ॥
sasyavatyā api bhuvo dānād godānam uttamam lokarakṣāṃ cakārāsau kṛtvā vinimayaṃ muniḥ //
यत्र तीर्थे च तद् वृत्तं गोतीर्थं तद् उदाहृतम् पुण्यदं तत्र तीर्थानां शतम् उक्तं मनीषिभिः ॥
yatra tīrthe ca tad vṛttaṃ gotīrthaṃ tad udāhṛtam puṇyadaṃ tatra tīrthānāṃ śatam uktaṃ manīṣibhiḥ //
तत्र स्नानेन दानेन भूमिदानफलं लभेत् संगता गङ्गया तच् च कपिलासंगमं विदुः ॥
tatra snānena dānena bhūmidānaphalaṃ labhet saṃgatā gaṅgayā tac ca kapilāsaṃgamaṃ viduḥ //