Chapter 156

शङ्खह्रदं नाम तीर्थं यत्र शङ्खगदाधरः तत्र स्नात्वा च तं दृष्ट्वा मुच्यते भवबन्धनात् ॥

śaṅkhahradaṃ nāma tīrthaṃ yatra śaṅkhagadādharaḥ tatra snātvā ca taṃ dṛṣṭvā mucyate bhavabandhanāt //

तत्रेदं वृत्तम् आख्यास्ये भुक्तिमुक्तिप्रदायकम् पुरा कृतयुगस्यादौ ब्रह्मणः सामगायिनः ॥

tatredaṃ vṛttam ākhyāsye bhuktimuktipradāyakam purā kṛtayugasyādau brahmaṇaḥ sāmagāyinaḥ //

ब्रह्माण्डागारसंभूता राक्षसा बहुरूपिणः ब्रह्माणं खादितुं प्राप्ता बलोन्मत्ता धृतायुधाः ॥

brahmāṇḍāgārasaṃbhūtā rākṣasā bahurūpiṇaḥ brahmāṇaṃ khādituṃ prāptā balonmattā dhṛtāyudhāḥ //

तदाहम् अब्रवं विष्णुं रक्षणाय जगद्गुरुम् स विष्णुस् तानि रक्षांसि हन्तुं चक्रेण चोद्यतः ॥

tadāham abravaṃ viṣṇuṃ rakṣaṇāya jagadgurum sa viṣṇus tāni rakṣāṃsi hantuṃ cakreṇa codyataḥ //

छित्त्वा चक्रेण रक्षांसि शङ्खम् आपूरयत् तदा निष्कण्टकं तलं कृत्वा स्वर्गं निर्वैरम् एव च ॥

chittvā cakreṇa rakṣāṃsi śaṅkham āpūrayat tadā niṣkaṇṭakaṃ talaṃ kṛtvā svargaṃ nirvairam eva ca //

ततो हर्षप्रकर्षेण शङ्खम् आपूरयद् धरिः ततो रक्षांसि सर्वाणि ह्य् अनीनशुर् अशेषतः ॥

tato harṣaprakarṣeṇa śaṅkham āpūrayad dhariḥ tato rakṣāṃsi sarvāṇi hy anīnaśur aśeṣataḥ //

यत्रैतद् वृत्तम् अखिलं विष्णुशङ्खप्रभावतः शङ्खतीर्थं तु तत् प्रोक्तं सर्वक्षेमकरं नृणाम् ॥

yatraitad vṛttam akhilaṃ viṣṇuśaṅkhaprabhāvataḥ śaṅkhatīrthaṃ tu tat proktaṃ sarvakṣemakaraṃ nṛṇām //

सर्वाभीष्टप्रदं पुण्यं स्मरणान् मङ्गलप्रदम् आयुरारोग्यजननं लक्ष्मीपुत्रप्रवर्धनम् ॥

sarvābhīṣṭapradaṃ puṇyaṃ smaraṇān maṅgalapradam āyurārogyajananaṃ lakṣmīputrapravardhanam //

स्मरणात् पठनाद् वापि सर्वकामान् अवाप्नुयात् तीर्थानाम् अयुतं तत्र सर्वपापनुदं मुने ॥

smaraṇāt paṭhanād vāpi sarvakāmān avāpnuyāt tīrthānām ayutaṃ tatra sarvapāpanudaṃ mune //

तीर्थान्य् अयुतसंख्यानि सर्वपापहराणि च येषां प्रभावं जानाति वक्तुं देवो महेश्वरः ॥

tīrthāny ayutasaṃkhyāni sarvapāpaharāṇi ca yeṣāṃ prabhāvaṃ jānāti vaktuṃ devo maheśvaraḥ //

पापक्षयप्रतिनिधिर् नैतेभ्यो ऽस्त्य् अपरः क्वचित् ॥

pāpakṣayapratinidhir naitebhyo 'sty aparaḥ kvacit //