देवागमं नाम तीर्थं सर्वकामप्रदं शिवम् भुक्तिमुक्तिप्रदं नॄणां पितॄणां तृप्तिकारकम् ॥
devāgamaṃ nāma tīrthaṃ sarvakāmapradaṃ śivam bhuktimuktipradaṃ nṝṇāṃ pitṝṇāṃ tṛptikārakam //
तत्र वृत्तं समाख्यास्ये तव यत्नेन नारद देवानाम् असुराणां च स्पर्धाभूद् धनहेतवे ॥
tatra vṛttaṃ samākhyāsye tava yatnena nārada devānām asurāṇāṃ ca spardhābhūd dhanahetave //
स्वर्गः सुराणाम् अभवद् असुराणाम् इलाभवत् कर्मभूमिम् अवष्टभ्य असुराः सर्वतो ऽभवन् ॥
svargaḥ surāṇām abhavad asurāṇām ilābhavat karmabhūmim avaṣṭabhya asurāḥ sarvato 'bhavan //
देवानां यज्ञभागांश् च दातॄन् घ्नन्त्य् असुरास् ततः ततः सुरगणाः सर्वे यज्ञभागैर् विना कृताः ॥
devānāṃ yajñabhāgāṃś ca dātṝn ghnanty asurās tataḥ tataḥ suragaṇāḥ sarve yajñabhāgair vinā kṛtāḥ //
व्यथिता माम् उपाजग्मुः किं कृत्यम् इति चाब्रुवन् मया चोक्ताः सुरगणा युद्धे जित्वासुरान् बलात् ॥
vyathitā mām upājagmuḥ kiṃ kṛtyam iti cābruvan mayā coktāḥ suragaṇā yuddhe jitvāsurān balāt //
भुवं प्राप्स्यथ कर्माणि हवींषि च यशांसि च तथेत्य् उक्त्वा गता देवा भूमिं ते समरार्थिनः ॥
bhuvaṃ prāpsyatha karmāṇi havīṃṣi ca yaśāṃsi ca tathety uktvā gatā devā bhūmiṃ te samarārthinaḥ //
दैत्याश् च दानवाश् चैव राक्षसा बलदर्पिताः एकीभूत्वा ययुस् ते ऽपि जयिनो युद्धकाङ्क्षिणः ॥
daityāś ca dānavāś caiva rākṣasā baladarpitāḥ ekībhūtvā yayus te 'pi jayino yuddhakāṅkṣiṇaḥ //
अहिर् वृत्रो बलिस् त्वाष्ट्रिर् नमुचिः शम्बरो मयः एते चान्ये च बहवो योद्धारो बलदर्पिताः ॥
ahir vṛtro balis tvāṣṭrir namuciḥ śambaro mayaḥ ete cānye ca bahavo yoddhāro baladarpitāḥ //
अग्निर् इन्द्रो ऽथ वरुणस् त्वष्टा पूषा तथाश्विनौ मरुतो लोकपालाश् च नानायुद्धविशारदाः ॥
agnir indro 'tha varuṇas tvaṣṭā pūṣā tathāśvinau maruto lokapālāś ca nānāyuddhaviśāradāḥ //
ते दानवाः सर्व एव याम्यां वै दिशि संगरे अकुर्वन्त महायत्नं दक्षिणार्णवसंस्थिताः ॥
te dānavāḥ sarva eva yāmyāṃ vai diśi saṃgare akurvanta mahāyatnaṃ dakṣiṇārṇavasaṃsthitāḥ //
त्रिकूटः पर्वतश्रेष्ठो राक्षसानां पुराभवत् तद्वनेन ययुः सर्वे तैः सार्धं दक्षिणार्णवम् ॥
trikūṭaḥ parvataśreṣṭho rākṣasānāṃ purābhavat tadvanena yayuḥ sarve taiḥ sārdhaṃ dakṣiṇārṇavam //
सर्वेषां मेलनं यत्र पर्वतो मलयस् तु सः मलयस्यापि देशो ऽसौ देवारीणाम् अभूत् तदा ॥
sarveṣāṃ melanaṃ yatra parvato malayas tu saḥ malayasyāpi deśo 'sau devārīṇām abhūt tadā //
देवानां गौतमीतीरे तत्र संनिहितः शिवः इति तेषां समायोगो देवानाम् अभवत् किल ॥
devānāṃ gautamītīre tatra saṃnihitaḥ śivaḥ iti teṣāṃ samāyogo devānām abhavat kila //
देवाः स्वरथम् आरूढास् तत्र तत्र समागमन् गौतम्याः सरिदम्बायाः पुलिने विमलाशयाः ॥
devāḥ svaratham ārūḍhās tatra tatra samāgaman gautamyāḥ saridambāyāḥ puline vimalāśayāḥ //
प्रसन्नाभीष्टदा या स्यात् पितॄणाम् अखिलस्य तु ततो देवगणाः सर्वे स्तुत्वा देवं महेश्वरम् अभयं चिन्तयाम् आसुस् ते सर्वे ऽथ परस्परम् ॥
prasannābhīṣṭadā yā syāt pitṝṇām akhilasya tu tato devagaṇāḥ sarve stutvā devaṃ maheśvaram abhayaṃ cintayām āsus te sarve 'tha parasparam //
अत्राप्य् उपायः को ऽस्माकं निर्जितानां परैर् हठात् एकम् एवात्र नः श्रेयो विजयो वाथवा मृतिः सपत्नैर् अभिभूतानां जीवितं धिङ् मनस्विनाम् ॥
atrāpy upāyaḥ ko 'smākaṃ nirjitānāṃ parair haṭhāt ekam evātra naḥ śreyo vijayo vāthavā mṛtiḥ sapatnair abhibhūtānāṃ jīvitaṃ dhiṅ manasvinām //
एतस्मिन्न् अन्तरे पुत्र वाग् उवाचाशरीरिणी ॥
etasminn antare putra vāg uvācāśarīriṇī //
क्लेशेनालं सुरगणा गौतमीम् आशु गच्छत भक्त्या हरिहरौ तत्र समाराधयतेश्वरौ ॥
kleśenālaṃ suragaṇā gautamīm āśu gacchata bhaktyā hariharau tatra samārādhayateśvarau //
गोदावर्यास् तयोश् चैव प्रसादात् किं तु दुष्करम् ॥
godāvaryās tayoś caiva prasādāt kiṃ tu duṣkaram //
प्रसन्नाभ्यां हरीशाभ्यां देवा जयम् अभीप्सितम् अवाप्य सर्वतो जग्मुः पालयन्तो दिवौकसः ॥
prasannābhyāṃ harīśābhyāṃ devā jayam abhīpsitam avāpya sarvato jagmuḥ pālayanto divaukasaḥ //
यत्र देवागमो जातस् तत् तीर्थं तेन विश्रुतम् देवागमं प्रशंसन्ति मुनयस् तत्त्वदर्शिनः ॥
yatra devāgamo jātas tat tīrthaṃ tena viśrutam devāgamaṃ praśaṃsanti munayas tattvadarśinaḥ //
तत्राशीतिसहस्राणि शिवलिङ्गानि नारद देवागमः पर्वतो ऽसौ प्रिय इत्य् अपि कथ्यते ततः प्रभृति तत् तीर्थं देवप्रियम् अतो विदुः ॥
tatrāśītisahasrāṇi śivaliṅgāni nārada devāgamaḥ parvato 'sau priya ity api kathyate tataḥ prabhṛti tat tīrthaṃ devapriyam ato viduḥ //