शृणुध्वं मुनयः सर्वे यद् वो वक्ष्यामि सांप्रतम् पुराणं वेदसंबद्धं भुक्तिमुक्तिप्रदं शुभम् ॥
śṛṇudhvaṃ munayaḥ sarve yad vo vakṣyāmi sāṃpratam purāṇaṃ vedasaṃbaddhaṃ bhuktimuktipradaṃ śubham //
पृथिव्यां भारतं वर्षं कर्मभूमिर् उदाहृता कर्मणः फलभूमिश् च स्वर्गं च नरकं तथा ॥
pṛthivyāṃ bhārataṃ varṣaṃ karmabhūmir udāhṛtā karmaṇaḥ phalabhūmiś ca svargaṃ ca narakaṃ tathā //
तस्मिन् वर्षे नरः पापं कृत्वा धर्मं च भो द्विजाः अवश्यं फलम् आप्नोति अशुभस्य शुभस्य च ॥
tasmin varṣe naraḥ pāpaṃ kṛtvā dharmaṃ ca bho dvijāḥ avaśyaṃ phalam āpnoti aśubhasya śubhasya ca //
ब्राह्मणाद्याः स्वकं कर्म कृत्वा सम्यक् सुसंयताः प्राप्नुवन्ति परां सिद्धिं तस्मिन् वर्षे न संशयः ॥
brāhmaṇādyāḥ svakaṃ karma kṛtvā samyak susaṃyatāḥ prāpnuvanti parāṃ siddhiṃ tasmin varṣe na saṃśayaḥ //
धर्मं चार्थं च कामं च मोक्षं च द्विजसत्तमाः प्राप्नोति पुरुषः सर्वं तस्मिन् वर्षे सुसंयतः ॥
dharmaṃ cārthaṃ ca kāmaṃ ca mokṣaṃ ca dvijasattamāḥ prāpnoti puruṣaḥ sarvaṃ tasmin varṣe susaṃyataḥ //
इन्द्राद्याश् च सुराः सर्वे तस्मिन् वर्षे द्विजोत्तमाः कृत्वा सुशोभनं कर्म देवत्वं प्रतिपेदिरे ॥
indrādyāś ca surāḥ sarve tasmin varṣe dvijottamāḥ kṛtvā suśobhanaṃ karma devatvaṃ pratipedire //
अन्ये ऽपि लेभिरे मोक्षं पुरुषाः संयतेन्द्रियाः तस्मिन् वर्षे बुधाः शान्ता वीतरागा विमत्सराः ॥
anye 'pi lebhire mokṣaṃ puruṣāḥ saṃyatendriyāḥ tasmin varṣe budhāḥ śāntā vītarāgā vimatsarāḥ //
ये चापि स्वर्गे तिष्ठन्ति विमानेन गतज्वराः ते ऽपि कृत्वा शुभं कर्म तस्मिन् वर्षे दिवं गताः ॥
ye cāpi svarge tiṣṭhanti vimānena gatajvarāḥ te 'pi kṛtvā śubhaṃ karma tasmin varṣe divaṃ gatāḥ //
निवासं भारते वर्ष आकाङ्क्षन्ति सदा सुराः स्वर्गापवर्गफलदे तत् पश्यामः कदा वयम् ॥
nivāsaṃ bhārate varṣa ākāṅkṣanti sadā surāḥ svargāpavargaphalade tat paśyāmaḥ kadā vayam //
यद् एतद् भवता प्रोक्तं कर्म नान्यत्र पुण्यदम् पापाय वा सुरश्रेष्ठ वर्जयित्वा च भारतम् ॥
yad etad bhavatā proktaṃ karma nānyatra puṇyadam pāpāya vā suraśreṣṭha varjayitvā ca bhāratam //
ततः स्वर्गश् च मोक्षश् च मध्यमं तच् च गम्यते न खल्व् अन्यत्र मर्त्यानां भूमौ कर्म विधीयते ॥
tataḥ svargaś ca mokṣaś ca madhyamaṃ tac ca gamyate na khalv anyatra martyānāṃ bhūmau karma vidhīyate //
तस्माद् विस्तरतो ब्रह्मन्न् अस्माकं भारतं वद यदि ते ऽस्ति दयास्मासु यथावस्थितिर् एव च ॥
tasmād vistarato brahmann asmākaṃ bhārataṃ vada yadi te 'sti dayāsmāsu yathāvasthitir eva ca //
तस्माद् वर्षम् इदं नाथ ये वास्मिन् वर्षपर्वताः भेदाश् च तस्य वर्षस्य ब्रूहि सर्वान् अशेषतः ॥
tasmād varṣam idaṃ nātha ye vāsmin varṣaparvatāḥ bhedāś ca tasya varṣasya brūhi sarvān aśeṣataḥ //
शृणुध्वं भारतं वर्षं नवभेदेन भो द्विजाः समुद्रान्तरिता ज्ञेयास् ते समाश् च परस्परम् ॥
śṛṇudhvaṃ bhārataṃ varṣaṃ navabhedena bho dvijāḥ samudrāntaritā jñeyās te samāś ca parasparam //
इन्द्रद्वीपः कशेरुश् च ताम्रवर्णो गभस्तिमान् नागद्वीपस् तथा सौम्यो गान्धर्वो वारुणस् तथा ॥
indradvīpaḥ kaśeruś ca tāmravarṇo gabhastimān nāgadvīpas tathā saumyo gāndharvo vāruṇas tathā //
अयं तु नवमस् तेषां द्वीपः सागरसंवृतः योजनानां सहस्रं वै द्वीपो ऽयं दक्षिणोत्तरः ॥
ayaṃ tu navamas teṣāṃ dvīpaḥ sāgarasaṃvṛtaḥ yojanānāṃ sahasraṃ vai dvīpo 'yaṃ dakṣiṇottaraḥ //
पूर्वे किराता यस्यासन् पश्चिमे यवनास् तथा ब्राह्मणाः क्षत्रिया वैश्याः शूद्राश् चान्ते स्थिता द्विजाः ॥
pūrve kirātā yasyāsan paścime yavanās tathā brāhmaṇāḥ kṣatriyā vaiśyāḥ śūdrāś cānte sthitā dvijāḥ //
इज्यायुद्धवणिज्याद्यैः कर्मभिः कृतपावनाः तेषां संव्यवहारश् च एभिः कर्मभिर् इष्यते ॥
ijyāyuddhavaṇijyādyaiḥ karmabhiḥ kṛtapāvanāḥ teṣāṃ saṃvyavahāraś ca ebhiḥ karmabhir iṣyate //
स्वर्गापवर्गहेतुश् च पुण्यं पापं च वै तथा महेन्द्रो मलयः सह्यः शुक्तिमान् ऋक्षपर्वतः ॥
svargāpavargahetuś ca puṇyaṃ pāpaṃ ca vai tathā mahendro malayaḥ sahyaḥ śuktimān ṛkṣaparvataḥ //
विन्ध्यश् च पारियात्रश् च सप्तैवात्र कुलाचलाः तेषां सहस्रशश् चान्ये भूधरा ये समीपगाः ॥
vindhyaś ca pāriyātraś ca saptaivātra kulācalāḥ teṣāṃ sahasraśaś cānye bhūdharā ye samīpagāḥ //
विस्तारोच्छ्रयिणो रम्या विपुलाश् चित्रसानवः कोलाहलः स वैभ्राजो मन्दरो दर्दलाचलः ॥
vistārocchrayiṇo ramyā vipulāś citrasānavaḥ kolāhalaḥ sa vaibhrājo mandaro dardalācalaḥ //
वातंधयो वैद्युतश् च मैनाकः सुरसस् तथा तुङ्गप्रस्थो नागगिरिर् गोधनः पाण्डराचलः ॥
vātaṃdhayo vaidyutaś ca mainākaḥ surasas tathā tuṅgaprastho nāgagirir godhanaḥ pāṇḍarācalaḥ //
पुष्पगिरिर् वैजयन्तो रैवतो ऽर्बुद एव च ऋष्यमूकः स गोमन्थः कृतशैलः कृताचलः ॥
puṣpagirir vaijayanto raivato 'rbuda eva ca ṛṣyamūkaḥ sa gomanthaḥ kṛtaśailaḥ kṛtācalaḥ //
श्रीपार्वतश् चकोरश् च शतशो ऽन्ये च पर्वताः तैर् विमिश्रा जनपदा म्लेच्छाद्याश् चैव भागशः ॥
śrīpārvataś cakoraś ca śataśo 'nye ca parvatāḥ tair vimiśrā janapadā mlecchādyāś caiva bhāgaśaḥ //
तैः पीयन्ते सरिच्छ्रेष्ठास् ता बुध्यध्वं द्विजोत्तमाः गङ्गा सरस्वती सिन्धुश् चन्द्रभागा तथापरा ॥
taiḥ pīyante saricchreṣṭhās tā budhyadhvaṃ dvijottamāḥ gaṅgā sarasvatī sindhuś candrabhāgā tathāparā //
यमुना शतद्रुर् विपाशा वितस्तैरावती कुहूः गोमती धूतपापा च बाहुदा च दृषद्वती ॥
yamunā śatadrur vipāśā vitastairāvatī kuhūḥ gomatī dhūtapāpā ca bāhudā ca dṛṣadvatī //
विपाशा देविका चक्षुर् निष्ठीवा गण्डकी तथा कौशिकी चापगा चैव हिमवत्पादनिःसृताः ॥
vipāśā devikā cakṣur niṣṭhīvā gaṇḍakī tathā kauśikī cāpagā caiva himavatpādaniḥsṛtāḥ //
देवस्मृतिर् देववती वातघ्नी सिन्धुर् एव च वेण्या तु चन्दना चैव सदानीरा मही तथा ॥
devasmṛtir devavatī vātaghnī sindhur eva ca veṇyā tu candanā caiva sadānīrā mahī tathā //
चर्मण्वती वृषी चैव विदिशा वेदवत्य् अपि सिप्रा ह्य् अवन्ती च तथा पारियात्रानुगाः स्मृताः ॥
carmaṇvatī vṛṣī caiva vidiśā vedavaty api siprā hy avantī ca tathā pāriyātrānugāḥ smṛtāḥ //
शोणा महानदी चैव नर्मदा सुरथा क्रिया मन्दाकिनी दशार्णा च चित्रकूटा तथापरा ॥
śoṇā mahānadī caiva narmadā surathā kriyā mandākinī daśārṇā ca citrakūṭā tathāparā //
चित्रोत्पला वेत्रवती करमोदा पिशाचिका तथान्यातिलघुश्रोणी विपाप्मा शैवला नदी ॥
citrotpalā vetravatī karamodā piśācikā tathānyātilaghuśroṇī vipāpmā śaivalā nadī //
सधेरुजा शक्तिमती शकुनी त्रिदिवा क्रमुः ऋक्षपादप्रसूता वै तथान्या वेगवाहिनी ॥
sadherujā śaktimatī śakunī tridivā kramuḥ ṛkṣapādaprasūtā vai tathānyā vegavāhinī //
सिप्रा पयोष्णी निर्विन्ध्या तापी चैव सरिद्वरा वेणा वैतरणी चैव सिनीवाली कुमुद्वती ॥
siprā payoṣṇī nirvindhyā tāpī caiva saridvarā veṇā vaitaraṇī caiva sinīvālī kumudvatī //
तोया चैव महागौरी दुर्गा चान्तःशिला तथा विन्ध्यपादप्रसूतास् ता नद्यः पुण्यजलाः शुभाः ॥
toyā caiva mahāgaurī durgā cāntaḥśilā tathā vindhyapādaprasūtās tā nadyaḥ puṇyajalāḥ śubhāḥ //
गोदावरी भीमरथी कृष्णवेणा तथापगा तुङ्गभद्रा सुप्रयोगा तथान्या पापनाशिनी ॥
godāvarī bhīmarathī kṛṣṇaveṇā tathāpagā tuṅgabhadrā suprayogā tathānyā pāpanāśinī //
सह्यपादविनिष्क्रान्ता इत्य् एताः सरितां वराः कृतमाला ताम्रपर्णी पुष्यजा प्रत्यलावती ॥
sahyapādaviniṣkrāntā ity etāḥ saritāṃ varāḥ kṛtamālā tāmraparṇī puṣyajā pratyalāvatī //
मलयाद्रिसमुद्भूताः पुण्याः शीतजलास् त्व् इमाः पितृसोमर्षिकुल्या च वञ्जुला त्रिदिवा च या ॥
malayādrisamudbhūtāḥ puṇyāḥ śītajalās tv imāḥ pitṛsomarṣikulyā ca vañjulā tridivā ca yā //
लाङ्गुलिनी वंशकरा महेन्द्रप्रभवाः स्मृताः सुविकाला कुमारी च मनूगा मन्दगामिनी ॥
lāṅgulinī vaṃśakarā mahendraprabhavāḥ smṛtāḥ suvikālā kumārī ca manūgā mandagāminī //
क्षयापलासिनी चैव शुक्तिमत्प्रभवाः स्मृताः सर्वाः पुण्याः सरस्वत्यः सर्वा गङ्गाः समुद्रगाः ॥
kṣayāpalāsinī caiva śuktimatprabhavāḥ smṛtāḥ sarvāḥ puṇyāḥ sarasvatyaḥ sarvā gaṅgāḥ samudragāḥ //
विश्वस्य मातरः सर्वाः सर्वाः पापहराः स्मृताः अन्याः सहस्रशः प्रोक्ताः क्षुद्रनद्यो द्विजोत्तमाः ॥
viśvasya mātaraḥ sarvāḥ sarvāḥ pāpaharāḥ smṛtāḥ anyāḥ sahasraśaḥ proktāḥ kṣudranadyo dvijottamāḥ //
प्रावृट्कालवहाः सन्ति सदाकालवहाश् च याः मत्स्या मुकुटकुल्याश् च कुन्तलाः काशिकोशलाः ॥
prāvṛṭkālavahāḥ santi sadākālavahāś ca yāḥ matsyā mukuṭakulyāś ca kuntalāḥ kāśikośalāḥ //
अन्ध्रकाश् च कलिङ्गाश् च शमकाश् च वृकैः सह मध्यदेशा जनपदाः प्रायशो ऽमी प्रकीर्तिताः ॥
andhrakāś ca kaliṅgāś ca śamakāś ca vṛkaiḥ saha madhyadeśā janapadāḥ prāyaśo 'mī prakīrtitāḥ //
सह्यस्य चोत्तरे यस् तु यत्र गोदावरी नदी पृथिव्याम् अपि कृत्स्नायां स प्रदेशो मनोरमः ॥
sahyasya cottare yas tu yatra godāvarī nadī pṛthivyām api kṛtsnāyāṃ sa pradeśo manoramaḥ //
गोवर्धनपुरं रम्यं भार्गवस्य महात्मनः वाहीकराटधानाश् च सुतीराः कालतोयदाः ॥
govardhanapuraṃ ramyaṃ bhārgavasya mahātmanaḥ vāhīkarāṭadhānāś ca sutīrāḥ kālatoyadāḥ //
अपरान्ताश् च शूद्राश् च वाह्लिकाश् च सकेरलाः गान्धारा यवनाश् चैव सिन्धुसौवीरमद्रकाः ॥
aparāntāś ca śūdrāś ca vāhlikāś ca sakeralāḥ gāndhārā yavanāś caiva sindhusauvīramadrakāḥ //
शतद्रुहाः कलिङ्गाश् च पारदा हारभूषिकाः माठराश् चैव कनकाः कैकेया दम्भमालिकाः ॥
śatadruhāḥ kaliṅgāś ca pāradā hārabhūṣikāḥ māṭharāś caiva kanakāḥ kaikeyā dambhamālikāḥ //
क्षत्रियोपमदेशाश् च वैश्यशूद्रकुलानि च काम्बोजाश् चैव विप्रेन्द्रा बर्बराश् च सलौकिकाः ॥
kṣatriyopamadeśāś ca vaiśyaśūdrakulāni ca kāmbojāś caiva viprendrā barbarāś ca salaukikāḥ //
वीराश् चैव तुषाराश् च पह्लवाधायता नराः आत्रेयाश् च भरद्वाजाः पुष्कलाश् च दशेरकाः ॥
vīrāś caiva tuṣārāś ca pahlavādhāyatā narāḥ ātreyāś ca bharadvājāḥ puṣkalāś ca daśerakāḥ //
लम्पकाः शुनशोकाश् च कुलिका जाङ्गलैः सह औषध्यश् चलचन्द्रा च किरातानां च जातयः ॥
lampakāḥ śunaśokāś ca kulikā jāṅgalaiḥ saha auṣadhyaś calacandrā ca kirātānāṃ ca jātayaḥ //
तोमरा हंसमार्गाश् च काश्मीराः करुणास् तथा शूलिकाः कुहकाश् चैव मागधाश् च तथैव च ॥
tomarā haṃsamārgāś ca kāśmīrāḥ karuṇās tathā śūlikāḥ kuhakāś caiva māgadhāś ca tathaiva ca //
एते देशा उदीच्यास् तु प्राच्यान् देशान् निबोधत अन्धा वामङ्कुराकाश् च वल्लकाश् च मखान्तकाः ॥
ete deśā udīcyās tu prācyān deśān nibodhata andhā vāmaṅkurākāś ca vallakāś ca makhāntakāḥ //
तथापरे ऽङ्गा वङ्गाश् च मलदा मालवर्तिकाः भद्रतुङ्गाः प्रतिजया भार्याङ्गाश् चापमर्दकाः ॥
tathāpare 'ṅgā vaṅgāś ca maladā mālavartikāḥ bhadratuṅgāḥ pratijayā bhāryāṅgāś cāpamardakāḥ //
प्राग्ज्योतिषाश् च मद्राश् च विदेहास् ताम्रलिप्तकाः मल्ला मगधका नन्दाः प्राच्या जनपदास् तथा ॥
prāgjyotiṣāś ca madrāś ca videhās tāmraliptakāḥ mallā magadhakā nandāḥ prācyā janapadās tathā //
अथापरे जनपदा दक्षिणापथवासिनः पूर्णाश् च केवलाश् चैव गोलाङ्गूलास् तथैव च ॥
athāpare janapadā dakṣiṇāpathavāsinaḥ pūrṇāś ca kevalāś caiva golāṅgūlās tathaiva ca //
ऋषिका मुषिकाश् चैव कुमारा रामठाः शकाः महाराष्ट्रा माहिषकाः कलिङ्गाश् चैव सर्वशः ॥
ṛṣikā muṣikāś caiva kumārā rāmaṭhāḥ śakāḥ mahārāṣṭrā māhiṣakāḥ kaliṅgāś caiva sarvaśaḥ //
आभीराः सह वैशिक्या अटव्याः सरवाश् च ये पुलिन्दाश् चैव मौलेया वैदर्भा दण्डकैः सह ॥
ābhīrāḥ saha vaiśikyā aṭavyāḥ saravāś ca ye pulindāś caiva mauleyā vaidarbhā daṇḍakaiḥ saha //
पौलिका मौलिकाश् चैव अश्मका भोजवर्धनाः कौलिकाः कुन्तलाश् चैव दम्भका नीलकालकाः ॥
paulikā maulikāś caiva aśmakā bhojavardhanāḥ kaulikāḥ kuntalāś caiva dambhakā nīlakālakāḥ //
दाक्षिणात्यास् त्व् अमी देशा अपरान्तान् निबोधत शूर्पारकाः कालिधना लोलास् तालकटैः सह ॥
dākṣiṇātyās tv amī deśā aparāntān nibodhata śūrpārakāḥ kālidhanā lolās tālakaṭaiḥ saha //
इत्य् एते ह्य् अपरान्ताश् च शृणुध्वं विन्ध्यवासिनः मलजाः कर्कशाश् चैव मेलकाश् चोलकैः सह ॥
ity ete hy aparāntāś ca śṛṇudhvaṃ vindhyavāsinaḥ malajāḥ karkaśāś caiva melakāś colakaiḥ saha //
उत्तमार्णा दशार्णाश् च भोजाः किष्किन्धकैः सह तोषलाः कोशलाश् चैव त्रैपुरा वैदिशास् तथा ॥
uttamārṇā daśārṇāś ca bhojāḥ kiṣkindhakaiḥ saha toṣalāḥ kośalāś caiva traipurā vaidiśās tathā //
तुम्बुरास् तु चराश् चैव यवनाः पवनैः सह अभया रुण्डिकेराश् च चर्चरा होत्रधर्तयः ॥
tumburās tu carāś caiva yavanāḥ pavanaiḥ saha abhayā ruṇḍikerāś ca carcarā hotradhartayaḥ //
एते जनपदाः सर्वे तत्र विन्ध्यनिवासिनः अतो देशान् प्रवक्ष्यामि पर्वताश्रयिणश् च ये ॥
ete janapadāḥ sarve tatra vindhyanivāsinaḥ ato deśān pravakṣyāmi parvatāśrayiṇaś ca ye //
नीहारास् तुषमार्गाश् च कुरवस् तुङ्गणाः खसाः कर्णप्रावरणाश् चैव ऊर्णा दर्घाः सकुन्तकाः ॥
nīhārās tuṣamārgāś ca kuravas tuṅgaṇāḥ khasāḥ karṇaprāvaraṇāś caiva ūrṇā darghāḥ sakuntakāḥ //
चित्रमार्गा मालवाश् च किरातास् तोमरैः सह कृतत्रेतादिकश् चात्र चतुर्युगकृतो विधिः ॥
citramārgā mālavāś ca kirātās tomaraiḥ saha kṛtatretādikaś cātra caturyugakṛto vidhiḥ //
एवं तु भारतं वर्षं नवसंस्थानसंस्थितम् दक्षिणे परतो यस्य पूर्वे चैव महोदधिः ॥
evaṃ tu bhārataṃ varṣaṃ navasaṃsthānasaṃsthitam dakṣiṇe parato yasya pūrve caiva mahodadhiḥ //
हिमवान् उत्तरेणास्य कार्मुकस्य यथा गुणः तद् एतद् भारतं वर्षं सर्वबीजं द्विजोत्तमाः ॥
himavān uttareṇāsya kārmukasya yathā guṇaḥ tad etad bhārataṃ varṣaṃ sarvabījaṃ dvijottamāḥ //
ब्रह्मत्वम् अमरेशत्वं देवत्वं मरुतां तथा मृगयक्षाप्सरोयोनिं तद्वत् सर्पसरीसृपाः ॥
brahmatvam amareśatvaṃ devatvaṃ marutāṃ tathā mṛgayakṣāpsaroyoniṃ tadvat sarpasarīsṛpāḥ //
स्थावराणां च सर्वेषां मितो विप्राः शुभाशुभैः प्रयान्ति कर्मभूर् विप्रा नान्या लोकेषु विद्यते ॥
sthāvarāṇāṃ ca sarveṣāṃ mito viprāḥ śubhāśubhaiḥ prayānti karmabhūr viprā nānyā lokeṣu vidyate //
देवानाम् अपि भो विप्राः सदैवैष मनोरथः अपि मानुष्यम् आप्स्यामो देवत्वात् प्रच्युताः क्षितौ ॥
devānām api bho viprāḥ sadaivaiṣa manorathaḥ api mānuṣyam āpsyāmo devatvāt pracyutāḥ kṣitau //
मनुष्यः कुरुते यत् तु तन् न शक्यं सुरासुरैः तत्कर्मनिगडग्रस्तैस् तत्कर्मक्षपणोन्मुखैः ॥
manuṣyaḥ kurute yat tu tan na śakyaṃ surāsuraiḥ tatkarmanigaḍagrastais tatkarmakṣapaṇonmukhaiḥ //
न भारतसमं वर्षं पृथिव्याम् अस्ति भो द्विजाः यत्र विप्रादयो वर्णाः प्राप्नुवन्त्य् अभिवाञ्छितम् ॥
na bhāratasamaṃ varṣaṃ pṛthivyām asti bho dvijāḥ yatra viprādayo varṇāḥ prāpnuvanty abhivāñchitam //
धन्यास् ते भारते वर्षे जायन्ते ये नरोत्तमाः धर्मार्थकाममोक्षाणां प्राप्नुवन्ति महाफलम् ॥
dhanyās te bhārate varṣe jāyante ye narottamāḥ dharmārthakāmamokṣāṇāṃ prāpnuvanti mahāphalam //
प्राप्यते यत्र तपसः फलं परमदुर्लभम् सर्वदानफलं चैव सर्वयज्ञफलं तथा ॥
prāpyate yatra tapasaḥ phalaṃ paramadurlabham sarvadānaphalaṃ caiva sarvayajñaphalaṃ tathā //
तीर्थयात्राफलं चैव गुरुसेवाफलं तथा देवताराधनफलं स्वाध्यायस्य फलं द्विजाः ॥
tīrthayātrāphalaṃ caiva gurusevāphalaṃ tathā devatārādhanaphalaṃ svādhyāyasya phalaṃ dvijāḥ //
यत्र देवाः सदा हृष्टा जन्म वाञ्छन्ति शोभनम् नानाव्रतफलं चैव नानाशास्त्रफलं तथा ॥
yatra devāḥ sadā hṛṣṭā janma vāñchanti śobhanam nānāvrataphalaṃ caiva nānāśāstraphalaṃ tathā //
अहिंसादिफलं सम्यक् फलं सर्वाभिवाञ्छितम् ब्रह्मचर्यफलं चैव गार्हस्थ्येन च यत् फलम् ॥
ahiṃsādiphalaṃ samyak phalaṃ sarvābhivāñchitam brahmacaryaphalaṃ caiva gārhasthyena ca yat phalam //
यत् फलं वनवासेन संन्यासेन च यत् फलम् इष्टापूर्तफलं चैव तथान्यच् छुभकर्मणाम् ॥
yat phalaṃ vanavāsena saṃnyāsena ca yat phalam iṣṭāpūrtaphalaṃ caiva tathānyac chubhakarmaṇām //
प्राप्यते भारते वर्षे न चान्यत्र द्विजोत्तमाः कः शक्नोति गुणान् वक्तुं भारतस्याखिलान् द्विजाः ॥
prāpyate bhārate varṣe na cānyatra dvijottamāḥ kaḥ śaknoti guṇān vaktuṃ bhāratasyākhilān dvijāḥ //
एवं सम्यङ् मया प्रोक्तं भारतं वर्षम् उत्तमम् सर्वपापहरं पुण्यं धन्यं बुद्धिविवर्धनम् ॥
evaṃ samyaṅ mayā proktaṃ bhārataṃ varṣam uttamam sarvapāpaharaṃ puṇyaṃ dhanyaṃ buddhivivardhanam //
य इदं शृणुयान् नित्यं पठेद् वा नियतेन्द्रियः सर्वपापैर् विनिर्मुक्तो विष्णुलोकं स गच्छति ॥
ya idaṃ śṛṇuyān nityaṃ paṭhed vā niyatendriyaḥ sarvapāpair vinirmukto viṣṇulokaṃ sa gacchati //