अथ वृत्ते विवाहे तु भवस्यामिततेजसः प्रहर्षम् अतुलं गत्वा देवाः शक्रपुरोगमाः तुष्टुवुर् वाग्भिर् आद्याभिः प्रणेमुस् ते महेश्वरम् ॥
atha vṛtte vivāhe tu bhavasyāmitatejasaḥ praharṣam atulaṃ gatvā devāḥ śakrapurogamāḥ tuṣṭuvur vāgbhir ādyābhiḥ praṇemus te maheśvaram //
नमः पर्वतलिङ्गाय पर्वतेशाय वै नमः नमः पवनवेगाय विरूपायाजिताय च नमः क्लेशविनाशाय दात्रे च शुभसंपदाम् ॥
namaḥ parvataliṅgāya parvateśāya vai namaḥ namaḥ pavanavegāya virūpāyājitāya ca namaḥ kleśavināśāya dātre ca śubhasaṃpadām //
नमो नीलशिखण्डाय अम्बिकापतये नमः नमः पवनरूपाय शतरूपाय वै नमः ॥
namo nīlaśikhaṇḍāya ambikāpataye namaḥ namaḥ pavanarūpāya śatarūpāya vai namaḥ //
नमो भैरवरूपाय विरूपनयनाय च नमः सहस्रनेत्राय सहस्रचरणाय च ॥
namo bhairavarūpāya virūpanayanāya ca namaḥ sahasranetrāya sahasracaraṇāya ca //
नमो देववयस्याय वेदाङ्गाय नमो नमः विष्टम्भनाय शक्रस्य बाह्वोर् वेदाङ्कुराय च ॥
namo devavayasyāya vedāṅgāya namo namaḥ viṣṭambhanāya śakrasya bāhvor vedāṅkurāya ca //
चराचराधिपतये शमनाय नमो नमः सलिलाशयलिङ्गाय युगान्ताय नमो नमः ॥
carācarādhipataye śamanāya namo namaḥ salilāśayaliṅgāya yugāntāya namo namaḥ //
नमः कपालमालाय कपालसूत्रधारिणे नमः कपालहस्ताय दण्डिने गदिने नमः ॥
namaḥ kapālamālāya kapālasūtradhāriṇe namaḥ kapālahastāya daṇḍine gadine namaḥ //
नमस् त्रैलोक्यनाथाय पशुलोकरताय च नमः खट्वाङ्गहस्ताय प्रमथार्तिहराय च ॥
namas trailokyanāthāya paśulokaratāya ca namaḥ khaṭvāṅgahastāya pramathārtiharāya ca //
नमो यज्ञशिरोहन्त्रे कृष्णकेशापहारिणे भगनेत्रनिपाताय पूष्णो दन्तहराय च ॥
namo yajñaśirohantre kṛṣṇakeśāpahāriṇe bhaganetranipātāya pūṣṇo dantaharāya ca //
नमः पिनाकशूलासिखड्गमुद्गरधारिणे नमो ऽस्तु कालकालाय तृतीयनयनाय च ॥
namaḥ pinākaśūlāsikhaḍgamudgaradhāriṇe namo 'stu kālakālāya tṛtīyanayanāya ca //
अन्तकान्तकृते चैव नमः पर्वतवासिने सुवर्णरेतसे चैव नमः कुण्डलधारिणे ॥
antakāntakṛte caiva namaḥ parvatavāsine suvarṇaretase caiva namaḥ kuṇḍaladhāriṇe //
दैत्यानां योगनाशाय योगिनां गुरवे नमः शशाङ्कादित्यनेत्राय ललाटनयनाय च ॥
daityānāṃ yoganāśāya yogināṃ gurave namaḥ śaśāṅkādityanetrāya lalāṭanayanāya ca //
नमः श्मशानरतये श्मशानवरदाय च नमो दैवतनाथाय त्र्यम्बकाय नमो नमः ॥
namaḥ śmaśānarataye śmaśānavaradāya ca namo daivatanāthāya tryambakāya namo namaḥ //
गृहस्थसाधवे नित्यं जटिले ब्रह्मचारिणे नमो मुण्डार्धमुण्डाय पशूनां पतये नमः ॥
gṛhasthasādhave nityaṃ jaṭile brahmacāriṇe namo muṇḍārdhamuṇḍāya paśūnāṃ pataye namaḥ //
सलिले तप्यमानाय योगैश्वर्यप्रदाय च नमः शान्ताय दान्ताय प्रलयोत्पत्तिकारिणे ॥
salile tapyamānāya yogaiśvaryapradāya ca namaḥ śāntāya dāntāya pralayotpattikāriṇe //
नमो ऽनुग्रहकर्त्रे च स्थितिकर्त्रे नमो नमः नमो रुद्राय वसव आदित्यायाश्विने नमः ॥
namo 'nugrahakartre ca sthitikartre namo namaḥ namo rudrāya vasava ādityāyāśvine namaḥ //
नमः पित्रे ऽथ सांख्याय विश्वेदेवाय वै नमः नमः शर्वाय उग्राय शिवाय वरदाय च ॥
namaḥ pitre 'tha sāṃkhyāya viśvedevāya vai namaḥ namaḥ śarvāya ugrāya śivāya varadāya ca //
नमो भीमाय सेनान्ये पशूनां पतये नमः शुचये वैरिहानाय सद्योजाताय वै नमः ॥
namo bhīmāya senānye paśūnāṃ pataye namaḥ śucaye vairihānāya sadyojātāya vai namaḥ //
महादेवाय चित्राय विचित्राय च वै नमः प्रधानायाप्रमेयाय कार्याय कारणाय च ॥
mahādevāya citrāya vicitrāya ca vai namaḥ pradhānāyāprameyāya kāryāya kāraṇāya ca //
पुरुषाय नमस् ते ऽस्तु पुरुषेच्छाकराय च नमः पुरुषसंयोगप्रधानगुणकारिणे ॥
puruṣāya namas te 'stu puruṣecchākarāya ca namaḥ puruṣasaṃyogapradhānaguṇakāriṇe //
प्रवर्तकाय प्रकृतेः पुरुषस्य च सर्वशः कृताकृतस्य सत्कर्त्रे फलसंयोगदाय च ॥
pravartakāya prakṛteḥ puruṣasya ca sarvaśaḥ kṛtākṛtasya satkartre phalasaṃyogadāya ca //
कालज्ञाय च सर्वेषां नमो नियमकारिणे नमो वैषम्यकर्त्रे च गुणानां वृत्तिदाय च ॥
kālajñāya ca sarveṣāṃ namo niyamakāriṇe namo vaiṣamyakartre ca guṇānāṃ vṛttidāya ca //
नमस् ते देवदेवेश नमस् ते भूतभावन शिव सौम्यमुखो द्रष्टुं भव सौम्यो हि नः प्रभो ॥
namas te devadeveśa namas te bhūtabhāvana śiva saumyamukho draṣṭuṃ bhava saumyo hi naḥ prabho //
एवं स भगवान् देवो जगत्पतिर् उमापतिः स्तूयमानः सुरैः सर्वैर् अमरान् इदम् अब्रवीत् ॥
evaṃ sa bhagavān devo jagatpatir umāpatiḥ stūyamānaḥ suraiḥ sarvair amarān idam abravīt //
द्रष्टुं सुखश् च सौम्यश् च देवानाम् अस्मि भोः सुराः वरं वरयत क्षिप्रं दातास्मि तम् असंशयम् ॥
draṣṭuṃ sukhaś ca saumyaś ca devānām asmi bhoḥ surāḥ varaṃ varayata kṣipraṃ dātāsmi tam asaṃśayam //
ततस् ते प्रणताः सर्वे सुरा ऊचुस् त्रिलोचनम् ॥
tatas te praṇatāḥ sarve surā ūcus trilocanam //
तवैव भगवन् हस्ते वर एषो ऽवतिष्ठताम् यदा कार्यं तदा नस् त्वं दास्यसे वरम् ईप्सितम् ॥
tavaiva bhagavan haste vara eṣo 'vatiṣṭhatām yadā kāryaṃ tadā nas tvaṃ dāsyase varam īpsitam //
एवम् अस्त्व् इति तान् उक्त्वा विसृज्य च सुरान् हरः लोकांश् च प्रमथैः सार्धं विवेश भवनं स्वकम् ॥
evam astv iti tān uktvā visṛjya ca surān haraḥ lokāṃś ca pramathaiḥ sārdhaṃ viveśa bhavanaṃ svakam //
यस् तु हरोत्सवम् अद्भुतम् एनं गायति दैवतविप्रसमक्षम् सो ऽप्रतिरूपगणेशसमानो देहविपर्ययम् एत्य सुखी स्यात्
yas tu harotsavam adbhutam enaṃ gāyati daivataviprasamakṣam so 'pratirūpagaṇeśasamāno dehaviparyayam etya sukhī syāt
विप्रवर्याः स्तवं हीमं शृणुयाद् वा पठेच् च यः स सर्वलोकगो देवैः पूज्यते ऽमरराड् इव ॥
vipravaryāḥ stavaṃ hīmaṃ śṛṇuyād vā paṭhec ca yaḥ sa sarvalokago devaiḥ pūjyate 'mararāḍ iva //