यदा भवेन् महाज्यैष्ठी राशिनक्षत्रयोगतः प्रयत्नेन तदा मर्त्यैर् गन्तव्यं पुरुषोत्तमम् ॥
yadā bhaven mahājyaiṣṭhī rāśinakṣatrayogataḥ prayatnena tadā martyair gantavyaṃ puruṣottamam //
कृष्णं दृष्ट्वा महाज्यैष्ठ्यां रामं भद्रां च भो द्विजाः नरो द्वादशयात्रायाः फलं प्राप्नोति चाधिकम् ॥
kṛṣṇaṃ dṛṣṭvā mahājyaiṣṭhyāṃ rāmaṃ bhadrāṃ ca bho dvijāḥ naro dvādaśayātrāyāḥ phalaṃ prāpnoti cādhikam //
प्रयागे च कुरुक्षेत्रे नैमिषे पुष्करे गये गङ्गाद्वारे कुशावर्ते गङ्गासागरसंगमे ॥
prayāge ca kurukṣetre naimiṣe puṣkare gaye gaṅgādvāre kuśāvarte gaṅgāsāgarasaṃgame //
कोकामुखे शूकरे च मथुरायां मरुस्थले शालग्रामे वायुतीर्थे मन्दरे सिन्धुसागरे ॥
kokāmukhe śūkare ca mathurāyāṃ marusthale śālagrāme vāyutīrthe mandare sindhusāgare //
पिण्डारके चित्रकूटे प्रभासे कनखले द्विजाः शङ्खोद्धारे द्वारकायां तथा बदरिकाश्रमे ॥
piṇḍārake citrakūṭe prabhāse kanakhale dvijāḥ śaṅkhoddhāre dvārakāyāṃ tathā badarikāśrame //
लोहकुण्डे चाश्वतीर्थे सर्वपापप्रमोचने कामालये कोटितीर्थे तथा चामरकण्टके ॥
lohakuṇḍe cāśvatīrthe sarvapāpapramocane kāmālaye koṭitīrthe tathā cāmarakaṇṭake //
लोहार्गले जम्बुमार्गे सोमतीर्थे पृथूदके उत्पलावर्तके चैव पृथुतुङ्गे सुकुब्जके ॥
lohārgale jambumārge somatīrthe pṛthūdake utpalāvartake caiva pṛthutuṅge sukubjake //
एकाम्रके च केदारे काश्यां च विरजे द्विजाः कालञ्जरे च गोकर्णे श्रीशैले गन्धमादने ॥
ekāmrake ca kedāre kāśyāṃ ca viraje dvijāḥ kālañjare ca gokarṇe śrīśaile gandhamādane //
महेन्द्रे मलये विन्ध्ये पारियात्रे हिमालये सह्ये च शुक्तिमन्ते च गोमन्ते चार्बुदे तथा ॥
mahendre malaye vindhye pāriyātre himālaye sahye ca śuktimante ca gomante cārbude tathā //
गङ्गायां सर्वतीर्थेषु यामुनेषु च भो द्विजाः सारस्वतेषु गोमत्यां ब्रह्मपुत्रेषु सप्तसु ॥
gaṅgāyāṃ sarvatīrtheṣu yāmuneṣu ca bho dvijāḥ sārasvateṣu gomatyāṃ brahmaputreṣu saptasu //
गोदावरी भीमरथी तुङ्गभद्रा च नर्मदा तापी पयोउष्णी कावेरी शिप्रा चर्मण्वती द्विजाः ॥
godāvarī bhīmarathī tuṅgabhadrā ca narmadā tāpī payouṣṇī kāverī śiprā carmaṇvatī dvijāḥ //
वितस्ता चन्द्रभागा च शतद्रुर् बाहुदा तथा ऋषिकुल्या कुमारी च विपाशा च दृषद्वती ॥
vitastā candrabhāgā ca śatadrur bāhudā tathā ṛṣikulyā kumārī ca vipāśā ca dṛṣadvatī //
शरयूर् नाकगङ्गा च गण्डकी च महानदी कौशिकी करतोया च त्रिस्रोता मधुवाहिनी ॥
śarayūr nākagaṅgā ca gaṇḍakī ca mahānadī kauśikī karatoyā ca trisrotā madhuvāhinī //
महानदी वैतरणी याश् चान्या नानुकीर्तिताः अथवा किं बहूक्तेन भाषितेन द्विजोत्तमाः ॥
mahānadī vaitaraṇī yāś cānyā nānukīrtitāḥ athavā kiṃ bahūktena bhāṣitena dvijottamāḥ //
पृथिव्यां सर्वतीर्थेषु सर्वेष्व् आयतनेषु च सागरेषु च शैलेषु नदीषु च सरःसु च ॥
pṛthivyāṃ sarvatīrtheṣu sarveṣv āyataneṣu ca sāgareṣu ca śaileṣu nadīṣu ca saraḥsu ca //
यत् फलं स्नानदानेन राहुग्रस्ते दिवाकरे तत् फलं कृष्णम् आलोक्य महाज्यैष्ठ्यां लभेन् नरः ॥
yat phalaṃ snānadānena rāhugraste divākare tat phalaṃ kṛṣṇam ālokya mahājyaiṣṭhyāṃ labhen naraḥ //
तस्मात् सर्वप्रयत्नेन गन्तव्यं पुरुषोत्तमे महाज्यैष्ठ्यां मुनिश्रेष्ठा सर्वकामफलेप्सुभिः ॥
tasmāt sarvaprayatnena gantavyaṃ puruṣottame mahājyaiṣṭhyāṃ muniśreṣṭhā sarvakāmaphalepsubhiḥ //
दृष्ट्वा रामं महाज्येष्ठं कृष्णं सुभद्रया सह विष्णुलोकं नरो याति समुद्धृत्य समं कुलम् ॥
dṛṣṭvā rāmaṃ mahājyeṣṭhaṃ kṛṣṇaṃ subhadrayā saha viṣṇulokaṃ naro yāti samuddhṛtya samaṃ kulam //
भुक्त्वा तत्र वरान् भोगान् यावद् आभूतसंप्लवम् पुण्यक्षयाद् इहागत्य चतुर्वेदी द्विजो भवेत् ॥
bhuktvā tatra varān bhogān yāvad ābhūtasaṃplavam puṇyakṣayād ihāgatya caturvedī dvijo bhavet //
स्वधर्मनिरतः शान्तः कृष्णभक्तो जितेन्द्रियः वैष्णवं योगम् आस्थाय ततो मोक्षम् अवाप्नुयात् ॥
svadharmanirataḥ śāntaḥ kṛṣṇabhakto jitendriyaḥ vaiṣṇavaṃ yogam āsthāya tato mokṣam avāpnuyāt //