कस्मिन् काले भवेत् स्नानं कृष्णस्य कमलोद्भव विधिना केन तद् ब्रूहि ततो विधिविदां वर ॥
kasmin kāle bhavet snānaṃ kṛṣṇasya kamalodbhava vidhinā kena tad brūhi tato vidhividāṃ vara //
शृणुध्वं मुनयः स्नानं कृष्णस्य वदतो मम रामस्य च सुभद्रायाः पुण्यं सर्वाघनाशनम् ॥
śṛṇudhvaṃ munayaḥ snānaṃ kṛṣṇasya vadato mama rāmasya ca subhadrāyāḥ puṇyaṃ sarvāghanāśanam //
मासि ज्येष्ठे च संप्राप्ते नक्षत्रे चन्द्रदैवते पौर्णमास्यां तदा स्नानं सर्वकालं हरेर् द्विजाः ॥
māsi jyeṣṭhe ca saṃprāpte nakṣatre candradaivate paurṇamāsyāṃ tadā snānaṃ sarvakālaṃ harer dvijāḥ //
सर्वतीर्थमयः कूपस् तत्रास्ते निर्मलः शुचिः तदा भोगवती तत्र प्रत्यक्षा भवति द्विजाः ॥
sarvatīrthamayaḥ kūpas tatrāste nirmalaḥ śuciḥ tadā bhogavatī tatra pratyakṣā bhavati dvijāḥ //
तस्माज् ज्यैष्ठ्यां समुद्धृत्य हैमाढ्यैः कलशैर् जलम् कृष्णरामाभिषेकार्थं सुभद्रायाश् च भो द्विजाः ॥
tasmāj jyaiṣṭhyāṃ samuddhṛtya haimāḍhyaiḥ kalaśair jalam kṛṣṇarāmābhiṣekārthaṃ subhadrāyāś ca bho dvijāḥ //
कृत्वा सुशोभनं मञ्चं पताकाभिर् अलंकृतम् सुदृढं सुखसंचारं वस्त्रैः पुष्पैर् अलंकृतम् ॥
kṛtvā suśobhanaṃ mañcaṃ patākābhir alaṃkṛtam sudṛḍhaṃ sukhasaṃcāraṃ vastraiḥ puṣpair alaṃkṛtam //
विस्तीर्णं धूपितं धूपैः स्नानार्थं रामकृष्णयोः सितवस्त्रपरिच्छन्नं मुक्ताहारावलम्बितम् ॥
vistīrṇaṃ dhūpitaṃ dhūpaiḥ snānārthaṃ rāmakṛṣṇayoḥ sitavastraparicchannaṃ muktāhārāvalambitam //
तत्र नानाविधैर् वाद्यैः कृष्णं नीलाम्बरं द्विजाः मध्ये सुभद्रां चास्थाप्य जयमङ्गलनिस्वनैः ॥
tatra nānāvidhair vādyaiḥ kṛṣṇaṃ nīlāmbaraṃ dvijāḥ madhye subhadrāṃ cāsthāpya jayamaṅgalanisvanaiḥ //
ब्राह्मणैः क्षत्रियैर् वैश्यैः शूद्रैश् चान्यैश् च जातिभिः अनेकशतसाहस्रैर् वृतं स्त्रीपुरुषैर् द्विजाः ॥
brāhmaṇaiḥ kṣatriyair vaiśyaiḥ śūdraiś cānyaiś ca jātibhiḥ anekaśatasāhasrair vṛtaṃ strīpuruṣair dvijāḥ //
गृहस्थाः स्नातकाश् चैव यतयो ब्रह्मचारिणः स्नापयन्ति तदा कृष्णं मञ्चस्थं सहलायुधम् ॥
gṛhasthāḥ snātakāś caiva yatayo brahmacāriṇaḥ snāpayanti tadā kṛṣṇaṃ mañcasthaṃ sahalāyudham //
तथा समस्ततीर्थानि पूर्वोक्तानि द्विजोत्तमाः स्वोदकैः पुष्पमिश्रैश् च स्नापयन्ति पृथक् पृथक् ॥
tathā samastatīrthāni pūrvoktāni dvijottamāḥ svodakaiḥ puṣpamiśraiś ca snāpayanti pṛthak pṛthak //
पश्चात् पटहशङ्खाद्यैर् भेरीमुरजनिस्वनैः काहलैस् तालशब्दैश् च मृदङ्गैर् झर्झरैस् तथा ॥
paścāt paṭahaśaṅkhādyair bherīmurajanisvanaiḥ kāhalais tālaśabdaiś ca mṛdaṅgair jharjharais tathā //
अन्यैश् च विविधैर् वाद्यैर् घण्टास्वनविभूषितैः स्त्रीणां मङ्गलशब्दैश् च स्तुतिशब्दैर् मनोहरैः ॥
anyaiś ca vividhair vādyair ghaṇṭāsvanavibhūṣitaiḥ strīṇāṃ maṅgalaśabdaiś ca stutiśabdair manoharaiḥ //
जयशब्दैस् तथा स्तोत्रैर् वीणावेणुनिनादितैः श्रूयते सुमहाञ् शब्दः सागरस्येव गर्जतः ॥
jayaśabdais tathā stotrair vīṇāveṇunināditaiḥ śrūyate sumahāñ śabdaḥ sāgarasyeva garjataḥ //
मुनीनां वेदशब्देन मन्त्रशब्दैस् तथापरैः नानास्तोत्ररवैः पुण्यैः सामशब्दोपबृंहितैः ॥
munīnāṃ vedaśabdena mantraśabdais tathāparaiḥ nānāstotraravaiḥ puṇyaiḥ sāmaśabdopabṛṃhitaiḥ //
यतिभिः स्नातकैश् चैव गृहस्थैर् ब्रह्मचारिभिः स्नानकाले सुरश्रेष्ठ स्तुवन्ति परया मुदा ॥
yatibhiḥ snātakaiś caiva gṛhasthair brahmacāribhiḥ snānakāle suraśreṣṭha stuvanti parayā mudā //
श्यामैर् वेश्याजनैश् चैव कुचभारावनामिभिः पीतरक्ताम्बराभिश् च माल्यदामावनामिभिः ॥
śyāmair veśyājanaiś caiva kucabhārāvanāmibhiḥ pītaraktāmbarābhiś ca mālyadāmāvanāmibhiḥ //
सरत्नकुण्डलैर् दिव्यैः सुवर्णस्तबकान्वितैः चामरै रत्नदण्डैश् च वीज्येते रामकेशवौ ॥
saratnakuṇḍalair divyaiḥ suvarṇastabakānvitaiḥ cāmarai ratnadaṇḍaiś ca vījyete rāmakeśavau //
यक्षविद्याधरैः सिद्धैः किंनरैश् चाप्सरोगणैः परिवार्याम्बरगतैर् देवगन्धर्वचारणैः ॥
yakṣavidyādharaiḥ siddhaiḥ kiṃnaraiś cāpsarogaṇaiḥ parivāryāmbaragatair devagandharvacāraṇaiḥ //
आदित्या वसवो रुद्राः साध्या विश्वे मरुद्गणाः लोकपालास् तथा चान्ये स्तुवन्ति पुरुषोत्तमम् ॥
ādityā vasavo rudrāḥ sādhyā viśve marudgaṇāḥ lokapālās tathā cānye stuvanti puruṣottamam //
नमस् ते देवदेवेश पुराण पुरुषोत्तम सर्गस्थित्यन्तकृद् देव लोकनाथ जगत्पते ॥
namas te devadeveśa purāṇa puruṣottama sargasthityantakṛd deva lokanātha jagatpate //
त्रैलोक्यधारिणं देवं ब्रह्मण्यं मोक्षकारणम् तं नमस्यामहे भक्त्या सर्वकामफलप्रदम् ॥
trailokyadhāriṇaṃ devaṃ brahmaṇyaṃ mokṣakāraṇam taṃ namasyāmahe bhaktyā sarvakāmaphalapradam //
स्तुत्वैवं विबुधाः कृष्णं रामं चैव महाबलम् सुभद्रां च मुनिश्रेष्ठास् तदाकाशे व्यवस्थिताः ॥
stutvaivaṃ vibudhāḥ kṛṣṇaṃ rāmaṃ caiva mahābalam subhadrāṃ ca muniśreṣṭhās tadākāśe vyavasthitāḥ //
गायन्ति देवगन्धर्वा नृत्यन्त्य् अप्सरसस् तथा देवतूर्याण्य् अवाद्यन्त वाता वान्ति सुशीतलाः ॥
gāyanti devagandharvā nṛtyanty apsarasas tathā devatūryāṇy avādyanta vātā vānti suśītalāḥ //
पुष्पमिश्रं तदा मेघा वर्षन्त्य् आकाशगोचराः जयशब्दं च कुर्वन्ति मुनयः सिद्धचारणाः ॥
puṣpamiśraṃ tadā meghā varṣanty ākāśagocarāḥ jayaśabdaṃ ca kurvanti munayaḥ siddhacāraṇāḥ //
शक्राद्या विबुधाः सर्व ऋषयः पितरस् तथा प्रजानां पतयो नागा ये चान्ये स्वर्गवासिनः ॥
śakrādyā vibudhāḥ sarva ṛṣayaḥ pitaras tathā prajānāṃ patayo nāgā ye cānye svargavāsinaḥ //
ततो मङ्गलसंभारैर् विधिमन्त्रपुरस्कृतम् आभिषेचनिकं द्रव्यं गृहीत्वा देवतागणाः ॥
tato maṅgalasaṃbhārair vidhimantrapuraskṛtam ābhiṣecanikaṃ dravyaṃ gṛhītvā devatāgaṇāḥ //
इन्द्रो विष्णुर् महावीर्यः सूर्याचन्द्रमसौ तथा धाता चैव विधाता च तथा चैवानिलानलौ ॥
indro viṣṇur mahāvīryaḥ sūryācandramasau tathā dhātā caiva vidhātā ca tathā caivānilānalau //
पूषा भगो ऽर्यमा त्वष्टा अंशुनैव विवस्वता पत्नीभ्यां सहितो धीमान् मित्रेण वरुणेन च ॥
pūṣā bhago 'ryamā tvaṣṭā aṃśunaiva vivasvatā patnībhyāṃ sahito dhīmān mitreṇa varuṇena ca //
रुद्रैर् वसुभिर् आदित्यैर् अश्विभ्यां च वृतः प्रभुः विश्वैर् देवैर् मरुद्भिश् च साध्यैश् च पितृभिः सह ॥
rudrair vasubhir ādityair aśvibhyāṃ ca vṛtaḥ prabhuḥ viśvair devair marudbhiś ca sādhyaiś ca pitṛbhiḥ saha //
गन्धर्वैर् अप्सरोभिश् च यक्षराक्षसपन्नगैः देवर्षिभिर् असंख्येयैस् तथा ब्रह्मर्षिभिर् वरैः ॥
gandharvair apsarobhiś ca yakṣarākṣasapannagaiḥ devarṣibhir asaṃkhyeyais tathā brahmarṣibhir varaiḥ //
वैखानसैर् वालखिल्यैर् वाय्वाहारैर् मरीचिपैः भृगुभिश् चाङ्गिरोभिश् च सर्वविद्यासुनिष्ठितैः ॥
vaikhānasair vālakhilyair vāyvāhārair marīcipaiḥ bhṛgubhiś cāṅgirobhiś ca sarvavidyāsuniṣṭhitaiḥ //
सर्वविद्याधरैः पुण्यैर् योगसिद्धिभिर् आवृतः पितामहः पुलस्त्यश् च पुलहश् च महातपाः ॥
sarvavidyādharaiḥ puṇyair yogasiddhibhir āvṛtaḥ pitāmahaḥ pulastyaś ca pulahaś ca mahātapāḥ //
अङ्गिराः कश्यपो ऽत्रिश् च मरीचिर् भृगुर् एव च क्रतुर् हरः प्रचेताश् च मनुर् दक्षस् तथैव च ॥
aṅgirāḥ kaśyapo 'triś ca marīcir bhṛgur eva ca kratur haraḥ pracetāś ca manur dakṣas tathaiva ca //
ऋतवश् च ग्रहाश् चैव ज्योतींषि च द्विजोत्तमाः मूर्तिमत्यश् च सरितो देवाश् चैव सनातनाः ॥
ṛtavaś ca grahāś caiva jyotīṃṣi ca dvijottamāḥ mūrtimatyaś ca sarito devāś caiva sanātanāḥ //
समुद्राश् च ह्रदाश् चैव तीर्थानि विविधानि च पृथिवी द्यौर् दिशश् चैव पादपाश् च द्विजोत्तमाः ॥
samudrāś ca hradāś caiva tīrthāni vividhāni ca pṛthivī dyaur diśaś caiva pādapāś ca dvijottamāḥ //
अदितिर् देवमाता च ह्रीः श्रीः स्वाहा सरस्वती उमा शची सिनीवाली तथा चानुमतिः कुहूः ॥
aditir devamātā ca hrīḥ śrīḥ svāhā sarasvatī umā śacī sinīvālī tathā cānumatiḥ kuhūḥ //
राका च धिषणा चैव पत्न्यश् चान्या दिवौकसाम् हिमवांश् चैव विन्ध्यश् च मेरुश् चानेकशृङ्गवान् ॥
rākā ca dhiṣaṇā caiva patnyaś cānyā divaukasām himavāṃś caiva vindhyaś ca meruś cānekaśṛṅgavān //
ऐरावतः सानुचरः कलाकाष्ठास् तथैव च मासार्धं मास-ऋतवस् तथा रात्र्यहनी समाः ॥
airāvataḥ sānucaraḥ kalākāṣṭhās tathaiva ca māsārdhaṃ māsa-ṛtavas tathā rātryahanī samāḥ //
उच्चैःश्रवा हयश्रेष्ठो नागराजश् च वामनः अरुणो गरुडश् चैव वृक्षाश् चौषधिभिः सह ॥
uccaiḥśravā hayaśreṣṭho nāgarājaś ca vāmanaḥ aruṇo garuḍaś caiva vṛkṣāś cauṣadhibhiḥ saha //
धर्मश् च भगवान् देवः समाजग्मुर् हि संगताः कालो यमश् च मृत्युश् च यमस्यानुचराश् च ये ॥
dharmaś ca bhagavān devaḥ samājagmur hi saṃgatāḥ kālo yamaś ca mṛtyuś ca yamasyānucarāś ca ye //
बहुलत्वाच् च नोक्ता ये विविधा देवतागणाः ते देवस्याभिषेकार्थं समायान्ति ततस् ततः ॥
bahulatvāc ca noktā ye vividhā devatāgaṇāḥ te devasyābhiṣekārthaṃ samāyānti tatas tataḥ //
गृहीत्वा ते तदा विप्राः सर्वे देवा दिवौकसः आभिषेचनिकं द्रव्यं मङ्गलानि च सर्वशः ॥
gṛhītvā te tadā viprāḥ sarve devā divaukasaḥ ābhiṣecanikaṃ dravyaṃ maṅgalāni ca sarvaśaḥ //
दिव्यसंभारसंयुक्तैः कलशैः काञ्चनैर् द्विजाः सारस्वतीभिः पुण्याभिर् दिव्यतोयाभिर् एव च ॥
divyasaṃbhārasaṃyuktaiḥ kalaśaiḥ kāñcanair dvijāḥ sārasvatībhiḥ puṇyābhir divyatoyābhir eva ca //
तोयेनाकाशगङ्गायाः कृष्णं रामेण संगतम् सपुष्पैः काञ्चनैः कुम्भैः स्नापयन्त्य् अवनिस्थिताः ॥
toyenākāśagaṅgāyāḥ kṛṣṇaṃ rāmeṇa saṃgatam sapuṣpaiḥ kāñcanaiḥ kumbhaiḥ snāpayanty avanisthitāḥ //
संचरन्ति विमानानि देवानाम् अम्बरे तथा उच्चावचानि दिव्यानि कामगानि स्थिराणि च ॥
saṃcaranti vimānāni devānām ambare tathā uccāvacāni divyāni kāmagāni sthirāṇi ca //
दिव्यरत्नविचित्राणि सेवितान्य् अप्सरोगणैः गीतैर् वाद्यैः पताकाभिः शोभितानि समन्ततः ॥
divyaratnavicitrāṇi sevitāny apsarogaṇaiḥ gītair vādyaiḥ patākābhiḥ śobhitāni samantataḥ //
एवं तदा मुनिश्रेष्ठाः कृष्णं रामेण संगतम् स्नापयित्वा सुभद्रां च संस्तुवन्ति मुदान्विताः ॥
evaṃ tadā muniśreṣṭhāḥ kṛṣṇaṃ rāmeṇa saṃgatam snāpayitvā subhadrāṃ ca saṃstuvanti mudānvitāḥ //
जय कृष्ण जगन्नाथ जय संकर्षणानुज जय पद्मपलाशाक्ष जय वाञ्छाफलप्रद ॥
jaya kṛṣṇa jagannātha jaya saṃkarṣaṇānuja jaya padmapalāśākṣa jaya vāñchāphalaprada //
जय मालावृतोरस्क जय चक्रगदाधर जय पद्मालयाकान्त जय विष्णो नमो ऽस्तु ते ॥
jaya mālāvṛtoraska jaya cakragadādhara jaya padmālayākānta jaya viṣṇo namo 'stu te //
एवं स्तुत्वा तदा देवाः शक्राद्या हृष्टमानसाः सिद्धचारणसंघाश् च ये चान्ये स्वर्गवासिनः ॥
evaṃ stutvā tadā devāḥ śakrādyā hṛṣṭamānasāḥ siddhacāraṇasaṃghāś ca ye cānye svargavāsinaḥ //
मुनयो वालखिल्याश् च कृष्णं रामेण संगतम् सुभद्रां च मुनिश्रेष्ठाः प्रणिपत्याम्बरे स्थिताः ॥
munayo vālakhilyāś ca kṛṣṇaṃ rāmeṇa saṃgatam subhadrāṃ ca muniśreṣṭhāḥ praṇipatyāmbare sthitāḥ //
दृष्ट्वा स्तुत्वा नमस्कृत्वा तदा ते त्रिदिवौकसः कृष्णं रामं सुभद्रां च यान्ति स्वं स्वं निवेशनम् ॥
dṛṣṭvā stutvā namaskṛtvā tadā te tridivaukasaḥ kṛṣṇaṃ rāmaṃ subhadrāṃ ca yānti svaṃ svaṃ niveśanam //
संचरन्ति विमानानि देवानाम् अम्बरे तदा उच्चावचानि दिव्यानि कामगानि स्थिराणि च ॥
saṃcaranti vimānāni devānām ambare tadā uccāvacāni divyāni kāmagāni sthirāṇi ca //
दिव्यरत्नविचित्राणि सेवितान्य् अप्सरोगणैः गीतैर् वाद्यैः पताकाभिः शोभितानि समन्ततः ॥
divyaratnavicitrāṇi sevitāny apsarogaṇaiḥ gītair vādyaiḥ patākābhiḥ śobhitāni samantataḥ //
तस्मिन् काले तु ये मर्त्याः पश्यन्ति पुरुषोत्तमम् बलभद्रं सुभद्रां च ते यान्ति पदम् अव्ययम् ॥
tasmin kāle tu ye martyāḥ paśyanti puruṣottamam balabhadraṃ subhadrāṃ ca te yānti padam avyayam //
सुभद्रारामसहितं मञ्चस्थं पुरुषोत्तमम् दृष्ट्वा निरामयं स्थानं यान्ति नास्त्य् अत्र संशयः ॥
subhadrārāmasahitaṃ mañcasthaṃ puruṣottamam dṛṣṭvā nirāmayaṃ sthānaṃ yānti nāsty atra saṃśayaḥ //
कपिलाशतदानेन यत् फलं पुष्करे स्मृतम् तत् फलं कृष्णम् आलोक्य मञ्चस्थं सहलायुधम् सुभद्रां च मुनिश्रेष्ठाः प्राप्नोति शुभकृन् नरः ॥
kapilāśatadānena yat phalaṃ puṣkare smṛtam tat phalaṃ kṛṣṇam ālokya mañcasthaṃ sahalāyudham subhadrāṃ ca muniśreṣṭhāḥ prāpnoti śubhakṛn naraḥ //
कन्याशतप्रदानेन यत् फलं समुदाहृतम् तत् फलं कृष्णम् आलोक्य मञ्चस्थं लभते नरः ॥
kanyāśatapradānena yat phalaṃ samudāhṛtam tat phalaṃ kṛṣṇam ālokya mañcasthaṃ labhate naraḥ //
सुवर्णशतनिष्काणां दानेन यत् फलं स्मृतम् तत् फलं कृष्णम् आलोक्य मञ्चस्थं लभते नरः ॥
suvarṇaśataniṣkāṇāṃ dānena yat phalaṃ smṛtam tat phalaṃ kṛṣṇam ālokya mañcasthaṃ labhate naraḥ //
गोसहस्रप्रदानेन यत् फलं परिकीर्तितम् तत् फलं कृष्णम् आलोक्य मञ्चस्थं लभते नरः ॥
gosahasrapradānena yat phalaṃ parikīrtitam tat phalaṃ kṛṣṇam ālokya mañcasthaṃ labhate naraḥ //
भूमिदानेन विधिवद् यत् फलं समुदाहृतम् तत् फलं कृष्णम् आलोक्य मञ्चस्थं लभते नरः ॥
bhūmidānena vidhivad yat phalaṃ samudāhṛtam tat phalaṃ kṛṣṇam ālokya mañcasthaṃ labhate naraḥ //
यत् फलं चान्नदानेन अर्घातिथ्येन कीर्तितम् तत् फलं कृष्णम् आलोक्य मञ्चस्थं लभते नरः ॥
yat phalaṃ cānnadānena arghātithyena kīrtitam tat phalaṃ kṛṣṇam ālokya mañcasthaṃ labhate naraḥ //
वृषोत्सर्गेण विधिवद् यत् फलं समुदाहृतम् तत् फलं कृष्णम् आलोक्य मञ्चस्थं लभते नरः ॥
vṛṣotsargeṇa vidhivad yat phalaṃ samudāhṛtam tat phalaṃ kṛṣṇam ālokya mañcasthaṃ labhate naraḥ //
यत् फलं तोयदानेन ग्रीष्मे वान्यत्र कीर्तितम् तत् फलं कृष्णम् आलोक्य मञ्चस्थं लभते नरः ॥
yat phalaṃ toyadānena grīṣme vānyatra kīrtitam tat phalaṃ kṛṣṇam ālokya mañcasthaṃ labhate naraḥ //
तिलधेनुप्रदानेन यत् फलं संप्रकीर्तितम् तत् फलं कृष्णम् आलोक्य मञ्चस्थं लभते नरः ॥
tiladhenupradānena yat phalaṃ saṃprakīrtitam tat phalaṃ kṛṣṇam ālokya mañcasthaṃ labhate naraḥ //
गजाश्वरथदानेन यत् फलं समुदाहृतम् तत् फलं कृष्णम् आलोक्य मञ्चस्थं लभते नरः ॥
gajāśvarathadānena yat phalaṃ samudāhṛtam tat phalaṃ kṛṣṇam ālokya mañcasthaṃ labhate naraḥ //
सुवर्णशृङ्गीदानेन यत् फलं समुदाहृतम् तत् फलं कृष्णम् आलोक्य मञ्चस्थं लभते नरः ॥
suvarṇaśṛṅgīdānena yat phalaṃ samudāhṛtam tat phalaṃ kṛṣṇam ālokya mañcasthaṃ labhate naraḥ //
जलधेनुप्रदानेन यत् फलं समुदाहृतम् तत् फलं कृष्णम् आलोक्य मञ्चस्थं लभते नरः ॥
jaladhenupradānena yat phalaṃ samudāhṛtam tat phalaṃ kṛṣṇam ālokya mañcasthaṃ labhate naraḥ //
दानेन घृतधेन्वाश् च फलं यत् समुदाहृतम् तत् फलं कृष्णम् आलोक्य मञ्चस्थं लभते नरः ॥
dānena ghṛtadhenvāś ca phalaṃ yat samudāhṛtam tat phalaṃ kṛṣṇam ālokya mañcasthaṃ labhate naraḥ //
चान्द्रायणेन चीर्णेन यत् फलं समुदाहृतम् तत् फलं कृष्णम् आलोक्य मञ्चस्थं लभते नरः ॥
cāndrāyaṇena cīrṇena yat phalaṃ samudāhṛtam tat phalaṃ kṛṣṇam ālokya mañcasthaṃ labhate naraḥ //
मासोपवासैर् विधिवद् यत् फलं समुदाहृतम् तत् फलं कृष्णम् आलोक्य मञ्चस्थं लभते नरः ॥
māsopavāsair vidhivad yat phalaṃ samudāhṛtam tat phalaṃ kṛṣṇam ālokya mañcasthaṃ labhate naraḥ //
अथ किं बहुनोक्तेन भाषितेन पुनः पुनः तस्य देवस्य माहात्म्यं मञ्चस्थस्य द्विजोत्तमाः ॥
atha kiṃ bahunoktena bhāṣitena punaḥ punaḥ tasya devasya māhātmyaṃ mañcasthasya dvijottamāḥ //
यत् फलं सर्वतीर्थेषु व्रतैर् दानैश् च कीर्तितम् तत् फलं कृष्णम् आलोक्य मञ्चस्थं सहलायुधम् ॥
yat phalaṃ sarvatīrtheṣu vratair dānaiś ca kīrtitam tat phalaṃ kṛṣṇam ālokya mañcasthaṃ sahalāyudham //
सुभद्रां च मुनिश्रेष्ठाः प्राप्नोति शुभकृन् नरः तस्मान् नरो ऽथवा नारी पश्येत् तं पुरुषोत्तमम् ॥
subhadrāṃ ca muniśreṣṭhāḥ prāpnoti śubhakṛn naraḥ tasmān naro 'thavā nārī paśyet taṃ puruṣottamam //
ततः समस्ततीर्थानां लभेत् स्नानादिकं फलम् स्नानशेषेण कृष्णस्य तोयेनात्माभिषिच्यते ॥
tataḥ samastatīrthānāṃ labhet snānādikaṃ phalam snānaśeṣeṇa kṛṣṇasya toyenātmābhiṣicyate //
वन्ध्या मृतप्रजा या तु दुर्भगा ग्रहपीडिता राक्षसाद्यैर् गृहीता वा तथा रोगैश् च संहताः ॥
vandhyā mṛtaprajā yā tu durbhagā grahapīḍitā rākṣasādyair gṛhītā vā tathā rogaiś ca saṃhatāḥ //
सद्यस् ताः स्नानशेषेण उदकेनाभिषेचिताः प्राप्नुवन्तीप्सितान् कामान् यान् यान् वाञ्छन्ति चेप्सितान् ॥
sadyas tāḥ snānaśeṣeṇa udakenābhiṣecitāḥ prāpnuvantīpsitān kāmān yān yān vāñchanti cepsitān //
पुत्रार्थिनी लभेत् पुत्रान् सौभाग्यं च सुखार्थिनी रोगार्ता मुच्यते रोगाद् धनं च धनकाङ्क्षिणी ॥
putrārthinī labhet putrān saubhāgyaṃ ca sukhārthinī rogārtā mucyate rogād dhanaṃ ca dhanakāṅkṣiṇī //
पुण्यानि यानि तोयानि तिष्ठन्ति धरणीतले तानि स्नानावशेषस्य कलां नार्हन्ति षोडशीम् ॥
puṇyāni yāni toyāni tiṣṭhanti dharaṇītale tāni snānāvaśeṣasya kalāṃ nārhanti ṣoḍaśīm //
तस्मात् स्नानावशेषं यत् कृष्णस्य सलिलं द्विजाः तेनाभिषिञ्चेद् गात्राणि सर्वकामप्रदं हि तत् ॥
tasmāt snānāvaśeṣaṃ yat kṛṣṇasya salilaṃ dvijāḥ tenābhiṣiñced gātrāṇi sarvakāmapradaṃ hi tat //
स्नातं पश्यन्ति ये कृष्णं व्रजन्तं दक्षिणामुखम् ब्रह्महत्यादिभिः पापैर् मुच्यन्ते ते न संशयः ॥
snātaṃ paśyanti ye kṛṣṇaṃ vrajantaṃ dakṣiṇāmukham brahmahatyādibhiḥ pāpair mucyante te na saṃśayaḥ //
शास्त्रेषु यत् फलं प्रोक्तं पृथिव्-यस् त्रिप्रदक्षिणैः दृष्ट्वा नरो लभेत् कृष्णं व्रजन्तं दक्षिणामुखम् ॥
śāstreṣu yat phalaṃ proktaṃ pṛthiv-yas tripradakṣiṇaiḥ dṛṣṭvā naro labhet kṛṣṇaṃ vrajantaṃ dakṣiṇāmukham //
तीर्थयात्राफलं यत् तु पृथिव्यां समुदाहृतम् दृष्ट्वा नरो लभेत् कृष्णं तत् फलं दक्षिणामुखम् ॥
tīrthayātrāphalaṃ yat tu pṛthivyāṃ samudāhṛtam dṛṣṭvā naro labhet kṛṣṇaṃ tat phalaṃ dakṣiṇāmukham //
बदर्यां यत् फलं प्रोक्तं दृष्ट्वा नारायणं नरम् दृष्ट्वा नरो लभेत् कृष्णं तत् फलं दक्षिणामुखम् ॥
badaryāṃ yat phalaṃ proktaṃ dṛṣṭvā nārāyaṇaṃ naram dṛṣṭvā naro labhet kṛṣṇaṃ tat phalaṃ dakṣiṇāmukham //
गङ्गाद्वारे कुरुक्षेत्रे स्नानदानेन यत् फलम् दृष्ट्वा नरो लभेत् कृष्णं तत् फलं दक्षिणामुखम् ॥
gaṅgādvāre kurukṣetre snānadānena yat phalam dṛṣṭvā naro labhet kṛṣṇaṃ tat phalaṃ dakṣiṇāmukham //
प्रयागे च महामाघ्यां यत् फलं समुदाहृतम् दृष्ट्वा नरो लभेत् कृष्णं तत् फलं दक्षिणामुखम् ॥
prayāge ca mahāmāghyāṃ yat phalaṃ samudāhṛtam dṛṣṭvā naro labhet kṛṣṇaṃ tat phalaṃ dakṣiṇāmukham //
शालग्रामे महाचैत्र्यां स्नानदानेन यत् फलम् दृष्ट्वा नरो लभेत् कृष्णं तत् फलं दक्षिणामुखम् ॥
śālagrāme mahācaitryāṃ snānadānena yat phalam dṛṣṭvā naro labhet kṛṣṇaṃ tat phalaṃ dakṣiṇāmukham //
महाभिधानकार्त्तिक्यां पुष्करे यत् फलं स्मृतम् दृष्ट्वा नरो लभेत् कृष्णं तत् फलं दक्षिणामुखम् ॥
mahābhidhānakārttikyāṃ puṣkare yat phalaṃ smṛtam dṛṣṭvā naro labhet kṛṣṇaṃ tat phalaṃ dakṣiṇāmukham //
यत् फलं स्नानदानेन गङ्गासागरसंगमे दृष्ट्वा नरो लभेत् कृष्णं तत् फलं दक्षिणामुखम् ॥
yat phalaṃ snānadānena gaṅgāsāgarasaṃgame dṛṣṭvā naro labhet kṛṣṇaṃ tat phalaṃ dakṣiṇāmukham //
ग्रस्ते सूर्ये कुरुक्षेत्रे स्नानदानेन यत् फलम् दृष्ट्वा नरो लभेत् कृष्णं तत् फलं दक्षिणामुखम् ॥
graste sūrye kurukṣetre snānadānena yat phalam dṛṣṭvā naro labhet kṛṣṇaṃ tat phalaṃ dakṣiṇāmukham //
गङ्गायां सर्वतीर्थेषु यामुनेषु च भो द्विजाः सारस्वतेषु तीर्थेषु तथान्येषु सरःसु च ॥
gaṅgāyāṃ sarvatīrtheṣu yāmuneṣu ca bho dvijāḥ sārasvateṣu tīrtheṣu tathānyeṣu saraḥsu ca //
यत् फलं स्नानदानेन विधिवत् समुदाहृतम् दृष्ट्वा नरो लभेत् कृष्णं तत् फलं दक्षिणामुखम् ॥
yat phalaṃ snānadānena vidhivat samudāhṛtam dṛṣṭvā naro labhet kṛṣṇaṃ tat phalaṃ dakṣiṇāmukham //
पुष्करे चाथ तीर्थेषु गये चामरकण्टके नैमिषादिषु तीर्थेषु क्षेत्रेष्व् आयतनेषु च ॥
puṣkare cātha tīrtheṣu gaye cāmarakaṇṭake naimiṣādiṣu tīrtheṣu kṣetreṣv āyataneṣu ca //
यत् फलं स्नानदानेन राहुग्रस्ते दिवाकरे दृष्ट्वा नरो लभेत् कृष्णं तत् फलं दक्षिणामुखम् ॥
yat phalaṃ snānadānena rāhugraste divākare dṛṣṭvā naro labhet kṛṣṇaṃ tat phalaṃ dakṣiṇāmukham //
अथ किं पुनर् उक्तेन भाषितेन पुनः पुनः यत् किंचित् कथितं चात्र फलं पुण्यस्य कर्मणः ॥
atha kiṃ punar uktena bhāṣitena punaḥ punaḥ yat kiṃcit kathitaṃ cātra phalaṃ puṇyasya karmaṇaḥ //
वेदशास्त्रे पुराणे च भारते च द्विजोत्तमाः धर्मशास्त्रेषु सर्वेषु तथान्यत्र मनीषिभिः ॥
vedaśāstre purāṇe ca bhārate ca dvijottamāḥ dharmaśāstreṣu sarveṣu tathānyatra manīṣibhiḥ //
दृष्ट्वा नरो लभेत् कृष्णं तत् फलं सहलायुधम् सकलं भद्रया सार्धं व्रजन्तं दक्षिणामुखम् ॥
dṛṣṭvā naro labhet kṛṣṇaṃ tat phalaṃ sahalāyudham sakalaṃ bhadrayā sārdhaṃ vrajantaṃ dakṣiṇāmukham //