श्रोतुम् इच्छामहे देव विष्णुलोकम् अनामयम् लोकानन्दकरं कान्तं सर्वाश्चर्यसमन्वितम् ॥
śrotum icchāmahe deva viṣṇulokam anāmayam lokānandakaraṃ kāntaṃ sarvāścaryasamanvitam //
प्रमाणं तस्य लोकस्य भोगं कान्तिं बलं प्रभो कर्मणा केन गच्छन्ति तत्र धर्मपरायणाः ॥
pramāṇaṃ tasya lokasya bhogaṃ kāntiṃ balaṃ prabho karmaṇā kena gacchanti tatra dharmaparāyaṇāḥ //
दर्शनात् स्पर्शनाद् वापि तीर्थस्नानादिनापि वा विस्तराद् ब्रूहि तत्त्वेन परं कौतूहलं हि नः ॥
darśanāt sparśanād vāpi tīrthasnānādināpi vā vistarād brūhi tattvena paraṃ kautūhalaṃ hi naḥ //
शृणुध्वं मुनयः सर्वे यत् परं परमं पदम् भक्तानाम् ईहितं धन्यं पुण्यं संसारनाशनम् ॥
śṛṇudhvaṃ munayaḥ sarve yat paraṃ paramaṃ padam bhaktānām īhitaṃ dhanyaṃ puṇyaṃ saṃsāranāśanam //
प्रवरं सर्वलोकानां विष्ण्वाख्यं वदतो मम सर्वाश्चर्यमयं पुण्यं स्थानं त्रैलोक्यपूजितम् ॥
pravaraṃ sarvalokānāṃ viṣṇvākhyaṃ vadato mama sarvāścaryamayaṃ puṇyaṃ sthānaṃ trailokyapūjitam //
अशोकैः पारिजातैश् च मन्दारैश् चम्पकद्रुमैः मालतीमल्लिकाकुन्दैर् बकुलैर् नागकेसरैः ॥
aśokaiḥ pārijātaiś ca mandāraiś campakadrumaiḥ mālatīmallikākundair bakulair nāgakesaraiḥ //
पुंनागैर् अतिमुक्तैश् च प्रियङ्गुतगरार्जुनैः पाटलाचूतखदिरैः कर्णिकारवनोज्ज्वलैः ॥
puṃnāgair atimuktaiś ca priyaṅgutagarārjunaiḥ pāṭalācūtakhadiraiḥ karṇikāravanojjvalaiḥ //
नारङ्गैः पनसैर् लोध्रैर् निम्बदाडिमसर्जकैः द्राक्षालकुचखर्जूरैर् मधुकेन्द्रफलैर् द्रुमैः ॥
nāraṅgaiḥ panasair lodhrair nimbadāḍimasarjakaiḥ drākṣālakucakharjūrair madhukendraphalair drumaiḥ //
कपित्थैर् नारिकेरैश् च तालैः श्रीफलसंभवैः कल्पवृक्षैर् असंख्यैश् च वन्यैर् अन्यैः सुशोभनैः ॥
kapitthair nārikeraiś ca tālaiḥ śrīphalasaṃbhavaiḥ kalpavṛkṣair asaṃkhyaiś ca vanyair anyaiḥ suśobhanaiḥ //
सरलैश् चन्दनैर् नीपैर् देवदारुशुभाञ्जनैः जातीलवङ्गकङ्कोलैः कर्पूरामोदवासिभिः ॥
saralaiś candanair nīpair devadāruśubhāñjanaiḥ jātīlavaṅgakaṅkolaiḥ karpūrāmodavāsibhiḥ //
ताम्बूलपत्त्रनिचयैस् तथा पूगीफलद्रुमैः अन्यैश् च विविधैर् वृक्षैः सर्वर्तुफलशोभितैः ॥
tāmbūlapattranicayais tathā pūgīphaladrumaiḥ anyaiś ca vividhair vṛkṣaiḥ sarvartuphalaśobhitaiḥ //
पुष्पैर् नानाविधैश् चैव लतागुच्छसमुद्भवैः नानाजलाशयैः पुण्यैर् नानापक्षिरुतैर् वरैः ॥
puṣpair nānāvidhaiś caiva latāgucchasamudbhavaiḥ nānājalāśayaiḥ puṇyair nānāpakṣirutair varaiḥ //
दीर्घिकाशतसंघातैस् तोयपूर्णैर् मनोहरैः कुमुदैः शतपत्त्रैश् च पुष्पैः कोकनदैर् वरैः ॥
dīrghikāśatasaṃghātais toyapūrṇair manoharaiḥ kumudaiḥ śatapattraiś ca puṣpaiḥ kokanadair varaiḥ //
रक्तनीलोत्पलैः कान्तैः कह्लारैश् च सुगन्धिभिः अन्यैश् च जलजैः पुष्पैर् नानावर्णैः सुशोभनैः ॥
raktanīlotpalaiḥ kāntaiḥ kahlāraiś ca sugandhibhiḥ anyaiś ca jalajaiḥ puṣpair nānāvarṇaiḥ suśobhanaiḥ //
हंसकारण्डवाकीर्णैश् चक्रवाकोपशोभितैः कोयष्टिकैश् च दात्यूहैः कारण्डवरवाकुलैः ॥
haṃsakāraṇḍavākīrṇaiś cakravākopaśobhitaiḥ koyaṣṭikaiś ca dātyūhaiḥ kāraṇḍavaravākulaiḥ //
चातकैः प्रियपुत्रैश् च जीवंजीवकजातिभिः अन्यैर् दिव्यैर् जलचरैर् विहारमधुरस्वनैः ॥
cātakaiḥ priyaputraiś ca jīvaṃjīvakajātibhiḥ anyair divyair jalacarair vihāramadhurasvanaiḥ //
एवं नानाविधैर् दिव्यैर् नानाश्चर्यसमन्वितैः वृक्षैर् जलाशयैः पुण्यैर् भूषितं सुमनोहरैः ॥
evaṃ nānāvidhair divyair nānāścaryasamanvitaiḥ vṛkṣair jalāśayaiḥ puṇyair bhūṣitaṃ sumanoharaiḥ //
तत्र दिव्यैर् विमानैश् च नानारत्नविभूषितैः कामगैः काञ्चनैः शुभ्रैर् दिव्यगन्धर्वनादितैः ॥
tatra divyair vimānaiś ca nānāratnavibhūṣitaiḥ kāmagaiḥ kāñcanaiḥ śubhrair divyagandharvanāditaiḥ //
तरुणादित्यसंकाशैर् अप्सरोभिर् अलंकृतैः हेमशय्यासनयुतैर् नानाभोगसमन्वितैः ॥
taruṇādityasaṃkāśair apsarobhir alaṃkṛtaiḥ hemaśayyāsanayutair nānābhogasamanvitaiḥ //
खेचरैः सपताकैश् च मुक्ताहारावलम्बिभिः नानावर्णैर् असंख्यातैर् जातरूपपरिच्छदैः ॥
khecaraiḥ sapatākaiś ca muktāhārāvalambibhiḥ nānāvarṇair asaṃkhyātair jātarūpaparicchadaiḥ //
नानाकुसुमगन्धाढ्यैश् चन्दनागुरुभूषितैः सुखप्रचारबहुलैर् नानावादित्रनिःस्वनैः ॥
nānākusumagandhāḍhyaiś candanāgurubhūṣitaiḥ sukhapracārabahulair nānāvāditraniḥsvanaiḥ //
मनोमारुततुल्यैश् च किङ्किणीस्तबकाकुलैः विहरन्ति पुरे तस्मिन् वैष्णवे लोकपूजिते ॥
manomārutatulyaiś ca kiṅkiṇīstabakākulaiḥ viharanti pure tasmin vaiṣṇave lokapūjite //
नानाङ्गनाभिः सततं गन्धर्वाप्सरसादिभिः चन्द्राननाभिः कान्ताभिर् योषिद्भिः सुमनोहरैः ॥
nānāṅganābhiḥ satataṃ gandharvāpsarasādibhiḥ candrānanābhiḥ kāntābhir yoṣidbhiḥ sumanoharaiḥ //
पीनोन्नतकुचाग्राभिः सुमध्याभिः समन्ततः श्यामावदातवर्णाभिर् मत्तमातङ्गगामिभिः ॥
pīnonnatakucāgrābhiḥ sumadhyābhiḥ samantataḥ śyāmāvadātavarṇābhir mattamātaṅgagāmibhiḥ //
परिवार्य नरश्रेष्ठं वीजयन्ति स्म ताः स्त्रियः चामरै रुक्मदण्डैश् च नानारत्नविभूषितैः ॥
parivārya naraśreṣṭhaṃ vījayanti sma tāḥ striyaḥ cāmarai rukmadaṇḍaiś ca nānāratnavibhūṣitaiḥ //
गीतनृत्यैस् तथा वाद्यैर् मोदमानैर् मदालसैः यक्षविद्याधरैः सिद्धैर् गन्धर्वैर् अप्सरोगणैः ॥
gītanṛtyais tathā vādyair modamānair madālasaiḥ yakṣavidyādharaiḥ siddhair gandharvair apsarogaṇaiḥ //
सुरसंघैश् च ऋषिभिः शुशुभे भुवनोत्तमम् तत्र प्राप्य महाभोगान् प्राप्नुवन्ति मनीषिणः ॥
surasaṃghaiś ca ṛṣibhiḥ śuśubhe bhuvanottamam tatra prāpya mahābhogān prāpnuvanti manīṣiṇaḥ //
वटराजसमीपे तु दक्षिणस्योदधेस् तटे दृष्टो यैर् भगवान् कृष्णः पुष्कराक्षो जगत्पतिः ॥
vaṭarājasamīpe tu dakṣiṇasyodadhes taṭe dṛṣṭo yair bhagavān kṛṣṇaḥ puṣkarākṣo jagatpatiḥ //
क्रीडन्त्य् अप्सरसैः सार्धं यावद् द्यौश् चन्द्रतारकम् प्रतप्तहेमसंकाशा जरामरणवर्जिताः ॥
krīḍanty apsarasaiḥ sārdhaṃ yāvad dyauś candratārakam prataptahemasaṃkāśā jarāmaraṇavarjitāḥ //
सर्वदुःखविहीनाश् च तृष्णाग्लानिविवर्जिताः चतुर्भुजा महावीर्या वनमालाविभूषिताः ॥
sarvaduḥkhavihīnāś ca tṛṣṇāglānivivarjitāḥ caturbhujā mahāvīryā vanamālāvibhūṣitāḥ //
श्रीवत्सलाञ्छनैर् युक्ताः शङ्खचक्रगदाधराः केचिन् नीलोत्पलश्यामाः केचित् काञ्चनसंनिभाः ॥
śrīvatsalāñchanair yuktāḥ śaṅkhacakragadādharāḥ kecin nīlotpalaśyāmāḥ kecit kāñcanasaṃnibhāḥ //
केचिन् मरकतप्रख्याः केचिद् वैदूर्यसंनिभाः श्यामवर्णाः कुण्डलिनस् तथान्ये वज्रसंनिभाः ॥
kecin marakataprakhyāḥ kecid vaidūryasaṃnibhāḥ śyāmavarṇāḥ kuṇḍalinas tathānye vajrasaṃnibhāḥ //
न तादृक् सर्वदेवानां भान्ति लोका द्विजोत्तमाः यादृग् भाति हरेर् लोकः सर्वाश्चर्यसमन्वितः ॥
na tādṛk sarvadevānāṃ bhānti lokā dvijottamāḥ yādṛg bhāti harer lokaḥ sarvāścaryasamanvitaḥ //
न तत्र पुनरावृत्तिर् गमनाज् जायते द्विजाः प्रभावात् तस्य देवस्य यावद् आभूतसंप्लवम् ॥
na tatra punarāvṛttir gamanāj jāyate dvijāḥ prabhāvāt tasya devasya yāvad ābhūtasaṃplavam //
विचरन्ति पुरे दिव्ये रूपयौवनगर्विताः कृष्णं रामं सुभद्रां च पश्यन्ति पुरुषोत्तमे ॥
vicaranti pure divye rūpayauvanagarvitāḥ kṛṣṇaṃ rāmaṃ subhadrāṃ ca paśyanti puruṣottame //
प्रतप्तहेमसंकाशं तरुणादित्यसंनिभम् पुरमध्ये हरेर् भाति मन्दिरं रत्नभूषितम् ॥
prataptahemasaṃkāśaṃ taruṇādityasaṃnibham puramadhye harer bhāti mandiraṃ ratnabhūṣitam //
अनेकशतसाहस्रैः पताकैः समलंकृतम् योजनायुतविस्तीर्णं हेमप्राकारवेष्टितम् ॥
anekaśatasāhasraiḥ patākaiḥ samalaṃkṛtam yojanāyutavistīrṇaṃ hemaprākāraveṣṭitam //
नानावर्णैर् ध्वजैश् चित्रैः कल्पितैः सुमनोहरैः विभाति शारदो यद्वन् नक्षत्रैः सह चन्द्रमाः ॥
nānāvarṇair dhvajaiś citraiḥ kalpitaiḥ sumanoharaiḥ vibhāti śārado yadvan nakṣatraiḥ saha candramāḥ //
चतुर्द्वारं सुविस्तीर्णं कञ्चुकिभिः सुरक्षितम् पुरसप्तकसंयुक्तं महोत्सेकं मनोहरम् ॥
caturdvāraṃ suvistīrṇaṃ kañcukibhiḥ surakṣitam purasaptakasaṃyuktaṃ mahotsekaṃ manoharam //
प्रथमं काञ्चनं तत्र द्वितीयं मरकतैर् युतम् इन्द्रनीलं तृतीयं तु महानीलं ततः परम् ॥
prathamaṃ kāñcanaṃ tatra dvitīyaṃ marakatair yutam indranīlaṃ tṛtīyaṃ tu mahānīlaṃ tataḥ param //
पुरं तु पञ्चमं दीप्तं पद्मरागमयं पुरम् षष्ठं वज्रमयं विप्रा वैदूर्यं सप्तमं पुरम् ॥
puraṃ tu pañcamaṃ dīptaṃ padmarāgamayaṃ puram ṣaṣṭhaṃ vajramayaṃ viprā vaidūryaṃ saptamaṃ puram //
नानारत्नमयैर् हेमप्रवालाङ्कुरभूषितैः स्तम्भैर् अद्भुतसंकाशैर् भाति तद् भवनं महत् ॥
nānāratnamayair hemapravālāṅkurabhūṣitaiḥ stambhair adbhutasaṃkāśair bhāti tad bhavanaṃ mahat //
दृश्यन्ते तत्र सिद्धाश् च भासयन्ति दिशो दश पौर्णमास्यां सनक्षत्रो यथा भाति निशाकरः ॥
dṛśyante tatra siddhāś ca bhāsayanti diśo daśa paurṇamāsyāṃ sanakṣatro yathā bhāti niśākaraḥ //
आरूढस् तत्र भगवान् सलक्ष्मीको जनार्दनः पीताम्बरधरः श्यामः श्रीवत्सलक्ष्मसंयुतः ॥
ārūḍhas tatra bhagavān salakṣmīko janārdanaḥ pītāmbaradharaḥ śyāmaḥ śrīvatsalakṣmasaṃyutaḥ //
ज्वलत् सुदर्शनं चक्रं घोरं सर्वास्त्रनायकम् दधार दक्षिणे हस्ते सर्वतेजोमयं हरिः ॥
jvalat sudarśanaṃ cakraṃ ghoraṃ sarvāstranāyakam dadhāra dakṣiṇe haste sarvatejomayaṃ hariḥ //
कुन्देन्दुरजतप्रख्यं हारगोक्षीरसंनिभम् आदाय तं मुनिश्रेष्ठाः सव्यहस्तेन केशवः ॥
kundendurajataprakhyaṃ hāragokṣīrasaṃnibham ādāya taṃ muniśreṣṭhāḥ savyahastena keśavaḥ //
यस्य शब्देन सकलं संक्षोभं जायते जगत् विश्रुतं पाञ्चजन्येति सहस्रावर्तभूषितम् ॥
yasya śabdena sakalaṃ saṃkṣobhaṃ jāyate jagat viśrutaṃ pāñcajanyeti sahasrāvartabhūṣitam //
दुष्कृतान्तकरीं रौद्रां दैत्यदानवनाशिनीम् ज्वलद्वह्निशिखाकारां दुःसहां त्रिदशैर् अपि ॥
duṣkṛtāntakarīṃ raudrāṃ daityadānavanāśinīm jvaladvahniśikhākārāṃ duḥsahāṃ tridaśair api //
कौमोदकीं गदां चासौ धृतवान् दक्षिणे करे वामे विस्फुरति ह्य् अस्य शार्ङ्गं सूर्यसमप्रभम् ॥
kaumodakīṃ gadāṃ cāsau dhṛtavān dakṣiṇe kare vāme visphurati hy asya śārṅgaṃ sūryasamaprabham //
शरैर् आदित्यसंकाशैर् ज्वालामालाकुलैर् वरैः यो ऽसौ संहरते देवस् त्रैलोक्यं सचराचरम् ॥
śarair ādityasaṃkāśair jvālāmālākulair varaiḥ yo 'sau saṃharate devas trailokyaṃ sacarācaram //
सर्वानन्दकरः श्रीमान् सर्वशास्त्रविशारदः सर्वलोकगुरुर् देवः सर्वैर् देवैर् नमस्कृतः ॥
sarvānandakaraḥ śrīmān sarvaśāstraviśāradaḥ sarvalokagurur devaḥ sarvair devair namaskṛtaḥ //
सहस्रमूर्धा देवेशः सहस्रचरणेक्षणः सहस्राख्यः सहस्राङ्गः सहस्रभुजवान् प्रभुः ॥
sahasramūrdhā deveśaḥ sahasracaraṇekṣaṇaḥ sahasrākhyaḥ sahasrāṅgaḥ sahasrabhujavān prabhuḥ //
सिंहासनगतो देवः पद्मपत्त्रायतेक्षणः विद्युद्विस्पष्टसंकाशो जगन्नाथो जगद्गुरुः ॥
siṃhāsanagato devaḥ padmapattrāyatekṣaṇaḥ vidyudvispaṣṭasaṃkāśo jagannātho jagadguruḥ //
परीतः सुरसिद्धैश् च गन्धर्वाप्सरसां गणैः यक्षविद्याधरैर् नागैर् मुनिसिद्धैः सचारणैः ॥
parītaḥ surasiddhaiś ca gandharvāpsarasāṃ gaṇaiḥ yakṣavidyādharair nāgair munisiddhaiḥ sacāraṇaiḥ //
सुपर्णैर् दानवैर् दैत्यै राक्षसैर् गुह्यकिंनरैः अन्यैर् देवगणैर् दिव्यैः स्तूयमानो विराजते ॥
suparṇair dānavair daityai rākṣasair guhyakiṃnaraiḥ anyair devagaṇair divyaiḥ stūyamāno virājate //
तत्रस्था सततं कीर्तिः प्रज्ञा मेधा सरस्वती बुद्धिर् मतिस् तथा क्षान्तिः सिद्धिमूर्तिस् तथा द्युतिः ॥
tatrasthā satataṃ kīrtiḥ prajñā medhā sarasvatī buddhir matis tathā kṣāntiḥ siddhimūrtis tathā dyutiḥ //
गायत्री चैव सावित्री मङ्गला सर्वमङ्गला प्रभा मतिस् तथा कान्तिस् तत्र नारायणी स्थिता ॥
gāyatrī caiva sāvitrī maṅgalā sarvamaṅgalā prabhā matis tathā kāntis tatra nārāyaṇī sthitā //
श्रद्धा च कौशिकी देवी विद्युत् सौदामिनी तथा निद्रा रात्रिस् तथा माया तथान्यामरयोषितः ॥
śraddhā ca kauśikī devī vidyut saudāminī tathā nidrā rātris tathā māyā tathānyāmarayoṣitaḥ //
वासुदेवस्य सर्वास् ता भवने संप्रतिष्ठिताः अथ किं बहुनोक्तेन सर्वं तत्र प्रतिष्ठितम् ॥
vāsudevasya sarvās tā bhavane saṃpratiṣṭhitāḥ atha kiṃ bahunoktena sarvaṃ tatra pratiṣṭhitam //
घृताची मेनका रम्भा सहजन्या तिलोत्तमा उर्वशी चैव निम्लोचा तथान्या वामना परा ॥
ghṛtācī menakā rambhā sahajanyā tilottamā urvaśī caiva nimlocā tathānyā vāmanā parā //
मन्दोदरी च सुभगा विश्वाची विपुलानना भद्राङ्गी चित्रसेना च प्रम्लोचा सुमनोहरा ॥
mandodarī ca subhagā viśvācī vipulānanā bhadrāṅgī citrasenā ca pramlocā sumanoharā //
मुनिसंमोहिनी रामा चन्द्रमध्या शुभानना सुकेशी नीलकेशा च तथा मन्मथदीपिनी ॥
munisaṃmohinī rāmā candramadhyā śubhānanā sukeśī nīlakeśā ca tathā manmathadīpinī //
अलम्बुषा मिश्रकेशी तथान्या मुञ्जिकस्थला क्रतुस्थला वराङ्गी च पूर्वचित्तिस् तथा परा ॥
alambuṣā miśrakeśī tathānyā muñjikasthalā kratusthalā varāṅgī ca pūrvacittis tathā parā //
परावती महारूपा शशिलेखा शुभानना हंसलीलानुगामिन्यो मत्तवारणगामिनी ॥
parāvatī mahārūpā śaśilekhā śubhānanā haṃsalīlānugāminyo mattavāraṇagāminī //
बिम्बौष्ठी नवगर्भा च विख्याताः सुरयोषितः एताश् चान्या अप्सरसो रूपयौवनगर्विताः ॥
bimbauṣṭhī navagarbhā ca vikhyātāḥ surayoṣitaḥ etāś cānyā apsaraso rūpayauvanagarvitāḥ //
सुमध्याश् चारुवदनाः सर्वालंकारभूषिताः गीतमाधुर्यसंयुक्ताः सर्वलक्षणसंयुताः ॥
sumadhyāś cāruvadanāḥ sarvālaṃkārabhūṣitāḥ gītamādhuryasaṃyuktāḥ sarvalakṣaṇasaṃyutāḥ //
गीतवाद्ये च कुशलाः सुरगन्धर्वयोषितः नृत्यन्त्य् अनुदिनं तत्र यत्रासौ पुरुषोत्तमः ॥
gītavādye ca kuśalāḥ suragandharvayoṣitaḥ nṛtyanty anudinaṃ tatra yatrāsau puruṣottamaḥ //
न तत्र रोगो नो ग्लानिर् न मृत्युर् न हिमातपौ न क्षुत् पिपासा न जरा न वैरूप्यं न चासुखम् ॥
na tatra rogo no glānir na mṛtyur na himātapau na kṣut pipāsā na jarā na vairūpyaṃ na cāsukham //
परमानन्दजननं सर्वकामफलप्रदम् विष्णुलोकात् परं लोकं नात्र पश्यामि भो द्विजाः ॥
paramānandajananaṃ sarvakāmaphalapradam viṣṇulokāt paraṃ lokaṃ nātra paśyāmi bho dvijāḥ //
ये लोकाः स्वर्गलोके तु श्रूयन्ते पुण्यकर्मणाम् विष्णुलोकस्य ते विप्राः कलां नार्हन्ति षोडशीम् ॥
ye lokāḥ svargaloke tu śrūyante puṇyakarmaṇām viṣṇulokasya te viprāḥ kalāṃ nārhanti ṣoḍaśīm //
एवं हरेः पुरस्थानं सर्वभोगगुणान्वितम् सर्वसौख्यकरं पुण्यं सर्वाश्चर्यमयं द्विजाः ॥
evaṃ hareḥ purasthānaṃ sarvabhogaguṇānvitam sarvasaukhyakaraṃ puṇyaṃ sarvāścaryamayaṃ dvijāḥ //
न तत्र नास्तिका यान्ति पुरुषा विषयात्मकाः न कृतघ्ना न पिशुना नो स्तेना नाजितेन्द्रियाः ॥
na tatra nāstikā yānti puruṣā viṣayātmakāḥ na kṛtaghnā na piśunā no stenā nājitendriyāḥ //
ये ऽर्चयन्ति सदा भक्त्या वासुदेवं जगद्गुरुम् ते तत्र वैष्णवा यान्ति विष्णुलोकं न संशयः ॥
ye 'rcayanti sadā bhaktyā vāsudevaṃ jagadgurum te tatra vaiṣṇavā yānti viṣṇulokaṃ na saṃśayaḥ //
दक्षिणस्योदधेस् तीरे क्षेत्रे परमदुर्लभे दृष्ट्वा कृष्णं च रामं च सुभद्रां च द्विजोत्तमाः ॥
dakṣiṇasyodadhes tīre kṣetre paramadurlabhe dṛṣṭvā kṛṣṇaṃ ca rāmaṃ ca subhadrāṃ ca dvijottamāḥ //
कल्पवृक्षसमीपे तु ये त्यजन्ति कलेवरम् ते तत्र मनुजा यान्ति मृता ये पुरुषोत्तमे ॥
kalpavṛkṣasamīpe tu ye tyajanti kalevaram te tatra manujā yānti mṛtā ye puruṣottame //
वटसागरयोर् मध्ये यः स्मरेत् पुरुषोत्तमम् ते ऽपि तत्र नरा यान्ति ये मृताः पुरुषोत्तमे ॥
vaṭasāgarayor madhye yaḥ smaret puruṣottamam te 'pi tatra narā yānti ye mṛtāḥ puruṣottame //
ते ऽपि तत्र परं स्थानं यान्ति नास्त्य् अत्र संशयः एवं मया मुनिश्रेष्ठा विष्णुलोकः सनातनः सर्वानन्दकरः प्रोक्तो भुक्तिमुक्तिफलप्रदः ॥
te 'pi tatra paraṃ sthānaṃ yānti nāsty atra saṃśayaḥ evaṃ mayā muniśreṣṭhā viṣṇulokaḥ sanātanaḥ sarvānandakaraḥ prokto bhuktimuktiphalapradaḥ //