त्र्यम्बकश् च इति प्राह गौतमं मुनिभिर् वृतम् ॥
tryambakaś ca iti prāha gautamaṃ munibhir vṛtam //
द्विहस्तमात्रे तीर्थानि संभविष्यन्ति गौतम सर्वत्राहं संनिहितः सर्वकामप्रदस् तथा ॥
dvihastamātre tīrthāni saṃbhaviṣyanti gautama sarvatrāhaṃ saṃnihitaḥ sarvakāmapradas tathā //
नर्मदा तु सरिच्छ्रेष्ठा पर्वते ऽमरकण्टके यमुना संगता तत्र प्रभासे तु सरस्वती ॥
narmadā tu saricchreṣṭhā parvate 'marakaṇṭake yamunā saṃgatā tatra prabhāse tu sarasvatī //
कृष्णा भीमरथी चैव तुङ्गभद्रा तु नारद तिसृणां संगमो यत्र तत् तीर्थं मुक्तिदं नृणाम् ॥
kṛṣṇā bhīmarathī caiva tuṅgabhadrā tu nārada tisṛṇāṃ saṃgamo yatra tat tīrthaṃ muktidaṃ nṛṇām //
पयोउष्णी संगता यत्र तत्रत्या तच् च मुक्तिदम् इयं तु गौतमी वत्स यत्र क्वापि ममाज्ञया ॥
payouṣṇī saṃgatā yatra tatratyā tac ca muktidam iyaṃ tu gautamī vatsa yatra kvāpi mamājñayā //
सर्वेषां सर्वदा नॄणां स्नानान् मुक्तिं प्रदास्यति किंचित्काले पुण्यतमं किंचित्तीर्थं सुरागमे ॥
sarveṣāṃ sarvadā nṝṇāṃ snānān muktiṃ pradāsyati kiṃcitkāle puṇyatamaṃ kiṃcittīrthaṃ surāgame //
सर्वेषां सर्वदा तीर्थं गौतमी नात्र संशयः तिस्रः कोट्यो ऽर्धकोटी च योजनानां शतद्वये ॥
sarveṣāṃ sarvadā tīrthaṃ gautamī nātra saṃśayaḥ tisraḥ koṭyo 'rdhakoṭī ca yojanānāṃ śatadvaye //
तीर्थानि मुनिशार्दूल संभविष्यन्ति गौतम इयं माहेश्वरी गङ्गा गौतमी वैष्णवीति च ॥
tīrthāni muniśārdūla saṃbhaviṣyanti gautama iyaṃ māheśvarī gaṅgā gautamī vaiṣṇavīti ca //
ब्राह्मी गोदावरी नन्दा सुनन्दा कामदायिनी ब्रह्मतेजःसमानीता सर्वपापप्रणाशनी ॥
brāhmī godāvarī nandā sunandā kāmadāyinī brahmatejaḥsamānītā sarvapāpapraṇāśanī //
स्मरणाद् एव पापौघहन्त्री मम सदा प्रिया पञ्चानाम् अपि भूतानाम् आपः श्रेष्ठत्वम् आगताः ॥
smaraṇād eva pāpaughahantrī mama sadā priyā pañcānām api bhūtānām āpaḥ śreṣṭhatvam āgatāḥ //
तत्रापि तीर्थभूतास् तु तस्माद् आपः पराः स्मृताः तासां भागीरथी श्रेष्ठा ताभ्यो ऽपि गौतमी तथा ॥
tatrāpi tīrthabhūtās tu tasmād āpaḥ parāḥ smṛtāḥ tāsāṃ bhāgīrathī śreṣṭhā tābhyo 'pi gautamī tathā //
आनीता सजटा गङ्गा अस्या नान्यच् छुभावहम् स्वर्गे भुवि तले वापि तीर्थं सर्वार्थदं मुने ॥
ānītā sajaṭā gaṅgā asyā nānyac chubhāvaham svarge bhuvi tale vāpi tīrthaṃ sarvārthadaṃ mune //
इत्य् एतत् कथितं पुत्र गौतमाय महात्मने साक्षाद् धरेण तुष्टेन मया तव निवेदितम् ॥
ity etat kathitaṃ putra gautamāya mahātmane sākṣād dhareṇa tuṣṭena mayā tava niveditam //
एवं सा गौतमी गङ्गा सर्वेभ्यो ऽप्य् अधिका मता तत्स्वरूपं च कथितं कुतो ऽन्या श्रवणस्पृहा ॥
evaṃ sā gautamī gaṅgā sarvebhyo 'py adhikā matā tatsvarūpaṃ ca kathitaṃ kuto 'nyā śravaṇaspṛhā //