38 ॥ इति श्रीब्रह्माण्डमहापुराणे उत्तरभागे हयग्रीवागस्त्यसंवादे ललितोपाख्याने भण्डासुरप्रादुर्भावो नामैकादशो ऽध्यायः रुद्रकोपानलाज्जातो यतो भण्डो महाबलः । तस्माद्रौद्रस्वभावो हि दानवश्चाभवत्ततः
38 // iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne bhaṇḍāsuraprādurbhāvo nāmaikādaśo 'dhyāyaḥ rudrakopānalājjāto yato bhaṇḍo mahābalaḥ / tasmādraudrasvabhāvo hi dānavaścābhavattataḥ
1 ॥ अथागच्छन्महातेजाः शुक्रो दैत्यपुरोहितः । समायाताश्च शतशो दैतेयाः सुमहाबलाः
1 // athāgacchanmahātejāḥ śukro daityapurohitaḥ / samāyātāśca śataśo daiteyāḥ sumahābalāḥ
2 ॥ अथाहूय मयं भण्डो दैत्यवंश्यादिशिल्पिनम् । नियुक्तो भृगुपुत्रेण निजगादार्थवद्वचः
2 // athāhūya mayaṃ bhaṇḍo daityavaṃśyādiśilpinam / niyukto bhṛguputreṇa nijagādārthavadvacaḥ
3 ॥ यत्र स्थित्वा तु दैत्येन्द्रैस्त्रैलोक्यं शासितं पुरा । तद्गत्वा शोणितपुरं कुरुष्व त्वं यथापुरम्
3 // yatra sthitvā tu daityendraistrailokyaṃ śāsitaṃ purā / tadgatvā śoṇitapuraṃ kuruṣva tvaṃ yathāpuram
4 ॥ तच्छ्रुत्वा वचनं शिल्पी स गत्वाथ पुरं महत् । चक्रे ऽमरपुरप्रख्यं मनसैवेक्षणेन तु
4 // tacchrutvā vacanaṃ śilpī sa gatvātha puraṃ mahat / cakre 'marapuraprakhyaṃ manasaivekṣaṇena tu
5 ॥ अथाभिषिक्तः शुक्रेण दैतेयैश्च महाबलैः । शुशभे परया लक्ष्म्या तेजसा च समन्वितः
5 // athābhiṣiktaḥ śukreṇa daiteyaiśca mahābalaiḥ / śuśabhe parayā lakṣmyā tejasā ca samanvitaḥ
6 ॥ हिरण्याय तु यद्दत्तं किरीटं ब्रह्मणा पुरा । सजीवमविनाश्यं च दैत्येन्द्रैरपि भूषितम् । दधौ भृगुसुतोत्सृष्टं भण्डो बालार्कसन्निभम्
6 // hiraṇyāya tu yaddattaṃ kirīṭaṃ brahmaṇā purā / sajīvamavināśyaṃ ca daityendrairapi bhūṣitam / dadhau bhṛgusutotsṛṣṭaṃ bhaṇḍo bālārkasannibham
7 ॥ चामरे चन्द्रसंकाशे सजीवे ब्रह्म निर्मिते । न रोगो न च दुःखानि संदधौ यन्निषेवणात्
7 // cāmare candrasaṃkāśe sajīve brahma nirmite / na rogo na ca duḥkhāni saṃdadhau yanniṣevaṇāt
8 ॥ तस्यातपत्रं प्रददौ ब्रह्मणैव पुरा कृतम् । यस्य च्छायानिषण्णास्तु बाध्यन्ते नास्त्रकोटिभिः
8 // tasyātapatraṃ pradadau brahmaṇaiva purā kṛtam / yasya cchāyāniṣaṇṇāstu bādhyante nāstrakoṭibhiḥ
9 ॥ धनुश्च विजयं नाम शङ्खं च रिपुघातिनम् । अन्यान्यपि महार्हाणि भूषणानि प्रदत्तवान्
9 // dhanuśca vijayaṃ nāma śaṅkhaṃ ca ripughātinam / anyānyapi mahārhāṇi bhūṣaṇāni pradattavān
10 ॥ तस्य सिंहासनं प्रादादक्षय्यं सूर्यसन्निभम् । ततः सिंहासनासीनः सर्वाभरणभूषितः । बभूवातीव तेजस्वी रत्नमुत्तेजितं यथा
10 // tasya siṃhāsanaṃ prādādakṣayyaṃ sūryasannibham / tataḥ siṃhāsanāsīnaḥ sarvābharaṇabhūṣitaḥ / babhūvātīva tejasvī ratnamuttejitaṃ yathā
11 ॥ बभूवुरथ दैतेयास्तयाष्टौ तु महाबलाः । इन्द्रशत्रुरमित्रघ्नो विद्युन्माली विभीषणः । उग्रकर्मोग्रधन्वा च विजयश्रुति पारगः
11 // babhūvuratha daiteyāstayāṣṭau tu mahābalāḥ / indraśatruramitraghno vidyunmālī vibhīṣaṇaḥ / ugrakarmogradhanvā ca vijayaśruti pāragaḥ
12 ॥ सुमोहिनी कुमुदिनी चित्राङ्गी सुंदरी तथा । चतस्रो वनितास्तस्य बभूवुः प्रियदर्शनाः
12 // sumohinī kumudinī citrāṅgī suṃdarī tathā / catasro vanitāstasya babhūvuḥ priyadarśanāḥ
13 ॥ तमसेवन्त कालज्ञा देवाः सर्वे सवासवाः । स्यन्दनास्तुरगा नागाः पादाताश्च सहस्रशः
13 // tamasevanta kālajñā devāḥ sarve savāsavāḥ / syandanāsturagā nāgāḥ pādātāśca sahasraśaḥ
14 ॥ संबभूवुर्महाकाया महान्तो जितकाशिनः । बभूवुर्दानवाः सर्वे भृगुपुत्रमतानुगाः
14 // saṃbabhūvurmahākāyā mahānto jitakāśinaḥ / babhūvurdānavāḥ sarve bhṛguputramatānugāḥ
15 ॥ अर्चयन्तो महादेवमास्थिताः शिवशासने । बभूवुर्दानवास्तत्र पुत्रपौत्रधनान्विताः । गृहेगृहे च यज्ञाश्च संबभूवुः समन्ततः
15 // arcayanto mahādevamāsthitāḥ śivaśāsane / babhūvurdānavāstatra putrapautradhanānvitāḥ / gṛhegṛhe ca yajñāśca saṃbabhūvuḥ samantataḥ
16 ॥ ऋचो यजूंषि सामानि मीमांसान्यायकादयः । प्रवर्तन्ते स्म दैत्यानां भूयः प्रतिगृहं तदा
16 // ṛco yajūṃṣi sāmāni mīmāṃsānyāyakādayaḥ / pravartante sma daityānāṃ bhūyaḥ pratigṛhaṃ tadā
17 ॥ यथाश्रमेषु मुख्येषु मुनीनां च द्विजन्मनाम् । तथा यज्ञेषु दैत्यानां बुभुजुर्हव्यभोजिनः
17 // yathāśrameṣu mukhyeṣu munīnāṃ ca dvijanmanām / tathā yajñeṣu daityānāṃ bubhujurhavyabhojinaḥ
18 ॥ एवं कृतवतो ऽप्यस्य भण्डस्य जितकाशिनः । षष्टिवर्षसहस्राणि व्यतीतानि क्षणार्धवत्
18 // evaṃ kṛtavato 'pyasya bhaṇḍasya jitakāśinaḥ / ṣaṣṭivarṣasahasrāṇi vyatītāni kṣaṇārdhavat
19 ॥ वर्धमानमथो दैत्यं तपसा च बलेन च । हीयमानबलं चेन्द्रं संप्रेक्ष्य कमलापतिः
19 // vardhamānamatho daityaṃ tapasā ca balena ca / hīyamānabalaṃ cendraṃ saṃprekṣya kamalāpatiḥ
20 ॥ ससर्ज सहसा काञ्चिन्मायां लोकविमोहिनीम् । तामुवाच ततो मायां देवदेवो जनार्दनः
20 // sasarja sahasā kāñcinmāyāṃ lokavimohinīm / tāmuvāca tato māyāṃ devadevo janārdanaḥ
21 ॥ त्वं हि सर्वाणि भूतानि मोहयन्ती निजौजसा । विचरस्व यथाकामं त्वां न ज्ञास्यति कश्चन
21 // tvaṃ hi sarvāṇi bhūtāni mohayantī nijaujasā / vicarasva yathākāmaṃ tvāṃ na jñāsyati kaścana
22 ॥ त्वं तु शीघ्रमितो गत्वा भण्डं दैतेयनायकम् । मोहयित्वाचिरेणैव विषयानुपभोक्ष्यसे
22 // tvaṃ tu śīghramito gatvā bhaṇḍaṃ daiteyanāyakam / mohayitvācireṇaiva viṣayānupabhokṣyase
23 ॥ एवं लब्ध्वा वरं माया तं प्रणम्य जनार्दनम् । ययाचे ऽप्सरसो मुख्याः सहायार्थं तु काश्चन
23 // evaṃ labdhvā varaṃ māyā taṃ praṇamya janārdanam / yayāce 'psaraso mukhyāḥ sahāyārthaṃ tu kāścana
24 ॥ तया संप्रार्थितो भूयः प्रेषयामास काश्चन । ताभिर्विश्वाचिमुख्याभिः सहिता सा मृगेक्षणा । प्रययौ मानसस्याग्यं तटमुज्ज्वलभूरुहम्
24 // tayā saṃprārthito bhūyaḥ preṣayāmāsa kāścana / tābhirviśvācimukhyābhiḥ sahitā sā mṛgekṣaṇā / prayayau mānasasyāgyaṃ taṭamujjvalabhūruham
25 ॥ यत्र क्रीडति दैत्येन्द्रो निजनारीभिरन्वितः । तत्र सा मृगशावाक्षी मूले चंपकशाखिनः । निवासमकरोद्रम्यं गायन्ती मधुरस्वरम्
25 // yatra krīḍati daityendro nijanārībhiranvitaḥ / tatra sā mṛgaśāvākṣī mūle caṃpakaśākhinaḥ / nivāsamakarodramyaṃ gāyantī madhurasvaram
26 ॥ अथागतस्तु दैत्येन्द्रो बलिभिर्भन्त्रिभिर्वृतः । श्रुत्वा तु वीणानिनदं ददर्श च वराङ्गनाम्
26 // athāgatastu daityendro balibhirbhantribhirvṛtaḥ / śrutvā tu vīṇāninadaṃ dadarśa ca varāṅganām
27 ॥ तां दृष्ट्वा चारुसर्वाङ्गीं विद्युल्लेखामिवापराम् । मायामये महागर्ते पतितो मदनाभिधे
27 // tāṃ dṛṣṭvā cārusarvāṅgīṃ vidyullekhāmivāparām / māyāmaye mahāgarte patito madanābhidhe
28 ॥ अथास्य मन्त्रिणो ऽभूवन्त्दृदये स्मरतापि ताः
28 // athāsya mantriṇo 'bhūvantdṛdaye smaratāpi tāḥ
29 ॥ तेन दैतेयनाथेन चिरं संप्रर्थिता सती । तैश्च संप्रर्थितास्ताश्च प्रतिशूश्रुवुरञ्जसा
29 // tena daiteyanāthena ciraṃ saṃprarthitā satī / taiśca saṃprarthitāstāśca pratiśūśruvurañjasā
30 ॥ यास्त्वलभ्या महायज्ञैरश्वमेधादिकैरपि । ता लब्ध्वा मोहिनीमुख्या निर्वृतिं परमां ययुः
30 // yāstvalabhyā mahāyajñairaśvamedhādikairapi / tā labdhvā mohinīmukhyā nirvṛtiṃ paramāṃ yayuḥ
31 ॥ विसस्मरुस्तदा वेदांस्तथा देवमुमापतिम् । विजहुस्ते तथा यज्ञक्रियाश्चान्याः शुभावहाः
31 // visasmarustadā vedāṃstathā devamumāpatim / vijahuste tathā yajñakriyāścānyāḥ śubhāvahāḥ
32 ॥ अवमानहतश्चासीत्तेषामपि पुरोहितः । मुहूर्त्तमिव तेषां तु ययावब्दायुतं तदा
32 // avamānahataścāsītteṣāmapi purohitaḥ / muhūrttamiva teṣāṃ tu yayāvabdāyutaṃ tadā
33 ॥ मोहितेष्वथ दैत्येषु सर्वे देवाः सवासवाः । विमुक्तोपद्रवा ब्रह्मन्नामोदं परमं ययुः
33 // mohiteṣvatha daityeṣu sarve devāḥ savāsavāḥ / vimuktopadravā brahmannāmodaṃ paramaṃ yayuḥ
34 ॥ कदाचिदथ देवेन्द्रं वीक्ष्य सिंहासने स्थितम् । सर्वदेवैः परिवृतं नारदो मुनिराययौ
34 // kadācidatha devendraṃ vīkṣya siṃhāsane sthitam / sarvadevaiḥ parivṛtaṃ nārado munirāyayau
35 ॥ प्रणम्य मुनिशार्दूलं ज्वलन्तमिव पावकम् । कृताञ्जलिपुटो भूत्वा देवेशो वाक्यमब्रवीत्
35 // praṇamya muniśārdūlaṃ jvalantamiva pāvakam / kṛtāñjalipuṭo bhūtvā deveśo vākyamabravīt
36 ॥ भगवन्सर्वधर्मज्ञ परापरविदां वर । तत्रैव गमनं ते स्याद्यं धन्यं कर्तुमिच्छसि
36 // bhagavansarvadharmajña parāparavidāṃ vara / tatraiva gamanaṃ te syādyaṃ dhanyaṃ kartumicchasi
37 ॥ भविष्यच्छोभनाकारं तवागमनकारणम् । त्वद्वाक्यामृतमाकर्ण्य श्रवणानन्दनिर्भरम् । अशेषदुःखान्युत्तीर्य कृतार्थः स्यां मुनीश्वर
37 // bhaviṣyacchobhanākāraṃ tavāgamanakāraṇam / tvadvākyāmṛtamākarṇya śravaṇānandanirbharam / aśeṣaduḥkhānyuttīrya kṛtārthaḥ syāṃ munīśvara
38 ॥ नारद उवाच अथ संमोहितो भण्डो दैत्येन्द्रो विष्णुमायया । तया विमुक्तो लोकांस्त्रीन्दहेताग्निरिवापरः
38 // nārada uvāca atha saṃmohito bhaṇḍo daityendro viṣṇumāyayā / tayā vimukto lokāṃstrīndahetāgnirivāparaḥ
39 ॥ अधिकस्तव तेजोभिरस्त्रैर्मायाबलेन च । तस्य तेजो ऽपहारस्तु कर्तव्यो ऽतिबलस्य तु
39 // adhikastava tejobhirastrairmāyābalena ca / tasya tejo 'pahārastu kartavyo 'tibalasya tu
40 ॥ विनाराधनतो देव्याः पराशक्तेस्तु वासव । अशक्यो ऽन्येन तपसा कल्पकोटिशतैरपि
40 // vinārādhanato devyāḥ parāśaktestu vāsava / aśakyo 'nyena tapasā kalpakoṭiśatairapi
41 ॥ पुरैवोदयतः शत्रोराराधयत बालिशाः । आराधिता भगवती सा वः श्रेयो विधास्यति
41 // puraivodayataḥ śatrorārādhayata bāliśāḥ / ārādhitā bhagavatī sā vaḥ śreyo vidhāsyati
42 ॥ एवं संबोधितस्तेन शक्रो देवगणेश्वरः । तं मुनिं पूजयामास सर्वदेवैः समन्वितः । तपसे कृतसन्नाहो ययौ हैमवतं तटम्
42 // evaṃ saṃbodhitastena śakro devagaṇeśvaraḥ / taṃ muniṃ pūjayāmāsa sarvadevaiḥ samanvitaḥ / tapase kṛtasannāho yayau haimavataṃ taṭam
43 ॥ तत्र भागीरथीतीरे सर्वर्तुकुसुमोज्ज्वले । पराशक्तेर्महापूजां चक्रे ऽखिलसुरैः समम् । इन्द्रप्रस्थमभून्नाम्रा तदाद्यखिलसिद्धिदम्
43 // tatra bhāgīrathītīre sarvartukusumojjvale / parāśaktermahāpūjāṃ cakre 'khilasuraiḥ samam / indraprasthamabhūnnāmrā tadādyakhilasiddhidam
44 ॥ ब्रह्मात्मजोपदिष्टेन कुर्वतां विधिना पराम् । देव्यास्तु महतीं पूजां जपध्यानरतात्मनाम्
44 // brahmātmajopadiṣṭena kurvatāṃ vidhinā parām / devyāstu mahatīṃ pūjāṃ japadhyānaratātmanām
45 ॥ उग्रे तपसि संस्थानामनन्या र्पितचेतसाम् । दशवर्षसहस्राणि दशाहानि च संययुः
45 // ugre tapasi saṃsthānāmananyā rpitacetasām / daśavarṣasahasrāṇi daśāhāni ca saṃyayuḥ
46 ॥ मोहितानथ तान्दृष्ट्वा भृगुपुत्रो महामतिः । भण्डासुरं समभ्येत्य निजगाद पुरोहितः
46 // mohitānatha tāndṛṣṭvā bhṛguputro mahāmatiḥ / bhaṇḍāsuraṃ samabhyetya nijagāda purohitaḥ
47 ॥ त्वामेवाश्रित्य राचैन्द्र सदा दानवसत्तमाः । निर्भयास्त्रिषु लोकेषु चरन्तीच्छविहारिणः
47 // tvāmevāśritya rācaindra sadā dānavasattamāḥ / nirbhayāstriṣu lokeṣu carantīcchavihāriṇaḥ
48 ॥ जातिमात्रं हि भवतो हन्ति सर्वान्सदा हरिः । तेनैव निर्मिता माया यया संमोहितो भवान्
48 // jātimātraṃ hi bhavato hanti sarvānsadā hariḥ / tenaiva nirmitā māyā yayā saṃmohito bhavān
49 ॥ भवन्तं मोहितं दृष्ट्वा रन्ध्रान्वेषण तत्परः । भवतां विजयार्थाय करोतीन्द्रो महत्तपः
49 // bhavantaṃ mohitaṃ dṛṣṭvā randhrānveṣaṇa tatparaḥ / bhavatāṃ vijayārthāya karotīndro mahattapaḥ
50 ॥ यदि तुष्टा जगद्धात्री तस्यैव विजयो भवेत् । इमां मायामयीं त्यक्त्वा मन्त्रिभिः सहितो भवान् । गत्वा हैमवतं शैलं परेषां विघ्नमाचर
50 // yadi tuṣṭā jagaddhātrī tasyaiva vijayo bhavet / imāṃ māyāmayīṃ tyaktvā mantribhiḥ sahito bhavān / gatvā haimavataṃ śailaṃ pareṣāṃ vighnamācara
51 ॥ एवमुक्तस्तु गुरुणा हित्वा पर्यङ्कमुत्तमम् । मन्त्रिवृद्धानु पाहूय यथावृत्तान्तमाह सः
51 // evamuktastu guruṇā hitvā paryaṅkamuttamam / mantrivṛddhānu pāhūya yathāvṛttāntamāha saḥ
52 ॥ तच्छ्रुत्वा नृपतिं प्राह श्रुतवर्मा विमृश्य च । षष्टिवर्षसहस्राणां राज्यं तव शिवार्पितम्
52 // tacchrutvā nṛpatiṃ prāha śrutavarmā vimṛśya ca / ṣaṣṭivarṣasahasrāṇāṃ rājyaṃ tava śivārpitam
53 ॥ तस्मादप्यधिकं वीर गतमासीदनेकशः । अशक्यप्रतिकार्यो ऽयं यः कालशिवचोदितः
53 // tasmādapyadhikaṃ vīra gatamāsīdanekaśaḥ / aśakyapratikāryo 'yaṃ yaḥ kālaśivacoditaḥ
54 ॥ अशक्यप्रतिकार्यो ऽयं तदभ्यर्चनतो विना । काले तु भोगः कर्त्तव्यो दुःखस्य च सुखस्य वा
54 // aśakyapratikāryo 'yaṃ tadabhyarcanato vinā / kāle tu bhogaḥ karttavyo duḥkhasya ca sukhasya vā
55 ॥ अथाह भीमकर्माख्यो नोपेक्ष्यो ऽरिर्यथाबलम् । क्रियाविघ्ने कृते ऽस्माभिर्विजयस्ते भविष्यति
55 // athāha bhīmakarmākhyo nopekṣyo 'riryathābalam / kriyāvighne kṛte 'smābhirvijayaste bhaviṣyati
56 ॥ तव युद्धे महाराज परार्थं बलहारिणी । दत्ता विद्या शिवेनैव तस्मात्ते विजयः सदा
56 // tava yuddhe mahārāja parārthaṃ balahāriṇī / dattā vidyā śivenaiva tasmātte vijayaḥ sadā
57 ॥ अनुमेने च तद्वाक्यं भण्डो दानवनायकः । निर्गत्य सहसेनाभिर्ययौ हैमवतं तटम्
57 // anumene ca tadvākyaṃ bhaṇḍo dānavanāyakaḥ / nirgatya sahasenābhiryayau haimavataṃ taṭam
58 ॥ तपोविघ्नकरान्दृष्ट्वा दानवाञ्जगदंबिका । अलङ्घ्यमकरोदग्रे महाप्राकारमुज्ज्वलम्
58 // tapovighnakarāndṛṣṭvā dānavāñjagadaṃbikā / alaṅghyamakarodagre mahāprākāramujjvalam
59 ॥ तं दृष्ट्वा दानवेन्द्रो ऽपि किमेतदिति विस्मितः । संक्रुद्धो दानवास्त्रेण बभञ्जातिबलेन तु
59 // taṃ dṛṣṭvā dānavendro 'pi kimetaditi vismitaḥ / saṃkruddho dānavāstreṇa babhañjātibalena tu
60 ॥ पुनरेव तदग्रे ऽभूदलङ्घ्यः सर्वदानवैः । वायव्यास्त्रेण तं धीरो बभञ्ज च ननाद च
60 // punareva tadagre 'bhūdalaṅghyaḥ sarvadānavaiḥ / vāyavyāstreṇa taṃ dhīro babhañja ca nanāda ca
61 ॥ पौनः पुन्येन तद्भस्म प्राभूत्पुनरुपस्थितम् । एतद्दृष्ट्वा तु दैत्येन्द्रो विषण्मः स्वपुरं ययौ
61 // paunaḥ punyena tadbhasma prābhūtpunarupasthitam / etaddṛṣṭvā tu daityendro viṣaṇmaḥ svapuraṃ yayau
62 ॥ तां च दृष्ट्वा जगद्धात्रीं दृष्ट्वा प्राकारमुज्ज्वलम् । भयाद्विव्यथिरे देवा विमुक्तसकलक्रियाः
62 // tāṃ ca dṛṣṭvā jagaddhātrīṃ dṛṣṭvā prākāramujjvalam / bhayādvivyathire devā vimuktasakalakriyāḥ
63 ॥ तानुवाच ततः शक्रो दैत्येन्द्रो ऽयमिहागतः । अशक्यः समरे योद्धुमस्माभिरखिलैरपि
63 // tānuvāca tataḥ śakro daityendro 'yamihāgataḥ / aśakyaḥ samare yoddhumasmābhirakhilairapi
64 ॥ पलायितानामपि नो गतिरन्या न कुत्रचित् । कुण्डं योजनविस्तारं सम्यक्कृत्वा तु शोभनम्
64 // palāyitānāmapi no gatiranyā na kutracit / kuṇḍaṃ yojanavistāraṃ samyakkṛtvā tu śobhanam
65 ॥ महायागविधानेन प्रणिधाय हुताशनम् । यजामः परमां शाक्तिं महामासैर्वयं सुराः
65 // mahāyāgavidhānena praṇidhāya hutāśanam / yajāmaḥ paramāṃ śāktiṃ mahāmāsairvayaṃ surāḥ
66 ॥ ब्रह्मभूता भविष्यामो भोक्ष्यामो वा त्रिविष्टपम् । एवमुक्तास्तु ते सर्वेदेवाः सेन्द्रपुरोगमाः
66 // brahmabhūtā bhaviṣyāmo bhokṣyāmo vā triviṣṭapam / evamuktāstu te sarvedevāḥ sendrapurogamāḥ
67 ॥ विधिवज्जुहुवुर्मांसान्युत्कृत्योत्कृत्य मन्त्रतः । हुतेषु सर्वमांसेषु पादेषु च करेषु च
67 // vidhivajjuhuvurmāṃsānyutkṛtyotkṛtya mantrataḥ / huteṣu sarvamāṃseṣu pādeṣu ca kareṣu ca
68 ॥ होतुमिच्छत्सु देवेषु कलेवरमशेषतः । प्रादुर्बभूव परमन्तेजः पुञ्जो ह्यनुत्तमः
68 // hotumicchatsu deveṣu kalevaramaśeṣataḥ / prādurbabhūva paramantejaḥ puñjo hyanuttamaḥ
69 ॥ तन्मध्यतः समुदभूच्चक्राकारमनुत्तमम् । तन्मध्ये तु महादेवीमुदयार्कसमप्रभाम्
69 // tanmadhyataḥ samudabhūccakrākāramanuttamam / tanmadhye tu mahādevīmudayārkasamaprabhām
70 ॥ जगदुज्जीवनकरीं ब्रह्मविष्णुशिवात्मिकाम् । सौन्दर्यसारसीमां तामानन्दरससागराम्
70 // jagadujjīvanakarīṃ brahmaviṣṇuśivātmikām / saundaryasārasīmāṃ tāmānandarasasāgarām
71 ॥ जपाकुसुमसंकाशां दाडिमीकुसुमांबराम् । सर्वाभरणसंयुक्तां शृङ्गारैकरसालयाम्
71 // japākusumasaṃkāśāṃ dāḍimīkusumāṃbarām / sarvābharaṇasaṃyuktāṃ śṛṅgāraikarasālayām
72 ॥ कृपातरङ्गितापाङ्गनयनालोककौमुदीम् । पाशाङ्कुशेक्षुकोदण्डपञ्चबाणलसत्कराम्
72 // kṛpātaraṅgitāpāṅganayanālokakaumudīm / pāśāṅkuśekṣukodaṇḍapañcabāṇalasatkarām
73 ॥ तां विलोक्य महादेवीं देवाः सर्वे सवासवाः । प्रणेमुर्मुदितात्मानो भूयोभूयो ऽखिलात्मिकम्
73 // tāṃ vilokya mahādevīṃ devāḥ sarve savāsavāḥ / praṇemurmuditātmāno bhūyobhūyo 'khilātmikam
74 ॥ तया विलोकिताः सद्यस्ते सर्वे विगतज्वराः । संपूर्णाङ्गा दृढतरा वज्रदेहा महाबलाः । तुष्टुवुश्च महादेवीमंबिकामखिलार्थदाम्
74 // tayā vilokitāḥ sadyaste sarve vigatajvarāḥ / saṃpūrṇāṅgā dṛḍhatarā vajradehā mahābalāḥ / tuṣṭuvuśca mahādevīmaṃbikāmakhilārthadām