75 ॥ इति श्रीब्रह्माण्डमहापुराणे उत्तरभागे हयग्रीवागस्त्यसंवादे ललितोपाख्याने ललिताप्रादुर्भावो नाम द्वादशो ऽध्यायः देवा ऊचुः जय देवि जगन्मातर्जय देवि परात्परे । जय कल्याणनिलये जय कामकलात्मिके
75 // iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne lalitāprādurbhāvo nāma dvādaśo 'dhyāyaḥ devā ūcuḥ jaya devi jaganmātarjaya devi parātpare / jaya kalyāṇanilaye jaya kāmakalātmike
1 ॥ जयकारि च वामाक्षि जय कामाक्षि सुन्दरि । जयाखिलसुराराध्ये जय कामेशि मानदे
1 // jayakāri ca vāmākṣi jaya kāmākṣi sundari / jayākhilasurārādhye jaya kāmeśi mānade
2 ॥ जय ब्रह्ममये देवि ब्रह्मात्मकरसात्मिके । जय नारायणि परे नन्दिताशेषविष्टपे
2 // jaya brahmamaye devi brahmātmakarasātmike / jaya nārāyaṇi pare nanditāśeṣaviṣṭape
3 ॥ जय श्रीकण्ठदयिते जय श्रीललितेंबिके । जय श्रीविजये देवि विजय श्रीसमृद्धिदे
3 // jaya śrīkaṇṭhadayite jaya śrīlaliteṃbike / jaya śrīvijaye devi vijaya śrīsamṛddhide
4 ॥ जातस्य जायमानस्य इष्टापूर्तस्य हेतवे । नमस्तस्यै त्रिजगतां पालयित्र्यै परात्परे
4 // jātasya jāyamānasya iṣṭāpūrtasya hetave / namastasyai trijagatāṃ pālayitryai parātpare
5 ॥ कलामुहूर्तकाष्ठाहर् मासर्तुशरदात्मने । नमः सहस्रशीर्षायै सहस्रमुखलोचने
5 // kalāmuhūrtakāṣṭhāhar māsartuśaradātmane / namaḥ sahasraśīrṣāyai sahasramukhalocane
6 ॥ नमः सहस्रहस्ताब्जपादपङ्कजशोभिते । अणोरणुतरे देवि महतो ऽपि महीयसि
6 // namaḥ sahasrahastābjapādapaṅkajaśobhite / aṇoraṇutare devi mahato 'pi mahīyasi
7 ॥ परात्परतरे मातस्तेजस्तेजीयसामपि । अतलं तु भवेत्पादौ वितलं जानुनी तव
7 // parātparatare mātastejastejīyasāmapi / atalaṃ tu bhavetpādau vitalaṃ jānunī tava
8 ॥ रसातलं कटीदेशः कुक्षिस्ते धरणी भवेत् । हृदयं तु भुवर्लोकः स्वस्ते मुखमुदाहृतम्
8 // rasātalaṃ kaṭīdeśaḥ kukṣiste dharaṇī bhavet / hṛdayaṃ tu bhuvarlokaḥ svaste mukhamudāhṛtam
9 ॥ दृशश्चन्द्रार्कदहना दिशस्ते बाहवोंबिके । मरुतस्तु तवोच्छ्वासा वाचस्ते श्रुतयो ऽखिलाः
9 // dṛśaścandrārkadahanā diśaste bāhavoṃbike / marutastu tavocchvāsā vācaste śrutayo 'khilāḥ
10 ॥ क्रीडा ते लोकरचना सखा ते चिन्मयः शिवः । आहारस्ते सदानन्दो वासस्ते हृदये सताम्
10 // krīḍā te lokaracanā sakhā te cinmayaḥ śivaḥ / āhāraste sadānando vāsaste hṛdaye satām
11 ॥ दृश्यादृश्य स्वरूपाणि रूपाणि भुवनानि ते । शिरोरुहा घनास्ते तु तारकाः कुसुमानि ते
11 // dṛśyādṛśya svarūpāṇi rūpāṇi bhuvanāni te / śiroruhā ghanāste tu tārakāḥ kusumāni te
12 ॥ धर्माद्या बाहवस्ते स्युरधर्माद्यायुधानि ते । यमाश्च नियमाश्चैव करपादरुहास्तथा
12 // dharmādyā bāhavaste syuradharmādyāyudhāni te / yamāśca niyamāścaiva karapādaruhāstathā
13 ॥ स्तनौ स्वाहास्वधाकरौ लोकोज्जीवनकारकौ । प्राणायामस्तु ते नासा रसना ते सरस्वती
13 // stanau svāhāsvadhākarau lokojjīvanakārakau / prāṇāyāmastu te nāsā rasanā te sarasvatī
14 ॥ प्रत्याहारस्त्विद्रिंयाणि ध्यानं ते धीस्तु सत्तमा । मनस्ते धारणाशक्तिर्हृदयं ते समाधिकः
14 // pratyāhārastvidriṃyāṇi dhyānaṃ te dhīstu sattamā / manaste dhāraṇāśaktirhṛdayaṃ te samādhikaḥ
15 ॥ महीरुहास्तेङ्गरुहाः प्रभातं वसनं तव । भूतं भव्यं भविष्यच्च नित्यं च तव विग्रहः
15 // mahīruhāsteṅgaruhāḥ prabhātaṃ vasanaṃ tava / bhūtaṃ bhavyaṃ bhaviṣyacca nityaṃ ca tava vigrahaḥ
16 ॥ यज्ञरूपा जगद्धात्री विश्वरूपा च पावनी । आदौ या तु दयाभूता ससर्ज निखिलाः प्रजाः
16 // yajñarūpā jagaddhātrī viśvarūpā ca pāvanī / ādau yā tu dayābhūtā sasarja nikhilāḥ prajāḥ
17 ॥ हृदयस्थापि लोकानामदृश्या मोहनात्मिका
17 // hṛdayasthāpi lokānāmadṛśyā mohanātmikā
18 ॥ नामरूपविभागं च या करोति स्वलीलया । तान्यधिष्ठाय तिष्ठन्ती तेष्वसक्तार्थकामदा । नमस्तस्यै महादेव्यै सर्वशक्त्यै नमोनमः
18 // nāmarūpavibhāgaṃ ca yā karoti svalīlayā / tānyadhiṣṭhāya tiṣṭhantī teṣvasaktārthakāmadā / namastasyai mahādevyai sarvaśaktyai namonamaḥ
19 ॥ यदाज्ञया प्रवर्तन्ते वह्निसूर्यैदुमारुताः । पृथिव्यादीनि भूतानि तस्यै देव्यै नमोनमः
19 // yadājñayā pravartante vahnisūryaidumārutāḥ / pṛthivyādīni bhūtāni tasyai devyai namonamaḥ
20 ॥ या ससर्जादिधातारं सर्गादावादिभूरिदम् । दधार स्वयमेवैका तस्यै देव्यै नमोनमः
20 // yā sasarjādidhātāraṃ sargādāvādibhūridam / dadhāra svayamevaikā tasyai devyai namonamaḥ
21 ॥ यथा धृता तु धरिणी ययाकाशममेयया । यस्यामुदेति सविता तस्यै देव्यै नमोनमः
21 // yathā dhṛtā tu dhariṇī yayākāśamameyayā / yasyāmudeti savitā tasyai devyai namonamaḥ
22 ॥ यत्रोदेति जगत्कृत्स्नं यत्र तिष्ठति निर्भरम् । यत्रान्तमेति काले तु तस्यै देव्यै नमोनमः
22 // yatrodeti jagatkṛtsnaṃ yatra tiṣṭhati nirbharam / yatrāntameti kāle tu tasyai devyai namonamaḥ
23 ॥ नमोनमस्ते रजसे भवायै नमोनमः सात्त्विकसंस्थितायै । नमोनमस्ते तमसे हरायै नमोनमो निर्गुणतः शिवायै
23 // namonamaste rajase bhavāyai namonamaḥ sāttvikasaṃsthitāyai / namonamaste tamase harāyai namonamo nirguṇataḥ śivāyai
24 ॥ नमोनमस्ते जगदेकमात्रे नमोनमस्ते जगदेकपित्रे । नमोनमस्ते ऽखिलरूपतन्त्रे नमोनमस्ते ऽखिलयन्त्ररूपे
24 // namonamaste jagadekamātre namonamaste jagadekapitre / namonamaste 'khilarūpatantre namonamaste 'khilayantrarūpe
25 ॥ नमोनमो लोकगुरुप्रधाने नमोनमस्ते ऽखिलवाग्विभूत्यै । नमो ऽस्तु लक्ष्म्यै जगदेकतुष्ट्यै नमोनमः शांभवि सर्वशक्त्यै
25 // namonamo lokagurupradhāne namonamaste 'khilavāgvibhūtyai / namo 'stu lakṣmyai jagadekatuṣṭyai namonamaḥ śāṃbhavi sarvaśaktyai
26 ॥ अनादिमध्यान्तमपाञ्चभौतिकं ह्यवाङ्मनोगम्यमतर्क्यवैभवम् । अरूपमद्वन्द्वमदृष्टगोचरं प्रभावमग्र्यं कथमंब वर्णये
26 // anādimadhyāntamapāñcabhautikaṃ hyavāṅmanogamyamatarkyavaibhavam / arūpamadvandvamadṛṣṭagocaraṃ prabhāvamagryaṃ kathamaṃba varṇaye
27 ॥ प्रसीद विश्वेश्वरि विश्ववन्दिते प्रसीद विद्येश्वरि वेदरूपिणि । प्रसीद मायामयि मन्त्राविग्रहे प्रसीद सर्वेश्वरि सर्वरूपिणि
27 // prasīda viśveśvari viśvavandite prasīda vidyeśvari vedarūpiṇi / prasīda māyāmayi mantrāvigrahe prasīda sarveśvari sarvarūpiṇi
28 ॥ इति स्तत्वा महादेवीं देवाः सर्वे सवासवाः । भूयोभूयो नमस्कृत्य शरणं जगमुरञ्जसा
28 // iti statvā mahādevīṃ devāḥ sarve savāsavāḥ / bhūyobhūyo namaskṛtya śaraṇaṃ jagamurañjasā
29 ॥ ततः प्रसन्ना सा देवी प्रणतं वीक्ष्य वासवम् । वरेण च्छन्दयामास वरदाखिलदेहिनाम्
29 // tataḥ prasannā sā devī praṇataṃ vīkṣya vāsavam / vareṇa cchandayāmāsa varadākhiladehinām
30 ॥ इन्द्र उवाच यदि तुष्टासि कर्याणि वरं दैत्येन्द्र पीडितः । दुर्धरं जीवितं देहि त्वां गताः शरणार्थिनः
30 // indra uvāca yadi tuṣṭāsi karyāṇi varaṃ daityendra pīḍitaḥ / durdharaṃ jīvitaṃ dehi tvāṃ gatāḥ śaraṇārthinaḥ
31 ॥ श्रीदेव्युवाच अहमेव विनिर्जित्य भण्डं दैत्यकुलोद्भवम् । अचिरात्तव दास्यामि त्रैलोक्यं सचराचरम्
31 // śrīdevyuvāca ahameva vinirjitya bhaṇḍaṃ daityakulodbhavam / acirāttava dāsyāmi trailokyaṃ sacarācaram
32 ॥ निर्भया मुदिताः सन्तु सर्वे देवगणास्तथा । ये स्तोष्यन्ति च मां भक्त्या स्तवेनानेन मानवाः
32 // nirbhayā muditāḥ santu sarve devagaṇāstathā / ye stoṣyanti ca māṃ bhaktyā stavenānena mānavāḥ
33 ॥ भाजनं ते भविष्यन्ति धर्मश्रीयशसां सदा । विद्याविनयसंपन्ना नीरोगा दीर्घजीविनः
33 // bhājanaṃ te bhaviṣyanti dharmaśrīyaśasāṃ sadā / vidyāvinayasaṃpannā nīrogā dīrghajīvinaḥ
34 ॥ पुत्रमित्रकल त्राढ्या भवन्तु मदनुग्रहात् । इति लब्धवरा देवा देवेन्द्रो ऽपि महाबलः
34 // putramitrakala trāḍhyā bhavantu madanugrahāt / iti labdhavarā devā devendro 'pi mahābalaḥ
35 ॥ आमोदं परमं जग्मुस्तां विलोक्य मुहुर्मुहुः
35 // āmodaṃ paramaṃ jagmustāṃ vilokya muhurmuhuḥ