19 ॥ इति श्रीब्रह्माण्डमहापुराणे उत्तरभागे हयग्रीवागस्त्यसंवादे ललितोपाख्याने ललितापरमेश्वरीसेनाजय यात्रा नामाष्टादशो ऽध्यायः अगस्त्य उवाच चक्रराजरथेन्द्रस्य याःपर्वणि समाश्रिताः । देवता प्रकटाभिख्यास्तासामाख्यां निवेदय
19 // iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne lalitāparameśvarīsenājaya yātrā nāmāṣṭādaśo 'dhyāyaḥ agastya uvāca cakrarājarathendrasya yāḥparvaṇi samāśritāḥ / devatā prakaṭābhikhyāstāsāmākhyāṃ nivedaya
1 ॥ संख्याश्च तासामखिला वर्णभेदांश्च शोभनान् । आयुधानि च दिव्यानि कथयस्व हयानन
1 // saṃkhyāśca tāsāmakhilā varṇabhedāṃśca śobhanān / āyudhāni ca divyāni kathayasva hayānana
2 ॥ हयग्रीव उवाच नवमं पर्व दीप्तस्य रथस्य समुपस्थिताः । तश प्रोक्ता सिद्धिदेव्यस्तासां नामानि मच्छृणु
2 // hayagrīva uvāca navamaṃ parva dīptasya rathasya samupasthitāḥ / taśa proktā siddhidevyastāsāṃ nāmāni macchṛṇu
3 ॥ अणिमा महिमाचैव लघिमा गरिमा तथा । ईशिता वशिता चैव प्राप्तिः सिद्धिश्च सप्तमी
3 // aṇimā mahimācaiva laghimā garimā tathā / īśitā vaśitā caiva prāptiḥ siddhiśca saptamī
4 ॥ प्राकाम्यमुक्तिसिद्धिश्च सर्वकामाभिधापरा । एतादेव्यश्चतुर्बाह्व्यो जपाकुसुमसंनिभाः
4 // prākāmyamuktisiddhiśca sarvakāmābhidhāparā / etādevyaścaturbāhvyo japākusumasaṃnibhāḥ
5 ॥ चिन्तामणिकपालं च त्रिशूलं सिद्धिकज्जलम् । दधाना दयया पूर्णा योगिभिश्च निषेविताः
5 // cintāmaṇikapālaṃ ca triśūlaṃ siddhikajjalam / dadhānā dayayā pūrṇā yogibhiśca niṣevitāḥ
6 ॥ तत्र पूर्वार्द्धभागे च ब्रह्माद्या अष्ट शक्तयः । ब्राह्मी माहेश्वरी चैव कौमारी वैष्मवी तथा । वाराही चैव मांहेन्द्री चामुण्डा चैव सप्तमी
6 // tatra pūrvārddhabhāge ca brahmādyā aṣṭa śaktayaḥ / brāhmī māheśvarī caiva kaumārī vaiṣmavī tathā / vārāhī caiva māṃhendrī cāmuṇḍā caiva saptamī
7 ॥ महालक्ष्मीरष्टमी च द्विभुजाः शोणविग्रहाः । कपालमुत्पलं चैव बिभ्राणा रक्तवाससः
7 // mahālakṣmīraṣṭamī ca dvibhujāḥ śoṇavigrahāḥ / kapālamutpalaṃ caiva bibhrāṇā raktavāsasaḥ
8 ॥ अथ वान्य प्रकारेण केचिद्ध्यानं पचक्षते । ब्रह्मादिसदृशाकारा ब्रह्मादिसदृशायुधाः
8 // atha vānya prakāreṇa keciddhyānaṃ pacakṣate / brahmādisadṛśākārā brahmādisadṛśāyudhāḥ
9 ॥ ब्रह्मादीनां परं चिह्नं धारयन्त्यः प्रकीर्तिताः । तासामूर्ध्वस्थानगतां मुद्रा देव्यो महत्तराः
9 // brahmādīnāṃ paraṃ cihnaṃ dhārayantyaḥ prakīrtitāḥ / tāsāmūrdhvasthānagatāṃ mudrā devyo mahattarāḥ
10 ॥ मुद्राविरचनायुक्तैर्हस्तैः कमलकान्तिभिः । दाडिमीपुष्पसङ्काशाः पीतांबरमनोहराः
10 // mudrāviracanāyuktairhastaiḥ kamalakāntibhiḥ / dāḍimīpuṣpasaṅkāśāḥ pītāṃbaramanoharāḥ
11 ॥ चतुर्भुजा भुजद्वन्द्वधृतचर्मकृपाणकाः । मदरक्तविलोलाक्ष्यस्तासां नामानि मच्छृणु
11 // caturbhujā bhujadvandvadhṛtacarmakṛpāṇakāḥ / madaraktavilolākṣyastāsāṃ nāmāni macchṛṇu
12 ॥ सर्वसंक्षोभिणी चैव सर्वविद्राविणी तथा । सर्वाकर्षणकृन्मुद्रा तथा सर्ववशङ्करी
12 // sarvasaṃkṣobhiṇī caiva sarvavidrāviṇī tathā / sarvākarṣaṇakṛnmudrā tathā sarvavaśaṅkarī
13 ॥ सर्वोन्मादनमुद्रा च यष्टिः सर्वमहाङ्कुशा । सर्वखेचरिका मुद्रा सर्वबीजा तथापरा
13 // sarvonmādanamudrā ca yaṣṭiḥ sarvamahāṅkuśā / sarvakhecarikā mudrā sarvabījā tathāparā
14 ॥ सर्वयोनिश्च नवमी तथा सर्वत्रिशण्डिका । सिद्धिब्राहयादिमुद्रास्ता एताः प्रकटशक्तयः
14 // sarvayoniśca navamī tathā sarvatriśaṇḍikā / siddhibrāhayādimudrāstā etāḥ prakaṭaśaktayaḥ
15 ॥ भण्डासुरस्य संहारं कर्तुं रक्तरथे स्थिताः । या गुप्ताख्याः पूर्वमुक्तास्तासां नामानि मच्छृणु
15 // bhaṇḍāsurasya saṃhāraṃ kartuṃ raktarathe sthitāḥ / yā guptākhyāḥ pūrvamuktāstāsāṃ nāmāni macchṛṇu
16 ॥ कामाकर्षणिका चैव बुद्ध्याकर्षणिका कला । अहङ्काराकर्षिणी च शब्दाकर्षणिका कला
16 // kāmākarṣaṇikā caiva buddhyākarṣaṇikā kalā / ahaṅkārākarṣiṇī ca śabdākarṣaṇikā kalā
17 ॥ स्पर्शाकर्षणिका नित्या रूपाकर्षणिका कला । रसाकर्षणिका नित्या गन्धाकर्षणिका कला
17 // sparśākarṣaṇikā nityā rūpākarṣaṇikā kalā / rasākarṣaṇikā nityā gandhākarṣaṇikā kalā
18 ॥ चित्ताकर्षणिका नित्या धैर्याकर्षणिका कला । स्मृत्या कर्षणिका नित्या नामाकर्णणिका कला
18 // cittākarṣaṇikā nityā dhairyākarṣaṇikā kalā / smṛtyā karṣaṇikā nityā nāmākarṇaṇikā kalā
19 ॥ बीजाकर्षणिका नित्या चात्मकर्षणिका कला । अमृताकर्षणी नित्या शरीराकर्षिणी कला
19 // bījākarṣaṇikā nityā cātmakarṣaṇikā kalā / amṛtākarṣaṇī nityā śarīrākarṣiṇī kalā
20 ॥ एताः षोडश शीतांशुकलारूपाश्च शक्तयः । अष्टमं पर्व सम्प्राप्ता गुप्ता नाम्ना प्रकीर्तिताः
20 // etāḥ ṣoḍaśa śītāṃśukalārūpāśca śaktayaḥ / aṣṭamaṃ parva samprāptā guptā nāmnā prakīrtitāḥ
21 ॥ विद्रुमद्रुमसङ्काशा मन्दस्मित मनोहराः । चतुर्भुजास्त्रिनेत्राश्च चन्द्रार्कमुकुजोज्ज्वलाः
21 // vidrumadrumasaṅkāśā mandasmita manoharāḥ / caturbhujāstrinetrāśca candrārkamukujojjvalāḥ
22 ॥ चापबाणौ चर्मखड्गौ दधाना दिव्यकान्तयः । भण्डासुरवधार्थाय प्रवृत्ताः कुम्भसम्भव
22 // cāpabāṇau carmakhaḍgau dadhānā divyakāntayaḥ / bhaṇḍāsuravadhārthāya pravṛttāḥ kumbhasambhava
23 ॥ सायन्तनज्वलद्दीपप्रख्यचक्ररथस्य तु । सप्तमे पर्वणि कृतावासा गुप्ततराभिधाः
23 // sāyantanajvaladdīpaprakhyacakrarathasya tu / saptame parvaṇi kṛtāvāsā guptatarābhidhāḥ
24 ॥ अनङ्गमदनानङ्गमदनातुरया सह । अनङ्गलेखा चानङ्गवेगानङ्गाङ्कुशापि च
24 // anaṅgamadanānaṅgamadanāturayā saha / anaṅgalekhā cānaṅgavegānaṅgāṅkuśāpi ca
25 ॥ अनङ्गमालिग्यपरा एता देव्यो जपात्विषः । इक्षुचापं पुष्पशरान्पुष्पकन्दुकमुत्पलम्
25 // anaṅgamāligyaparā etā devyo japātviṣaḥ / ikṣucāpaṃ puṣpaśarānpuṣpakandukamutpalam
26 ॥ बिभ्रत्यो ऽदभ्रविक्रान्तिशालिन्यो ललिताज्ञया । भण्डासुरमभिक्रुद्धाः प्रज्वलन्त्य इव स्थिताः
26 // bibhratyo 'dabhravikrāntiśālinyo lalitājñayā / bhaṇḍāsuramabhikruddhāḥ prajvalantya iva sthitāḥ
27 ॥ अथ चक्ररथेन्द्रस्य षष्ठं पर्व समाश्रिताः । सर्वसंक्षोभिणीमुख्याः सम्प्रदायाख्यया युताः
27 // atha cakrarathendrasya ṣaṣṭhaṃ parva samāśritāḥ / sarvasaṃkṣobhiṇīmukhyāḥ sampradāyākhyayā yutāḥ
28 ॥ वेणीकृतकचस्तोमाः सिंदूरतिलकोज्ज्वलाः । अतितीव्रस्वभावाश्च कालानलसमत्विषः
28 // veṇīkṛtakacastomāḥ siṃdūratilakojjvalāḥ / atitīvrasvabhāvāśca kālānalasamatviṣaḥ
29 ॥ वह्निबाणं वह्निचापं वह्निरूपमसिं तथा । वह्निचक्राख्याफलकं दधाना दीप्तविग्रहाः
29 // vahnibāṇaṃ vahnicāpaṃ vahnirūpamasiṃ tathā / vahnicakrākhyāphalakaṃ dadhānā dīptavigrahāḥ
30 ॥ असुरेन्द्रं प्रति क्रुद्धाः कामभस्मसमुद्भवाः । आज्ञाशक्तय एवैता ललिताया महौजसः
30 // asurendraṃ prati kruddhāḥ kāmabhasmasamudbhavāḥ / ājñāśaktaya evaitā lalitāyā mahaujasaḥ
31 ॥ सर्वसंक्षोभिणी चैव सर्वविद्राविणी तथा । सर्वाकर्षणिका शक्तिः सर्वाह्लादिनिका तथा
31 // sarvasaṃkṣobhiṇī caiva sarvavidrāviṇī tathā / sarvākarṣaṇikā śaktiḥ sarvāhlādinikā tathā
32 ॥ सर्वसंमोहिनीशक्तिः सर्वस्तम्भनशक्तिका । सर्वजृंभणशक्तिश्च सर्वोन्मादनशक्तिका
32 // sarvasaṃmohinīśaktiḥ sarvastambhanaśaktikā / sarvajṛṃbhaṇaśaktiśca sarvonmādanaśaktikā
33 ॥ सर्वार्थसाधिका शक्तिः सर्वसम्पत्तिपूरणी । सर्वमन्त्रमयी शक्तिः सर्वद्वन्द्वक्षयङ्करी
33 // sarvārthasādhikā śaktiḥ sarvasampattipūraṇī / sarvamantramayī śaktiḥ sarvadvandvakṣayaṅkarī
34 ॥ एवं तु सम्प्रदायानां नामानि कथितानि वै । अथ पञ्चमपर्वस्थाः कुलोत्तीर्णा इति स्मृताः
34 // evaṃ tu sampradāyānāṃ nāmāni kathitāni vai / atha pañcamaparvasthāḥ kulottīrṇā iti smṛtāḥ
35 ॥ ताश्च सप्तटिकसङ्काशाः परशुं पाशमेव च । गदां घण्टां मणिं चैव दधाना दीप्तविग्रहाः
35 // tāśca saptaṭikasaṅkāśāḥ paraśuṃ pāśameva ca / gadāṃ ghaṇṭāṃ maṇiṃ caiva dadhānā dīptavigrahāḥ
36 ॥ देवद्विषमति क्रुद्धा भ्रुकुटीकुटिलाननाः । एतासामपि नामानि समाकर्मय कुम्भज
36 // devadviṣamati kruddhā bhrukuṭīkuṭilānanāḥ / etāsāmapi nāmāni samākarmaya kumbhaja
37 ॥ सर्वसिद्धिप्रदा देवी सर्वसम्पत्प्रदा तथा । सर्वप्रियङ्करी देवी सर्वमङ्गलकारिणी
37 // sarvasiddhipradā devī sarvasampatpradā tathā / sarvapriyaṅkarī devī sarvamaṅgalakāriṇī
38 ॥ सर्वकामप्रदा देवी सर्वदुःखविमोचिनी
38 // sarvakāmapradā devī sarvaduḥkhavimocinī
39 ॥ सर्वमृत्युप्रशमिनी सर्वविघ्ननिवारिणी । सर्वाङ्गसुन्दरी देवी सर्वसौभाग्यदायिनी
39 // sarvamṛtyupraśaminī sarvavighnanivāriṇī / sarvāṅgasundarī devī sarvasaubhāgyadāyinī
40 ॥ दशैन्ताः कथिता देव्यो दयया पूरिताशयाः । चक्रे तुरीयपर्वस्था मुक्ताहारसमत्विषः
40 // daśaintāḥ kathitā devyo dayayā pūritāśayāḥ / cakre turīyaparvasthā muktāhārasamatviṣaḥ
41 ॥ निगर्भयोगिनीनाम्ना प्रथिता दश कीर्तिताः । सर्वज्ञा सर्वशक्तिश्च सर्वैश्वर्यप्रदा तथा
41 // nigarbhayoginīnāmnā prathitā daśa kīrtitāḥ / sarvajñā sarvaśaktiśca sarvaiśvaryapradā tathā
42 ॥ सर्वज्ञानमयी देवी सर्वव्याधिविनाशिनी । सर्वाधारस्वरूपा च सर्वपापहरा तथा
42 // sarvajñānamayī devī sarvavyādhivināśinī / sarvādhārasvarūpā ca sarvapāpaharā tathā
43 ॥ सर्वानन्दमयी देवी सर्वरक्षास्वरूपिणी । दशमी देवताज्ञेया सर्वेष्सितफलप्रदा
43 // sarvānandamayī devī sarvarakṣāsvarūpiṇī / daśamī devatājñeyā sarveṣsitaphalapradā
44 ॥ एताश्चतुर्भुजा ज्ञेया वज्रं शक्तिं च तोमरम् । चक्रं चैवाभिबिभ्राणा भण्डासुरवधोद्यताः
44 // etāścaturbhujā jñeyā vajraṃ śaktiṃ ca tomaram / cakraṃ caivābhibibhrāṇā bhaṇḍāsuravadhodyatāḥ
45 ॥ अथ चक्ररथेन्द्रस्य तृतीयं पर्वसंश्रिताः । रहस्ययोगिनीनाम्ना प्रख्याता वागधीश्वराः
45 // atha cakrarathendrasya tṛtīyaṃ parvasaṃśritāḥ / rahasyayoginīnāmnā prakhyātā vāgadhīśvarāḥ
46 ॥ रक्ताशोकप्रसूनाभाबाणकार्मुकपाणयः । कवचच्छन्नसर्वाङ्गयो वीणापुस्तकशोभिताः
46 // raktāśokaprasūnābhābāṇakārmukapāṇayaḥ / kavacacchannasarvāṅgayo vīṇāpustakaśobhitāḥ
47 ॥ वशिनी चैव कामेशी भोगिनी विमला तथा । अरुणाच जविन्याख्या सर्वेशी कौलिनी तथा
47 // vaśinī caiva kāmeśī bhoginī vimalā tathā / aruṇāca javinyākhyā sarveśī kaulinī tathā
48 ॥ अष्टावेताः स्मृता देव्यो दैत्यसंहारहेतवः । अथ चक्ररथेन्द्रस्य द्वितीयं पर्वसंश्रिताः
48 // aṣṭāvetāḥ smṛtā devyo daityasaṃhārahetavaḥ / atha cakrarathendrasya dvitīyaṃ parvasaṃśritāḥ
49 ॥ चापबाणौ पानपात्रं मातुरुङ्गं कृपाणिकाम् । तिस्रस्त्रिपीठनिलया अष्टबाहुसमन्विताः
49 // cāpabāṇau pānapātraṃ māturuṅgaṃ kṛpāṇikām / tisrastripīṭhanilayā aṣṭabāhusamanvitāḥ
50 ॥ पलकं नागपाशं च घण्टां चैव महाध्वनिम् । विभ्राणा मदिरामत्ता अतिगुप्तरहस्यकाः
50 // palakaṃ nāgapāśaṃ ca ghaṇṭāṃ caiva mahādhvanim / vibhrāṇā madirāmattā atiguptarahasyakāḥ
51 ॥ कामेशी चैव वज्रेशी भगमालिन्यथापरा । तिस्र एताः स्मृता देव्यो भण्डे कोपसमन्विताः
51 // kāmeśī caiva vajreśī bhagamālinyathāparā / tisra etāḥ smṛtā devyo bhaṇḍe kopasamanvitāḥ
52 ॥ ललितासममाहात्म्या ललितासमतेजसः । एतास्तु नित्यं श्रीदेव्या अन्तरङ्गाः प्रकीर्तिताः
52 // lalitāsamamāhātmyā lalitāsamatejasaḥ / etāstu nityaṃ śrīdevyā antaraṅgāḥ prakīrtitāḥ
53 ॥ अथानन्दमहापीठे रथमध्यमपर्वणि । परितो रचितावासाः प्रोक्ताः पञ्चदशाक्षराः
53 // athānandamahāpīṭhe rathamadhyamaparvaṇi / parito racitāvāsāḥ proktāḥ pañcadaśākṣarāḥ
54 ॥ तिथिनित्याः कालरूपा विश्वं व्याप्यैव संस्थिताः । भण्डासुरादिदैत्येषु प्रक्षुब्धभ्रुकुटीतटाः
54 // tithinityāḥ kālarūpā viśvaṃ vyāpyaiva saṃsthitāḥ / bhaṇḍāsurādidaityeṣu prakṣubdhabhrukuṭītaṭāḥ
55 ॥ देवीसमनिजाकारा देवीसमनिजायुधाः । जगतामुपकाराय वर्तमाना युगेयुगे
55 // devīsamanijākārā devīsamanijāyudhāḥ / jagatāmupakārāya vartamānā yugeyuge
56 ॥ तासां नामानि मत्तस्त्वमवधारयकुम्भज । कामेशी भगमाला च नित्यक्लिन्ना तथैव च
56 // tāsāṃ nāmāni mattastvamavadhārayakumbhaja / kāmeśī bhagamālā ca nityaklinnā tathaiva ca
57 ॥ भेरुण्डा वह्निवासिन्यो महावज्रेश्वरी तथा । दती च त्वरिता देवी नवमी कुलसुन्दरी
57 // bheruṇḍā vahnivāsinyo mahāvajreśvarī tathā / datī ca tvaritā devī navamī kulasundarī
58 ॥ नित्या नीलपताका च विजया सर्वमङ्गला । ज्वालामालिनिकाचित्रे दश पञ्च च कीर्तिताः
58 // nityā nīlapatākā ca vijayā sarvamaṅgalā / jvālāmālinikācitre daśa pañca ca kīrtitāḥ
59 ॥ एताभिः सहिता देवी सदा सेवैकबुद्धिभिः । दुष्टं भण्डासुरं जेतुं निर्ययौ परमेश्वरी
59 // etābhiḥ sahitā devī sadā sevaikabuddhibhiḥ / duṣṭaṃ bhaṇḍāsuraṃ jetuṃ niryayau parameśvarī
60 ॥ मन्त्रिनाथा महाचक्रे गीतिं चक्रे रथोत्तमे । सप्तपर्वाणि चोक्तानि तत्र देव्याश्च ताः शृणु
60 // mantrināthā mahācakre gītiṃ cakre rathottame / saptaparvāṇi coktāni tatra devyāśca tāḥ śṛṇu
61 ॥ गेयचक्ररथे पर्वमध्यपीढनिकेतना । संगीतयोगिनी प्रोक्ता श्रीदेव्या अतिवल्लभा
61 // geyacakrarathe parvamadhyapīḍhaniketanā / saṃgītayoginī proktā śrīdevyā ativallabhā
62 ॥ तदेव प्रथमं पर्व मन्त्रिण्यास्तु निवासभूः । अथ द्वितीयपर्वस्था गेयचक्रे रथोत्तमे
62 // tadeva prathamaṃ parva mantriṇyāstu nivāsabhūḥ / atha dvitīyaparvasthā geyacakre rathottame
63 ॥ रतिः प्रीतिर्मनोजा च वीणाकार्मुकपाणयः । तमालश्यामलाकारा दानवोन्मूलनक्षमाः
63 // ratiḥ prītirmanojā ca vīṇākārmukapāṇayaḥ / tamālaśyāmalākārā dānavonmūlanakṣamāḥ
64 ॥ तृतीयपर्वसंरूढा मनोभूबाणदेवता । द्राविणी शोषिणी चैव बन्धिनी मोहिनी तथा
64 // tṛtīyaparvasaṃrūḍhā manobhūbāṇadevatā / drāviṇī śoṣiṇī caiva bandhinī mohinī tathā
65 ॥ उन्मादिनीति पञ्चैता दीप्तकार्मुकपाणयः । तत्र पर्वण्यधस्तात्तु वर्तमाना महौजसः
65 // unmādinīti pañcaitā dīptakārmukapāṇayaḥ / tatra parvaṇyadhastāttu vartamānā mahaujasaḥ
66 ॥ कामराजश्च कन्दर्पौं मन्मथो मकरध्वजः । मनोभवः पञ्चमः स्यादेते त्रैलोक्यमोहनाः
66 // kāmarājaśca kandarpauṃ manmatho makaradhvajaḥ / manobhavaḥ pañcamaḥ syādete trailokyamohanāḥ
67 ॥ कस्तूरीतिलकोल्लासिभालामुक्ताविराजिताः । कवचच्छन्नसर्वाङ्गाः पलाशप्रसवत्विषः
67 // kastūrītilakollāsibhālāmuktāvirājitāḥ / kavacacchannasarvāṅgāḥ palāśaprasavatviṣaḥ
68 ॥ पञ्चकामा इमे प्रोक्ता भण्डासुरवधार्थिनः । जेयचक्ररथेन्द्रस्य चतुर्थं पर्व संश्रिताः
68 // pañcakāmā ime proktā bhaṇḍāsuravadhārthinaḥ / jeyacakrarathendrasya caturthaṃ parva saṃśritāḥ
69 ॥ ब्रह्मीमुख्यास्तु पूर्वोक्ताश्चण्डिका त्वष्टमी परा । तत्र पर्वण्यधस्ताच्च लक्ष्मीश्चैव सरस्वती
69 // brahmīmukhyāstu pūrvoktāścaṇḍikā tvaṣṭamī parā / tatra parvaṇyadhastācca lakṣmīścaiva sarasvatī
70 ॥ रतिः प्रीतिः कीर्तिशान्ती पुष्टिस्तुष्टिश्च शक्तयः । एताश्चक्रोधरक्ताक्ष्यो दैत्यं हन्तुं महाबलम्
70 // ratiḥ prītiḥ kīrtiśāntī puṣṭistuṣṭiśca śaktayaḥ / etāścakrodharaktākṣyo daityaṃ hantuṃ mahābalam
71 ॥ कुन्तचक्रधराः प्रोक्ताः कुमार्यः कुंभसंभव । पञ्चमं पर्व संप्राप्ता वामाद्याः षोडशापराः
71 // kuntacakradharāḥ proktāḥ kumāryaḥ kuṃbhasaṃbhava / pañcamaṃ parva saṃprāptā vāmādyāḥ ṣoḍaśāparāḥ
72 ॥ गीतिं चक्रू रथेन्द्रस्य तासां नामानि मच्छृणु । वामा ज्येष्टा च रौद्री च शान्तिः श्रद्धा सरस्वती
72 // gītiṃ cakrū rathendrasya tāsāṃ nāmāni macchṛṇu / vāmā jyeṣṭā ca raudrī ca śāntiḥ śraddhā sarasvatī
73 ॥ श्रीभूशाक्तिश्च लक्ष्मीश्च सृष्टिश्चैव तु मोहिनी । तथा प्रमाथिनी चाश्वसिनी वीचिस्तथैव च
73 // śrībhūśāktiśca lakṣmīśca sṛṣṭiścaiva tu mohinī / tathā pramāthinī cāśvasinī vīcistathaiva ca
74 ॥ विद्युन्मालिन्यथ सुरानन्दाथो नागबुद्धिका । एतास्तु कुरविन्दाभा जगत्क्षोभणलंपटाः
74 // vidyunmālinyatha surānandātho nāgabuddhikā / etāstu kuravindābhā jagatkṣobhaṇalaṃpaṭāḥ
75 ॥ महासरसमन्नाहमादधानाः पदेपदे । वज्रकङ्कटसंछन्ना अट्टहासोज्ज्वलाः परे । वज्रदण्डौ शतघ्नीं च संबिभ्राणा भुशुण्डिकाः
75 // mahāsarasamannāhamādadhānāḥ padepade / vajrakaṅkaṭasaṃchannā aṭṭahāsojjvalāḥ pare / vajradaṇḍau śataghnīṃ ca saṃbibhrāṇā bhuśuṇḍikāḥ
76 ॥ अथ गीतिरथेन्द्रस्य षष्ठं पर्व समाश्रिताः । असिताङ्गप्रभृतयो भैरवाः शस्त्रभीषणाः
76 // atha gītirathendrasya ṣaṣṭhaṃ parva samāśritāḥ / asitāṅgaprabhṛtayo bhairavāḥ śastrabhīṣaṇāḥ
77 ॥ त्रिशिखं पानपात्रं च बिभ्राणा नीलवर्चसः । असिताङ्गो रुरुश्चण्डः क्रोध उन्मत्तभैरवः
77 // triśikhaṃ pānapātraṃ ca bibhrāṇā nīlavarcasaḥ / asitāṅgo ruruścaṇḍaḥ krodha unmattabhairavaḥ
78 ॥ कपाली भीषणश्चैव संहारश्चाष्ट भैरवाः । अथ गीतिरथेन्द्रस्य सप्तमं पर्व संश्रिताः
78 // kapālī bhīṣaṇaścaiva saṃhāraścāṣṭa bhairavāḥ / atha gītirathendrasya saptamaṃ parva saṃśritāḥ
79 ॥ मातङ्गी सिद्धलक्ष्मीश्च महामातङ्गिकापि च । महती सिद्धलक्ष्मीश्च शोणा बाणधनुर्धराः
79 // mātaṅgī siddhalakṣmīśca mahāmātaṅgikāpi ca / mahatī siddhalakṣmīśca śoṇā bāṇadhanurdharāḥ
80 ॥ तस्यैव पर्वणो ऽधस्ताद्गणपः क्षेत्रपस्तथा । दुर्गांबा बटुकश्चेंव सर्वे ते शस्त्रपाणयः
80 // tasyaiva parvaṇo 'dhastādgaṇapaḥ kṣetrapastathā / durgāṃbā baṭukaśceṃva sarve te śastrapāṇayaḥ
81 ॥ तत्रैव पर्वणो ऽधस्ताल्लक्ष्मीश्चैव सरस्वती । शङ्खः पद्मो निधिश्चैव ते सर्वे शस्त्रपाणयः
81 // tatraiva parvaṇo 'dhastāllakṣmīścaiva sarasvatī / śaṅkhaḥ padmo nidhiścaiva te sarve śastrapāṇayaḥ
82 ॥ लोकद्विषं प्रति क्रुद्धा भण्डं चण्डपराक्रमम् । शक्रादयश्च विष्म्वन्ता दश दिक्चक्रनायकाः
82 // lokadviṣaṃ prati kruddhā bhaṇḍaṃ caṇḍaparākramam / śakrādayaśca viṣmvantā daśa dikcakranāyakāḥ
83 ॥ शक्तिरूपास्तत्र पर्वण्यधस्तात्कृतसंश्रयाः । वज्रे शक्तिं कालदण्डमकिं पाशं ध्वजं तथा
83 // śaktirūpāstatra parvaṇyadhastātkṛtasaṃśrayāḥ / vajre śaktiṃ kāladaṇḍamakiṃ pāśaṃ dhvajaṃ tathā
84 ॥ गदां त्रिशूलं दर्भास्त्रं वज्रं च दधतस्त्वमी । सेवन्ते मन्त्रिनाथां तां नित्यं भक्तिसमन्विताः
84 // gadāṃ triśūlaṃ darbhāstraṃ vajraṃ ca dadhatastvamī / sevante mantrināthāṃ tāṃ nityaṃ bhaktisamanvitāḥ
85 ॥ भण्डासुरान्दुर्दुरूढान्निहन्तुं विश्वकण्टकान् । मन्त्रिनाथाश्रयद्वारा ललिताज्ञापनोत्सुकाः
85 // bhaṇḍāsurāndurdurūḍhānnihantuṃ viśvakaṇṭakān / mantrināthāśrayadvārā lalitājñāpanotsukāḥ
86 ॥ गीतिचक्ररथोपान्ते दिक्पालाः संश्रयं ददुः । सर्वेषां चैव देवानां मन्त्रिणी द्वारतः कृता
86 // gīticakrarathopānte dikpālāḥ saṃśrayaṃ daduḥ / sarveṣāṃ caiva devānāṃ mantriṇī dvārataḥ kṛtā
87 ॥ विज्ञापना महादेव्याः कार्यसिद्धिं प्रयच्छति । राक्षी विज्ञापना चेति प्रधानद्वारतः कृता
87 // vijñāpanā mahādevyāḥ kāryasiddhiṃ prayacchati / rākṣī vijñāpanā ceti pradhānadvārataḥ kṛtā
88 ॥ यथा खलु फलप्राप्तिः सेवकानां हि जायते । अन्यथा कथमेतेषां सामर्थ्यं ज्वलितौजसः
88 // yathā khalu phalaprāptiḥ sevakānāṃ hi jāyate / anyathā kathameteṣāṃ sāmarthyaṃ jvalitaujasaḥ
89 ॥ अपधृष्यप्रभावायाः श्रीदेव्या उपसर्पणे । सा हि संगीतविद्येति श्रीदेव्या अतिवल्लभा
89 // apadhṛṣyaprabhāvāyāḥ śrīdevyā upasarpaṇe / sā hi saṃgītavidyeti śrīdevyā ativallabhā
90 ॥ नातिलङ्घति च क्वापि तदुक्तं कार्यसिद्धिषु । श्रीदेव्याःशक्तिसाम्राज्ये सर्वकर्माणि मन्त्रिणी
90 // nātilaṅghati ca kvāpi taduktaṃ kāryasiddhiṣu / śrīdevyāḥśaktisāmrājye sarvakarmāṇi mantriṇī
91 ॥ अकर्त्तुमन्यथा कर्तुं कर्तुं चैव प्रगल्भते । तस्मात्सर्वे ऽपि दिक्पालाः श्रीदेव्या जयकाङ्क्षिणः । तस्याः प्रधानभूतायाः सेवामेव वितन्वते
91 // akarttumanyathā kartuṃ kartuṃ caiva pragalbhate / tasmātsarve 'pi dikpālāḥ śrīdevyā jayakāṅkṣiṇaḥ / tasyāḥ pradhānabhūtāyāḥ sevāmeva vitanvate
92 ॥ इति श्रीललितादेव्याश्चक्रराजरथोत्तमे । पर्वस्थितानां देवीनां नामानि कथितान्यलम्
92 // iti śrīlalitādevyāścakrarājarathottame / parvasthitānāṃ devīnāṃ nāmāni kathitānyalam
93 ॥ भण्डासुरस्य संहारे तस्या दिव्यायुधान्यपि । प्रोक्तानि गेयचक्रस्य पर्वदेव्याश्च कीर्तिताः
93 // bhaṇḍāsurasya saṃhāre tasyā divyāyudhānyapi / proktāni geyacakrasya parvadevyāśca kīrtitāḥ
94 ॥ इमानि सर्वदेवीनां नामान्याकर्णयन्ति ये । सर्वपापविनिर्मुक्तास्ते स्युर्विजयिनो नराः
94 // imāni sarvadevīnāṃ nāmānyākarṇayanti ye / sarvapāpavinirmuktāste syurvijayino narāḥ