78 ॥ इति श्रीगारुडे महापुराणे पूर्वखण्डे प्रथमांशाख्ये आचारकाण्डे ज्वरादिचिकित्सानिरूपणं नाम सप्तत्युत्तरशततमो ऽध्यायः श्रीगरुडमहापुराणम्- 171 धन्वन्तरिरुवाच । नाडीव्रणादिरोगाणां चिकित्सां शृणु सुश्रुत । नाडीं शस्त्रेण संपाट्य नाजीनां व्रणवत्क्रिया
78 // iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe jvarādicikitsānirūpaṇaṃ nāma saptatyuttaraśatatamo 'dhyāyaḥ śrīgaruḍamahāpurāṇam- 171 dhanvantariruvāca / nāḍīvraṇādirogāṇāṃ cikitsāṃ śṛṇu suśruta / nāḍīṃ śastreṇa saṃpāṭya nājīnāṃ vraṇavatkriyā
1 ॥ गुग्गुलुत्रिफलाव्योपैः समांशैराज्ययोजितैः । नाडीदुष्टव्रणं शूलं भगन्दरमथो जयेत्
1 // guggulutriphalāvyopaiḥ samāṃśairājyayojitaiḥ / nāḍīduṣṭavraṇaṃ śūlaṃ bhagandaramatho jayet
2 ॥ निर्गुण्डीरसतस्तैलं नाडीदुष्टव्रणापहम् । हितं पामामयानां तु पानाभ्यञ्जननावनैः
2 // nirguṇḍīrasatastailaṃ nāḍīduṣṭavraṇāpaham / hitaṃ pāmāmayānāṃ tu pānābhyañjananāvanaiḥ
3 ॥ गग्गुत्रिफलाकृष्णात्रिपञ्चैकांशयोजिता । घुटि (गुडि) काशोथगुल्मार्शोभगन्दरवतां हिता
3 // gaggutriphalākṛṣṇātripañcaikāṃśayojitā / ghuṭi (guḍi) kāśothagulmārśobhagandaravatāṃ hitā
4 ॥ ध्वजमध्ये शिरावेधे विशुद्धिरुपदंशके । पाको रक्ष्यः प्रयत्नेन शिश्रक्षयकरो हि सः
4 // dhvajamadhye śirāvedhe viśuddhirupadaṃśake / pāko rakṣyaḥ prayatnena śiśrakṣayakaro hi saḥ
5 ॥ पटोलनिम्बत्रिफलागुडूचीक्वाथमापिबेत् । सगुग्गुलुं सखदिरमुपदंशो विनश्यति
5 // paṭolanimbatriphalāguḍūcīkvāthamāpibet / sagugguluṃ sakhadiramupadaṃśo vinaśyati
6 ॥ दहेत्कटाहे त्रिफलां सामसी (षी) मधसंयुताम् । उपदंशे प्रलेपो ऽय सद्यो रोपयते व्रणम्
6 // dahetkaṭāhe triphalāṃ sāmasī (ṣī) madhasaṃyutām / upadaṃśe pralepo 'ya sadyo ropayate vraṇam
7 ॥ त्रिफलानिम्बभूनिम्बकरञ्जखदिरादिभिः । कल्कैः क्वाथैर्घृतं पक्वमुपदंशहरं परम्
7 // triphalānimbabhūnimbakarañjakhadirādibhiḥ / kalkaiḥ kvāthairghṛtaṃ pakvamupadaṃśaharaṃ param
8 ॥ आदौ भग्नं विदित्वा तु सेचयेच्छीतलांबुना । पक्वेनालेपनं कार्यं बन्धनं च कुशान्वितम्
8 // ādau bhagnaṃ viditvā tu secayecchītalāṃbunā / pakvenālepanaṃ kāryaṃ bandhanaṃ ca kuśānvitam
9 ॥ माषं मांसं तथा सर्पिः क्षीरं यूषः सतीजलः । बृंहणं चान्नपानं स्यात्प्रदेयं भग्नरोगिणे
9 // māṣaṃ māṃsaṃ tathā sarpiḥ kṣīraṃ yūṣaḥ satījalaḥ / bṛṃhaṇaṃ cānnapānaṃ syātpradeyaṃ bhagnarogiṇe
10 ॥ रसोनमधुनासाज्यसिताकल्कं समश्नुता । छिन्नभिन्नच्युतास्थीनां सन्धानमचिराद्भवेत्
10 // rasonamadhunāsājyasitākalkaṃ samaśnutā / chinnabhinnacyutāsthīnāṃ sandhānamacirādbhavet
11 ॥ अश्वत्थत्रिफलाव्योषाः सवरभिः समीकृतैः । तुल्यो गुग्गुलुना योज्यो भग्नसन्धिप्रसाध (कृत्) कः
11 // aśvatthatriphalāvyoṣāḥ savarabhiḥ samīkṛtaiḥ / tulyo guggulunā yojyo bhagnasandhiprasādha (kṛt) kaḥ
12 ॥ सर्वकुष्ठेषु वमनं रेचनं रक्तमोक्षण । वचावासापटोलानां निम्बस्य कलिनीत्वचः
12 // sarvakuṣṭheṣu vamanaṃ recanaṃ raktamokṣaṇa / vacāvāsāpaṭolānāṃ nimbasya kalinītvacaḥ
13 ॥ कषायो मधुना पीतो वातहृन्मदनान्वितः । विरेचनं प्रयोक्तव्यं त्रिवृत्कर्णफलत्रिकैः
13 // kaṣāyo madhunā pīto vātahṛnmadanānvitaḥ / virecanaṃ prayoktavyaṃ trivṛtkarṇaphalatrikaiḥ
14 ॥ मनः शिलांमरीचैस्तु तैलं कुष्ठविनाशनम् । सर्वकुष्ठे विलेपो ऽयं शिवापञ्चगुडौदनम्
14 // manaḥ śilāṃmarīcaistu tailaṃ kuṣṭhavināśanam / sarvakuṣṭhe vilepo 'yaṃ śivāpañcaguḍaudanam
15 ॥ करञ्जैलगजैः कुष्ठं गोमूत्रेण प्रलेपतः । करवीरोद्वर्तनं च तैलाक्तस्य च कुष्ठहृत्
15 // karañjailagajaiḥ kuṣṭhaṃ gomūtreṇa pralepataḥ / karavīrodvartanaṃ ca tailāktasya ca kuṣṭhahṛt
16 ॥ हरिद्रा मलयं रास्ना गुडूच्येडगजस्तथा । आरग्वधः करञ्जश्च लेपः कुष्ठहरः परः
16 // haridrā malayaṃ rāsnā guḍūcyeḍagajastathā / āragvadhaḥ karañjaśca lepaḥ kuṣṭhaharaḥ paraḥ
17 ॥ मनः शिलाविडङ्गानि वागजी सर्षपास्तथा । करञ्जैर्मूत्रपिष्टो ऽयं लेपः कुष्टहरोर्ऽकवत्
17 // manaḥ śilāviḍaṅgāni vāgajī sarṣapāstathā / karañjairmūtrapiṣṭo 'yaṃ lepaḥ kuṣṭaharor'kavat
18 ॥ विडङ्गैडवचा कुष्ठनिशासिन्धूत्थसर्षपैः । मूत्राम्लपिष्टो लेपो ऽयं दद्रूकुष्टविनाशनः
18 // viḍaṅgaiḍavacā kuṣṭhaniśāsindhūtthasarṣapaiḥ / mūtrāmlapiṣṭo lepo 'yaṃ dadrūkuṣṭavināśanaḥ
19 ॥ प्रपुन्नाटसुबीजानि धात्री सर्जरसः स्नुही । सौवीरपिष्टं दद्रूणामेतदुद्वर्तनं परम्
19 // prapunnāṭasubījāni dhātrī sarjarasaḥ snuhī / sauvīrapiṣṭaṃ dadrūṇāmetadudvartanaṃ param
20 ॥ आरग्वधस्य पत्राणि आरनालेन पेषयेत् । दद्रूकिट्टिम (भ) कुष्ठानि हन्ति सिध्मानमेव च
20 // āragvadhasya patrāṇi āranālena peṣayet / dadrūkiṭṭima (bha) kuṣṭhāni hanti sidhmānameva ca
21 ॥ उष्णो पीता वागुजी च कुष्ठजित्क्षीरभोजनः । तिलाज्यत्रिफलाक्षौद्रव्योषभल्लातशर्कराः । वृष्याः सप्त समा मेध्याः कष्ठहाः कामचारिणः
21 // uṣṇo pītā vāgujī ca kuṣṭhajitkṣīrabhojanaḥ / tilājyatriphalākṣaudravyoṣabhallātaśarkarāḥ / vṛṣyāḥ sapta samā medhyāḥ kaṣṭhahāḥ kāmacāriṇaḥ
22 ॥ विडङ्गत्रिफलाकृष्णाचूर्णं लीढं समाक्षिकम् । हन्ति कुष्ठक्रिमिमेहनाडीव्रणभगन्दरान्
22 // viḍaṅgatriphalākṛṣṇācūrṇaṃ līḍhaṃ samākṣikam / hanti kuṣṭhakrimimehanāḍīvraṇabhagandarān
23 ॥ यः खादेदभयारिष्टमरिष्टामलकानिशाः । स जयेत्सर्वकुष्ठानिमासादूर्ध्वं न संशयः
23 // yaḥ khādedabhayāriṣṭamariṣṭāmalakāniśāḥ / sa jayetsarvakuṣṭhānimāsādūrdhvaṃ na saṃśayaḥ
24 ॥ दह्यमानायुतः कुम्भे मूलगे खदिराङ्कुरः । साक्षधात्रीरसः क्षौद्रो हन्यात्कुष्ठं रसायनम्
24 // dahyamānāyutaḥ kumbhe mūlage khadirāṅkuraḥ / sākṣadhātrīrasaḥ kṣaudro hanyātkuṣṭhaṃ rasāyanam
25 ॥ धात्री खदिरयोः क्काथं पीत्वा वागजिसंयुतम् । शङ्खेन्दुधवलं श्वित्रं हन्ति तूर्णं न संशयः
25 // dhātrī khadirayoḥ kkāthaṃ pītvā vāgajisaṃyutam / śaṅkhendudhavalaṃ śvitraṃ hanti tūrṇaṃ na saṃśayaḥ
26 ॥ पीत्वा भल्लातकं तैलं मासाद्व्याधिं जयेन्नरः । सेवितं खादिरं वारि पानाद्यैः कुष्ठजिद्भवेत्
26 // pītvā bhallātakaṃ tailaṃ māsādvyādhiṃ jayennaraḥ / sevitaṃ khādiraṃ vāri pānādyaiḥ kuṣṭhajidbhavet
27 ॥ भावितं मलपूक्वाथैः सोमराजीफलं बहु । कर्षं भक्षेदलवणो ह्यक्षफल्गुशृतं पिबेत्
27 // bhāvitaṃ malapūkvāthaiḥ somarājīphalaṃ bahu / karṣaṃ bhakṣedalavaṇo hyakṣaphalguśṛtaṃ pibet
28 ॥ हन्ति श्वित्रमसाध्यं च लेपे योज्यापराजिता । वासा शुद्धा च त्रिफला पटोलं च करञ्जकम्
28 // hanti śvitramasādhyaṃ ca lepe yojyāparājitā / vāsā śuddhā ca triphalā paṭolaṃ ca karañjakam
29 ॥ निम्बाशनं कृष्णवेत्रं क्वाथकल्केन यद्धृतम् । वज्रकं तद्भवेत्कुष्ठं शतवर्षाणि जीवति
29 // nimbāśanaṃ kṛṣṇavetraṃ kvāthakalkena yaddhṛtam / vajrakaṃ tadbhavetkuṣṭhaṃ śatavarṣāṇi jīvati
30 ॥ स्वरसेन च दूर्वायाः पचेत्तैलं चतुर्गुणम् । कच्छूर्विचर्चिका पामा अभ्यङ्गादेव नश्यति
30 // svarasena ca dūrvāyāḥ pacettailaṃ caturguṇam / kacchūrvicarcikā pāmā abhyaṅgādeva naśyati
31 ॥ द्रुमत्वगर्ककुष्ठानि लवणानि च मूत्रकम् । गम्भारिकाचित्रकैस्तैस्तैलं कुष्ठव्रणादिनुत्
31 // drumatvagarkakuṣṭhāni lavaṇāni ca mūtrakam / gambhārikācitrakaistaistailaṃ kuṣṭhavraṇādinut
32 ॥ (अथाम्लपित्तचिकित्सा) धात्रीनिम्बफलं तद्वद्गोमूत्रेण च चित्रकम् । वासामृतापर्पटिकानिम्बभूनिम्बमार्करैः (वैः) । त्रिफलाकुलत्थैः क्वाथः सक्षौद्रश्चाम्लपित्तहा
32 // (athāmlapittacikitsā) dhātrīnimbaphalaṃ tadvadgomūtreṇa ca citrakam / vāsāmṛtāparpaṭikānimbabhūnimbamārkaraiḥ (vaiḥ) / triphalākulatthaiḥ kvāthaḥ sakṣaudraścāmlapittahā
33 ॥ फलत्रिकं पटोलं च तिक्तक्वाथः सितायुतः । पीतो यष्टीमधुयुतो ज्वरच्छर्द्यम्लपित्तजित्
33 // phalatrikaṃ paṭolaṃ ca tiktakvāthaḥ sitāyutaḥ / pīto yaṣṭīmadhuyuto jvaracchardyamlapittajit
34 ॥ वासाघृतं तिक्तघृतं पिप्पलीघृतमेव च । अम्लपित्ते प्रयोक्तव्यं गुडकूष्माण्डकं तथा
34 // vāsāghṛtaṃ tiktaghṛtaṃ pippalīghṛtameva ca / amlapitte prayoktavyaṃ guḍakūṣmāṇḍakaṃ tathā
35 ॥ पिप्पली मधुसंयुक्ता अम्लपित्तविनाशिनी । श्लेष्माग्निमान्द्यनुत्पथ्यापिप्पलीगुडमोदकः
35 // pippalī madhusaṃyuktā amlapittavināśinī / śleṣmāgnimāndyanutpathyāpippalīguḍamodakaḥ
36 ॥ पिष्ट्वाजाजीं सधन्याकां घृप्रस्थं विपाचयेत् । कफपित्तारुचिहरं मन्दानलवमिं हरेत्
36 // piṣṭvājājīṃ sadhanyākāṃ ghṛprasthaṃ vipācayet / kaphapittāruciharaṃ mandānalavamiṃ haret
37 ॥ (इत्यम्लपित्तचिकित्सा) पिप्पल्यमृतभूनिम्बवासकारिष्टपर्पटैः । खदिरारिष्टकैः क्वाथो विस्फोटार्तिज्वरापहः
37 // (ityamlapittacikitsā) pippalyamṛtabhūnimbavāsakāriṣṭaparpaṭaiḥ / khadirāriṣṭakaiḥ kvātho visphoṭārtijvarāpahaḥ
38 ॥ त्रिफलारससंयुक्तं सर्पिस्त्रिवृतयासह । प्रयोक्तव्यं विरेकार्थं वीसर्पज्वरशान्तये
38 // triphalārasasaṃyuktaṃ sarpistrivṛtayāsaha / prayoktavyaṃ virekārthaṃ vīsarpajvaraśāntaye
39 ॥ खादिरात्रिफलारिष्टपटोलामृतवासकैः । क्वाथो ऽष्टकाख्यो जयति रोमान्तिकमसूरिकाम्
39 // khādirātriphalāriṣṭapaṭolāmṛtavāsakaiḥ / kvātho 'ṣṭakākhyo jayati romāntikamasūrikām
40 ॥ कुष्ठवीसर्पविस्फोटकण्ड्वादीनां विघातकः । लशुनानां तु चृर्णस्य घर्षो मशकनाशनः
40 // kuṣṭhavīsarpavisphoṭakaṇḍvādīnāṃ vighātakaḥ / laśunānāṃ tu cṛrṇasya gharṣo maśakanāśanaḥ
41 ॥ चर्मकीलं जरुमणिं मशकांस्तिलकालकान् । उत्कृत्य शस्त्रेण दहेत्क्षागग्निभ्यामशेषतः
41 // carmakīlaṃ jarumaṇiṃ maśakāṃstilakālakān / utkṛtya śastreṇa dahetkṣāgagnibhyāmaśeṣataḥ
42 ॥ पटोलनीलीलेपः स्याज्जाल (ज्वाला) गर्दभरोगनुत् । गुञ्जाफलैः शृतं तलं भृङ्गराजरसेन तु । कण्ठ (ण्डु) दारुणकृत्कुष्ठवातव्याधिविनाशनम्
42 // paṭolanīlīlepaḥ syājjāla (jvālā) gardabharoganut / guñjāphalaiḥ śṛtaṃ talaṃ bhṛṅgarājarasena tu / kaṇṭha (ṇḍu) dāruṇakṛtkuṣṭhavātavyādhivināśanam
43 ॥ अर्कास्थिमज्जात्रिफलानालीछा भृङ्गराजकम् । जीर्णे पक्वे लौहचूर्णं काञ्जिकं कृष्णकेशकृत्
43 // arkāsthimajjātriphalānālīchā bhṛṅgarājakam / jīrṇe pakve lauhacūrṇaṃ kāñjikaṃ kṛṣṇakeśakṛt
44 ॥ क्षीरात्सशर्करसाद्द्विप्रस्थो मधुकात्पले । तैलम्य कुडवं पक्वं तन्नस्यं पलितापहम्
44 // kṣīrātsaśarkarasāddviprastho madhukātpale / tailamya kuḍavaṃ pakvaṃ tannasyaṃ palitāpaham
45 ॥ मुखरोगे तु त्रिफलागण्डूषपरिधारणम् । गृहधूम यवक्षारपाठाव्योपरसाञ्जनम्
45 // mukharoge tu triphalāgaṇḍūṣaparidhāraṇam / gṛhadhūma yavakṣārapāṭhāvyoparasāñjanam
46 ॥ तेजोदं त्रिफलालोध्रं चित्रकं चेति चूर्णितम् । सक्षौद्रं धारयेद्वक्त्रे ग्रीवादन्तास्यरोगनुत्
46 // tejodaṃ triphalālodhraṃ citrakaṃ ceti cūrṇitam / sakṣaudraṃ dhārayedvaktre grīvādantāsyaroganut
47 ॥ पटोल निम्बजम्व्वाग्रमालतीनवपल्लवाः । पञ्चपल्लवकः श्रेष्ठः कषयो मुखधावने
47 // paṭola nimbajamvvāgramālatīnavapallavāḥ / pañcapallavakaḥ śreṣṭhaḥ kaṣayo mukhadhāvane
48 ॥ लशुनार्द्रकशिग्रूणां पारुल्या मूलकस्य च । रुदन्त्याश्च रसः श्रेष्ठः कदुष्णः कर्णपूरणे
48 // laśunārdrakaśigrūṇāṃ pārulyā mūlakasya ca / rudantyāśca rasaḥ śreṣṭhaḥ kaduṣṇaḥ karṇapūraṇe
49 ॥ तीव्रशूलोत्तरे कर्णे सशब्दे क्लेदवाहिनि । बस्तमूत्रं क्षिपेत्कोष्णं सैन्धवेनावचूर्णितम्
49 // tīvraśūlottare karṇe saśabde kledavāhini / bastamūtraṃ kṣipetkoṣṇaṃ saindhavenāvacūrṇitam
50 ॥ जातीपत्ररसे तैलं पक्वं पूतिककर्णजित् । शुण्ठीतैलं सार्षपं च क्रोष्णं स्यात्कर्णशूलनुत्
50 // jātīpatrarase tailaṃ pakvaṃ pūtikakarṇajit / śuṇṭhītailaṃ sārṣapaṃ ca kroṣṇaṃ syātkarṇaśūlanut
51 ॥ पञ्चमूलिशृतं क्षीरं स्याच्चित्रकहरीतकी । सर्पिर्गुडः षडङ्गश्चयूषः पीनसशान्तये
51 // pañcamūliśṛtaṃ kṣīraṃ syāccitrakaharītakī / sarpirguḍaḥ ṣaḍaṅgaścayūṣaḥ pīnasaśāntaye
52 ॥ अक्षिकुक्षिभवा रोगाः प्रतिश्यायव्रणज्वराः । पञ्चैते पञ्चरात्रेण प्रशमं यान्ति लङ्घनात्
52 // akṣikukṣibhavā rogāḥ pratiśyāyavraṇajvarāḥ / pañcaite pañcarātreṇa praśamaṃ yānti laṅghanāt
53 ॥ धात्रीरसानाञ्च दृशः कोपं हरति पूरणात् । सक्षौद्रः सैन्धवो वापि शिग्रुदार्विरसाञ्जनम्
53 // dhātrīrasānāñca dṛśaḥ kopaṃ harati pūraṇāt / sakṣaudraḥ saindhavo vāpi śigrudārvirasāñjanam
54 ॥ हरिद्रादारुसिन्धूत्थपथ्याजनवगौरिकैः । पिष्टैर्दत्तो बहिर्लपो नेत्रव्याधिनिवारकः
54 // haridrādārusindhūtthapathyājanavagaurikaiḥ / piṣṭairdatto bahirlapo netravyādhinivārakaḥ
55 ॥ मृतभ्रष्टाभयालेपात्त्रिफला क्षीरसंयुता । शुण्ठीनिम्बदलैः पिष्टैः सुखोष्णैः स्वल्पसैन्धवैः । धार्यश्चक्षुषि संक्षेपाच्छोथकण्डूरुजापहः
55 // mṛtabhraṣṭābhayālepāttriphalā kṣīrasaṃyutā / śuṇṭhīnimbadalaiḥ piṣṭaiḥ sukhoṣṇaiḥ svalpasaindhavaiḥ / dhāryaścakṣuṣi saṃkṣepācchothakaṇḍūrujāpahaḥ
56 ॥ अभयाक्षामृतं चैकद्विचतुर्भागिकं युतम् । मध्वाज्यलीढं क्वाथो वा सर्वनेत्ररुगर्दनम्
56 // abhayākṣāmṛtaṃ caikadvicaturbhāgikaṃ yutam / madhvājyalīḍhaṃ kvātho vā sarvanetrarugardanam
57 ॥ चन्दनत्रिफलापूगपलाशतरुमूलकैः । जलपिष्टैरियं विर्तिरशेषतिमिरापहा
57 // candanatriphalāpūgapalāśatarumūlakaiḥ / jalapiṣṭairiyaṃ virtiraśeṣatimirāpahā
58 ॥ दध्नातिघृष्टं मरिचं रात्र्यान्ध्यापहमञ्जनम् । त्रिफलाक्वाथकल्काभ्यां सपयस्कं शृतं घृतम्
58 // dadhnātighṛṣṭaṃ maricaṃ rātryāndhyāpahamañjanam / triphalākvāthakalkābhyāṃ sapayaskaṃ śṛtaṃ ghṛtam
59 ॥ तिमिराण्यचिराद्धन्यात्पीतमेतन्निशामुखे । पिप्पलीत्रिफला द्राक्षालोहचूर्णं ससैन्धवम्
59 // timirāṇyacirāddhanyātpītametanniśāmukhe / pippalītriphalā drākṣālohacūrṇaṃ sasaindhavam
60 ॥ भृङ्गराजरसैर्घृष्टं घुटिकाञ्जनमिष्यते । आन्ध्यं सतिमिरं काचं हन्त्यन्यान्नेत्ररोगकान्
60 // bhṛṅgarājarasairghṛṣṭaṃ ghuṭikāñjanamiṣyate / āndhyaṃ satimiraṃ kācaṃ hantyanyānnetrarogakān
61 ॥ त्रिकटु त्रिफला नक्त सैन्धवं च मनः शिला । रुचकं शङ्खनाभिश्च जातीपुष्पाणि निम्बकम्
61 // trikaṭu triphalā nakta saindhavaṃ ca manaḥ śilā / rucakaṃ śaṅkhanābhiśca jātīpuṣpāṇi nimbakam
62 ॥ रसाञ्जनं भृङ्गराजं घृतं मधु पयस्तथा । एतत्पिष्ट्वा च वटिका सर्वनेत्ररुगर्दिनी
62 // rasāñjanaṃ bhṛṅgarājaṃ ghṛtaṃ madhu payastathā / etatpiṣṭvā ca vaṭikā sarvanetrarugardinī
63 ॥ दग्धमेरण्डकं मूलं लेपात्काकिकपेषितम् । शिरो ऽर्तिं नाशयत्याशु पुष्पं वा मुचुकुन्दक (ज) म्
63 // dagdhameraṇḍakaṃ mūlaṃ lepātkākikapeṣitam / śiro 'rtiṃ nāśayatyāśu puṣpaṃ vā mucukundaka (ja) m
64 ॥ शतमूल्यैरण्डमूलचक्राव्याघ्रीपलैः शृतम् । तैलं नस्यमरुश्लेष्मतिमिरोर्ध्वर् (द्ध) गदापहम्
64 // śatamūlyairaṇḍamūlacakrāvyāghrīpalaiḥ śṛtam / tailaṃ nasyamaruśleṣmatimirordhvar (ddha) gadāpaham
65 ॥ नाचनं (लनणं) सगुडं विश्वं पिप्पली वा ससैन्धवा । भुजस्तम्भादिरोगेषु सर्वेषूर्ध्वगदेषु च
65 // nācanaṃ (lanaṇaṃ) saguḍaṃ viśvaṃ pippalī vā sasaindhavā / bhujastambhādirogeṣu sarveṣūrdhvagadeṣu ca
66 ॥ सूर्यावर्ते विधातव्यं नस्यकर्मादिभेषजम् । दशमूलीकषायं तु सर्पिः सैन्धवसंयुतम् । नस्यमङ्गविभेदघ्नं सूर्यावर्तशिरो ऽर्तिनुत्
66 // sūryāvarte vidhātavyaṃ nasyakarmādibheṣajam / daśamūlīkaṣāyaṃ tu sarpiḥ saindhavasaṃyutam / nasyamaṅgavibhedaghnaṃ sūryāvartaśiro 'rtinut
67 ॥ दध्ना सौवर्चलाजाजीमधूकं नीलमुत्पलम् । पिबेत्क्षौद्रयुतं नारी वातासृग्दरपीडिता
67 // dadhnā sauvarcalājājīmadhūkaṃ nīlamutpalam / pibetkṣaudrayutaṃ nārī vātāsṛgdarapīḍitā
68 ॥ वासकस्वरसं पैत्ते गुडूच्या रसमेव वा । जलेनामलकीबीजं कल्कं वाससितामधु
68 // vāsakasvarasaṃ paitte guḍūcyā rasameva vā / jalenāmalakībījaṃ kalkaṃ vāsasitāmadhu
69 ॥ आमलक्या मधुरसं मूलं कार्पासमेव वा । पाण्डुप्रदरशान्त्यर्थं पिबेत्तण्डुलवारिणा
69 // āmalakyā madhurasaṃ mūlaṃ kārpāsameva vā / pāṇḍupradaraśāntyarthaṃ pibettaṇḍulavāriṇā
70 ॥ तण्डुलीयकमूलं तु सक्षौद्रे सरसाञ्जनम् । तण्डुलोदकसंपीतं सर्वांश्चासृक्दराञ्जयेत् । कुशमूलं तण्डुलाद्भिः पीतं चासृक्दरं जयेत्
70 // taṇḍulīyakamūlaṃ tu sakṣaudre sarasāñjanam / taṇḍulodakasaṃpītaṃ sarvāṃścāsṛkdarāñjayet / kuśamūlaṃ taṇḍulādbhiḥ pītaṃ cāsṛkdaraṃ jayet