50 ॥ इति श्रीबृहन्नारदीयपुराणे बृहदुपाख्याने चतुर्थपादे पुराणमहिमावर्णनं नाम पञ्चविंशोत्तरशततमो ऽध्यायः समाप्तोयं बृहन्नारदीयपुराणस्य पूर्वभागः श्रीराधामदनमोहनो जयति तराम् उत्तरभागः श्रीगणेशाय नमः श्रीकृष्णाय नमः पान्तु वो जलदश्यामाः शार्ङ्गज्याघातकर्कशाः । त्रैलोक्यमण्डपस्तंभाश्चत्वारो हरिबाहवः
50 // iti śrībṛhannāradīyapurāṇe bṛhadupākhyāne caturthapāde purāṇamahimāvarṇanaṃ nāma pañcaviṃśottaraśatatamo 'dhyāyaḥ samāptoyaṃ bṛhannāradīyapurāṇasya pūrvabhāgaḥ śrīrādhāmadanamohano jayati tarām uttarabhāgaḥ śrīgaṇeśāya namaḥ śrīkṛṣṇāya namaḥ pāntu vo jaladaśyāmāḥ śārṅgajyāghātakarkaśāḥ / trailokyamaṇḍapastaṃbhāścatvāro haribāhavaḥ
1 ॥ सुरद सुरशिरोरत्ननिघृष्टमणिरञ्जितम् । हरिपादांबुजद्वन्द्वमभीष्टप्तदमस्तु नः
1 // surada suraśiroratnanighṛṣṭamaṇirañjitam / haripādāṃbujadvandvamabhīṣṭaptadamastu naḥ
2 ॥ मान्धातोवाच पापेन्धनस्य घोरस्य शुष्कार्द्रस्य द्विजोत्तम । कोवह्निर्दहते तस्य तद्भवान्वक्तुमर्हति
2 // māndhātovāca pāpendhanasya ghorasya śuṣkārdrasya dvijottama / kovahnirdahate tasya tadbhavānvaktumarhati
3 ॥ नाज्ञातं त्रिषु लोकेषु चतुर्मुखसमुद्भव । विद्यते तव विप्रेन्द्र त्रिविधस्य सुनिश्चितम्
3 // nājñātaṃ triṣu lokeṣu caturmukhasamudbhava / vidyate tava viprendra trividhasya suniścitam
4 ॥ अज्ञातं पातकं शुष्कं ज्ञातं चार्द्रमुदाहृतम् । भाव्यं वाप्यथवातीतं वर्तमान वदस्व नः
4 // ajñātaṃ pātakaṃ śuṣkaṃ jñātaṃ cārdramudāhṛtam / bhāvyaṃ vāpyathavātītaṃ vartamāna vadasva naḥ
5 ॥ वह्निनो केन तद्भस्म भवेदेतन्मतं मम । वसिष्टं उवाच श्रूयतां नृपशार्दूल वह्निना येन तद्भवेत्
5 // vahnino kena tadbhasma bhavedetanmataṃ mama / vasiṣṭaṃ uvāca śrūyatāṃ nṛpaśārdūla vahninā yena tadbhavet
6 ॥ भस्म शुष्कं तथार्द्रं च पापमस्य ह्येशेषतः
6 // bhasma śuṣkaṃ tathārdraṃ ca pāpamasya hyeśeṣataḥ
7 ॥ अवाप्य वासरं विष्णोर्यो नरः संयतेन्द्रियः । उपवासपरो भूत्वा पूजयेन्मधुसूदनम्
7 // avāpya vāsaraṃ viṣṇoryo naraḥ saṃyatendriyaḥ / upavāsaparo bhūtvā pūjayenmadhusūdanam
8 ॥ स धात्रीस्नानसहितो रात्रौ जागरणान्वितः । विशोधयति पापानि कितवो हि यथा धनम्
8 // sa dhātrīsnānasahito rātrau jāgaraṇānvitaḥ / viśodhayati pāpāni kitavo hi yathā dhanam
9 ॥ एकदाशीसमाख्येन वह्निना पातकेन्धनम् । भस्मतां याति राजेन्द्र अपि जन्मशतोद्भवम्
9 // ekadāśīsamākhyena vahninā pātakendhanam / bhasmatāṃ yāti rājendra api janmaśatodbhavam
10 ॥ नेदृश पावनं किञ्चिन्नाराणां भूप विद्यते । यादृशं पद्मनाभस्य दिनं पातकहानिदम्
10 // nedṛśa pāvanaṃ kiñcinnārāṇāṃ bhūpa vidyate / yādṛśaṃ padmanābhasya dinaṃ pātakahānidam
11 ॥ तावत्पापानि देहे ऽस्मिंस्तिष्ठन्ति मनुजाधिप । यावन्नोपवसेज्जन्तुः पद्मनाभदिमं शुभम्
11 // tāvatpāpāni dehe 'smiṃstiṣṭhanti manujādhipa / yāvannopavasejjantuḥ padmanābhadimaṃ śubham
12 ॥ अश्वमेधसहस्राणि राजसूयशतानि च । एकादश्युपवासस्य कलां नार्हन्ति षोडशीम्
12 // aśvamedhasahasrāṇi rājasūyaśatāni ca / ekādaśyupavāsasya kalāṃ nārhanti ṣoḍaśīm
13 ॥ एकादशेन्द्रियैः पापं यत्कृतं भवति प्रभो । एकादश्युपवासेन तत्सर्वं विलयं व्रजेत्
13 // ekādaśendriyaiḥ pāpaṃ yatkṛtaṃ bhavati prabho / ekādaśyupavāsena tatsarvaṃ vilayaṃ vrajet
14 ॥ एकादशीसमं किञ्चित्पापनाशं न विद्यते । व्याजेनापि कृता राजन्न दर्शयति भास्करिम्
14 // ekādaśīsamaṃ kiñcitpāpanāśaṃ na vidyate / vyājenāpi kṛtā rājanna darśayati bhāskarim
15 ॥ स्वर्गमोक्षप्रदा ह्येषा राज्यपुत्रप्रदायिनी । सुकलत्रप्रदा ह्येषा शरीरारोग्यदायिनी
15 // svargamokṣapradā hyeṣā rājyaputrapradāyinī / sukalatrapradā hyeṣā śarīrārogyadāyinī
16 ॥ न गङ्गा न गया भूप न काशी न च पुष्करम् । न चापि कैरवं क्षेत्रं न रेवा न च देविका
16 // na gaṅgā na gayā bhūpa na kāśī na ca puṣkaram / na cāpi kairavaṃ kṣetraṃ na revā na ca devikā
17 ॥ यमुना चन्द्रभागा च पुण्या भूप हरेर्दिनात् । अनायासेन राजेन्द्र प्राप्यते हरिमन्दिरम्
17 // yamunā candrabhāgā ca puṇyā bhūpa harerdināt / anāyāsena rājendra prāpyate harimandiram
18 ॥ रात्रौ जामरण कृत्वा समुपोष्य हरेर्दिनम् । सर्वपापविनिर्मुक्तो विष्णुलोके व्रजेन्नरः
18 // rātrau jāmaraṇa kṛtvā samupoṣya harerdinam / sarvapāpavinirmukto viṣṇuloke vrajennaraḥ
19 ॥ दशैव मातृके पक्षे दश राजेन्द्र पैतृके । भार्याया दश पक्षे च पुरुषानुद्धरेत्तथा
19 // daśaiva mātṛke pakṣe daśa rājendra paitṛke / bhāryāyā daśa pakṣe ca puruṣānuddharettathā
20 ॥ आत्मानमपि राजेन्द्र स नयेद्वैष्णवं पुरम् । चिन्तामणिसमा ह्येषा अथवापि निधेः समा
20 // ātmānamapi rājendra sa nayedvaiṣṇavaṃ puram / cintāmaṇisamā hyeṣā athavāpi nidheḥ samā
21 ॥ संकल्पपादपप्रख्या वेदवाक्योपमाथवा । द्वादशीं ये प्रपन्ना हि नरा नरवरोत्तम
21 // saṃkalpapādapaprakhyā vedavākyopamāthavā / dvādaśīṃ ye prapannā hi narā naravarottama
22 ॥ ते द्वन्द्वबाहवो जाता नागारिकृतवाहनाः । स्रग्विणः पीतवस्त्राश्च प्रयान्ति हरिमन्दिरम्
22 // te dvandvabāhavo jātā nāgārikṛtavāhanāḥ / sragviṇaḥ pītavastrāśca prayānti harimandiram
23 ॥ एष प्रभावो हि मया द्वादश्याः परिकीर्तितः । पापेन्धनस्य घोरस्य पावकाख्यो महीपते
23 // eṣa prabhāvo hi mayā dvādaśyāḥ parikīrtitaḥ / pāpendhanasya ghorasya pāvakākhyo mahīpate
24 ॥ हरेर्द्दिनं सदोपोष्यं नरैर्धर्मपरायणैः । इच्छद्भिर्विपुलान्योगान्पुत्रपौत्रादिकांस्तथा
24 // harerddinaṃ sadopoṣyaṃ narairdharmaparāyaṇaiḥ / icchadbhirvipulānyogānputrapautrādikāṃstathā
25 ॥ हरिदिनमिह मर्त्यो यः करोत्यादरेण नरवर स तु कुक्षिं मातुराप्नोति नैव । बहुवृजिनसमेतो ऽकामतः कामतो वा व्रजति पदमनन्तं लोकनाथस्य विष्णोः
25 // haridinamiha martyo yaḥ karotyādareṇa naravara sa tu kukṣiṃ māturāpnoti naiva / bahuvṛjinasameto 'kāmataḥ kāmato vā vrajati padamanantaṃ lokanāthasya viṣṇoḥ