47 ॥ इति श्रीबृहन्नारदीयपुराणोत्तरेभागे मोहिनीदर्शनं नाम एकादशो ऽध्यायः वसिष्ट उवाच व्याहृते शोभने वाक्ये मोहिन्या नृपतिस्तदा । उन्मील्य नेत्रे राजेन्द्र शतपत्रनिभे तथा
47 // iti śrībṛhannāradīyapurāṇottarebhāge mohinīdarśanaṃ nāma ekādaśo 'dhyāyaḥ vasiṣṭa uvāca vyāhṛte śobhane vākye mohinyā nṛpatistadā / unmīlya netre rājendra śatapatranibhe tathā
1 ॥ सगद्गदमुवाचेदं मुग्धो मोहिनिदर्शनात् । मया बाले सुबहुशः पूर्णचन्द्रनिभाननाः
1 // sagadgadamuvācedaṃ mugdho mohinidarśanāt / mayā bāle subahuśaḥ pūrṇacandranibhānanāḥ
2 ॥ दृष्टास्तथानुभूताश्च नेदृग्दृष्टं वपुः क्वचित् । यादृशं त्वं धारयसे रूपं लोकविमोहनम्
2 // dṛṣṭāstathānubhūtāśca nedṛgdṛṣṭaṃ vapuḥ kvacit / yādṛśaṃ tvaṃ dhārayase rūpaṃ lokavimohanam
3 ॥ सो ऽहं दर्शनमात्रेण त्वदीयेन वरानने । मनोभवशरैर्विद्धः पतितः सहसा क्षितौ । अजल्पितवचो देवि मोहितस्तव तेजसा
3 // so 'haṃ darśanamātreṇa tvadīyena varānane / manobhavaśarairviddhaḥ patitaḥ sahasā kṣitau / ajalpitavaco devi mohitastava tejasā
4 ॥ कुरु प्रसादं करभोरु मह्यं दास्यामि सर्वं तव चित्तसंस्थम् । नादेयमस्तीह जगत्त्रये ऽपि तवानुरागेण निबद्धचेतसः
4 // kuru prasādaṃ karabhoru mahyaṃ dāsyāmi sarvaṃ tava cittasaṃstham / nādeyamastīha jagattraye 'pi tavānurāgeṇa nibaddhacetasaḥ
5 ॥ इमां धरां भूधरभूषिताङ्गीं समुद्रवस्त्रां शशिसूर्यनेत्राम् । घनस्तनीं व्योमसुबद्धदेहां निष्काननां सुंदरि वामशीलाम्
5 // imāṃ dharāṃ bhūdharabhūṣitāṅgīṃ samudravastrāṃ śaśisūryanetrām / ghanastanīṃ vyomasubaddhadehāṃ niṣkānanāṃ suṃdari vāmaśīlām
6 ॥ पातालगुह्यां बहुवृक्षरोम्णीं सप्ताधरां सुभ्रु तवास्मि दाता । सकोशबद्धां गजवाजिपूर्णां समन्त्रिहृद्यां नगरैः समेताम्
6 // pātālaguhyāṃ bahuvṛkṣaromṇīṃ saptādharāṃ subhru tavāsmi dātā / sakośabaddhāṃ gajavājipūrṇāṃ samantrihṛdyāṃ nagaraiḥ sametām
7 ॥ आत्मानमपि दास्यामि तवा चार्वङ्गि संगमे । किं पुनर्द्धनरत्नादि प्रसीद मम मोहिनि
7 // ātmānamapi dāsyāmi tavā cārvaṅgi saṃgame / kiṃ punarddhanaratnādi prasīda mama mohini
8 ॥ नृपस्य वचनं श्रुत्वा मोहिनी मधुराक्षरम् । समुवाच स्मितं कृत्वा तमुत्थाप्य नृपं तदा
8 // nṛpasya vacanaṃ śrutvā mohinī madhurākṣaram / samuvāca smitaṃ kṛtvā tamutthāpya nṛpaṃ tadā
9 ॥ न धरां भूधरोपेतां वरये वसुधाधिप । यद्विदिष्याम्यहं काल तत्कार्यमविशङ्कया
9 // na dharāṃ bhūdharopetāṃ varaye vasudhādhipa / yadvidiṣyāmyahaṃ kāla tatkāryamaviśaṅkayā
10 ॥ भजिष्यामि न संदेहः कुरुष्व समयं मम । राजोवाच येन संतुष्यसे देवि समयं तं करोम्यहम्
10 // bhajiṣyāmi na saṃdehaḥ kuruṣva samayaṃ mama / rājovāca yena saṃtuṣyase devi samayaṃ taṃ karomyaham
11 ॥ दशावस्थां गतो देहो मम त्वत्संगमं विना
11 // daśāvasthāṃ gato deho mama tvatsaṃgamaṃ vinā
12 ॥ मोहिन्युवाच दीयतां दक्षिणो हस्तो बहुधर्मकरस्तव । येन मे प्रत्ययो राजन् वचने तावके भवेत्
12 // mohinyuvāca dīyatāṃ dakṣiṇo hasto bahudharmakarastava / yena me pratyayo rājan vacane tāvake bhavet
13 ॥ राजा त्वं धर्मशीलो ऽसि सत्यकीर्तिर्जगत्त्रये । न वक्तास्यनृतं काले मार्गायं लौकिकः कृतः
13 // rājā tvaṃ dharmaśīlo 'si satyakīrtirjagattraye / na vaktāsyanṛtaṃ kāle mārgāyaṃ laukikaḥ kṛtaḥ
14 ॥ एवं ब्रवाणां राजेन्द्रो मोहिनीं हृच्छयातुरः । अब्रवीन्नृपतिस्तां तु सुप्रसन्नमना नृप
14 // evaṃ bravāṇāṃ rājendro mohinīṃ hṛcchayāturaḥ / abravīnnṛpatistāṃ tu suprasannamanā nṛpa
15 ॥ जन्मप्रभृति वामोरु नानृतं भाषितं मया । स्वैरेष्वपि विहारेषु कदापि वरवाणिंनि
15 // janmaprabhṛti vāmoru nānṛtaṃ bhāṣitaṃ mayā / svaireṣvapi vihāreṣu kadāpi varavāṇiṃni
16 ॥ अथवा व्याहृतैर्वाक्यैः किमेभिः प्रत्ययाक्षरैः । दतो ह्येष मया हस्तो दक्षिणः पुण्यलाञ्छनः
16 // athavā vyāhṛtairvākyaiḥ kimebhiḥ pratyayākṣaraiḥ / dato hyeṣa mayā hasto dakṣiṇaḥ puṇyalāñchanaḥ
17 ॥ यन्मया सुकृतं किञ्चित्कृतमाजन्म सुन्दरि । तत्सर्वं तव वामोरु यदि कुर्यान्न ते वचः
17 // yanmayā sukṛtaṃ kiñcitkṛtamājanma sundari / tatsarvaṃ tava vāmoru yadi kuryānna te vacaḥ
18 ॥ अन्तरे ह्येष दत्तो मे धर्मो भार्या भवाङ्गने । तव रूपेण मे क्षोभः सहसा प्रत्युपस्थितः
18 // antare hyeṣa datto me dharmo bhāryā bhavāṅgane / tava rūpeṇa me kṣobhaḥ sahasā pratyupasthitaḥ
19 ॥ ऋतध्वजसुतश्चाहं नाम्ना रुक्मां गदो नृपः । इक्ष्वाकुवशसंभूतः सुतो धर्माङ्गदो मम
19 // ṛtadhvajasutaścāhaṃ nāmnā rukmāṃ gado nṛpaḥ / ikṣvākuvaśasaṃbhūtaḥ suto dharmāṅgado mama
20 ॥ मृगव्याजेन गहनं प्रविष्टश्चारुलोचने । ततो दृष्टो वने हृद्यो वामदेवाश्रमो मया
20 // mṛgavyājena gahanaṃ praviṣṭaścārulocane / tato dṛṣṭo vane hṛdyo vāmadevāśramo mayā
21 ॥ मुनिना जल्पितं तत्र किञ्चित्तेन विसर्जितः । आरुह्य वाहनश्रेष्ठंमन्दरं द्रष्टुमागतः
21 // muninā jalpitaṃ tatra kiñcittena visarjitaḥ / āruhya vāhanaśreṣṭhaṃmandaraṃ draṣṭumāgataḥ
22 ॥ भ्रममाणो गिरिवरं कुतूहलमनास्तदा । प्राप्तं मच्छ्रवणे गीतं तव वक्त्रविनिर्गतम्
22 // bhramamāṇo girivaraṃ kutūhalamanāstadā / prāptaṃ macchravaṇe gītaṃ tava vaktravinirgatam
23 ॥ तेन गीतेन चाकृष्टस्त्वत्समीपमुपागतः । दृष्टेः पथमनुप्राप्ता मम त्वं चारुलोचने
23 // tena gītena cākṛṣṭastvatsamīpamupāgataḥ / dṛṣṭeḥ pathamanuprāptā mama tvaṃ cārulocane
24 ॥ ततो ऽहं मूर्च्छितो देवि विसंज्ञः पतितः क्षितौ । सांप्रतं चेतनायुक्तस्तव वाक्यामृतेन हि
24 // tato 'haṃ mūrcchito devi visaṃjñaḥ patitaḥ kṣitau / sāṃprataṃ cetanāyuktastava vākyāmṛtena hi
25 ॥ पुनर्जातमिवात्मानं मन्ये ऽहं लोकमोहिनि । प्रत्युत्तरप्रदानेन प्रसादं कर्त्तुमर्हसि
25 // punarjātamivātmānaṃ manye 'haṃ lokamohini / pratyuttarapradānena prasādaṃ karttumarhasi
26 ॥ नृपेणैव समुद्दिष्टा मोहिन्याहोत्तरं वचः । अहं ब्रह्मभवा राजंस्त्वदर्थं समुपागता
26 // nṛpeṇaiva samuddiṣṭā mohinyāhottaraṃ vacaḥ / ahaṃ brahmabhavā rājaṃstvadarthaṃ samupāgatā
27 ॥ श्रुत्वा कीर्ति स्मरोपेता मन्दरं कनकाचलम् । परित्यज्य सुरान्सर्वान्विश्वंभरपुरोगमान्
27 // śrutvā kīrti smaropetā mandaraṃ kanakācalam / parityajya surānsarvānviśvaṃbharapurogamān
28 ॥ समाहितमनास्त्वत्र तपस्यानिरता स्थिता । संपूजयन्ती देवेशं गीतदानेन शङ्करम्
28 // samāhitamanāstvatra tapasyāniratā sthitā / saṃpūjayantī deveśaṃ gītadānena śaṅkaram
29 ॥ गीतदानमहं मन्ये सुराणामतिवल्लभम् । सर्वदानाधिकं भूप ह्यनन्तगतिदायकम्
29 // gītadānamahaṃ manye surāṇāmativallabham / sarvadānādhikaṃ bhūpa hyanantagatidāyakam
30 ॥ येन तुष्टः पशुपतिः सद्यः प्रत्युपकारकः । ईप्सितो ऽयं मया प्राप्तो भवानवनिपालकः
30 // yena tuṣṭaḥ paśupatiḥ sadyaḥ pratyupakārakaḥ / īpsito 'yaṃ mayā prāpto bhavānavanipālakaḥ
31 ॥ अभिप्रीतो ऽसि मे राजन्नभिप्रीता ह्यहं तव
31 // abhiprīto 'si me rājannabhiprītā hyahaṃ tava
32 ॥ तमेवं मुक्त्वा द्विजराजवक्त्रा करं गृहीत्वा नृपतेस्तु वेगात् । उत्थापयामास धराशयानमिन्द्रस्य यष्टीमिव मोहिनी सा
32 // tamevaṃ muktvā dvijarājavaktrā karaṃ gṛhītvā nṛpatestu vegāt / utthāpayāmāsa dharāśayānamindrasya yaṣṭīmiva mohinī sā