89 ॥ इति श्रीबृहन्नारदीयपुराणोत्तरभागे मोहिनीचरिते काष्ठीलोपाख्यानं नामाष्टाविंशो ऽध्यायः काष्ठीलोवाच एवं सा राक्षसी सुभ्रु हस्तिनीरूपधारिणी । त्रिभिर्मुहूर्तैः संप्राप्ता काशीं विश्वेशमन्दिरम्
89 // iti śrībṛhannāradīyapurāṇottarabhāge mohinīcarite kāṣṭhīlopākhyānaṃ nāmāṣṭāviṃśo 'dhyāyaḥ kāṣṭhīlovāca evaṃ sā rākṣasī subhru hastinīrūpadhāriṇī / tribhirmuhūrtaiḥ saṃprāptā kāśīṃ viśveśamandiram
1 ॥ उवाच तां पुरीं प्राप्य भर्तारमसितेक्षणा । इयं पापतरोः कान्त कुठारा परिकीर्तिता
1 // uvāca tāṃ purīṃ prāpya bhartāramasitekṣaṇā / iyaṃ pāpataroḥ kānta kuṭhārā parikīrtitā
2 ॥ षडूर्मिकाञ्चनस्यैषा कान्त प्रोक्ता दुरोदरी । कर्मबीजोपशमनी सर्वेषां गतिदायिका
2 // ṣaḍūrmikāñcanasyaiṣā kānta proktā durodarī / karmabījopaśamanī sarveṣāṃ gatidāyikā
3 ॥ आद्यं हि वैष्णवं स्थानं पुराणाः संप्रचक्षते । नावैष्णवे स्थले मुक्तिः सर्वस्य तु कदाचन
3 // ādyaṃ hi vaiṣṇavaṃ sthānaṃ purāṇāḥ saṃpracakṣate / nāvaiṣṇave sthale muktiḥ sarvasya tu kadācana
4 ॥ माधवस्य पुरी चेयं पूर्वमासीद्द्विजोत्तम । मुक्तिदा सर्वजन्तूनां सर्वपापप्रणाशिनी
4 // mādhavasya purī ceyaṃ pūrvamāsīddvijottama / muktidā sarvajantūnāṃ sarvapāpapraṇāśinī
5 ॥ एकदा शङ्करो देवो द्रष्टुं प्रागात्पितामहम् । सर्वलोकैककर्तारं भ्राजमानं स्वतेजसा
5 // ekadā śaṅkaro devo draṣṭuṃ prāgātpitāmaham / sarvalokaikakartāraṃ bhrājamānaṃ svatejasā
6 ॥ गत्वा तत्र महादेवो ब्रह्माणं जगतां गुरुम् । नमस्कृत्य स्थितो ह्यग्रे वेदपाठं निशामयन्
6 // gatvā tatra mahādevo brahmāṇaṃ jagatāṃ gurum / namaskṛtya sthito hyagre vedapāṭhaṃ niśāmayan
7 ॥ चतुर्भिरद्भुतैवक्त्रैश्चतुरो निगमान्मुदा । उद्गिरन्तं जगन्नाथं दृष्ट्वा प्रीतो ऽभवत्तदा
7 // caturbhiradbhutaivaktraiścaturo nigamānmudā / udgirantaṃ jagannāthaṃ dṛṣṭvā prīto 'bhavattadā
8 ॥ अथ तत्पञ्चमं वक्त्रं ब्रह्मणो भूतनायकः । प्रगल्भं तमुपालक्ष्य क्षणाज्जातः समत्सरः
8 // atha tatpañcamaṃ vaktraṃ brahmaṇo bhūtanāyakaḥ / pragalbhaṃ tamupālakṣya kṣaṇājjātaḥ samatsaraḥ
9 ॥ स क्रोधजन्मा विप्रेन्द्र तस्य प्रागल्भ्यमक्षमन् । चकर्त तन्नखाग्रेण खस्थं वक्त्रं त्रिलोचनः
9 // sa krodhajanmā viprendra tasya prāgalbhyamakṣaman / cakarta tannakhāgreṇa khasthaṃ vaktraṃ trilocanaḥ
10 ॥ तच्छिन्नं ब्रह्मणः शीर्षं संलग्नं करपल्लवे । वामे निर्धूतमानिशं न निवृत्तं द्विजोत्तम
10 // tacchinnaṃ brahmaṇaḥ śīrṣaṃ saṃlagnaṃ karapallave / vāme nirdhūtamāniśaṃ na nivṛttaṃ dvijottama
11 ॥ ब्रह्मा तु दुःखितो भूत्वा तस्थौ स्थाणुं व्यलोकयन् । रुद्रो ऽपि लज्जितो भूत्वा निर्ज्जगाम त्वरान्वितः
11 // brahmā tu duḥkhito bhūtvā tasthau sthāṇuṃ vyalokayan / rudro 'pi lajjito bhūtvā nirjjagāma tvarānvitaḥ
12 ॥ बहुधा यतमानो ऽपि तच्छिरः क्षेप्तुमातुरः । न शशाक परित्यक्तुं तदद्भुतमभून्महत्
12 // bahudhā yatamāno 'pi tacchiraḥ kṣeptumāturaḥ / na śaśāka parityaktuṃ tadadbhutamabhūnmahat
13 ॥ चिन्तया व्याकुलो भूत्वा सस्मार गरुडध्वजम् । तेन संस्मृतमात्रस्तु शीघ्रमाविरभूच्च सः
13 // cintayā vyākulo bhūtvā sasmāra garuḍadhvajam / tena saṃsmṛtamātrastu śīghramāvirabhūcca saḥ
14 ॥ तं दृष्ट्वा देवदेवेशं विष्णुं सर्वगतं द्विज । ननाम शिरसा नम्रो निष्प्रभो वृषभध्वजः
14 // taṃ dṛṣṭvā devadeveśaṃ viṣṇuṃ sarvagataṃ dvija / nanāma śirasā namro niṣprabho vṛṣabhadhvajaḥ
15 ॥ तं तथातुरमालक्ष्य भीतं ब्रह्मद्रुहं हरिः । समाश्वास्या ब्रवीद्वाक्यं तत्तोषपरिकारकम्
15 // taṃ tathāturamālakṣya bhītaṃ brahmadruhaṃ hariḥ / samāśvāsyā bravīdvākyaṃ tattoṣaparikārakam
16 ॥ शंभो त्वया कृतं पापं यच्चिन्नं ब्रह्मणः शिरः । तत्फलं भुङ्क्ष्व सर्ंवज्ञ कियत्कालं कृतं स्वयम्
16 // śaṃbho tvayā kṛtaṃ pāpaṃ yaccinnaṃ brahmaṇaḥ śiraḥ / tatphalaṃ bhuṅkṣva sarṃvajña kiyatkālaṃ kṛtaṃ svayam
17 ॥ अवश्यमेव भोक्तव्यं कृतं कर्म शुभाशुभम् । नाभुक्तं क्षीयते कर्म ह्यपि जन्मशतैः प्रिय
17 // avaśyameva bhoktavyaṃ kṛtaṃ karma śubhāśubham / nābhuktaṃ kṣīyate karma hyapi janmaśataiḥ priya
18 ॥ किं करोमि क्व गच्छामि त्वां दृष्ट्वा दुःखितं हरम् । प्राणा विकलतां यान्ति मम त्वद्दुःखदर्शनात्
18 // kiṃ karomi kva gacchāmi tvāṃ dṛṣṭvā duḥkhitaṃ haram / prāṇā vikalatāṃ yānti mama tvadduḥkhadarśanāt
19 ॥ यानि कानि च पापानि महान्ति महतां गते । न तानि ब्रह्महत्यायाः समानीति मतिर्मम
19 // yāni kāni ca pāpāni mahānti mahatāṃ gate / na tāni brahmahatyāyāḥ samānīti matirmama
20 ॥ यस्त्वं सर्वस्य लोकस्य गुरुर्धर्मोपदेशकः । ब्रह्महत्याभिभूतस्तु क्षणं स्थातुं न च क्षमः
20 // yastvaṃ sarvasya lokasya gururdharmopadeśakaḥ / brahmahatyābhibhūtastu kṣaṇaṃ sthātuṃ na ca kṣamaḥ
21 ॥ एषा घोरतरा हत्या मीनगन्ध्या जरातुरा । लेलिहाना सुरेशान ग्रहीतुं त्वानुधावति
21 // eṣā ghoratarā hatyā mīnagandhyā jarāturā / lelihānā sureśāna grahītuṃ tvānudhāvati
22 ॥ तस्मान्नैकत्र भवता स्थेयं द्वादशबत्सरम् । अटनीयं हितार्थाय पापनाशाभिकाम्यया
22 // tasmānnaikatra bhavatā stheyaṃ dvādaśabatsaram / aṭanīyaṃ hitārthāya pāpanāśābhikāmyayā
23 ॥ अटित्वा द्वादशाब्दानि तीर्थेषु सकलेषु च । प्रक्षालयन्करं वामं भिक्षां गृह्णन्कपालके
23 // aṭitvā dvādaśābdāni tīrtheṣu sakaleṣu ca / prakṣālayankaraṃ vāmaṃ bhikṣāṃ gṛhṇankapālake
24 ॥ शुद्धिं यास्यसि देवेश पापादस्मात्सुदारुणात् । इत्युक्तो विष्णुना विप्र स्थाणुः सर्वगतो ऽभवत्
24 // śuddhiṃ yāsyasi deveśa pāpādasmātsudāruṇāt / ityukto viṣṇunā vipra sthāṇuḥ sarvagato 'bhavat
25 ॥ कपालमोचनार्थं हि पाणिं प्रक्षालयन् जले । वर्षत्रयं भ्रमित्वा तु प्राप्तो बदरिकाश्रमम्
25 // kapālamocanārthaṃ hi pāṇiṃ prakṣālayan jale / varṣatrayaṃ bhramitvā tu prāpto badarikāśramam
26 ॥ भिक्षार्थं देवदेवस्य धर्मपुत्रस्य मानद । द्वारस्थो देहि भिक्षां मे विष्णो इत्यवदन्मुहुः
26 // bhikṣārthaṃ devadevasya dharmaputrasya mānada / dvārastho dehi bhikṣāṃ me viṣṇo ityavadanmuhuḥ
27 ॥ ततो नारायणो देवो दृष्ट्वा द्वारि स्थितं हरम् । गृहाण भिक्षामित्युक्त्वा प्रददौ दक्षिणं करम्
27 // tato nārāyaṇo devo dṛṣṭvā dvāri sthitaṃ haram / gṛhāṇa bhikṣāmityuktvā pradadau dakṣiṇaṃ karam
28 ॥ ततो हरो हरिं दृष्ट्वा भिक्षां दातुं समुद्यतम् । प्राहरद्दक्षिणं पाणिं त्रिशूलेन द्विजोत्तम
28 // tato haro hariṃ dṛṣṭvā bhikṣāṃ dātuṃ samudyatam / prāharaddakṣiṇaṃ pāṇiṃ triśūlena dvijottama
29 ॥ तत्त्रिशूलक्षताद्धारास्तिस्रो लोकभयङ्कराः । प्रस्थद्वादशहस्ताश्च निर्गताश्चित्रवर्णिकाः
29 // tattriśūlakṣatāddhārāstisro lokabhayaṅkarāḥ / prasthadvādaśahastāśca nirgatāścitravarṇikāḥ
30 ॥ एका क्षतजधारा तु कपाले न्यपतत्तदा । द्वितीया तन्मुखे प्राप्ता पयस्याथ तृतीयका
30 // ekā kṣatajadhārā tu kapāle nyapatattadā / dvitīyā tanmukhe prāptā payasyātha tṛtīyakā
31 ॥ जलधारा शिवं प्राप्ता हरस्य हेतुरग्रतः । ता धारास्त्रीणि वर्षाणि संसेव्य विधिवद्धरः
31 // jaladhārā śivaṃ prāptā harasya heturagrataḥ / tā dhārāstrīṇi varṣāṇi saṃsevya vidhivaddharaḥ
32 ॥ किञ्चित्प्रीतो ययौ क्षेत्रं कुरोः पुण्यकरं द्विज । तत्र गत्वा हरः स्थाणुर्भूतस्तत्र पपात च
32 // kiñcitprīto yayau kṣetraṃ kuroḥ puṇyakaraṃ dvija / tatra gatvā haraḥ sthāṇurbhūtastatra papāta ca
33 ॥ ब्रह्मह्रदे त्रिवर्षाणि मग्रो ब्रह्मह्रदांबुनि । वर्षत्रये गते तत्र क्षतार्द्धाङ्गो विनिःसृतः
33 // brahmahrade trivarṣāṇi magro brahmahradāṃbuni / varṣatraye gate tatra kṣatārddhāṅgo viniḥsṛtaḥ
34 ॥ चिरं तुष्टाव देवेशं विष्णुं सर्वगुहाशयम् । ततस्तुष्टो जगन्नाथो वरं तस्मै ददौ तु सः
34 // ciraṃ tuṣṭāva deveśaṃ viṣṇuṃ sarvaguhāśayam / tatastuṣṭo jagannātho varaṃ tasmai dadau tu saḥ
35 ॥ गच्छ काशीमितो भ्रान्त्वा तीर्थानि बहुशो हर । ततो हरिं नमस्कृत्य परीत्य बहुधा तथा
35 // gaccha kāśīmito bhrāntvā tīrthāni bahuśo hara / tato hariṃ namaskṛtya parītya bahudhā tathā
36 ॥ क्रमात्तीर्थाटनं कुर्वन्नविमुक्तपुरीं गतः । अविमुक्तस्य सीमायां प्राविशद्वीक्ष्तय धूर्जटिः
36 // kramāttīrthāṭanaṃ kurvannavimuktapurīṃ gataḥ / avimuktasya sīmāyāṃ prāviśadvīkṣtaya dhūrjaṭiḥ
37 ॥ नापश्यत्तामनुप्राप्तां ब्रह्महत्यां बहिः स्थिताम् । ततो ऽसौ वैष्णवं ज्ञात्वा क्षेत्रं दुरितनाशनम् । तुष्टाव प्रयतो भूत्वा माधवं वन्द्यमीश्वरम्
37 // nāpaśyattāmanuprāptāṃ brahmahatyāṃ bahiḥ sthitām / tato 'sau vaiṣṇavaṃ jñātvā kṣetraṃ duritanāśanam / tuṣṭāva prayato bhūtvā mādhavaṃ vandyamīśvaram
38 ॥ जय जय जगदीश नाथ विष्णो जगदानन्दनिधान वेदवेद्य । मधुमथन नृसिंह पीतवासो गरुडाधिष्ठित माधवादिदेव
38 // jaya jaya jagadīśa nātha viṣṇo jagadānandanidhāna vedavedya / madhumathana nṛsiṃha pītavāso garuḍādhiṣṭhita mādhavādideva
39 ॥ व्रजरमण रमेश राधिकेश त्रिदशेशाखिलकामपूर कृष्ण । सुरवरकरुणार्णवार्तिनाशिन्नलिनाक्षाधिपते विभो परेश
39 // vrajaramaṇa rameśa rādhikeśa tridaśeśākhilakāmapūra kṛṣṇa / suravarakaruṇārṇavārtināśinnalinākṣādhipate vibho pareśa
40 ॥ यदुकु लतिलकाब्धिवास शौरे कुधरोद्धारविधानदक्ष धन्विन् । कलिकलुषहराङ्घ्रिपद्मयुग्म गृणदात्मप्रद कूर्म कश्यपोत्थ
40 // yaduku latilakābdhivāsa śaure kudharoddhāravidhānadakṣa dhanvin / kalikaluṣaharāṅghripadmayugma gṛṇadātmaprada kūrma kaśyapottha
41 ॥ कुकुपतिवनपावकाखिलेज्यास्रपकालासितवस्त्र बुद्ध कल्किन् । भवभयहर भक्तवश्य गोप प्रणत्तोद्धारक पुण्यकीर्तिनाम्
41 // kukupativanapāvakākhilejyāsrapakālāsitavastra buddha kalkin / bhavabhayahara bhaktavaśya gopa praṇattoddhāraka puṇyakīrtinām
42 ॥ धरणिभरहरासुरारिपूज्य प्रकृतीशेश जगन्निवास राम । गुणगणविलसच्चराचरेश त्रिगुणातीत सनातनाग्रपूज्य । निजजनपरिरक्षितान्तकारे कमलाङ्घ्रे कमनीय पद्मनाभ । कमलकर कुशेशया धिवास प्रियकामोन्मथन त्र्यधीशवन्द्य
42 // dharaṇibharaharāsurāripūjya prakṛtīśeśa jagannivāsa rāma / guṇagaṇavilasaccarācareśa triguṇātīta sanātanāgrapūjya / nijajanaparirakṣitāntakāre kamalāṅghre kamanīya padmanābha / kamalakara kuśeśayā dhivāsa priyakāmonmathana tryadhīśavandya
43 ॥ अघहर रघुनाथ यादवेश प्रियभूदेव परात्परामरेज्य । हलधर दुरितापह प्रणम्य त्रिगुणव्याप्त जगत्त्रिकालदक्ष
43 // aghahara raghunātha yādaveśa priyabhūdeva parātparāmarejya / haladhara duritāpaha praṇamya triguṇavyāpta jagattrikāladakṣa
44 ॥ दनुजकुलविनाशनैककर्मन्ननघारूढफणीश कंसकाल । रविशशिनयन प्रगल्भचेष्ट प्रधुतध्वान्त नवांबुदाभ मेश
44 // danujakulavināśanaikakarmannanaghārūḍhaphaṇīśa kaṃsakāla / raviśaśinayana pragalbhaceṣṭa pradhutadhvānta navāṃbudābha meśa
45 ॥ मख मखधर मातृबद्धदामन्नवनीतप्रिय बल्लवीगणेश । अघबकवृषकेशिपूतनान्त त्रिशिरोवालिदशास्यभेदकारिन्
45 // makha makhadhara mātṛbaddhadāmannavanītapriya ballavīgaṇeśa / aghabakavṛṣakeśipūtanānta triśirovālidaśāsyabhedakārin
46 ॥ नरकमुरविनाश बाणदोः कृत्त्रिपुरारीज्य सुदाममित्र सेव्य । भवतरणिवहित्रपादपद्म प्रकटैश्वर्य पुराण पूर्णबाहो
46 // narakamuravināśa bāṇadoḥ kṛttripurārījya sudāmamitra sevya / bhavataraṇivahitrapādapadma prakaṭaiśvarya purāṇa pūrṇabāho
47 ॥ बहुजनिसुकृताप्य मङ्गलार्ह श्रुतिवेद्य श्रुतिधाम शान्तशुद्ध । तव वरद वरेण्यमङ्घ्रियुग्मं शरणं प्राप्तमघार्दितं प्रपाहि
47 // bahujanisukṛtāpya maṅgalārha śrutivedya śrutidhāma śāntaśuddha / tava varada vareṇyamaṅghriyugmaṃ śaraṇaṃ prāptamaghārditaṃ prapāhi
48 ॥ नहि मम गतिदं पुराणपुंसो ऽन्यदिति प्रार्थनया प्रसीदऽमेद्य
48 // nahi mama gatidaṃ purāṇapuṃso 'nyaditi prārthanayā prasīda'medya
49 ॥ इति स्तुतो जगन्नाथो भक्त्या देवेन शंभुना । आविर्बभूव सहसा माधवो भक्तवत्सलः
49 // iti stuto jagannātho bhaktyā devena śaṃbhunā / āvirbabhūva sahasā mādhavo bhaktavatsalaḥ
50 ॥ तं दृष्ट्वा दण्डवद्भूमौ निपपात हरो हरिम् । पुनरुत्थाय विप्रेन्द्र ननाम विधृताञ्जलिः
50 // taṃ dṛṣṭvā daṇḍavadbhūmau nipapāta haro harim / punarutthāya viprendra nanāma vidhṛtāñjaliḥ
51 ॥ तमुवाच हृषीकेशः प्रणतं भूतनायकम् । वरं वृणु प्रदास्ये ऽहं संतुष्टः स्तोत्रतस्तव
51 // tamuvāca hṛṣīkeśaḥ praṇataṃ bhūtanāyakam / varaṃ vṛṇu pradāsye 'haṃ saṃtuṣṭaḥ stotratastava
52 ॥ तच्छ्रुत्वा भगवद्वाक्यं भूतेशो ब्रह्यहत्यया । पीडितात्मा जगादेदं भुक्तिमुक्तिप्रदं हरिम्
52 // tacchrutvā bhagavadvākyaṃ bhūteśo brahyahatyayā / pīḍitātmā jagādedaṃ bhuktimuktipradaṃ harim
53 ॥ इच्छामि वसितुं क्षेत्रे तव चक्रगदाधर । त्वत्क्षेत्रसीमाबाह्यस्था ब्रह्महत्या यदीक्ष्यते
53 // icchāmi vasituṃ kṣetre tava cakragadādhara / tvatkṣetrasīmābāhyasthā brahmahatyā yadīkṣyate
54 ॥ क्षेत्रदानेन कारुण्यं कुरु मे गरुडध्वज । मम निर्गमने ब्रह्महत्या मां पुनरेष्यति
54 // kṣetradānena kāruṇyaṃ kuru me garuḍadhvaja / mama nirgamane brahmahatyā māṃ punareṣyati
55 ॥ त्वत्क्षेत्रे संस्थितो ऽहं तु पूजां प्राप्स्ये जगत्त्रये । इत्युक्त्वा ह्यभवत्तूष्णीं देवदेवं वृषध्वजः
55 // tvatkṣetre saṃsthito 'haṃ tu pūjāṃ prāpsye jagattraye / ityuktvā hyabhavattūṣṇīṃ devadevaṃ vṛṣadhvajaḥ
56 ॥ तथेति प्रतिपेदे च क्षीरसागरजाप्रियः । ततः प्रभृति विप्रेन्द्र शैवं क्षेत्रं निगद्यते
56 // tatheti pratipede ca kṣīrasāgarajāpriyaḥ / tataḥ prabhṛti viprendra śaivaṃ kṣetraṃ nigadyate
57 ॥ क्षेत्रं तु केशवस्येदं पुराणं कवयो विदुः । कृपया संपरीतस्य माधवस्य द्विजोत्तम
57 // kṣetraṃ tu keśavasyedaṃ purāṇaṃ kavayo viduḥ / kṛpayā saṃparītasya mādhavasya dvijottama
58 ॥ नेत्राभ्यां निर्गतं वारि तेन बिन्दुसरो ऽभवत् । माधवस्याज्ञया तत्र सस्नौ देवो वृषध्वजः
58 // netrābhyāṃ nirgataṃ vāri tena bindusaro 'bhavat / mādhavasyājñayā tatra sasnau devo vṛṣadhvajaḥ
59 ॥ स्नातमात्रे हरे तत्तु कपालं पाणितो ऽपतत् । कपालमोचनं नाम तत्तीर्थं ख्यातिमागतम्
59 // snātamātre hare tattu kapālaṃ pāṇito 'patat / kapālamocanaṃ nāma tattīrthaṃ khyātimāgatam
60 ॥ बिन्दुमाधवनामासौ दत्वा स्वं धाम शूलिने । भक्तिभावेन शंभुस्तु निबद्धस्तत्र संस्थितः
60 // bindumādhavanāmāsau datvā svaṃ dhāma śūline / bhaktibhāvena śaṃbhustu nibaddhastatra saṃsthitaḥ
61 ॥ यं तु ब्रह्मादयो देवाः स्वःस्थाः पश्यति सर्वदा । सूर्यायुतसमप्रख्य दिगंबरनिषेवितम्
61 // yaṃ tu brahmādayo devāḥ svaḥsthāḥ paśyati sarvadā / sūryāyutasamaprakhya digaṃbaraniṣevitam
62 ॥ विघ्नानि शूलिना कान्त कृतान्यस्य निषेवणे । यैर्विघ्नैरभिभूतास्तु स्तुत्वा विष्णुं शिवार्चकाः
62 // vighnāni śūlinā kānta kṛtānyasya niṣevaṇe / yairvighnairabhibhūtāstu stutvā viṣṇuṃ śivārcakāḥ
63 ॥ सर्वे लोकाः स्थिता ह्यत्र शिवः काशीति चिन्तकाः । शिवस्य चिन्तनाद्विप्र शैवाः सर्वे निराकुलाः
63 // sarve lokāḥ sthitā hyatra śivaḥ kāśīti cintakāḥ / śivasya cintanādvipra śaivāḥ sarve nirākulāḥ
64 ॥ प्रयान्ति शिवलोकं वैजरामृत्युविवर्जितम् । बहुपुण्ययुताः संतो निवसंत्तयत्र नीरुजः
64 // prayānti śivalokaṃ vaijarāmṛtyuvivarjitam / bahupuṇyayutāḥ saṃto nivasaṃttayatra nīrujaḥ
65 ॥ यज्ञशिष्टाशिनः काशीकान्त ऋद्धिसमन्विताः । नात्र स्नानं प्रशंसंति न जपं न सुरार्चनम्
65 // yajñaśiṣṭāśinaḥ kāśīkānta ṛddhisamanvitāḥ / nātra snānaṃ praśaṃsaṃti na japaṃ na surārcanam
66 ॥ नापि दानं द्विजश्रेष्ठ मुक्त्वैकं देहपातनम् । मृत्युं प्रात्युं नरः कामं कृतकृत्यो भवेद्ध्रुवन्
66 // nāpi dānaṃ dvijaśreṣṭha muktvaikaṃ dehapātanam / mṛtyuṃ prātyuṃ naraḥ kāmaṃ kṛtakṛtyo bhaveddhruvan
67 ॥ सेयमासादिता विप्रर पुरी प्रासादसंकुला । भोगिनीमपि मोक्षाय किं पुनर्व्रतधारिणाम्
67 // seyamāsāditā viprara purī prāsādasaṃkulā / bhoginīmapi mokṣāya kiṃ punarvratadhāriṇām
68 ॥ निक्षिप्यतामियं बाला काशीशस्येह मन्दिरे । वियोजिता तु या पूर्वं तेन दुष्टेन रक्षसा
68 // nikṣipyatāmiyaṃ bālā kāśīśasyeha mandire / viyojitā tu yā pūrvaṃ tena duṣṭena rakṣasā
69 ॥ आत्मनः सुरतार्थाय कुमारी नियमान्विता । एष प्रभावो ऽपि हितः क्षेत्रस्यास्य द्विजोत्म
69 // ātmanaḥ suratārthāya kumārī niyamānvitā / eṣa prabhāvo 'pi hitaḥ kṣetrasyāsya dvijotma
70 ॥ विनश्यन्तीह कर्माणि शुभान्यप्यशुभानि च । भूतव्यभविष्याणि ज्ञानाज्ञानकृतानि च
70 // vinaśyantīha karmāṇi śubhānyapyaśubhāni ca / bhūtavyabhaviṣyāṇi jñānājñānakṛtāni ca
71 ॥ एषा पुरी कर्मविनाशनाय कृष्णेन पूर्वं हि विनिर्मिताभूत् । यस्यां मृता दुःखमनन्तमुग्रं भुञ्जन्ति मर्त्या यमयातनां नो
71 // eṣā purī karmavināśanāya kṛṣṇena pūrvaṃ hi vinirmitābhūt / yasyāṃ mṛtā duḥkhamanantamugraṃ bhuñjanti martyā yamayātanāṃ no