Chapter 2

इति श्रीस्कन्दपुराणे रेवाखण्डे प्रथमो ऽध्यायः ॥ RKS अध्याय 2 स्कन्द उवाच: श्रोतुकामा इमे सर्वे ब्रह्मविष्णुसुरोत्तमाः । प्रभावमीदृशं यस्य तीर्थस्या ऽस्य महत् फलम्

iti śrīskandapurāṇe revākhaṇḍe prathamo 'dhyāyaḥ || RKS adhyāya 2 skanda uvāca: śrotukāmā ime sarve brahmaviṣṇusurottamāḥ / prabhāvamīdṛśaṃ yasya tīrthasyā 'sya mahat phalam

नर्मदायास् तथोत्पत्तिं सङ्गमं लिङ्गपूजनम् । पर्वकाले च देवानां पर्वते ऽमरकण्टके

narmadāyās tathotpattiṃ saṅgamaṃ liṅgapūjanam / parvakāle ca devānāṃ parvate 'marakaṇṭake

आख्यानसहितं देव कथयस्व यथार्थतः । तीर्थयात्राफलं सम्यग्वंशो मन्वन्तराणि च

ākhyānasahitaṃ deva kathayasva yathārthataḥ / tīrthayātrāphalaṃ samyagvaṃśo manvantarāṇi ca

भक्त्या युक्तं च यत् किंचित् कथयस्व प्रसादतः । सूत उवाच: श्रुत्वा ऽख्यानमिदं पुण्य पुराणं स्कन्दकीर्तितम्

bhaktyā yuktaṃ ca yat kiṃcit kathayasva prasādataḥ / sūta uvāca: śrutvā 'khyānamidaṃ puṇya purāṇaṃ skandakīrtitam

भविष्यभूततत्त्वज्ञः सप्तकल्पानुवर्तकः । आजगामा ऽथमार्कण्डऋषिभिः सहितस्तदा

bhaviṣyabhūtatattvajñaḥ saptakalpānuvartakaḥ / ājagāmā 'thamārkaṇḍaṛṣibhiḥ sahitastadā

सर्वकामसमृद्धात्मा श्रेयान् त्वेनैव पूजितः । सपादलक्षमधिकम् ऋषीणां चोग्रतेजसाम्

sarvakāmasamṛddhātmā śreyān tvenaiva pūjitaḥ / sapādalakṣamadhikam ṛṣīṇāṃ cogratejasām

ब्रह्मर्षयो देवर्षयस् तथा राजर्षयः परे । एतैः परिवृतः श्रीमान् मध्ये ऽरण्याश्रमं प्रति

brahmarṣayo devarṣayas tathā rājarṣayaḥ pare / etaiḥ parivṛtaḥ śrīmān madhye 'raṇyāśramaṃ prati

तीर्थयात्राफलं प्राप्य नर्मदातटमाश्रितः । श्रुत्वा महान्तं मार्कण्डप्रभावं लोमहर्षणः

tīrthayātrāphalaṃ prāpya narmadātaṭamāśritaḥ / śrutvā mahāntaṃ mārkaṇḍaprabhāvaṃ lomaharṣaṇaḥ

आजगाम ततो द्रष्टुमृषिं कल्मषनाशनम् । नर्मदाप्रवाहे पुण्ये सिद्धगन्धर्वसेविते

ājagāma tato draṣṭumṛṣiṃ kalmaṣanāśanam / narmadāpravāhe puṇye siddhagandharvasevite

यक्षविद्याधराकीर्णे किन्नरैरुपशोभिते । नानादेवगणाकीर्णे नानागणनिषेविते

yakṣavidyādharākīrṇe kinnarairupaśobhite / nānādevagaṇākīrṇe nānāgaṇaniṣevite

रेवावतरणं श्रुत्वा प्रभावं पुण्यसङ्गतम् । ननृतुर् देवतास् तत्र सिद्धविद्याधरा नराः

revāvataraṇaṃ śrutvā prabhāvaṃ puṇyasaṅgatam / nanṛtur devatās tatra siddhavidyādharā narāḥ

कह्लारैः शतपत्रैश्च पुन्नागैर् नागचम्पकैः । आम्रजम्बूकपित्थैश्च दाडिमैः पनसैस्तथा

kahlāraiḥ śatapatraiśca punnāgair nāgacampakaiḥ / āmrajambūkapitthaiśca dāḍimaiḥ panasaistathā

निम्बजम्बीरनारङ्गैः कदलीषण्डमण्डितैः । कुमुदैर् नागवल्ल्याद् यैः शालेयैश्च तमालकैः

nimbajambīranāraṅgaiḥ kadalīṣaṇḍamaṇḍitaiḥ / kumudair nāgavallyād yaiḥ śāleyaiśca tamālakaiḥ

बीजपूरकखर्जूरैर् द्राक्षामधुरपाटलैः । बिल्वचन्दनपील्वाद्यैः कदम्बकुटजैस्तथा

bījapūrakakharjūrair drākṣāmadhurapāṭalaiḥ / bilvacandanapīlvādyaiḥ kadambakuṭajaistathā

सर्वकामफलैर्वृक्षैः फलितं पुष्पितं भृशम् । हंसकारण्डवाकीर्णं चक्रवाकोपशोभितम्

sarvakāmaphalairvṛkṣaiḥ phalitaṃ puṣpitaṃ bhṛśam / haṃsakāraṇḍavākīrṇaṃ cakravākopaśobhitam

कोकिलाबर्हिणशुकैर् नानापक्षिविनादितम् । जातिस्मरा पक्षिणश्च व्याजह्रुर् मानुषीङ्गिरम्

kokilābarhiṇaśukair nānāpakṣivināditam / jātismarā pakṣiṇaśca vyājahrur mānuṣīṅgiram

गन्धर्वकिन्नरयुतैर् यक्षविद्याधरोरगैः । क्रीडते मिथुनं दिव्यं शनैर्गिरिवरोत्तमे

gandharvakinnarayutair yakṣavidyādharoragaiḥ / krīḍate mithunaṃ divyaṃ śanairgirivarottame

दिव्यगन्धर्वनृत्यैश्च वेणुवीणासहस्रशः । दिव्योद्भवैः प्रेक्षणीयैः शोभितैर्गिरिगह्वरे

divyagandharvanṛtyaiśca veṇuvīṇāsahasraśaḥ / divyodbhavaiḥ prekṣaṇīyaiḥ śobhitairgirigahvare

गीतध्वनिनिनादेन दिवं भूमिं व्यनादयन् । ब्रह्मर्षयो देवर्षयस् तथा राजर्षयः परे

gītadhvanininādena divaṃ bhūmiṃ vyanādayan / brahmarṣayo devarṣayas tathā rājarṣayaḥ pare

वेदध्वनितयज्ञानाम् अग्निहोत्रप्रकाशतः । ऋग्यजुःसामाथर्वाणि चातुर्वर्ण्या द्विजोत्तमाः

vedadhvanitayajñānām agnihotraprakāśataḥ / ṛgyajuḥsāmātharvāṇi cāturvarṇyā dvijottamāḥ

पुलस्त्यश्च वसिष्ठश्च पुलहश्च क्रतुस्तथा । भृगुरत्रिर्मरीचिश्च भारद्वाजो ऽथ काश्यपः

pulastyaśca vasiṣṭhaśca pulahaśca kratustathā / bhṛguratrirmarīciśca bhāradvājo 'tha kāśyapaḥ

मनुर्यमो ऽङ्गिराश्चैव शातातपपराशरौ । आपस्तम्बो ऽथ शम्बश्च काव्यः कात्यायनो मुनिः

manuryamo 'ṅgirāścaiva śātātapaparāśarau / āpastambo 'tha śambaśca kāvyaḥ kātyāyano muniḥ

गौतमः शङ्खलिखितौ दक्षः कात्यायनिस् तथा । जामदग्न्यो याज्ञवल्क्य ऋष्यशृङ्गो विभाण्डकः

gautamaḥ śaṅkhalikhitau dakṣaḥ kātyāyanis tathā / jāmadagnyo yājñavalkya ṛṣyaśṛṅgo vibhāṇḍakaḥ

गर्गशौनकदाल्भ्या व्यास उद्दालकः शुकः । नारदः पर्वतश्चैव दुर्वासाश्चोग्रतापसः

gargaśaunakadālbhyā vyāsa uddālakaḥ śukaḥ / nāradaḥ parvataścaiva durvāsāścogratāpasaḥ

शाकल्यो गालवश्चैव जाबालिर्मुद्गलस्तथा । विश्वामित्रः कौशिकश्च ऋषयो देवसम्मताः

śākalyo gālavaścaiva jābālirmudgalastathā / viśvāmitraḥ kauśikaśca ṛṣayo devasammatāḥ

तथा धर्मशतानन्दवैशम्पायनवैष्णवाः । शाकलायनवार्द्धक्यौ जुहुतिश् चावसुस् तथा

tathā dharmaśatānandavaiśampāyanavaiṣṇavāḥ / śākalāyanavārddhakyau juhutiś cāvasus tathā

बालखिल्या महात्मानो भूमिमण्डलवासिनः । ब्रह्मदण्डं समारुहा देवलोकं व्रजन्ति ये

bālakhilyā mahātmāno bhūmimaṇḍalavāsinaḥ / brahmadaṇḍaṃ samāruhā devalokaṃ vrajanti ye

एते चान्ये ऽव्रजंस्तत्र ऋषयो धार्मिकाः परे । ज्वलन्तस्तेजसा सर्वे निर्धूमा इव पावकाः

ete cānye 'vrajaṃstatra ṛṣayo dhārmikāḥ pare / jvalantastejasā sarve nirdhūmā iva pāvakāḥ

मासोपवासिन केचित् केचित् पक्षोपवासिनः । त्रिरात्रकाः सान्तपना निराहारास् तथा परे

māsopavāsina kecit kecit pakṣopavāsinaḥ / trirātrakāḥ sāntapanā nirāhārās tathā pare

केचित् पुष्पफलाहाराः शान्ता वाताशनिस्तथा । केचिद् गोमयभक्ष्याश्च जलाहारास्तथापरे

kecit puṣpaphalāhārāḥ śāntā vātāśanistathā / kecid gomayabhakṣyāśca jalāhārāstathāpare

साग्निहोत्राश्च विद्वांसो मोक्षवेदार्थचिन्तकाः । इतिहासपुराणादि श्रुतिस्मृतिविशारदाः

sāgnihotrāśca vidvāṃso mokṣavedārthacintakāḥ / itihāsapurāṇādi śrutismṛtiviśāradāḥ

एते चान्ये च बहवो मार्कण्डेयं प्रियया तपस्विनः । एतैश्च संतिष्ठन् ऋक्षैरिव निशाकरः

ete cānye ca bahavo mārkaṇḍeyaṃ priyayā tapasvinaḥ / etaiśca saṃtiṣṭhan ṛkṣairiva niśākaraḥ

तीर्थयात्राफलं श्रुत्वा धर्मपुत्रो युधिष्ठिरः । अभिज्ञैर् ब्राह्मणैः सार्धं द्रौपद्या प्रियया सह

tīrthayātrāphalaṃ śrutvā dharmaputro yudhiṣṭhiraḥ / abhijñair brāhmaṇaiḥ sārdhaṃ draupadyā priyayā saha

विद्वद्भिर्वेदविद्भिश्च ब्रह्मिष्ठैर् ब्रह्मचिन्तकैः । नर्मदातीरम् आयाते मार्कण्डेयाश्रमं प्रति

vidvadbhirvedavidbhiśca brahmiṣṭhair brahmacintakaiḥ / narmadātīram āyāte mārkaṇḍeyāśramaṃ prati

प्रदक्षिणत्रिः प्रणम्य साष्टाङ्गं च पुनः पुनः । उपविष्टस्तदा तत्र भ्रातृभिस्सह धर्मजः

pradakṣiṇatriḥ praṇamya sāṣṭāṅgaṃ ca punaḥ punaḥ / upaviṣṭastadā tatra bhrātṛbhissaha dharmajaḥ

उपविष्टं नृपं दृष्ट्वा मार्कण्डेयो महामुनिः । उवाच वचनं देवं धर्मपुत्रं युधिष्ठिरम्

upaviṣṭaṃ nṛpaṃ dṛṣṭvā mārkaṇḍeyo mahāmuniḥ / uvāca vacanaṃ devaṃ dharmaputraṃ yudhiṣṭhiram

कुशलं नृपशार्दूल भ्रातृभिर् ब्राह्मणैः सह । प्रहस्य सो ऽब्रवीद्वाक्यं मार्कण्डं मुनिसत्तमम्

kuśalaṃ nṛpaśārdūla bhrātṛbhir brāhmaṇaiḥ saha / prahasya so 'bravīdvākyaṃ mārkaṇḍaṃ munisattamam

अद्य मे सफलं जन्म जीवितं च सुजीवितम् । कृतकृत्यो ऽभवं त्वद्य त्वत्पादाम्बुजदर्शनात्

adya me saphalaṃ janma jīvitaṃ ca sujīvitam / kṛtakṛtyo 'bhavaṃ tvadya tvatpādāmbujadarśanāt

अद्य मे ऽन्तर्मलं नष्टं पापोच्छेदननिर्म्मलम् । दृष्ट्वा तपोवनं सर्वं ज्वलन्तं सूर्यवर्चसम्

adya me 'ntarmalaṃ naṣṭaṃ pāpocchedananirmmalam / dṛṣṭvā tapovanaṃ sarvaṃ jvalantaṃ sūryavarcasam

निर्मुक्तः किल्बिषादस्मात् सप्तजन्मान्तराद्विभो । रन्त्वा चोत्तरदिग्भागे देवभूमिं मनोहराम्

nirmuktaḥ kilbiṣādasmāt saptajanmāntarādvibho / rantvā cottaradigbhāge devabhūmiṃ manoharām

गङ्गां त्रिपथगां देवीं यमुनां च सरस्वतीम् । गङ्गाद्वारं हिमस्थानं कुब्जाग्रं ब्रह्मयोनिकम्

gaṅgāṃ tripathagāṃ devīṃ yamunāṃ ca sarasvatīm / gaṅgādvāraṃ himasthānaṃ kubjāgraṃ brahmayonikam

उग्रं कनखलञ्चैव केदारं भैरवं तथा । नैमिषं च गयातीर्थं कुरुक्षेत्रं च पुष्करम्

ugraṃ kanakhalañcaiva kedāraṃ bhairavaṃ tathā / naimiṣaṃ ca gayātīrthaṃ kurukṣetraṃ ca puṣkaram

वाराणसीं प्रयागं च गङ्गासागरसङ्गमम् । कालञ्जरं चाप्यतीर्थं प्रभासं शशिभूषणम्

vārāṇasīṃ prayāgaṃ ca gaṅgāsāgarasaṅgamam / kālañjaraṃ cāpyatīrthaṃ prabhāsaṃ śaśibhūṣaṇam

पुण्यान्येतानि चान्यानि त्यक्त्वा क्षेत्राणि सुव्रत । सेव्यते केन कार्व्येण नर्मदैव महानदी

puṇyānyetāni cānyāni tyaktvā kṣetrāṇi suvrata / sevyate kena kārvyeṇa narmadaiva mahānadī

भविष्यभूततत्त्वज्ञ त्रिकालज्ञ त्रिवेदिक । श्रोतुकामा इमे सर्वे कथयस्व प्रसादतः

bhaviṣyabhūtatattvajña trikālajña trivedika / śrotukāmā ime sarve kathayasva prasādataḥ

मार्कण्डेय उवाच: शृणु राजन् महाबाहो ब्राह्मणैर् भ्रातृभिः सह । तत्ते ऽहं कथयिष्यामि पुराणं स्कन्दकीर्तितम्

mārkaṇḍeya uvāca: śṛṇu rājan mahābāho brāhmaṇair bhrātṛbhiḥ saha / tatte 'haṃ kathayiṣyāmi purāṇaṃ skandakīrtitam

स्वायम्भुवे ऽथ मुनय आदिकल्पे कृते युगे । देवानां सङ्गमे तत्र कैलासे च शिवालये

svāyambhuve 'tha munaya ādikalpe kṛte yuge / devānāṃ saṅgame tatra kailāse ca śivālaye

कार्तिक्यां देवदेवेशं हरं द्रष्टुं समाययुः । प्राक् पृष्टं कार्त्तिकेयेन धर्माधर्मनिदर्शनम्

kārtikyāṃ devadeveśaṃ haraṃ draṣṭuṃ samāyayuḥ / prāk pṛṣṭaṃ kārttikeyena dharmādharmanidarśanam

शिवेन कथितं पूर्वं पार्वत्याः षण्मुखस्य च । विष्णुब्रह्मादिदेवानां शृण्वतां यक्षरक्षसाम्

śivena kathitaṃ pūrvaṃ pārvatyāḥ ṣaṇmukhasya ca / viṣṇubrahmādidevānāṃ śṛṇvatāṃ yakṣarakṣasām

अष्टलक्षाणि सार्द्धानि शिवलोके च गीयते । तदर्द्धं वैष्णवे लोके चार्द्धार्द्धं ब्रह्मणः पुरे

aṣṭalakṣāṇi sārddhāni śivaloke ca gīyate / tadarddhaṃ vaiṣṇave loke cārddhārddhaṃ brahmaṇaḥ pure

चतुरशीतिसहस्राणि मर्त्यलोके च गीयते । आराधितः शिवः पूर्वं ब्रह्माद्यैश्च सुरासुरैः

caturaśītisahasrāṇi martyaloke ca gīyate / ārādhitaḥ śivaḥ pūrvaṃ brahmādyaiśca surāsuraiḥ

ततस्तुष्टः सुरेशानो वरं दातुं यथेप्सितम् । देवा ऊचुः: यदि तुष्टो ऽसि देवेश देवानां वरदो भव

tatastuṣṭaḥ sureśāno varaṃ dātuṃ yathepsitam / devā ūcuḥ: yadi tuṣṭo 'si deveśa devānāṃ varado bhava

सप्तद्वीपा वसुमती वसुधा कर्म्मभागिनी । नवमद्वीपपर्य्यन्तं जम्बूद्वीपं प्रचक्षते

saptadvīpā vasumatī vasudhā karmmabhāginī / navamadvīpaparyyantaṃ jambūdvīpaṃ pracakṣate

वापी कूपसहस्राणि नवार्णः सरितो नहि । न सृताश्चापगाः शर्वपितृघोरावतारिणीः

vāpī kūpasahasrāṇi navārṇaḥ sarito nahi / na sṛtāścāpagāḥ śarvapitṛghorāvatāriṇīḥ

तिलोदकप्रदानेन पितॄन् पातुं हि साम्प्रतम् । तारिणी सर्वलोकानाम् अवतारय नर्मदाम्

tilodakapradānena pitṝn pātuṃ hi sāmpratam / tāriṇī sarvalokānām avatāraya narmadām

ईश्वर उवाच: दुष्प्राप्यं त्रिदशैः सर्वैर् अयाच्यं याच्यते सुराः । वेगं शक्नोति कः सोढुं तत्तोयभ्रमणस्य च

īśvara uvāca: duṣprāpyaṃ tridaśaiḥ sarvair ayācyaṃ yācyate surāḥ / vegaṃ śaknoti kaḥ soḍhuṃ tattoyabhramaṇasya ca

तोयं भूतं जगत्सर्वं निपतिष्यज्जवेन तु । याचध्वमन्यां सरितं सुखसाध्यान्तरङ्गिणीम्

toyaṃ bhūtaṃ jagatsarvaṃ nipatiṣyajjavena tu / yācadhvamanyāṃ saritaṃ sukhasādhyāntaraṅgiṇīm

देवा ऊचुः: का ऽन्या तारयितुं शक्ता पुण्या सोढुं सरिद्वरा । मुक्त्वा त्रिनयनेशानीं नर्मदां शोकतारिणीम्

devā ūcuḥ: kā 'nyā tārayituṃ śaktā puṇyā soḍhuṃ saridvarā / muktvā trinayaneśānīṃ narmadāṃ śokatāriṇīm

देवानां वचनं श्रुत्वा समाहूता सरिद्वरा । आगता च ततो देवी सर्वाभरणभूषिता

devānāṃ vacanaṃ śrutvā samāhūtā saridvarā / āgatā ca tato devī sarvābharaṇabhūṣitā

प्रत्यक्षा मकरारूढा देवदेवस्य चाज्ञया । देव मे देहि वक्तव्यं कर्तव्या तु कृपा मयि

pratyakṣā makarārūḍhā devadevasya cājñayā / deva me dehi vaktavyaṃ kartavyā tu kṛpā mayi

निशम्य तद् वचसौम्यं नर्मदायास् त्रिलोचनः । उवाच वचनं श्लक्ष्णं मर्त्यलोके ऽद्य गम्यताम्

niśamya tad vacasaumyaṃ narmadāyās trilocanaḥ / uvāca vacanaṃ ślakṣṇaṃ martyaloke 'dya gamyatām

लोकानां च हितार्थाय मर्त्यानां च विशेषतः । नर्मदोवाच: तवाज्ञां च करिष्ये ऽहं निराधारा कथं विभो

lokānāṃ ca hitārthāya martyānāṃ ca viśeṣataḥ / narmadovāca: tavājñāṃ ca kariṣye 'haṃ nirādhārā kathaṃ vibho

को मां धर्तुं च शक्नोति मही यास्यति विप्लवम् । आदिदेश ततः सर्वान् पर्वतान् परमेश्वरः

ko māṃ dhartuṃ ca śaknoti mahī yāsyati viplavam / ādideśa tataḥ sarvān parvatān parameśvaraḥ

आदिश्यैतांश्च तान् सर्वांस् ततो देवः स्वयं शिवः । पर्वता ऊचुः: न शक्नुमो वयं सर्वे धर्तुं वेगं च नार्मदम्

ādiśyaitāṃśca tān sarvāṃs tato devaḥ svayaṃ śivaḥ / parvatā ūcuḥ: na śaknumo vayaṃ sarve dhartuṃ vegaṃ ca nārmadam

भेदमाप्नोति वै पृथ्वी शतधा यान्ति भूभृतः । ऋक्षवानब्रवीद्देवं देह्याज्ञा त्रिदशेश्वर

bhedamāpnoti vai pṛthvī śatadhā yānti bhūbhṛtaḥ / ṛkṣavānabravīddevaṃ dehyājñā tridaśeśvara

धारयामि च सत्येन त्वत्प्रसादादुमापते । ततो ऽवतारिता देवी जम्बूद्वीपे नराधिप

dhārayāmi ca satyena tvatprasādādumāpate / tato 'vatāritā devī jambūdvīpe narādhipa

दारयित्वा महीं सर्वां सशैलवनकाननाम् । ततो देवगणैर् उक्ता मर्यादां वह सुव्रते

dārayitvā mahīṃ sarvāṃ saśailavanakānanām / tato devagaṇair uktā maryādāṃ vaha suvrate

एकविंशत्सहस्राणि योजनानां प्रमाणतः । सभित्त्वा सप्तपातालान् रसातलतलं ययौ

ekaviṃśatsahasrāṇi yojanānāṃ pramāṇataḥ / sabhittvā saptapātālān rasātalatalaṃ yayau

देवलोकं जगामा ऽथ प्रलये समुपस्थिते । प्रथमा कथिता राजन्नवतारस्य कल्पना

devalokaṃ jagāmā 'tha pralaye samupasthite / prathamā kathitā rājannavatārasya kalpanā

स्वारोचिषे द्वितीये तु आदिकल्पे युगे ऽनघ । न सागरा न सरितो न तीर्थानि न सङ्गमः

svārociṣe dvitīye tu ādikalpe yuge 'nagha / na sāgarā na sarito na tīrthāni na saṅgamaḥ

त्रेतायुगे ऽवतीर्णा तु पुरा भागीरथी सरित् । जह्नुना चुलुकेनैव हृदि मध्ये व्यवस्थिता

tretāyuge 'vatīrṇā tu purā bhāgīrathī sarit / jahnunā culukenaiva hṛdi madhye vyavasthitā

सा कथं सेव्यते राजस्त्यक्त्वा चैव तु कल्पगाम् । अज्ञानतमसाछन्ना विष्णुमायाविमोहिताः

sā kathaṃ sevyate rājastyaktvā caiva tu kalpagām / ajñānatamasāchannā viṣṇumāyāvimohitāḥ

त्यक्त्वा वै नर्मदां राजन् सेवन्ते ऽन्यां नदीं सुराः । यावृशं सूर्यदेवानां मणिरत्नप्रभासु च

tyaktvā vai narmadāṃ rājan sevante 'nyāṃ nadīṃ surāḥ / yāvṛśaṃ sūryadevānāṃ maṇiratnaprabhāsu ca

अन्तरं तादृशं राजन्नर्मदा ऽन्यापगासु च । श्रुत्वाख्यानम् इदं पुण्यं शङ्करस्य प्रभावतः

antaraṃ tādṛśaṃ rājannarmadā 'nyāpagāsu ca / śrutvākhyānam idaṃ puṇyaṃ śaṅkarasya prabhāvataḥ

सेव्यते सप्तगा तत्र पुराणं स्कन्दकीर्तितम् । एतत्ते कथितं राजन् यथादृष्टं यथा श्रुतम्

sevyate saptagā tatra purāṇaṃ skandakīrtitam / etatte kathitaṃ rājan yathādṛṣṭaṃ yathā śrutam

कृतकृत्यः सर्वकामान् ब्राह्मणैर् वेदपारगैः । प्राप्नोषि परमं स्थानं वंशक्षयविवर्जितम्

kṛtakṛtyaḥ sarvakāmān brāhmaṇair vedapāragaiḥ / prāpnoṣi paramaṃ sthānaṃ vaṃśakṣayavivarjitam

श्रुत्वाख्यानम् इदं पुण्यं पवित्रमघनाशनम् । ये शृण्वन्ति सदा नित्यं गोहत्या च प्रणश्यति

śrutvākhyānam idaṃ puṇyaṃ pavitramaghanāśanam / ye śṛṇvanti sadā nityaṃ gohatyā ca praṇaśyati