इति श्रीस्कन्दपुराणे रेवाखण्डे द्वीपेश्वरवर्णनो नामैकसप्ततितमो ऽध्यायः ॥ RKS अध्याय 72 मार्कण्डेय उवाच: नर्मदासङ्गमं पुण्यं सुरसिद्धनिषेवितम् । तत्र स्नात्वा दिवं यान्ति पूजयित्वा महेश्वरम्
iti śrīskandapurāṇe revākhaṇḍe dvīpeśvaravarṇano nāmaikasaptatitamo 'dhyāyaḥ || RKS adhyāya 72 mārkaṇḍeya uvāca: narmadāsaṅgamaṃ puṇyaṃ surasiddhaniṣevitam / tatra snātvā divaṃ yānti pūjayitvā maheśvaram
आगच्छन्ती पुरा लोके नर्मदा भरतर्षभ । स्तुता पूर्वं नमस्कृत्य देवैर् ब्रह्मर्षिभिस् तथा
āgacchantī purā loke narmadā bharatarṣabha / stutā pūrvaṃ namaskṛtya devair brahmarṣibhis tathā
त्वया पवित्रितं पुण्यं मर्त्यलोकं चराचरम् । अपां रूपगता रेवा हरस्य परमा कला
tvayā pavitritaṃ puṇyaṃ martyalokaṃ carācaram / apāṃ rūpagatā revā harasya paramā kalā
उमा कात्यायनी गङ्गा यमुना च सरस्वती । चामुण्डा चर्चिका देवी रेवा त्वं सप्तकल्पगा
umā kātyāyanī gaṅgā yamunā ca sarasvatī / cāmuṇḍā carcikā devī revā tvaṃ saptakalpagā
शिवजा प्रवहा पुण्या मेकलाद्रिसुता स्तुता । यज्ञयूपा च मूर्धा च स्वर्गमोक्षप्रदा तथा
śivajā pravahā puṇyā mekalādrisutā stutā / yajñayūpā ca mūrdhā ca svargamokṣapradā tathā
तारिणी सर्वभूतानां पापघ्नी च तरङ्गिणी । लक्ष्मीः स्वाहा स्वधा चैव पुरुहूता यशस्विनी
tāriṇī sarvabhūtānāṃ pāpaghnī ca taraṅgiṇī / lakṣmīḥ svāhā svadhā caiva puruhūtā yaśasvinī
त्वया व्याप्तं जगत्कृत्स्नम् अपां रूपेण सुव्रते । सङ्गमं सिद्धलिङ्गं च सुरासुरनमस्कृतम्
tvayā vyāptaṃ jagatkṛtsnam apāṃ rūpeṇa suvrate / saṅgamaṃ siddhaliṅgaṃ ca surāsuranamaskṛtam
अत्र दत्तं हुतं सर्वम् एतद् भवति चाक्षयम् । अत्यद्भुतं महाराज नर्मदास्नानम् अर्चनम्
atra dattaṃ hutaṃ sarvam etad bhavati cākṣayam / atyadbhutaṃ mahārāja narmadāsnānam arcanam
अनेकानि सहस्राणि विमानानि युधिष्ठिर । नानारत्नप्रभाजालैः सूर्यकोटिसमानि च
anekāni sahasrāṇi vimānāni yudhiṣṭhira / nānāratnaprabhājālaiḥ sūryakoṭisamāni ca
गतानि धर्मराजस्य पुरीं वीणादिनिः स्वनैः । नादयन्ति दिवं भूमिं वेदनिर्घोषणादिभिः
gatāni dharmarājasya purīṃ vīṇādiniḥ svanaiḥ / nādayanti divaṃ bhūmiṃ vedanirghoṣaṇādibhiḥ
एकस्मिन् समये दृष्ट्वाश्चर्यं वैवस्वतो नृपः । अत्रिश् चैव वशिष्ठश् च पुलस्त्यः पुलहः क्रतुः
ekasmin samaye dṛṣṭvāścaryaṃ vaivasvato nṛpaḥ / atriś caiva vaśiṣṭhaś ca pulastyaḥ pulahaḥ kratuḥ
इत्याद्याः सप्त मुनयो धर्माधर्मविचारकाः । शिवेन स्थापिताः पूर्वं हरिणा ब्रह्मणा तथा
ityādyāḥ sapta munayo dharmādharmavicārakāḥ / śivena sthāpitāḥ pūrvaṃ hariṇā brahmaṇā tathā
युधिष्ठिर उवाच: अक्षीणकर्मबन्धुस् तु पुरुषो मुनिसत्तम । परं पदम् अवाप्नोति तन् मे कथय कल्पग
yudhiṣṭhira uvāca: akṣīṇakarmabandhus tu puruṣo munisattama / paraṃ padam avāpnoti tan me kathaya kalpaga
मार्कण्डेय उवाच: विष्णुना कथितं पूर्वं ब्रह्मणे च महात्मने । प्रपद्ये पुण्डरीकाक्षं देवं नारायणं हरिम्
mārkaṇḍeya uvāca: viṣṇunā kathitaṃ pūrvaṃ brahmaṇe ca mahātmane / prapadye puṇḍarīkākṣaṃ devaṃ nārāyaṇaṃ harim
लोकनाथं सहस्राक्षम् अक्षरं परमं पदम् । भगवन्तं प्रपद्ये ऽहं भूतभव्यभवत्प्रभुम्
lokanāthaṃ sahasrākṣam akṣaraṃ paramaṃ padam / bhagavantaṃ prapadye 'haṃ bhūtabhavyabhavatprabhum
स्रष्टारं सर्वभूतानाम् अनन्तबलपौरुषम् । पद्मनाभं हृषीकेशं प्रपद्ये सत्यम् अव्ययम्
sraṣṭāraṃ sarvabhūtānām anantabalapauruṣam / padmanābhaṃ hṛṣīkeśaṃ prapadye satyam avyayam
हिरण्यगर्भं भूगर्भम् अमृतं विश्वतोमुखम् । अनश्वरमनाथं च प्रपद्ये भास्करद्युतिम्
hiraṇyagarbhaṃ bhūgarbham amṛtaṃ viśvatomukham / anaśvaramanāthaṃ ca prapadye bhāskaradyutim
सहस्रशिरसं देवं वैकुण्ठं तार्क्ष्यवाहनम् । प्रपद्ये सूक्ष्मम् अचलं वरेण्यम् अभयप्रदम्
sahasraśirasaṃ devaṃ vaikuṇṭhaṃ tārkṣyavāhanam / prapadye sūkṣmam acalaṃ vareṇyam abhayapradam
नारायणं हरिं चैव योगात्मानं सनातनम् । शरण्यं सर्वलोकानां प्रपद्ये ध्रुवमीश्वरम्
nārāyaṇaṃ hariṃ caiva yogātmānaṃ sanātanam / śaraṇyaṃ sarvalokānāṃ prapadye dhruvamīśvaram
यः प्रभुः सर्वभूतानां येन सर्वम् इदं ततम् । यः संहारकरो देवः स मे विष्णुः प्रसीदतु
yaḥ prabhuḥ sarvabhūtānāṃ yena sarvam idaṃ tatam / yaḥ saṃhārakaro devaḥ sa me viṣṇuḥ prasīdatu
यस्माज् जातः पुरा ब्रह्मा पद्मयोनिः प्रजापतिः । प्रसीदतु स मे विष्णुः पितामहपरः प्रभुः
yasmāj jātaḥ purā brahmā padmayoniḥ prajāpatiḥ / prasīdatu sa me viṣṇuḥ pitāmahaparaḥ prabhuḥ
पुरा लये तु संप्राप्ते नष्टे लोके चराचरे । एकस् तिष्ठति योगात्मा स मे विष्णुः प्रसीदतु
purā laye tu saṃprāpte naṣṭe loke carācare / ekas tiṣṭhati yogātmā sa me viṣṇuḥ prasīdatu
जयेद् यः पृथिवीं सत्यं कालो धर्मः क्रियाफलम् । गणाकारः स तां वाचो वासुदेवः प्रसीदतु
jayed yaḥ pṛthivīṃ satyaṃ kālo dharmaḥ kriyāphalam / gaṇākāraḥ sa tāṃ vāco vāsudevaḥ prasīdatu
योगावास नमस्तुभ्यं सर्वावास वरप्रद । यज्ञभोगिन् पञ्चभोगिन् नारायण नमो ऽस्तु ते
yogāvāsa namastubhyaṃ sarvāvāsa varaprada / yajñabhogin pañcabhogin nārāyaṇa namo 'stu te
चतुर्मूर्ते जगद्धाम लक्ष्मीवास वरप्रद । विश्वावास नमस्ते ऽस्तु साक्षीभूत जगत्पते
caturmūrte jagaddhāma lakṣmīvāsa varaprada / viśvāvāsa namaste 'stu sākṣībhūta jagatpate
अजेयः षड्विभागैकविश्वमूर्तिर् वृषाकपिः । मृगाधिपश् च कालश् च नमस् ते ज्ञानसागर
ajeyaḥ ṣaḍvibhāgaikaviśvamūrtir vṛṣākapiḥ / mṛgādhipaś ca kālaś ca namas te jñānasāgara
अव्यक्तादण्डम् उत्पन्नम् अव्यक्ताद् अपरः प्रभुः । यस्मात् परतरं नास्ति तम् अस्मि शरणं गतः
avyaktādaṇḍam utpannam avyaktād aparaḥ prabhuḥ / yasmāt parataraṃ nāsti tam asmi śaraṇaṃ gataḥ
चिन्तयन्तो हि यं नित्यं ब्रह्मेशानादयः प्रभुम् । एकांशेन जगत्सर्वं यो विष्टभ्य विभुः स्थितः
cintayanto hi yaṃ nityaṃ brahmeśānādayaḥ prabhum / ekāṃśena jagatsarvaṃ yo viṣṭabhya vibhuḥ sthitaḥ
अग्राह्यो निर्गुणः शास्ता तम् अस्मि शरणं गतः । दिवाकरस्य सोमस्य मध्ये ज्योतिर् इव स्थितम्
agrāhyo nirguṇaḥ śāstā tam asmi śaraṇaṃ gataḥ / divākarasya somasya madhye jyotir iva sthitam
क्षेत्रज्ञ इति यं प्राहुः स महात्मा प्रसीदतु । सांख्ययोगेन ये चान्ये सिद्धाश् चैव महर्षयः
kṣetrajña iti yaṃ prāhuḥ sa mahātmā prasīdatu / sāṃkhyayogena ye cānye siddhāś caiva maharṣayaḥ
यं विदित्वा विमुच्यन्ते स महात्मा प्रसीदतु । नमस्ते सर्वतोभद्र सर्वतो ऽक्षिशिरोमुख
yaṃ viditvā vimucyante sa mahātmā prasīdatu / namaste sarvatobhadra sarvato 'kṣiśiromukha
निर्विकार नमस्ते ऽस्तु आदिकल्प हृदि स्थित । अतीन्द्रिय नमस्तुभ्यं परमात्मन् नमो ऽस्तु ते
nirvikāra namaste 'stu ādikalpa hṛdi sthita / atīndriya namastubhyaṃ paramātman namo 'stu te
ये च त्वाम् अभिजानन्ति संसारे न वसन्ति ते । रागद्वेषविनिर्मुक्ता लोभमोहविवार्जिताः
ye ca tvām abhijānanti saṃsāre na vasanti te / rāgadveṣavinirmuktā lobhamohavivārjitāḥ
अशरीरः सुगुप्तः सन् सर्वदेहेषु तन् मयः । अव्यक्तबुद्ध्य् अहंकारमहाभूतेन्द्रियाणि च
aśarīraḥ suguptaḥ san sarvadeheṣu tan mayaḥ / avyaktabuddhy ahaṃkāramahābhūtendriyāṇi ca
त्वयि तानि न तेषु त्वं ते च तानि न तु स्वयम् । अव्यक्तो नातिकूटस्थो गुणानां प्रभुरीश्वरः
tvayi tāni na teṣu tvaṃ te ca tāni na tu svayam / avyakto nātikūṭastho guṇānāṃ prabhurīśvaraḥ
आवर्तो हेतुर् अहितः प्रभुः स्वात्मव्यवस्थितः । नमस्ते पुण्डरीकाक्ष वासुदेव नमो ऽस्तु ते
āvarto hetur ahitaḥ prabhuḥ svātmavyavasthitaḥ / namaste puṇḍarīkākṣa vāsudeva namo 'stu te
ईश्वरो ऽसि जगन्नाथ किम् अतः परमुच्यते । भक्तानां मुक्तिदस् त्वं च गुरुश् च त्रिदशेश्वरः
īśvaro 'si jagannātha kim ataḥ paramucyate / bhaktānāṃ muktidas tvaṃ ca guruś ca tridaśeśvaraḥ
समे भूतपतिस् त्वं हि प्रभुर् जन्मनि जन्मनि । अहंकारेण बद्धो वा तथा सत्त्वादिभिर् गणैः
same bhūtapatis tvaṃ hi prabhur janmani janmani / ahaṃkāreṇa baddho vā tathā sattvādibhir gaṇaiḥ
पृथिवीं यातु मे घ्राणं यातु मे रसनाजलम् । चक्षुर्हुताशनं यातु स्पर्शो मे यातु मारुतम्
pṛthivīṃ yātu me ghrāṇaṃ yātu me rasanājalam / cakṣurhutāśanaṃ yātu sparśo me yātu mārutam
शब्दश् चाकाशम् आयातु मनो वै कारणं तथा । अहंकारश् च मे बुद्धिं त्वयि बुद्धिर् ममास्त्व् इति
śabdaś cākāśam āyātu mano vai kāraṇaṃ tathā / ahaṃkāraś ca me buddhiṃ tvayi buddhir mamāstv iti
वियोगः सर्वकरणैर् गुणैर् भूतैस् तथा ऽस्तु मे । सत्त्वं रजस्तमश् चैव प्रकृतिं स्वां विशन्तु मे
viyogaḥ sarvakaraṇair guṇair bhūtais tathā 'stu me / sattvaṃ rajastamaś caiva prakṛtiṃ svāṃ viśantu me
प्रभोः प्रभुमनवद्यं प्रपद्ये ऽहं नरः प्रभुम् । सहस्रशिरसं देवं महर्षिं भूतभावनम्
prabhoḥ prabhumanavadyaṃ prapadye 'haṃ naraḥ prabhum / sahasraśirasaṃ devaṃ maharṣiṃ bhūtabhāvanam
ब्रह्मयोनिश् च विश्वस्य स मे विष्णुः प्रसीदतु । ब्रह्मपत्न्यां प्रलीयन्ते नष्टे स्थावरजङ्गमे
brahmayoniś ca viśvasya sa me viṣṇuḥ prasīdatu / brahmapatnyāṃ pralīyante naṣṭe sthāvarajaṅgame
आहूतसंप्लवे चैव लीयते प्रकृतौ महत् । हूयते च पुनस् ताभ्यां स मे विष्णुः प्रसीदतु
āhūtasaṃplave caiva līyate prakṛtau mahat / hūyate ca punas tābhyāṃ sa me viṣṇuḥ prasīdatu
अग्निसोमार्कदेवानां ब्रह्मरुद्रेन्द्रयोगिनाम् । यस्ते जयति तेजांसि स मे विष्णुः प्रसीदतु
agnisomārkadevānāṃ brahmarudrendrayoginām / yaste jayati tejāṃsi sa me viṣṇuḥ prasīdatu
अजस्त्वं जगतः पन्था अमूर्तिर्वीश्वमूर्तिजित् । नवं प्रधानं च महान् पुरुषश् चेतनो ऽलसः
ajastvaṃ jagataḥ panthā amūrtirvīśvamūrtijit / navaṃ pradhānaṃ ca mahān puruṣaś cetano 'lasaḥ
अगोप्यो यः परतरस् तम् एव शरणं गतः । सोमसूर्योपमस् तेजो यो ऽवतारयति स्वयम्
agopyo yaḥ parataras tam eva śaraṇaṃ gataḥ / somasūryopamas tejo yo 'vatārayati svayam
विजायन्ते दिशो यस्मात् स महात्मा प्रसीदतु । गुणवान् निर्गुणश् चैव चेतनो ऽचेतनो स्वगः
vijāyante diśo yasmāt sa mahātmā prasīdatu / guṇavān nirguṇaś caiva cetano 'cetano svagaḥ
सूक्ष्मः सर्वगतो देहः स महात्मा प्रसीदतु । सूर्यमध्ये स्थितः सोमस् तस्य मध्ये तु संस्मृतः
sūkṣmaḥ sarvagato dehaḥ sa mahātmā prasīdatu / sūryamadhye sthitaḥ somas tasya madhye tu saṃsmṛtaḥ
भूतत्वाद् यो ऽचलो दीप्तः स महात्मा प्रसीदतु । एकत्वात् तव नानात्वं ये विदुर्यान्ति ते परम्
bhūtatvād yo 'calo dīptaḥ sa mahātmā prasīdatu / ekatvāt tava nānātvaṃ ye viduryānti te param
समः सर्वेषु भूतेषु प्रद्वेष्यात्मजनप्रियः । समं भजत्य् अनाकाङ्क्षी भजते नान्यचेतसः
samaḥ sarveṣu bhūteṣu pradveṣyātmajanapriyaḥ / samaṃ bhajaty anākāṅkṣī bhajate nānyacetasaḥ
यो ऽयं सर्वात्मना ज्ञेयः स मे विष्णुः प्रसीदतु । चराचरम् इदं सर्वं भूतग्रामं चतुर्विधम्
yo 'yaṃ sarvātmanā jñeyaḥ sa me viṣṇuḥ prasīdatu / carācaram idaṃ sarvaṃ bhūtagrāmaṃ caturvidham
त्वयि तं तन्तुवत् प्रोतं सूत्रे मणिगणा इव । न ते धर्मो ह्य् अधर्मो ऽस्ति न गर्भो जन्म वा पुनः
tvayi taṃ tantuvat protaṃ sūtre maṇigaṇā iva / na te dharmo hy adharmo 'sti na garbho janma vā punaḥ
जराजन्मविमोक्षार्थं तम् एव शरणं गतः । इन्द्रियाणि गुणश् चैव श्वासोच्छ्वासश् च योनिषु
jarājanmavimokṣārthaṃ tam eva śaraṇaṃ gataḥ / indriyāṇi guṇaś caiva śvāsocchvāsaś ca yoniṣu
केवलं दारुवद् देहं नश्यं यत् परमापदम् । स्वयम् एकाकिभावो मे जन्मतो ऽत्र पुनर्भवः
kevalaṃ dāruvad dehaṃ naśyaṃ yat paramāpadam / svayam ekākibhāvo me janmato 'tra punarbhavaḥ
त्वद् बुद्धिस् त्वद् गतप्राणा त्वद् भक्तस् त्वत् परायणः । त्वाम् एवाहं स्मरिष्यामि मरणे पर्युपस्थिते
tvad buddhis tvad gataprāṇā tvad bhaktas tvat parāyaṇaḥ / tvām evāhaṃ smariṣyāmi maraṇe paryupasthite
पूर्वदेहे कृता ये तु व्याधयः प्रविशन्तु माम् । वातादयश् च दुःखानि ऋणं तन् मुञ्चतात् प्रभो
pūrvadehe kṛtā ye tu vyādhayaḥ praviśantu mām / vātādayaś ca duḥkhāni ṛṇaṃ tan muñcatāt prabho
श्रेयसां च परं श्रेयस् त्व् अन्येषां च यशस्विनाम् । सर्वपापविशुद्ध्यर्थं पुण्यं यत्परमं पदम्
śreyasāṃ ca paraṃ śreyas tv anyeṣāṃ ca yaśasvinām / sarvapāpaviśuddhyarthaṃ puṇyaṃ yatparamaṃ padam
प्रातर् उत्थाय सततं मध्याह्ने च दिनक्षये । अजस्रं च तथा जप्यं सर्वपापोपशान्तिदम्
prātar utthāya satataṃ madhyāhne ca dinakṣaye / ajasraṃ ca tathā japyaṃ sarvapāpopaśāntidam
हरिं कृष्णं हृषीकेशं वासुदेवं जनार्दनम् । प्रणतो ऽस्मि जगन्नाथं स मे पापं व्यपोहतु
hariṃ kṛṣṇaṃ hṛṣīkeśaṃ vāsudevaṃ janārdanam / praṇato 'smi jagannāthaṃ sa me pāpaṃ vyapohatu
गोवर्धनधरं देवं गोब्राह्मणहिते रतम् । प्रणतो ऽस्मि गदापाणिं स मे पापं व्यपोहतु
govardhanadharaṃ devaṃ gobrāhmaṇahite ratam / praṇato 'smi gadāpāṇiṃ sa me pāpaṃ vyapohatu
शङ्खिनं चक्रिणं विष्णुं शार्ङ्गिणं मधुसूदनम् । प्रणतो ऽस्मि पतिं लक्ष्म्याः स मे पापं व्यपोहतु
śaṅkhinaṃ cakriṇaṃ viṣṇuṃ śārṅgiṇaṃ madhusūdanam / praṇato 'smi patiṃ lakṣmyāḥ sa me pāpaṃ vyapohatu
दामोदरं मुदा युक्तं पुण्डरीकाक्षम् अव्ययम् । प्रणतो ऽस्मि स्थितं स्थित्यै स मे पापं व्यपोहतु
dāmodaraṃ mudā yuktaṃ puṇḍarīkākṣam avyayam / praṇato 'smi sthitaṃ sthityai sa me pāpaṃ vyapohatu
नारायणं नरं सौम्यं माधवं च जनार्दनम् । श्रीवत्सं श्रीवपुः श्रीमच् छ्रीधरं श्रीनिकेतनम्
nārāyaṇaṃ naraṃ saumyaṃ mādhavaṃ ca janārdanam / śrīvatsaṃ śrīvapuḥ śrīmac chrīdharaṃ śrīniketanam
प्रणतो ऽस्मि श्रियः कान्तं स मे पापं व्यपोहतु । यम् ईशं सर्वभूतानां ध्यायन्ति च तमक्षरम्
praṇato 'smi śriyaḥ kāntaṃ sa me pāpaṃ vyapohatu / yam īśaṃ sarvabhūtānāṃ dhyāyanti ca tamakṣaram
वासुदेवमनिर्देश्यं तम् अस्मि शरणं गतः । सर्वबन्धविनिर्मुक्तो यं प्रविश्य पुनर्भवम्
vāsudevamanirdeśyaṃ tam asmi śaraṇaṃ gataḥ / sarvabandhavinirmukto yaṃ praviśya punarbhavam
पुरुषो नैव प्राप्नोति तम् अस्मि शरणं गतः । कृत्वा ब्रह्मवपुः सर्वं सदेवासुरमानुषम्
puruṣo naiva prāpnoti tam asmi śaraṇaṃ gataḥ / kṛtvā brahmavapuḥ sarvaṃ sadevāsuramānuṣam
यः करोति पुनः सृष्टिं तम् अस्मि शरणं गतः । ब्रह्मरूपधरं देवं योनिरूपं जनार्दनम्
yaḥ karoti punaḥ sṛṣṭiṃ tam asmi śaraṇaṃ gataḥ / brahmarūpadharaṃ devaṃ yonirūpaṃ janārdanam
सृष्टित्वे संस्थितं नित्यं प्रणतो ऽस्मि जनार्दनम् । यस्मान् नान्यत् परं किंचिद् यस्मिन् सर्वम् इदं जगत्
sṛṣṭitve saṃsthitaṃ nityaṃ praṇato 'smi janārdanam / yasmān nānyat paraṃ kiṃcid yasmin sarvam idaṃ jagat
यः सर्वमध्यगो ऽनन्तः सर्वगं तं नमाम्य् अहम् । यो ऽस्ति भूतेषु सर्वेषु स्थावरे जङ्गमेषु च
yaḥ sarvamadhyago 'nantaḥ sarvagaṃ taṃ namāmy aham / yo 'sti bhūteṣu sarveṣu sthāvare jaṅgameṣu ca
विष्णुर् एव स वै पापं ममाशेषं प्रणश्यतु । न वृत्तं निर्वृतं कर्म विष्णोर् यत्कर्म वा कृतम्
viṣṇur eva sa vai pāpaṃ mamāśeṣaṃ praṇaśyatu / na vṛttaṃ nirvṛtaṃ karma viṣṇor yatkarma vā kṛtam
अनेकजन्मकर्मोत्थं पापं नश्यति मे तथा । निशायां च तथा प्रातर् मध्याह्णे चापराह्णयोः
anekajanmakarmotthaṃ pāpaṃ naśyati me tathā / niśāyāṃ ca tathā prātar madhyāhṇe cāparāhṇayoḥ
अज्ञानाच् च कृतं पापं कर्मणा मनसा गिरा । यत्कृतं चाशुभं किंचित् तत्सर्वं नश्यतु क्षणात्
ajñānāc ca kṛtaṃ pāpaṃ karmaṇā manasā girā / yatkṛtaṃ cāśubhaṃ kiṃcit tatsarvaṃ naśyatu kṣaṇāt
तत्सर्वं विलयं यातु तोयेषु लवणं यथा । परपीडां च निन्दां च कुर्वतो जन्म नार्जितम्
tatsarvaṃ vilayaṃ yātu toyeṣu lavaṇaṃ yathā / parapīḍāṃ ca nindāṃ ca kurvato janma nārjitam
परद्रव्यपरक्षेत्रवाञ्छा क्रोधोद्भवं च यत् । तत्सर्वं विलयं यातु तोयेषु लवणं यथा
paradravyaparakṣetravāñchā krodhodbhavaṃ ca yat / tatsarvaṃ vilayaṃ yātu toyeṣu lavaṇaṃ yathā
विष्णवे वासुदेवाय हरये केशवाय च । जनार्दनाय कृष्णाय नमो भूयो नमो नमः
viṣṇave vāsudevāya haraye keśavāya ca / janārdanāya kṛṣṇāya namo bhūyo namo namaḥ
नाभागो नाम राजर्षिर् नर्मदातीरसङ्गमे । चकार स्तोत्रम् अतुलं वैष्णवं तु प्रजापतिः
nābhāgo nāma rājarṣir narmadātīrasaṅgame / cakāra stotram atulaṃ vaiṣṇavaṃ tu prajāpatiḥ
ब्रह्मणो ऽङ्गिरसा प्राप्तं तस्माद् इन्द्रेण भारत । वशिष्ठः श्रावयामास नाभागं राजसत्तमम्
brahmaṇo 'ṅgirasā prāptaṃ tasmād indreṇa bhārata / vaśiṣṭhaḥ śrāvayāmāsa nābhāgaṃ rājasattamam
स्नात्वा च नर्मदातोये दत्त्वा दानान्य् अनेकशः । कामिकं यानमारुह्य नाभागः स्वपुरीं ययौ
snātvā ca narmadātoye dattvā dānāny anekaśaḥ / kāmikaṃ yānamāruhya nābhāgaḥ svapurīṃ yayau
स्तौति नामसहस्रेण यः स्तवेन जनार्दनम् । न तस्य पुनरावृत्तिर्घोरे संसारसागरे
stauti nāmasahasreṇa yaḥ stavena janārdanam / na tasya punarāvṛttirghore saṃsārasāgare