Chapter 137

॥ इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे अहल्यातीर्थमाहात्म्यवर्णनं नाम षट्त्रिंशदधिकशततमो ऽध्यायः ॥ RKV अध्याय 137 मार्कण्डेय उवाच: धर्मपुत्र ततो गच्छेत् कर्कटेश्वरमुत्तमम् । उत्तरे नर्मदाकूले सर्वपापक्षयंकरम्

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ahalyātīrthamāhātmyavarṇanaṃ nāma ṣaṭtriṃśadadhikaśatatamo 'dhyāyaḥ || RKV adhyāya 137 mārkaṇḍeya uvāca: dharmaputra tato gacchet karkaṭeśvaramuttamam / uttare narmadākūle sarvapāpakṣayaṃkaram

तत्र स्नात्वा विधानेन यस्तु पूजयते शिवम् । अनिवर्तिका गतिस्तस्य रुद्रलोकाद् असंशयम्

tatra snātvā vidhānena yastu pūjayate śivam / anivartikā gatistasya rudralokād asaṃśayam

तस्य तीर्थस्य माहात्म्यं पुराणे यच्छ्रुतं मया । न तद्वर्णयितुं शक्यं संक्षेपेण वदाम्यतः

tasya tīrthasya māhātmyaṃ purāṇe yacchrutaṃ mayā / na tadvarṇayituṃ śakyaṃ saṃkṣepeṇa vadāmyataḥ

तत्र तीर्थे तु यः कुर्यात्किंचित्कर्म शुभाशुभम् । हर्षान् मदान् महाराज तत्सर्वं जायते ऽक्षयम्

tatra tīrthe tu yaḥ kuryātkiṃcitkarma śubhāśubham / harṣān madān mahārāja tatsarvaṃ jāyate 'kṣayam

तत्र तीर्थे तपस्तप्त्वा वालखिल्या मरीचयः । रमन्ते ऽद्यापि लोकेषु स्वेच्छया कुरुनन्दन

tatra tīrthe tapastaptvā vālakhilyā marīcayaḥ / ramante 'dyāpi lokeṣu svecchayā kurunandana

तत्रस्थास्तन्न जानन्ति नराज्ञानबहिष्कृताः । शरीरस्थम् इवात्मानम् अक्षयं ज्योतिख्ययम्

tatrasthāstanna jānanti narājñānabahiṣkṛtāḥ / śarīrastham ivātmānam akṣayaṃ jyotikhyayam

तत्र तीर्थे नृपश्रेष्ठ देवी नारायणी पुरा । अद्यापि तपते घोरं तपो यावत्किलार्बुदम्

tatra tīrthe nṛpaśreṣṭha devī nārāyaṇī purā / adyāpi tapate ghoraṃ tapo yāvatkilārbudam

तत्र तीर्थे तु यः स्नात्वा तर्पयेत् पितृदेवताः । तस्य ते द्वादशाब्दानि तृप्तिं यान्ति पितामहाः

tatra tīrthe tu yaḥ snātvā tarpayet pitṛdevatāḥ / tasya te dvādaśābdāni tṛptiṃ yānti pitāmahāḥ