Chapter 207

॥ इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे दशकन्यातीर्थमाहात्म्यवर्णनं नाम षडुत्तरद्विशततमो ऽध्यायः ॥ RKV अध्याय 207 श्रीमार्कण्डेय उवाच: तस्याग्रे पावनं तीर्थं स्वर्णबिन्द्विति विश्रुतम् । यत्र स्नात्वा दिवं यान्ति मृताश्च न पुनर्भवम्

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe daśakanyātīrthamāhātmyavarṇanaṃ nāma ṣaḍuttaradviśatatamo 'dhyāyaḥ || RKV adhyāya 207 śrīmārkaṇḍeya uvāca: tasyāgre pāvanaṃ tīrthaṃ svarṇabindviti viśrutam / yatra snātvā divaṃ yānti mṛtāśca na punarbhavam

तत्र तीर्थे तु यः स्नात्वा दत्ते विप्राय काञ्चनम् । तेन यत्तु फलं प्रोक्तं तच्छृणुष्व महीपते

tatra tīrthe tu yaḥ snātvā datte viprāya kāñcanam / tena yattu phalaṃ proktaṃ tacchṛṇuṣva mahīpate

सर्वेषाम् एव रत्नानां काञ्चनं रत्नमुत्तमम् । अग्नितेजःसमुद्भूतं तेन तत्परमं भुवि

sarveṣām eva ratnānāṃ kāñcanaṃ ratnamuttamam / agnitejaḥsamudbhūtaṃ tena tatparamaṃ bhuvi

तेनैव दत्ता पृथिवी सशैलवनकानना । सपत्तनपुरा सर्वा काञ्चनं यः प्रयच्छति

tenaiva dattā pṛthivī saśailavanakānanā / sapattanapurā sarvā kāñcanaṃ yaḥ prayacchati

मानसं वाचिकं पापं कर्मणा यत्पुरा कृतम् । तत्सर्वं नश्यति क्षिप्रं स्वर्णदानेन भारत

mānasaṃ vācikaṃ pāpaṃ karmaṇā yatpurā kṛtam / tatsarvaṃ naśyati kṣipraṃ svarṇadānena bhārata

स्वर्णदानं तु यो दत्त्वा ह्यपि वालाग्रमात्रकम् । तत्र तीर्थे मृतो याति दिवं नास्त्यत्र संशयः

svarṇadānaṃ tu yo dattvā hyapi vālāgramātrakam / tatra tīrthe mṛto yāti divaṃ nāstyatra saṃśayaḥ

तत्र विद्याधरैः सिद्धैर् विमानवरमास्थितः । पूज्यमानो वसेत्तावद्यावदाभूतसम्प्लवम्

tatra vidyādharaiḥ siddhair vimānavaramāsthitaḥ / pūjyamāno vasettāvadyāvadābhūtasamplavam

पूर्णे तत्र ततः काले प्राप्य मानुष्यमुत्तमम् । सुवर्णकोटिसहिते गृहे वै जायते द्विजः

pūrṇe tatra tataḥ kāle prāpya mānuṣyamuttamam / suvarṇakoṭisahite gṛhe vai jāyate dvijaḥ

सर्वव्याधिविनिर्मुक्तः सर्वलोकेषु पूजितः । जीवेद्वर्षशतं साग्रं राजसं सत्सु विश्रुतः

sarvavyādhivinirmuktaḥ sarvalokeṣu pūjitaḥ / jīvedvarṣaśataṃ sāgraṃ rājasaṃ satsu viśrutaḥ