Aṃśa 4 · Chapter 23

मागधानां बार्हद्रथानां भविष्याणाम् अनुक्रमं कथयामि । अत्र हि वंशे महाबला जरासंधप्रधाना बभूवुः ॥

māgadhānāṃ bārhadrathānāṃ bhaviṣyāṇām anukramaṃ kathayāmi | atra hi vaṃśe mahābalā jarāsaṃdhapradhānā babhūvuḥ ||

जरासंधसुतात् सहदेवात् सोमापिस् तस्माच् छृतवांस् तस्याप्य् अयुतायुस् ततश् च निरमित्रस् तत्तनयः सुक्षत्रस् तस्माद् अपि बृहत्कर्मा । ततश् च सेनजित् तस्माच् च श्रुतंजयस् ततो विप्रस् तस्य पुत्रः शुचिनामा भविष्यति । तस्यापि क्षेम्यस् ततश् च सुव्रतः सुव्रताद् धर्मस् ततः सुश्रमः । ततो दृढसेनस् ततः सुमतिस् तस्मात् सुबलस् तस्य सुनीतो भविता । ततः सत्यजित् सत्यजितो विश्वजित् तस्यापि रिपुंजयः पुत्रः । इत्य् एते बार्हद्रथा भूपतयो वर्षसहस्रम् एकं भविष्यन्तीति ॥

jarāsaṃdhasutāt sahadevāt somāpis tasmāc chṛtavāṃs tasyāpy ayutāyus tataś ca niramitras tattanayaḥ sukṣatras tasmād api bṛhatkarmā | tataś ca senajit tasmāc ca śrutaṃjayas tato vipras tasya putraḥ śucināmā bhaviṣyati | tasyāpi kṣemyas tataś ca suvrataḥ suvratād dharmas tataḥ suśramaḥ | tato dṛḍhasenas tataḥ sumatis tasmāt subalas tasya sunīto bhavitā | tataḥ satyajit satyajito viśvajit tasyāpi ripuṃjayaḥ putraḥ | ity ete bārhadrathā bhūpatayo varṣasahasram ekaṃ bhaviṣyantīti ||

[[इति श्रीविष्णुपुराणे चतुर्थे ऽंशे त्रयोविंशो ऽध्यायः ]]

[[iti śrīviṣṇupurāṇe caturthe 'ṃśe trayoviṃśo 'dhyāyaḥ ]]