अथ शततमो ऽध्यायः
atha śatatamo 'dhyāyaḥ
द्वारप्रतिष्ठाकथनं
dvārapratiṣṭhākathanaṃ
ईश्वर उवाच
īśvara uvāca
द्वाराश्रितप्रतिष्ठाया वक्ष्यामि विधिमप्यथ
dvārāśritapratiṣṭhāyā vakṣyāmi vidhimapyatha
द्वाराङ्गानि कषायाद्यैः संस्कृत्य शयने न्यसेत्
dvārāṅgāni kaṣāyādyaiḥ saṃskṛtya śayane nyaset
मूलमध्याग्रभागेषु त्रयमात्मादिसेश्वरं
mūlamadhyāgrabhāgeṣu trayamātmādiseśvaraṃ
विन्यस्य सन्निवेश्याथ हुत्वा जप्त्वात्र रूपतः
vinyasya sanniveśyātha hutvā japtvātra rūpataḥ
द्वारादथो यजेद्वास्तुन्तत्रैवानन्तमन्त्रितः
dvārādatho yajedvāstuntatraivānantamantritaḥ
रत्नादिपञ्चकं न्यस्य शान्तिहोमं विधाय च
ratnādipañcakaṃ nyasya śāntihomaṃ vidhāya ca
यवसिद्धार्थकाक्रान्ता ऋद्धिवृद्धिमहातिलाः
yavasiddhārthakākrāntā ṛddhivṛddhimahātilāḥ
गोमृत्सर्षपरागेन्द्रमोहनीलक्षणामृताः
gomṛtsarṣaparāgendramohanīlakṣaṇāmṛtāḥ
रोचना रुग् वचो दूर्वा प्रासादधश् च पोटलीं
rocanā rug vaco dūrvā prāsādadhaś ca poṭalīṃ
प्रकृत्योदुम्बरे बद्ध्वा रक्षार्थं प्रणवेन तु
prakṛtyodumbare baddhvā rakṣārthaṃ praṇavena tu
द्वारमुत्तरतः किञ्चिदाश्रितं सन्निवेशयेत्
dvāramuttarataḥ kiñcidāśritaṃ sanniveśayet
आत्मतत्त्वमधो न्यस्य विद्यातत्त्वञ्च शाखयोः
ātmatattvamadho nyasya vidyātattvañca śākhayoḥ
शिवमकाशदेशे च व्यापकं सर्वमङ्गले
śivamakāśadeśe ca vyāpakaṃ sarvamaṅgale
ततो महेशनाथं च विन्यसेन्मूलमन्त्रतः
tato maheśanāthaṃ ca vinyasenmūlamantrataḥ
द्वाराश्रितांश् च तल्पादीन् कृतयुक्तैः स्वनामभिः
dvārāśritāṃś ca talpādīn kṛtayuktaiḥ svanāmabhiḥ
जुहुयाच्छतमर्धं वा द्विगुणं शक्तितोथवा
juhuyācchatamardhaṃ vā dviguṇaṃ śaktitothavā
न्यूनादिदोषमोषार्थं हेतितो जुहुयाच्च्छतं
nyūnādidoṣamoṣārthaṃ hetito juhuyāccchataṃ
दिग्बलिम्पूर्ववद्धुत्वा प्रदद्याद्दक्षिणादिकं
digbalimpūrvavaddhutvā pradadyāddakṣiṇādikaṃ
इत्य् आग्नेये महापुराणे द्वारप्रतिष्ठा नाम शततमो ऽध्यायः ॥
ity āgneye mahāpurāṇe dvārapratiṣṭhā nāma śatatamo 'dhyāyaḥ ||