Chapter 128

कोटचक्रं प्रवक्ष्यामि चतुरस्रं पुरं लिखेत्

koṭacakraṃ pravakṣyāmi caturasraṃ puraṃ likhet

चतुरस्रं पुनर्मध्ये तन्मध्ये चतुरस्रकम्

caturasraṃ punarmadhye tanmadhye caturasrakam

नाडीत्रितयचिह्नाढ्यं मेषाद्याः पूर्वदिङ्मुखाः

nāḍītritayacihnāḍhyaṃ meṣādyāḥ pūrvadiṅmukhāḥ

कृत्तिका पूर्वभागे तु अश्लेषाग्नेयगोचरे

kṛttikā pūrvabhāge tu aśleṣāgneyagocare

भरणी दक्षिणे देया विशाखां नैरृते न्यसेत्

bharaṇī dakṣiṇe deyā viśākhāṃ nairṛte nyaset

अनुराधां पश्चिमे च श्रवणं वायुगोचरे

anurādhāṃ paścime ca śravaṇaṃ vāyugocare

धन्बिष्ठाञ्चोत्तरे न्यस्य ऐशान्यां रेवतीं तथा

dhanbiṣṭhāñcottare nyasya aiśānyāṃ revatīṃ tathā

वाह्यनाड्यां स्थितान्येव अष्टौ ह्य् ऋक्षाणि यत्नतः

vāhyanāḍyāṃ sthitānyeva aṣṭau hy ṛkṣāṇi yatnataḥ

रोहिणीपुष्यफल्गुण्यः स्वाती ज्येष्ठा क्रमेण तु

rohiṇīpuṣyaphalguṇyaḥ svātī jyeṣṭhā krameṇa tu

अभिजिच्छततारा तु अश्विनी मध्यनाडिका

abhijicchatatārā tu aśvinī madhyanāḍikā

कोटमध्ये तु या नाडी कथयामि प्रयत्नतः

koṭamadhye tu yā nāḍī kathayāmi prayatnataḥ

मृगश्चाभ्यन्तरे पूर्वं तस्याग्नेये पुनर्वसुः

mṛgaścābhyantare pūrvaṃ tasyāgneye punarvasuḥ

उत्तराफल्गुनी याम्ये चित्रा नैरृतसंस्थिता

uttarāphalgunī yāmye citrā nairṛtasaṃsthitā

मूलन्तु पश्चिमे न्यस्योत्तराषाढान्तु वायवे

mūlantu paścime nyasyottarāṣāḍhāntu vāyave

पूर्वभाद्रपदा सौम्ये रेवती ईशगोचरे

pūrvabhādrapadā saumye revatī īśagocare

कोटस्याभ्यन्तरे नाडी ह्य् ऋक्षाष्टकसमन्विता

koṭasyābhyantare nāḍī hy ṛkṣāṣṭakasamanvitā

आर्द्रा हस्ता तथाषाढा चतुष्कञ्चोत्तरात्रिकम्

ārdrā hastā tathāṣāḍhā catuṣkañcottarātrikam

मध्ये स्तम्भचतुष्कन्तु दद्यात् कोटस्य कोटरे

madhye stambhacatuṣkantu dadyāt koṭasya koṭare

एवं दुर्गस्य विन्यासं वाह्ये स्थानं दिशाधिपात्

evaṃ durgasya vinyāsaṃ vāhye sthānaṃ diśādhipāt

आगन्तुको यदा योद्धा ऋक्षवान् स्यात्फलान्वितः

āgantuko yadā yoddhā ṛkṣavān syātphalānvitaḥ

कोटमध्ये ग्रहाः सौम्या यदा ऋक्षान्विताः पुनः

koṭamadhye grahāḥ saumyā yadā ṛkṣānvitāḥ punaḥ

जयं मध्यस्थितानान्तु भङ्गमागामिनो विदुः

jayaṃ madhyasthitānāntu bhaṅgamāgāmino viduḥ

प्रवेशभे प्रवेष्टव्यं निर्गमभे च निर्गमेत्

praveśabhe praveṣṭavyaṃ nirgamabhe ca nirgamet

भृगुः सौम्यस् तथा भौम ऋक्षान्तं सकलं यदा

bhṛguḥ saumyas tathā bhauma ṛkṣāntaṃ sakalaṃ yadā

तदा भङ्गं विजानीयाज्जयमागन्तुकस्य च

tadā bhaṅgaṃ vijānīyājjayamāgantukasya ca

प्रवेशर्क्षचतुष्के तु सङ्ग्रामञ्चारभेद् यदा

praveśarkṣacatuṣke tu saṅgrāmañcārabhed yadā