Chapter 151

मन्वादयो भुक्तिमुक्तिधर्मांश्चीर्त्वाप्नुवन्ति यान्

manvādayo bhuktimuktidharmāṃścīrtvāpnuvanti yān

प्रोचे परशुरामाय वरुणोक्तन्तु पुष्करः

proce paraśurāmāya varuṇoktantu puṣkaraḥ

वर्णाश्रमेतराणान्ते धर्मान्वक्ष्यामि सर्वदान्

varṇāśrametarāṇānte dharmānvakṣyāmi sarvadān

मन्वादिभिर् निगदितान् वासुदेवादितुष्टिदान्

manvādibhir nigaditān vāsudevādituṣṭidān

अहिंसा सत्यवचनन्दया भूतेष्वनुग्रहः

ahiṃsā satyavacanandayā bhūteṣvanugrahaḥ

तीर्थानुसरणं दानं ब्रह्मचर्यम्मत्सरः

tīrthānusaraṇaṃ dānaṃ brahmacaryammatsaraḥ

देवद्विजातिशुश्रूषा गुरूणाञ्च भृगूत्तम

devadvijātiśuśrūṣā gurūṇāñca bhṛgūttama

श्रवणं सर्वधर्माणां पितॄणां पूजनं तथा

śravaṇaṃ sarvadharmāṇāṃ pitṝṇāṃ pūjanaṃ tathā

भक्तिश् च नृपतौ नित्यं तथा सच्छास्त्रनेत्रता

bhaktiś ca nṛpatau nityaṃ tathā sacchāstranetratā

आनृशंष्यन्तितिक्षा च तथा चास्तिक्यमेव च

ānṛśaṃṣyantitikṣā ca tathā cāstikyameva ca

वर्णाश्रमाणां सामान्यं धर्माधर्मं समीरितं

varṇāśramāṇāṃ sāmānyaṃ dharmādharmaṃ samīritaṃ

यजनं याजनं दानं वेदाद्यध्यापनक्रिया

yajanaṃ yājanaṃ dānaṃ vedādyadhyāpanakriyā

प्रतिग्रहञ्चाध्ययनं विप्रकर्माणि निर्दिशेत्

pratigrahañcādhyayanaṃ viprakarmāṇi nirdiśet

दानमध्ययनञ्चैव यजनञ्च यथाविधिः

dānamadhyayanañcaiva yajanañca yathāvidhiḥ

क्षत्रियस्य सवैश्यस्य कर्मेदं परिकीर्तितं

kṣatriyasya savaiśyasya karmedaṃ parikīrtitaṃ

क्षत्रियस्य विशेषेण पालनं दुष्टनिग्रहः

kṣatriyasya viśeṣeṇa pālanaṃ duṣṭanigrahaḥ

कृषिगोरक्ष्यवाणिज्यं वैश्यस्य परिकीर्तितं

kṛṣigorakṣyavāṇijyaṃ vaiśyasya parikīrtitaṃ

शूद्रस्य द्विजशुश्रूषा सर्वशिल्पानि वाप्यथ

śūdrasya dvijaśuśrūṣā sarvaśilpāni vāpyatha

मौञ्जीबन्धनतो जन्म विप्रादेश् च द्वितीयकं

mauñjībandhanato janma viprādeś ca dvitīyakaṃ

आनुलोम्येन वर्णानां जातिर्मातृसमा स्मृता

ānulomyena varṇānāṃ jātirmātṛsamā smṛtā

चण्डालो ब्राह्मणीपुत्रः शूद्राच्च प्रतिलोमतः

caṇḍālo brāhmaṇīputraḥ śūdrācca pratilomataḥ

सूतस्तु क्षत्रियाज्जातो वैश्याद्वै देवलस् तथा

sūtastu kṣatriyājjāto vaiśyādvai devalas tathā

पुक्कसः क्षत्रियापुत्रः शूद्रात् स्यात् प्रतिलोमजः

pukkasaḥ kṣatriyāputraḥ śūdrāt syāt pratilomajaḥ

मागधः स्यात्तथा वैश्याच्छूद्रादयोगवो भवेत्

māgadhaḥ syāttathā vaiśyācchūdrādayogavo bhavet

वैश्यायां प्रतिलोमेभ्यः प्रतिलोमाः सहस्रशः

vaiśyāyāṃ pratilomebhyaḥ pratilomāḥ sahasraśaḥ

विवाहः सदृशैस्तेषां नोत्तमैर् नाधमैस् तथा

vivāhaḥ sadṛśaisteṣāṃ nottamair nādhamais tathā

चण्डालकर्म निर्दिष्टं बध्यानां घातनं तथा

caṇḍālakarma nirdiṣṭaṃ badhyānāṃ ghātanaṃ tathā

स्त्रीजीवन्तु तद्रक्षाप्रोक्तं वैदेहकस्य च

strījīvantu tadrakṣāproktaṃ vaidehakasya ca

सूतानामश्वसारथ्यं पुक्कसानाञ्च व्याधता

sūtānāmaśvasārathyaṃ pukkasānāñca vyādhatā

स्तुतिक्रिया माघ्धानां तथा चायोगशस्य च

stutikriyā māghdhānāṃ tathā cāyogaśasya ca

रङ्गावतरणं प्रोक्तं तथा शिल्पैश् च जीवनं

raṅgāvataraṇaṃ proktaṃ tathā śilpaiś ca jīvanaṃ

वहिर्ग्रामनिवासश् च मृतचेलस्य धारणं

vahirgrāmanivāsaś ca mṛtacelasya dhāraṇaṃ

न संस्पर्शस्तथैवान्यैश् चण्डालस्य विधीयते

na saṃsparśastathaivānyaiś caṇḍālasya vidhīyate

ब्राह्मणार्थे गवार्थे वा देहत्यागो ऽत्र यः कृतः

brāhmaṇārthe gavārthe vā dehatyāgo 'tra yaḥ kṛtaḥ

स्त्रीबालाद्युपपतो वा वाह्याणां सिद्धिकारणं

strībālādyupapato vā vāhyāṇāṃ siddhikāraṇaṃ

सङ्करे जातयो ज्ञेयाः पितुर्मातुश् च कर्मतः

saṅkare jātayo jñeyāḥ piturmātuś ca karmataḥ