Chapter 174

देवाश्रमार्चनादीनां प्रायश्चित्तन्तु लोपतः

devāśramārcanādīnāṃ prāyaścittantu lopataḥ

पूजालोपे चाष्टशतं जपेद्द्विगुणपूजनं

pūjālope cāṣṭaśataṃ japeddviguṇapūjanaṃ

पञ्चोपनिषदैर् मन्त्रैर् हुत्वा ब्राह्मणभोजनं

pañcopaniṣadair mantrair hutvā brāhmaṇabhojanaṃ

सूतिकान्त्यजकोदक्यास्पृष्टे देवे शतं जपेत्

sūtikāntyajakodakyāspṛṣṭe deve śataṃ japet

पञ्चोपनिषदैः पूजां द्विगुणं स्नानमेव च

pañcopaniṣadaiḥ pūjāṃ dviguṇaṃ snānameva ca

विप्रभोज्यं होमलोपे होमस्नानं तथार्चनं

viprabhojyaṃ homalope homasnānaṃ tathārcanaṃ

होमद्रव्ये मूषिकाद्यैर् भक्षिते कीटसंयुते

homadravye mūṣikādyair bhakṣite kīṭasaṃyute

तावन्मात्रं परित्यज्य प्रोक्ष्य देवादि पूजयेत्

tāvanmātraṃ parityajya prokṣya devādi pūjayet

अङ्कुरार्पणमात्रन्तु छिन्नं भिन्नं परित्यजेत्

aṅkurārpaṇamātrantu chinnaṃ bhinnaṃ parityajet

अस्पृश्यैश् चैव संस्पृष्टे अन्यपात्रे तदर्पणं

aspṛśyaiś caiva saṃspṛṣṭe anyapātre tadarpaṇaṃ

देवमानुषविघ्नघ्नं पूजाकाले तथैव च

devamānuṣavighnaghnaṃ pūjākāle tathaiva ca

मन्त्रद्रव्यादिव्यत्यासे मूलं जप्त्वा पुनर्जपेत्

mantradravyādivyatyāse mūlaṃ japtvā punarjapet

कुम्भेनाष्टशतजपो देवे तु पतिते करात्

kumbhenāṣṭaśatajapo deve tu patite karāt

भिन्ने नष्टे चोपवासः शतहोमाच्छुभं भवेत्

bhinne naṣṭe copavāsaḥ śatahomācchubhaṃ bhavet

कृते पापे ऽनुतापो वै यस्य पुंसः प्रजायते

kṛte pāpe 'nutāpo vai yasya puṃsaḥ prajāyate

प्रायश्चित्तन्तु तस्यैकं हरिसंस्मरणं परं

prāyaścittantu tasyaikaṃ harisaṃsmaraṇaṃ paraṃ

चान्द्रायणं पराको वा प्राजापत्यमघौघनुत्

cāndrāyaṇaṃ parāko vā prājāpatyamaghaughanut

सूर्येशशक्तिश्रीशदिमन्त्रजप्यमघौघनुत्

sūryeśaśaktiśrīśadimantrajapyamaghaughanut

गायत्रीप्रणवस्तोत्रमन्त्रजप्यमघान्तकं

gāyatrīpraṇavastotramantrajapyamaghāntakaṃ

काद्यैर् आवीजसंयुक्तैर् आद्यैर् आद्यैस्तदन्तकैः

kādyair āvījasaṃyuktair ādyair ādyaistadantakaiḥ

सूर्येशशक्तिश्रीशादिमन्त्राः कोट्यधिकाः पृथक्

sūryeśaśaktiśrīśādimantrāḥ koṭyadhikāḥ pṛthak

ओंह्रीमाद्याश् चतुर्थ्यन्ता नमोन्ताः सर्वकामदाः

oṃhrīmādyāś caturthyantā namontāḥ sarvakāmadāḥ

नृसिंहद्वादशाष्टार्णमालामन्त्राद्यघौघनुत्

nṛsiṃhadvādaśāṣṭārṇamālāmantrādyaghaughanut

आग्नेयस्य पुराणस्य पठनं श्रवणादिकं

āgneyasya purāṇasya paṭhanaṃ śravaṇādikaṃ

द्विविद्यारूपको विष्णुरग्निरूपस्तु गीयते

dvividyārūpako viṣṇuragnirūpastu gīyate

परमात्मा देवमुखं सर्ववेदेषु गीयते

paramātmā devamukhaṃ sarvavedeṣu gīyate

प्रवृत्तौ तु निवृत्तौ तु इज्यते भुक्तिमुक्तिदः

pravṛttau tu nivṛttau tu ijyate bhuktimuktidaḥ

अग्निरूपस्य विष्णोर्हि हवनं ध्यानमर्चनं

agnirūpasya viṣṇorhi havanaṃ dhyānamarcanaṃ

जप्यं स्तुतिश् च प्रणतिः शारीराशेषाघौघनुत्

japyaṃ stutiś ca praṇatiḥ śārīrāśeṣāghaughanut

दशस्वर्णानि दानानि धान्यद्वादशमेव च

daśasvarṇāni dānāni dhānyadvādaśameva ca

तुलापुरुषमुख्यानि महादानानि षोडश

tulāpuruṣamukhyāni mahādānāni ṣoḍaśa

अन्नदानानि मुख्यानि सर्वाण्यघहराणि हि

annadānāni mukhyāni sarvāṇyaghaharāṇi hi

तिथिवारर्क्षसङ्क्रान्तियोगमन्वादिकालके

tithivārarkṣasaṅkrāntiyogamanvādikālake

ब्रतादि सूर्येशशक्तिश्रीशादेरघघातनं

bratādi sūryeśaśaktiśrīśāderaghaghātanaṃ

गङ्गा गया प्रयागश् च काश्ययोध्या ह्य् अवम्तिका

gaṅgā gayā prayāgaś ca kāśyayodhyā hy avamtikā

कुरुक्षेत्रं पुष्करञ्च नैमिषं पुरुषोत्तमः

kurukṣetraṃ puṣkarañca naimiṣaṃ puruṣottamaḥ

शालग्रामप्रभासाद्यं तीर्थञ्चघोघघातकं

śālagrāmaprabhāsādyaṃ tīrthañcaghoghaghātakaṃ

अहं ब्रह्म परं ज्योतिरिति ध्यानमघौघनुत्

ahaṃ brahma paraṃ jyotiriti dhyānamaghaughanut

पुराणं ब्रह्म चाग्नेयं ब्रह्मा विष्णुर्महेश्वरः

purāṇaṃ brahma cāgneyaṃ brahmā viṣṇurmaheśvaraḥ

अवताराः सर्वपूजाः प्रतिष्ठाप्रतिमादिकं

avatārāḥ sarvapūjāḥ pratiṣṭhāpratimādikaṃ

ज्योतिःशास्त्रपुराणानि स्मृतयस्तु तपोव्रतं

jyotiḥśāstrapurāṇāni smṛtayastu tapovrataṃ

अर्थशास्त्रञ्च सर्गाद्या आयुर्वेदो धनुर्मतिः

arthaśāstrañca sargādyā āyurvedo dhanurmatiḥ

शिक्षा छन्दो व्याकरणं निरुक्तञ्चाभिधानकं

śikṣā chando vyākaraṇaṃ niruktañcābhidhānakaṃ

कल्पो न्यायश् च मीमांसा ह्य् अन्यत् सर्वं हरिः प्रभुः

kalpo nyāyaś ca mīmāṃsā hy anyat sarvaṃ hariḥ prabhuḥ

एके द्वयोर्यतो यस्मिन् यः सर्वमिति वेद यः

eke dvayoryato yasmin yaḥ sarvamiti veda yaḥ

तं दृष्ट्वान्यस्य पापानि विनश्यन्ति हरिश् च सः

taṃ dṛṣṭvānyasya pāpāni vinaśyanti hariś ca saḥ

विद्याष्टादशरूपश् च सूक्ष्मः स्थूलो ऽपरो हरिः

vidyāṣṭādaśarūpaś ca sūkṣmaḥ sthūlo 'paro hariḥ

ज्योतिः सदक्षरं ब्रह्म परं विष्णुश् च निर्मलः

jyotiḥ sadakṣaraṃ brahma paraṃ viṣṇuś ca nirmalaḥ