Chapter 203

पुष्पाद्यैः पूजनाद्विष्णोर् न याति नरकान्दवे

puṣpādyaiḥ pūjanādviṣṇor na yāti narakāndave

आयुषो ऽन्ते नरः प्राणैरनिच्छन्नपि मुच्यते

āyuṣo 'nte naraḥ prāṇairanicchannapi mucyate

जलमग्निर्विषं शस्त्रं क्षुद्व्याधिः पतनं गिरेः

jalamagnirviṣaṃ śastraṃ kṣudvyādhiḥ patanaṃ gireḥ

निमित्तं किञ्चिदासाद्य देही प्राणैर्विमुच्यते

nimittaṃ kiñcidāsādya dehī prāṇairvimucyate

अन्यच्छरीरमादत्ते यातनीयं स्वकर्मभिः

anyaccharīramādatte yātanīyaṃ svakarmabhiḥ

भुङ्क्ते ऽथ पापकृत् दुःखं सुखं धर्माय सङ्गतः

bhuṅkte 'tha pāpakṛt duḥkhaṃ sukhaṃ dharmāya saṅgataḥ

नीयते यमदूतैस्तु यमं प्राणिभयङ्करैः

nīyate yamadūtaistu yamaṃ prāṇibhayaṅkaraiḥ

कुपथे दक्षिणद्वारि धर्मिकः पश्चिमादिभिः

kupathe dakṣiṇadvāri dharmikaḥ paścimādibhiḥ

यमाज्ञप्तैः किङ्करैस्तु पात्यते नरकेषु च

yamājñaptaiḥ kiṅkaraistu pātyate narakeṣu ca

स्वर्गे तु नीयते धर्माद् वसिष्ठाद्युक्तिसंश्रयात्

svarge tu nīyate dharmād vasiṣṭhādyuktisaṃśrayāt

गोघाती तु महावीच्यां वर्षलक्षन्तु पीड्यते

goghātī tu mahāvīcyāṃ varṣalakṣantu pīḍyate

आमकुम्भे महादीप्ते ब्रह्महा भूमिहारकः

āmakumbhe mahādīpte brahmahā bhūmihārakaḥ

महाप्रलयकं यावद्रौरवे पीड्यते शनैः

mahāpralayakaṃ yāvadraurave pīḍyate śanaiḥ

स्त्रीबालवृद्धहन्ता तु यावदिन्द्राश् चतुर्दश

strībālavṛddhahantā tu yāvadindrāś caturdaśa

महारौरवके रौद्रे गृहक्षेत्रादिदीपकः

mahārauravake raudre gṛhakṣetrādidīpakaḥ

दह्यते कल्पमेकं स चौरस्तामिस्रके पतेत्

dahyate kalpamekaṃ sa caurastāmisrake patet

नैककल्पन्तु शूलाद्यैर्भिद्यते यमकिङ्करैः

naikakalpantu śūlādyairbhidyate yamakiṅkaraiḥ

महातामिस्रके सर्पजलौकाद्यैश् च पीड्यते

mahātāmisrake sarpajalaukādyaiś ca pīḍyate

यावद्भूमिर्मातृहाद्या असिपत्रवने ऽसिभिः

yāvadbhūmirmātṛhādyā asipatravane 'sibhiḥ

नैककल्पन्तु नरके करम्भवालुकासु च

naikakalpantu narake karambhavālukāsu ca

येन दग्धो जनस्तत्र दह्यते वालुकादिभिः

yena dagdho janastatra dahyate vālukādibhiḥ

काकोले कृमिविष्ठाशी एकाकी मिष्टभोजनः

kākole kṛmiviṣṭhāśī ekākī miṣṭabhojanaḥ

कुट्टले मूत्ररक्ताशी पञ्चयज्ञक्रियोज्झितः

kuṭṭale mūtraraktāśī pañcayajñakriyojjhitaḥ

सुदुर्गन्धे रक्तभोजी भवेच्चाभक्ष्यभक्ष्यकः

sudurgandhe raktabhojī bhaveccābhakṣyabhakṣyakaḥ

तैलपाके तु तिलवत् पीड्यते परपीडकः

tailapāke tu tilavat pīḍyate parapīḍakaḥ

तैलपाके तु पच्येत शरणागतघातकः

tailapāke tu pacyeta śaraṇāgataghātakaḥ

निरुच्छासे दाननाशी रसविक्रयको ऽध्वरे

nirucchāse dānanāśī rasavikrayako 'dhvare

नाम्ना वज्रकवाटेन महापाते तदानृती

nāmnā vajrakavāṭena mahāpāte tadānṛtī

महाज्वाले पापबुद्धिः क्रकचे ऽगम्यगामिनः

mahājvāle pāpabuddhiḥ krakace 'gamyagāminaḥ

सङ्करी गुडपाके च प्रतुदेत् परमर्मनुत्

saṅkarī guḍapāke ca pratudet paramarmanut

क्षारह्रदे प्राणिहन्ता क्षुरधारे च भूमिहृत्

kṣārahrade prāṇihantā kṣuradhāre ca bhūmihṛt

अम्बरीषे गोस्वर्णहृद् द्रुमच्छिद्वज्रशस्त्रके

ambarīṣe gosvarṇahṛd drumacchidvajraśastrake

मधुहर्ता परीतापे कालसूत्रे परार्थहृत्

madhuhartā parītāpe kālasūtre parārthahṛt

कश्मले ऽत्यन्तमांसाशी उग्रगन्धे ह्य् अपिण्डदः

kaśmale 'tyantamāṃsāśī ugragandhe hy apiṇḍadaḥ

दुर्धरे तु काचभक्षी वन्दिग्राहरताश् च ये

durdhare tu kācabhakṣī vandigrāharatāś ca ye

मञ्जुषे नरके लोहे ऽप्रतिष्ठे श्रुतिनिन्दकः

mañjuṣe narake lohe 'pratiṣṭhe śrutinindakaḥ

पूतिवक्त्रे कूटसाक्षी परिलुण्ठे धनापहा

pūtivaktre kūṭasākṣī pariluṇṭhe dhanāpahā

बालस्त्रीवृद्धघाती च कराले ब्राह्मणार्तिकृत्

bālastrīvṛddhaghātī ca karāle brāhmaṇārtikṛt

विलेपे मद्यपो विप्रो महाताम्रे तु मेदिनः ॥20

vilepe madyapo vipro mahātāmre tu medinaḥ //20

तथाक्रम्य पारदारान् ज्वलन्तीमायसीं शिलां

tathākramya pāradārān jvalantīmāyasīṃ śilāṃ

शाल्मलाख्ये तमालिङ्गेन् नारी बहुनरङ्गमा

śālmalākhye tamāliṅgen nārī bahunaraṅgamā

आस्फोटजिह्वोद्धरणं स्त्रीक्षणान् नेत्रभेदनं

āsphoṭajihvoddharaṇaṃ strīkṣaṇān netrabhedanaṃ

अङ्गारराशौ क्षिप्यन्ते मातृपुत्र्यादिगामिनः

aṅgārarāśau kṣipyante mātṛputryādigāminaḥ

चौराः क्षुरैश् च भिद्यन्ते स्वमांसाशी च मांसभुक्

caurāḥ kṣuraiś ca bhidyante svamāṃsāśī ca māṃsabhuk

मासोपवासकर्ता वै न याति नरकन्नरः

māsopavāsakartā vai na yāti narakannaraḥ

एकादशीव्रतकरो भीष्मपञ्चकसद् व्रती

ekādaśīvratakaro bhīṣmapañcakasad vratī