अथ पञ्चाधिकद्विशततमो ऽध्यायः
atha pañcādhikadviśatatamo 'dhyāyaḥ
भीष्मपञ्चकव्रतं
bhīṣmapañcakavrataṃ
अग्निर् उवाच
agnir uvāca
भीष्मपञ्चकमाख्यास्ये व्रतराजन्तु सर्वदं
bhīṣmapañcakamākhyāsye vratarājantu sarvadaṃ
कार्त्तिकस्यामले पक्षे एकादश्यां समचरेत्
kārttikasyāmale pakṣe ekādaśyāṃ samacaret
दिनानि पञ्चत्रिःस्नाती पञ्चव्रीहितिलैस् तथा
dināni pañcatriḥsnātī pañcavrīhitilais tathā
तर्पयेद्देवपित्रादीन् मौनी सम्पूजयेद्धरिं
tarpayeddevapitrādīn maunī sampūjayeddhariṃ
पञ्चगव्येन संस्नाप्य देवं पञ्चामृतेन च
pañcagavyena saṃsnāpya devaṃ pañcāmṛtena ca
चन्दनाद्यैः समालिप्य गुग्गुलुं सघृतन्दहेत्
candanādyaiḥ samālipya gugguluṃ saghṛtandahet
दीपं दद्याद्दिवारात्रौ नैवेद्यं परमान्नकं
dīpaṃ dadyāddivārātrau naivedyaṃ paramānnakaṃ
ओं नमो वासुदेवाय जपेदष्टोत्तरं शतं
oṃ namo vāsudevāya japedaṣṭottaraṃ śataṃ
जुहुयाच्च घृताभ्यक्तांस्तिलव्रीहींस्ततो व्रती
juhuyācca ghṛtābhyaktāṃstilavrīhīṃstato vratī
षडक्षरेण मन्त्रेण स्वाहाकारान्वितेन च
ṣaḍakṣareṇa mantreṇa svāhākārānvitena ca
कमलैः पूजयेत् पादौ द्वितीये बिल्वपत्रकैः
kamalaiḥ pūjayet pādau dvitīye bilvapatrakaiḥ
जानु सक्थि तृतीये ऽथ नाभिं भृङ्गरजेन तु
jānu sakthi tṛtīye 'tha nābhiṃ bhṛṅgarajena tu
वाणबिल्वजवाभिस्तु चतुर्थे पञ्चमे ऽहनि
vāṇabilvajavābhistu caturthe pañcame 'hani
मालत्या भूमिशायी स्यादेकादश्यान्तु गोमयं
mālatyā bhūmiśāyī syādekādaśyāntu gomayaṃ
गोमूत्रं दधि दुग्धं च पञ्चमे पञ्चगव्यकं
gomūtraṃ dadhi dugdhaṃ ca pañcame pañcagavyakaṃ
पौर्णमास्याञ्चरेन्नक्तं भुक्तिं मुक्तिं लभेद्व्रती
paurṇamāsyāñcarennaktaṃ bhuktiṃ muktiṃ labhedvratī
भीष्मः कृत्वा हरिं प्राप्तस्तेनैव भीष्मपञ्चकं
bhīṣmaḥ kṛtvā hariṃ prāptastenaiva bhīṣmapañcakaṃ
ब्राह्मणः पूजनाद्यैश् च उपवासादिकं व्रतं
brāhmaṇaḥ pūjanādyaiś ca upavāsādikaṃ vrataṃ
इत्य् आग्नेये महापुराणे भीष्मपञ्चकं नाम पञ्चाधिकद्विशततमो ऽध्यायः ॥
ity āgneye mahāpurāṇe bhīṣmapañcakaṃ nāma pañcādhikadviśatatamo 'dhyāyaḥ ||